ເຢເຣມີຢາ
49 ພະເຢໂຫວາເວົ້າກ່ຽວກັບອຳໂມນວ່າ:+
“ອິດສະຣາເອນບໍ່ມີລູກຊາຍບໍ?
ລາວບໍ່ມີຜູ້ສືບເຊື້ອສາຍບໍ?
ເປັນຫຍັງພະມັນກາມ+ຈຶ່ງຍຶດເອົາເຂດຂອງຕະກູນຄາດໄປ?+
ເປັນຫຍັງຄົນຂອງລາວຈຶ່ງມາຢູ່ຕາມເມືອງຕ່າງໆຂອງອິດສະຣາເອນ?
2 ພະເຢໂຫວາບອກວ່າ ‘ເບິ່ງແມ້! ອີກຈັກໜ້ອຍ
ເຮົາຈະເຮັດໃຫ້ມີສຽງສັນຍານຂອງການສູ້ຮົບ*ເກີດຂຶ້ນຢູ່ເມືອງຣັບບາ+ຂອງພວກອຳໂມນ.+
ເມືອງນີ້ຈະກາຍເປັນໂນນທີ່ມີແຕ່ຊາກຫັກພັງ
ແລະເມືອງຕ່າງໆທີ່ຢູ່ອ້ອມແອ້ມເມືອງນີ້ຈະຖືກຈູດ.
ອິດສະຣາເອນຈະຍຶດເອົາແຜ່ນດິນຂອງເຂົາເຈົ້າທີ່ເຄີຍຖືກຄົນອື່ນຍຶດໄປກັບຄືນມາ.’+ ພະເຢໂຫວາເວົ້າໄວ້ແນວນີ້.
3 ‘ເມືອງເຮັດຊະໂບນເອີ້ຍ ໃຫ້ຮ້ອງໄຫ້ແມ້ ຍ້ອນເມືອງອາອີຖືກທຳລາຍແລ້ວ!
ເມືອງຕ່າງໆທີ່ຢູ່ອ້ອມແອ້ມເມືອງຣັບບາເອີ້ຍ ໃຫ້ຮ້ອງອອກມາດັງໆໂລດ
ແລະໃຫ້ນຸ່ງຜ້າເນື້ອຫຍາບ.
ໃຫ້ຮ້ອງໄຫ້ແລະແລ່ນໄປຕາມຄອກ*ແກະ
ຍ້ອນພະມັນກາມຈະຖືກຈັບໄປເປັນຊະເລີຍ
ພ້ອມກັບພວກປະໂລຫິດແລະພວກເຈົ້ານາຍທີ່ຮັບໃຊ້ລາວ.+
4 ລູກສາວທີ່ບໍ່ສັດຊື່ເອີ້ຍ ເປັນຫຍັງພວກເຈົ້າຈຶ່ງເວົ້າອວດກ່ຽວກັບຮ່ອມພູ
ແລະເວົ້າອວດກ່ຽວກັບທົ່ງພຽງທີ່ອຸດົມສົມບູນຂອງພວກເຈົ້າ?
ພວກເຈົ້າໄວ້ໃຈຊັບສົມບັດຂອງພວກເຈົ້າ
ແລະພວກເຈົ້າເວົ້າວ່າ “ຈະບໍ່ມີຜູ້ໃດມາໂຈມຕີພວກເຮົາ.”’
5 ພະເຢໂຫວາຜູ້ບັນຊາການກອງທັບ ພະເຈົ້າຜູ້ຍິ່ງໃຫຍ່ສູງສຸດບອກວ່າ ‘ເຮົາຈະເຮັດໃຫ້ພວກເຈົ້າເຈິສິ່ງທີ່ເປັນຕາຢ້ານ
ຈາກຄົນທັງໝົດທີ່ຢູ່ອ້ອມຂ້າງພວກເຈົ້າ.
ພວກເຈົ້າຈະກະຈັດກະຈາຍກັນໄປທຸກທິດທຸກທາງ
ແລະຈະບໍ່ມີໃຜລວບລວມຄົນທີ່ໜີໄປໃຫ້ກັບມາ.
6 ແຕ່ຫຼັງຈາກນັ້ນເຮົາຈະລວບລວມຄົນອຳໂມນທີ່ຖືກຈັບໄປໃຫ້ກັບມາ.’ ພະເຢໂຫວາເວົ້າໄວ້ແນວນີ້.”
7 ພະເຢໂຫວາຜູ້ບັນຊາການກອງທັບເວົ້າກ່ຽວກັບເອໂດມວ່າ:
“ບໍ່ມີຄົນສະຫຼາດຢູ່ເຕມານແລ້ວບໍ?+
ຄຳແນະນຳດີໆຈາກຄົນທີ່ມີຄວາມເຂົ້າໃຈບໍ່ມີແລ້ວບໍ?
ສະຕິປັນຍາຂອງເຂົາເຈົ້າໃຊ້ບໍ່ໄດ້ແລ້ວບໍ?
8 ຄົນທີ່ຢູ່ເດດານເອີ້ຍ+ ໃຫ້ຫັນຫຼັງແລະໜີໄປ.
