ເອັດສະເທີ
6 ຄືນມື້ນັ້ນກະສັດນອນບໍ່ຫຼັບ ລາວຈຶ່ງບອກໃຫ້ຄົນໄປເອົາປຶ້ມບັນທຶກເຫດການຕ່າງໆ+ມາອ່ານໃຫ້ຟັງ. 2 ຕອນທີ່ອ່ານມີບ່ອນໜຶ່ງຂຽນວ່າ ມໍເດກາຍເຄີຍມາບອກວ່າບິກທານກັບເຕເຣັດຂ້າລາຊະການ 2 ຄົນທີ່ຍາມປະຕູຫ້ອງຂອງກະສັດໄດ້ວາງແຜນຂ້າກະສັດອາຫະສຸເອຣັດ.+ 3 ກະສັດຖາມວ່າ: “ມໍເດກາຍໄດ້ຮັບກຽດແລະລາງວັນຫຍັງ?” ຄົນຮັບໃຊ້ທີ່ໃກ້ຊິດຂອງກະສັດຕອບວ່າ: “ລາວຍັງບໍ່ໄດ້ຫຍັງເທື່ອ.”
4 ແລ້ວກະສັດກໍຖາມວ່າ: “ມີໃຜຢູ່ເດີ່ນບໍ່?” ຕອນນັ້ນຮາມານຢູ່ເດີ່ນທາງນອກ+ຂອງວັງກະສັດ ຍ້ອນລາວຈະມາບອກກະສັດໃຫ້ເອົາມໍເດກາຍໄປແຂວນໄວ້ເທິງເສົາທີ່ລາວກຽມໄວ້.+ 5 ຄົນຮັບໃຊ້ຂອງກະສັດບອກວ່າ: “ທ່ານຮາມານ+ຢືນຢູ່ເດີ່ນທາງນອກ.” ກະສັດຈຶ່ງບອກວ່າ: “ເອີ້ນລາວມາຫາຂ້ອຍ.”
6 ເມື່ອຮາມານເຂົ້າມາ ກະສັດກໍຖາມລາວວ່າ: “ຖ້າຂ້ອຍຢາກໃຫ້ກຽດຜູ້ໃດຜູ້ໜຶ່ງ ຂ້ອຍຄວນເຮັດແນວໃດ?” ຮາມານຄິດໃນໃຈວ່າ: “ກະສັດຈະໃຫ້ກຽດໃຜຄັນບໍ່ແມ່ນຂ້ອຍ?”+ 7 ຮາມານຈຶ່ງຕອບວ່າ: “ສຳລັບຜູ້ທີ່ກະສັດຢາກໃຫ້ກຽດ 8 ໃຫ້ເອົາເຄື່ອງນຸ່ງຊຸດໜຶ່ງ+ຂອງກະສັດກັບມ້າໂຕໜຶ່ງຂອງກະສັດມາ ແລະເອົາເຄື່ອງເອ້ພິເສດໃສ່ຫົວມ້າໂຕນັ້ນນຳ. 9 ແລ້ວໃຫ້ເຈົ້ານາຍຜູ້ໜຶ່ງທີ່ໄດ້ຮັບຄວາມນັບຖືຫຼາຍທີ່ສຸດເປັນຜູ້ເບິ່ງແຍງເຄື່ອງນຸ່ງກັບມ້າ. ຫຼັງຈາກນັ້ນ ໃຫ້ຜູ້ທີ່ກະສັດຢາກໃຫ້ກຽດໃສ່ເຄື່ອງນຸ່ງຊຸດນັ້ນແລະຂີ່ມ້າໂຕນັ້ນຢູ່ເດີ່ນຂອງເມືອງ ແລະໃຫ້ຄົນຮ້ອງອອກໜ້າລາວວ່າ ‘ກະສັດຈະເຮັດແບບນີ້ກັບຜູ້ທີ່ກະສັດຢາກໃຫ້ກຽດ.’”+ 10 ກະສັດບອກຮາມານທັນທີວ່າ: “ໃຫ້ຟ້າວໄປເອົາເຄື່ອງນຸ່ງກັບມ້າມາ ແລະເຮັດແບບນັ້ນກັບມໍເດກາຍຄົນຢິວທີ່ນັ່ງຢູ່ປະຕູວັງຂອງກະສັດ. ໃຫ້ເຮັດທຸກຢ່າງຕາມທີ່ເຈົ້າເວົ້າ.”
11 ຮາມານກໍເອົາເຄື່ອງນຸ່ງມາໃສ່ໃຫ້ມໍເດກາຍ+ແລະເອົາມ້າໃຫ້ລາວຂີ່ຢູ່ເດີ່ນຂອງເມືອງ ແລ້ວຮ້ອງອອກໜ້າລາວວ່າ: “ກະສັດຈະເຮັດແບບນີ້ກັບຜູ້ທີ່ກະສັດຢາກໃຫ້ກຽດ!” 12 ຈາກນັ້ນ ມໍເດກາຍກໍກັບໄປປະຕູວັງຂອງກະສັດ ສ່ວນຮາມານກໍຟ້າວເມືອເຮືອນ. ລາວເອົາຜ້າປົກຫົວໄວ້ຍ້ອນວ່າຜິດຫວັງແລະອັບອາຍຫຼາຍ. 13 ເມື່ອຮາມານເລົ່າເລື່ອງທຸກຢ່າງທີ່ເກີດຂຶ້ນໃຫ້ເຊເຣັດເມຍຂອງລາວ+ແລະໝູ່ທຸກຄົນຟັງ ພວກທີ່ປຶກສາກັບເຊເຣັດເມຍຂອງລາວກໍເວົ້າກັບລາວວ່າ: “ຖ້າມໍເດກາຍທີ່ເປັນຄົນຢິວໄດ້ຕຳແໜ່ງສູງກວ່າເຈົ້າ ເຈົ້າຈະບໍ່ມີທາງຊະນະລາວໄດ້ດອກ. ເຈົ້າຈະໄດ້ເຫັນຈຸດຈົບຂອງໂຕເອງບາດນີ້ແຫຼະ.”
14 ຕອນທີ່ເຂົາເຈົ້າກຳລັງລົມກັນ ຄົນຂອງກະສັດກໍມາຮອດແລະຟ້າວພາຮາມານໄປງານລ້ຽງທີ່ເອັດສະເທີຈັດ.+