ເອັດສະເທີ
4 ເມື່ອມໍເດກາຍ+ຮູ້ເລື່ອງທີ່ເກີດຂຶ້ນ+ ລາວກໍຈີກເສື້ອຂອງໂຕເອງ ນຸ່ງຜ້າເນື້ອຫຍາບ ແລະເອົາຂີ້ເທົ່າໂຮຍໃສ່ຫົວ ແລ້ວລາວກໍອອກໄປກາງເມືອງແລະຮ້ອງໄຫ້ສຽງດັງຍ້ອນເສຍໃຈຫຼາຍ. 2 ລາວໄປຮອດແຕ່ປະຕູວັງຂອງກະສັດເທົ່ານັ້ນ ຍ້ອນວ່າຜູ້ທີ່ໃສ່ຜ້າເນື້ອຫຍາບຈະເຂົ້າໄປໃນວັງບໍ່ໄດ້. 3 ເມື່ອຄຳສັ່ງແລະກົດໝາຍຂອງກະສັດໄປຮອດແຂວງຕ່າງໆ+ ຄົນຢິວໃນແຕ່ລະແຂວງກໍພາກັນໄວ້ທຸກ. ເຂົາເຈົ້າອົດເຂົ້າ+ແລະຮ້ອງໄຫ້ຈົນໃຈຊິຂາດ. ຫຼາຍຄົນນອນຢູ່ເທິງຜ້າເນື້ອຫຍາບແລະຂີ້ເທົ່າ.+ 4 ເມື່ອພວກສາວໃຊ້ແລະພວກຂັນທີ*ຂອງລາຊີນີເອັດສະເທີມາບອກເລື່ອງຂອງມໍເດກາຍໃຫ້ເອັດສະເທີຮູ້ ເອັດສະເທີກໍທຸກໃຈຫຼາຍ. ຈາກນັ້ນ ລາວກໍສົ່ງເຄື່ອງນຸ່ງໄປໃຫ້ມໍເດກາຍໃສ່ແທນຜ້າເນື້ອຫຍາບ ແຕ່ມໍເດກາຍບໍ່ເອົາ. 5 ເອັດສະເທີຈຶ່ງເອີ້ນຮາທາກໃຫ້ມາຫາ. ຮາທາກເປັນຂັນທີຜູ້ໜຶ່ງຂອງກະສັດທີ່ກະສັດສັ່ງໃຫ້ມາຮັບໃຊ້ເອັດສະເທີ. ເອັດສະເທີໃຫ້ຮາທາກໄປຖາມມໍເດກາຍວ່າເກີດຫຍັງຂຶ້ນ.
6 ຮາທາກຈຶ່ງອອກໄປຫາມໍເດກາຍຢູ່ເດີ່ນຂອງເມືອງທີ່ຢູ່ຕໍ່ໜ້າປະຕູວັງຂອງກະສັດ. 7 ມໍເດກາຍບອກຮາທາກທຸກຢ່າງກ່ຽວກັບເລື່ອງທີ່ເກີດຂຶ້ນ ແລະຍັງບອກອີກວ່າຮາມານຈະເອົາເງິນເທົ່າໃດ+ໃຫ້ຄັງຊັບສິນຂອງກະສັດເພື່ອຈະກຳຈັດຄົນຢິວ.+ 8 ມໍເດກາຍຍັງໄດ້ເອົາສຳເນົາກົດໝາຍເລື່ອງການກວາດລ້າງຄົນຢິວທີ່ອອກຢູ່ເມືອງຊູຊາ+ໃຫ້ຮາທາກນຳ. ຮາທາກຕ້ອງເອົາສຳເນົານັ້ນໄປໃຫ້ເອັດສະເທີແລະອະທິບາຍໃຫ້ລາວຟັງ.+ ມໍເດກາຍບອກໃຫ້ເອັດສະເທີເຂົ້າໄປຫາກະສັດແລະອ້ອນວອນກັບກະສັດໂດຍກົງເພື່ອຊ່ວຍຄົນຊາດດຽວກັນກັບລາວ.
9 ຮາທາກກັບມາບອກເອັດສະເທີຕາມທີ່ມໍເດກາຍບອກ. 10 ເອັດສະເທີຈຶ່ງໃຫ້ຮາທາກໄປບອກມໍເດກາຍວ່າ:+ 11 “ຂ້າລາຊະການທຸກຄົນຂອງກະສັດແລະປະຊາຊົນທຸກແຂວງກໍຮູ້ດີວ່າ ຖ້າໃຜເຂົ້າໄປເດີ່ນທາງໃນຂອງວັງ+ໂດຍທີ່ກະສັດບໍ່ໄດ້ເອີ້ນ ລາວຈະມີໂທດເຖິງຕາຍ. ວິທີດຽວທີ່ຈະລອດຕາຍແມ່ນ ກະສັດຕ້ອງຍື່ນຄ້ອນຄຳຂອງກະສັດໃຫ້ຜູ້ນັ້ນ.+ ແຕ່ກະສັດບໍ່ໄດ້ເອີ້ນລູກໃຫ້ໄປຫາ 30 ມື້ແລ້ວ.”
12 ເມື່ອມໍເດກາຍໄດ້ຍິນເອັດສະເທີເວົ້າຈັ່ງຊີ້ 13 ລາວກໍບອກເອັດສະເທີວ່າ: “ລູກຢ່າຄິດເດີ້ວ່າລູກຢູ່ໃນວັງຂອງກະສັດແລ້ວລູກຈະມີໂອກາດລອດຫຼາຍກວ່າຄົນຢິວຄົນອື່ນໆ. 14 ເຖິງວ່າລູກຈະບໍ່ເຮັດຫຍັງ ຄົນຢິວກໍຈະໄດ້ຮັບຄວາມຊ່ວຍເຫຼືອແລະຄວາມລອດດ້ວຍວິທີອື່ນ+ ແຕ່ລູກກັບພີ່ນ້ອງຂອງລູກຈະຕ້ອງຕາຍ. ລູກລອງຄິດເບິ່ງເດີ້ ການທີ່ລູກໄດ້ເປັນລາຊີນີກໍອາດຈະເພື່ອຊ່ວຍຄົນຊາດດຽວກັນກັບລູກໃນຍາມທີ່ຍາກລຳບາກແບບນີ້ກໍໄດ້.”+
15 ເອັດສະເທີຕອບມໍເດກາຍວ່າ: 16 “ຂໍໃຫ້ລວບລວມຄົນຢິວທັງໝົດໃນເມືອງຊູຊາແລະໃຫ້ເຂົາເຈົ້າອົດເຂົ້າ+ເພື່ອລູກ. ບໍ່ໃຫ້ເຂົາເຈົ້າກິນຫຼືດື່ມຫຍັງ 3 ມື້ 3 ຄືນ.+ ລູກກັບພວກສາວໃຊ້ຂອງລູກກໍຈະເຮັດຄືກັນ. ຫຼັງຈາກນັ້ນ ລູກຈະເຂົ້າໄປຫາກະສັດ. ເຖິງວ່າຈະຂັດກັບກົດໝາຍແລະເຖິງວ່າລູກຈະຕ້ອງຕາຍ ລູກກໍຍອມ.” 17 ມໍເດກາຍຈຶ່ງໄປເຮັດທຸກຢ່າງຕາມທີ່ເອັດສະເທີບອກ.