ໃຫ້ລົງໄປຢູ່ບ່ອນທີ່ເລິກໆ
ຍ້ອນເມື່ອຮອດເວລາທີ່ເຮົາຈະລົງໂທດເອຊາວ
ເຮົາຈະເຮັດໃຫ້ລາວເຈິຄວາມຈິບຫາຍ.
9 ຖ້າມີຄົນເກັບໝາກລະແຊັງຢູ່ສວນຂອງເຈົ້າ
ເຂົາເຈົ້າຈະຈົ່ງໝາກມັນໄວ້ຢູ່ເຄືອແດ່ບໍ່ແມ່ນບໍ?
ແຕ່ຖ້າຂີ້ລັກມາໃນຕອນກາງຄືນ
ເຂົາເຈົ້າກໍຈະເອົາໄປໃຫ້ຫຼາຍເທົ່າທີ່ເຂົາເຈົ້າຕ້ອງການ.+
10 ແຕ່ເຮົາຈະເຮັດໃຫ້ເອຊາວບໍ່ເຫຼືອຫຍັງເລີຍ.
ເຮົາຈະເປີດເຜີຍບ່ອນລີ້ຂອງລາວ
ເພື່ອລາວຈະລີ້ບໍ່ໄດ້ອີກຕໍ່ໄປ.
11 ໃຫ້ປະລູກກຳພ້າຂອງເຈົ້າໄວ້
ແລະເຮົາຈະຊ່ວຍເຂົາເຈົ້າໃຫ້ລອດ.
ພວກແມ່ໝ້າຍຂອງເຈົ້າກໍຈະໄວ້ໃຈເຮົາ.”
12 ພະເຢໂຫວາເວົ້າວ່າ: “ຖ້າຄົນທີ່ບໍ່ໄດ້ຖືກຕັດສິນໃຫ້ກິນຈາກຈອກຂອງຄວາມໃຈຮ້າຍກໍຍັງຕ້ອງໄດ້ກິນ ເຈົ້າຄິດວ່າເຈົ້າຊິລອດບໍ? ເຈົ້າຈະຕ້ອງກິນຈາກຈອກຂອງຄວາມໃຈຮ້າຍນັ້ນແລະເຈົ້າຈະຖືກລົງໂທດແທ້.”+
13 ພະເຢໂຫວາເວົ້າວ່າ: “ເຮົາໄດ້ສາບານໂດຍໃຊ້ຊື່ຂອງເຮົາວ່າໂບຊະຣາຈະຖືກເຮັດໃຫ້ອັບອາຍ ຖືກສາບແຊ່ງ ແລະກາຍເປັນບ່ອນຮ້າງເປົ່າ. ຄົນອື່ນໆທີ່ເຫັນຈະຕ້ອງຕົກໃຈແລະຢ້ານຫຼາຍ+ ແລະເມືອງທຸກເມືອງຂອງໂບຊະຣາຈະກາຍເປັນຊາກຫັກພັງຕະຫຼອດໄປ.”+
14 ຂ້ອຍໄດ້ຍິນຂ່າວສານຈາກພະເຢໂຫວາ.
ເພິ່ນໄດ້ສົ່ງຕົວແທນຂອງເພິ່ນໄປບອກຊາດຕ່າງໆວ່າ:
15 “ເຮົາໄດ້ເຮັດໃຫ້ພວກເຈົ້າເປັນປະເທດທີ່ບໍ່ສຳຄັນ
ແລະຊາດອື່ນໆກໍພາກັນດູຖູກເຈົ້າ.+
16 ພວກເຈົ້າທີ່ຢູ່ຕາມໂກນຫີນແລະຢູ່ຕາມໂນນພູສູງໆເອີ້ຍ
ພວກເຈົ້າຖືກຕົວະຍ້ອນຄົນອື່ນຢ້ານພວກເຈົ້າ
ແລະຍ້ອນພວກເຈົ້າຍິ່ງ.
ເຖິງວ່າພວກເຈົ້າຈະໄປເຮັດຮັງຢູ່ບ່ອນສູງຄືກັບນົກອິນຊີ
ເຮົາກໍຈະເອົາພວກເຈົ້າລົງມາຈາກບ່ອນນັ້ນ.” ພະເຢໂຫວາເວົ້າໄວ້ແນວນີ້.
17 “ເອໂດມຈະກາຍເປັນບ່ອນທີ່ເປັນຕາຢ້ານ.+ ທຸກຄົນທີ່ກາຍໄປກາຍມາຈະຈ້ອງເບິ່ງດ້ວຍຄວາມຕົກໃຈແລະເຍາະເຍີ້ຍ*ເອໂດມ ຍ້ອນຄວາມຈິບຫາຍທັງໝົດທີ່ເກີດຂຶ້ນກັບຊາດນີ້. 18 ຄືກັບເມືອງໂຊໂດມ ເມືອງໂກໂມຣາ ແລະເມືອງຕ່າງໆທີ່ຢູ່ອ້ອມແອ້ມ 2 ເມືອງນັ້ນທີ່ໄດ້ຖືກທຳລາຍໄປແລ້ວ+ ຈະບໍ່ມີໃຜອາໄສຢູ່ຫັ້ນອີກເລີຍ.”+ ພະເຢໂຫວາເວົ້າໄວ້ແນວນີ້.
