ໂຢບ

 2 “ຂ້ອຍ​ຮູ້ສຶກ​ບໍ່​ສະບາຍ​ໃຈ​ແລະ​ຫງຸດຫງິດ

ຂ້ອຍ​ກໍ​ເລີຍ​ຕ້ອງ​ເວົ້າ.

 3 ຂ້ອຍ​ໄດ້​ຍິນ​ແລ້ວ​ທີ່​ເຈົ້າດູຖູກຂ້ອຍ.

ແຕ່​ຂ້ອຍ​ເປັນ​ຄົນ​ສະຫຼາດ ຂ້ອຍ​ກໍ​ເລີຍ​ຕ້ອງ​ຕອບ​ເຈົ້າ.

 4 ສິ່ງ​ທີ່​ຂ້ອຍ​ຈະ​ເວົ້າ ເຈົ້າ​ກໍ​ຮູ້​ຢູ່​ແລ້ວ

ເພາະ​ມັນ​ເປັນ​ແບບ​ນີ້​ມາ​ຕັ້ງ​ແຕ່​ມີ​ມະນຸດ*​ຢູ່​ເທິງ​ໂລກ.+

 5 ຄົນ​ຊົ່ວ​ຮ້ອງ​ດີ​ໃຈ​ໄດ້​ແຕ່​ບຶດ​ດຽວ

ແລະ​ຄົນ​ທີ່​ບໍ່​ນັບ​ຖື*​ພະເຈົ້າ​ກໍ​ມີ​ຄວາມ​ສຸກ​ໄດ້​ບໍ່​ດົນ.+

 6 ເຖິງ​ວ່າ​ຄວາມ​ຍິ່ງ​ໃຫຍ່​ຂອງ​ລາວ​ຈະ​ໄປ​ຮອດ​ສະຫວັນ

ແລະ​ລາວ​ຈະ​ສູງ​ສ່ຳ​ຟ້າ

 7 ແຕ່​ລາວ​ຈະ​ຖືກ​ກຳຈັດ​ຕະຫຼອດໄປ​ຄື​ກັບຂີ້ຂອງ​ລາວ.

ຄົນ​ທີ່​ເຄີຍ​ເຫັນ​ລາວ​ກໍ​ຈະ​ຖາມ​ວ່າ ‘ລາວ​ໄປ​ໃສ​ແລ້ວ?’

 8 ລາວ​ຈະ​ຫາຍ​ໄປ​ຄື​ກັບສິ່ງ​ທີ່​ເກີດ​ຂຶ້ນ​ໃນ​ຄວາມ​ຝັນ ແລະ​ຈະ​ບໍ່​ມີ​ໃຜ​ເຫັນ​ລາວ​ອີກ.

ລາວ​ຈະ​ຖືກ​ລືມ​ຄື​ກັບ​ຄວາມ​ຝັນ​ໃນ​ຕອນ​ກາງຄືນ.

 9 ຄົນ​ທີ່​ເຄີຍ​ເຫັນ​ລາວ​ຈະ​ບໍ່​ເຫັນ​ລາວ​ອີກ

ແລະ​ຈະ​ບໍ່​ມີ​ຜູ້​ໃດ​ເຫັນ​ລາວຢູ່​ໃນ​ເຮືອນ​ຂອງ​ລາວ​ອີກ.+

10 ພວກ​ລູກ​ຂອງ​ລາວ​ຈະ​ໄປຂໍ​ໃຫ້​ຄົນ​ທຸກ​ຊ່ວຍ

ແລະ​ລາວ​ຕ້ອງສົ່ງ​ຊັບ​ສົມບັດທີ່​ລາວ​ເອົາ​ມາ​ຈາກ​ຄົນ​ອື່ນ​ຄືນ​ໃຫ້​ເຂົາ​ເຈົ້າ.+

11 ລາວ*​ມີ​ເຫື່ອ​ມີ​ແຮງຄື​ກັບ​ຄົນ​ໜຸ່ມ

ແຕ່​ລາວ​ກໍ​ຈະ​ຕາຍ​ທັງ​ໆ​ທີ່​ຍັງ​ມີ​ເຫື່ອ​ມີ​ແຮງ.

12 ສຳລັບ​ລາວ ການ​ເຮັດ​ຊົ່ວ​ເປັນ​ຄື​ກັບ​ອາຫານ​ທີ່​ຫວານ​ໆ​.

ລາວປ່ອຍ​ໃຫ້​ມັນ​ເປື່ອຍຢູ່​ກ້ອງ​ລີ້ນ.

13 ລາວ​ອົມ​ມັນ​ໄວ້​ໃນ​ປາກ

ແລະ​ລາວ​ມີ​ຄວາມ​ສຸກ​ກັບ​ລົດ​ຊາດ​ນັ້ນ.

14 ແຕ່​ເມື່ອ​ມັນ​ລົງ​ໄປ​ໃນ​ທ້ອງ​ຂອງ​ລາວ ອາຫານ​ທີ່​ຫວານ​ໆ​ນັ້ນ​ກໍ​ຂົມ.

ມັນ​ເປັນ​ຄື​ກັບ​ພິດ*​ຂອງ​ງູ​ເຫົ່າ​ຢູ່​ໃນ​ໂຕ​ຂອງ​ລາວ.

15 ລາວ​ກືນ​ຄວາມ​ຮັ່ງມີ​ລົງ​ໄປ ແຕ່​ລາວ​ກໍ​ຈະ​ຮາກ​ອອກ​ມາ.

ພະເຈົ້າຈະ​ລ້າງ​ທ້ອງຂອງ​ລາວ.

16 ລາວ​ຈະ​ດູດ​ພິດ​ຂອງ​ງູ​ເຫົ່າ

ແລະ​ລາວ​ຈະ​ຕາຍ​ຍ້ອນ​ແຂ້ວ*​ຂອງ​ງູ​ພິດ.

17 ລາວຈະ​ບໍ່​ໄດ້​ເຫັນນ້ຳ​ນົມ​ກັບ​ນ້ຳ​ເຜີ້ງ

ທີ່​ໄຫຼ​ຄື​ກັບ​ແມ່​ນ້ຳ​ອີກ​ເລີຍ.

18 ລາວ​ຈະ​ຕ້ອງ​ສົ່ງ​ຄືນ​ເຄື່ອງ​ທີ່​ລາວ​ເອົາ​ມາ​ທັງ​ໆ​ທີ່​ຍັງ​ບໍ່​ໄດ້​ໃຊ້​ຊ້ຳ.*

ລາວ​ຈະ​ບໍ່​ໄດ້​ໃຊ້​ເງິນ​ທີ່​ໄດ້​ຈາກ​ການ​ຄ້າ​ຂາຍ.+

19 ລາວ​ກົດຂີ່​ແລະ​ປະຖິ້ມ​ຄົນ​ທຸກ.

ລາວ​ຍຶດ​ເອົາ​ເຮືອນ​ທີ່​ລາວ​ບໍ່​ໄດ້​ປຸກ.

20 ລາວ​ຈະ​ບໍ່​ມີ​ຄວາມ​ສະຫງົບ​ສຸກ.

ຊັບ​ສົມບັດ​ຈະ​ບໍ່​ໄດ້​ຊ່ວຍ​ໃຫ້​ລາວ​ລອດ​ຈາກ​ໄພພິບັດ.

21 ຈະບໍ່​ມີ​ຫຍັງ​ເຫຼືອໃຫ້​ລາວ​ຍາດ​ເອົາ

ຍ້ອນ​ແນວ​ນີ້ ຄວາມ​ຮັ່ງມີ​ຂອງ​ລາວ​ຈຶ່ງ​ຢູ່​ໄດ້​ບໍ່​ດົນ.

22 ຕອນ​ທີ່​ລາວ​ລວຍ​ແທ້​ລວຍ​ວ່າ ລາວ​ກໍ​ຈະ​ອຸກໃຈ​ຫຼາຍ.

ລາວ​ຈະ​ເຈິແຕ່​ແນວ​ບໍ່​ດີ.

23 ຕອນ​ທີ່​ລາວກິນ​ຈົນ​ໜຳ​ໃຈ

ພະເຈົ້າ​ຈະ​ໃຈ​ຮ້າຍ​ໃຫ້​ລາວ.

ແນວ​ບໍ່​ດີ​ຈະ​ເກີດ​ຂຶ້ນ​ກັບ​ລາວ​ຄື​ກັບ​ຝົນ​ຕົກ​ໃສ່.

24 ຕອນ​ທີ່​ລາວ​ໜີ​ຈາກ​ອາວຸດ​ເຫຼັກ

ລູກທະນູ​ທອງແດງ​ກໍ​ຈະ​ສຽບ​ລາວ.

25 ລາວ​ດຶງ​ລູກທະນູ​ອອກ​ຈາກ​ຫຼັງ​ຂອງ​ລາວ.

ລູກທະນູ​ທີ່​ເຫຼື້ອມ​ມາບ​ໆ​ນັ້ນແທງ​ຈົນ​ຊອດ​ໄສ້*​ຂອງ​ລາວ

ແລະ​ລາວ​ຮູ້ສຶກ​ຢ້ານ​ຫຼາຍ.+

26 ຊັບ​ສົມບັດ​ຂອງ​ລາວ​ຈະ​ຖືກ​ໂຍນ​ເຂົ້າ​ໄປໃນ​ຄວາມ​ມືດ​ທຶບ.

ໄຟ​ທີ່​ຍັງ​ບໍ່​ທັນ​ຖືກ​ວີ​ໃຫ້​ແຮງ​ຂຶ້ນ​ຈະ​ໄໝ້​ໂຕ​ລາວ.

ຈະ​ບໍ່​ມີ​ຜູ້​ໃດ​ໃນ​ເຕັ້ນ​ຂອງ​ລາວ​ລອດ​ຈາກ​ໄພ​ພິບັດ​ຈັກ​ຄົນ.

27 ສະຫວັນ​ຈະ​ເປີດ​ເຜີຍ​ຄວາມ​ຜິດ​ຂອງ​ລາວ.

ແຜ່ນດິນ​ຈະຫັນ​ມາ​ຕໍ່ສູ້ລາວ.

28 ນ້ຳ​ຈະ​ພັດ​ເຮືອນ​ຂອງ​ລາວ​ໄປ.

ມັນ​ຈະ​ເປັນ​ນ້ຳ​ທີ່​ໄຫຼ​ແຮງ​ໃນ​ມື້​ທີ່​ພະເຈົ້າ​ໃຈ​ຮ້າຍ.

29 ນີ້​ແມ່ນລາງວັນທີ່​ພະເຈົ້າ​ໃຫ້​ກັບ​ຄົນ​ຊົ່ວ

ແລະ​ເປັນ​ມູນ​ມໍລະດົກ​ທີ່​ເພິ່ນ​ກຽມ​ໄວ້​ໃຫ້​ລາວ.”