19 “ຄືກັບໂຕສິງທີ່ອອກຈາກປ່າຕຶບໜາຂອງຈໍແດນ ຈະມີຜູ້ໜຶ່ງມາແລະໂຈມຕີທົ່ງຫຍ້າທີ່ປອດໄພຂອງເອໂດມ.+ ແຕ່ບໍ່ດົນເຮົາຈະເຮັດໃຫ້ເອໂດມແລ່ນໜີຈາກແຜ່ນດິນຂອງໂຕເອງ ແລະເຮົາຈະແຕ່ງຕັ້ງຜູ້ນຳທີ່ເຮົາໄດ້ເລືອກໄວ້ໃຫ້ປົກຄອງແຜ່ນດິນນີ້. ຈະມີໃຜບໍທີ່ຄືກັບເຮົາ? ມີໃຜບໍທີ່ກ້າທ້າທາຍເຮົາ? ມີຜູ້ລ້ຽງແກະຄົນໃດບໍທີ່ຈະຕໍ່ຕ້ານເຮົາໄດ້?+ 20 ດັ່ງນັ້ນ ໃຫ້ຟັງສິ່ງທີ່ພະເຢໂຫວາຕັດສິນໃຈ*ກ່ຽວກັບເອໂດມແລະສິ່ງທີ່ເພິ່ນຄິດກ່ຽວກັບຄົນທີ່ຢູ່ໃນເມືອງເຕມານ.+
ພວກແກະນ້ອຍຈະຖືກລັກໄປແນ່ນອນ.
ເພິ່ນຈະເຮັດໃຫ້ບ່ອນຢູ່ຂອງເຂົາເຈົ້າຮ້າງເປົ່າຍ້ອນສິ່ງທີ່ເຂົາເຈົ້າເຮັດ.+
21 ເມື່ອມີສຽງຂອງການທຳລາຍເຂົາເຈົ້າ ແຜ່ນດິນກໍສັ່ນສະເທືອນ.
ມີສຽງຮ້ອງດັງຫຼາຍ.
ສຽງນັ້ນດັງໄປຈົນຮອດທະເລແດງ.+
ໃນມື້ນັ້ນທະຫານທີ່ເກັ່ງໆຂອງເອໂດມຈະຮູ້ສຶກຢ້ານຫຼາຍ
ຄືກັບຜູ້ຍິງທີ່ກຳລັງເກີດລູກ.”
23 ນີ້ແມ່ນຂ່າວສານກ່ຽວກັບເມືອງດາມາເຊ:+
“ຮາມັດ+ແລະອາປາດຖືກເຮັດໃຫ້ອັບອາຍແລ້ວ
ຍ້ອນເຂົາເຈົ້າໄດ້ຍິນຂ່າວຮ້າຍ.
ເຂົາເຈົ້າຢ້ານຫຼາຍ.
ຜູ້ຄົນກໍເປັນຄືກັບທະເລທີ່ປັ່ນປ່ວນ.
24 ຄົນໃນເມືອງດາມາເຊບໍ່ມີຄວາມກ້າຫານແລ້ວ.
ເຂົາເຈົ້າຢາກໜີ ແຕ່ເຂົາເຈົ້າກໍຢ້ານຫຼາຍ.
ເຂົາເຈົ້າທຸກໃຈແລະເຈັບປວດຫຼາຍ
ຄືກັບຜູ້ຍິງທີ່ກຳລັງເກີດລູກ.
25 ເປັນຫຍັງເມືອງທີ່ຖືກຍົກຍ້ອງ
ແລະເມືອງທີ່ປະຊາຊົນເຄີຍມີຄວາມສຸກຍັງມີຄົນອາໄສຢູ່?
26 ພວກຄົນໜຸ່ມຂອງເມືອງນີ້ຈະຕາຍຢູ່ຕາມເດີ່ນຕ່າງໆຂອງເມືອງ
ແລະທະຫານທັງໝົດກໍຈະຕາຍໃນມື້ນັ້ນ.” ພະເຢໂຫວາຜູ້ບັນຊາການກອງທັບເວົ້າໄວ້ແນວນີ້.
27 “ເຮົາຈະຈູດກຳແພງຂອງເມືອງດາມາເຊ
ແລະໄຟນັ້ນຈະເຜົາປ້ອມສູງຕ່າງໆຂອງເບັນຮາດັດ.”+
28 ພະເຢໂຫວາເວົ້າກ່ຽວກັບແຜ່ນດິນເກດາ+ແລະອານາຈັກຕ່າງໆໃນຮາໂສທີ່ເນບູກາດເນັດຊາ*ກະສັດຂອງບາບີໂລນໄປໂຈມຕີ. ເພິ່ນເວົ້າວ່າ:
“ໃຫ້ຂຶ້ນໄປເກດາ
ແລະທຳລາຍຄົນເຫຼົ່ານັ້ນທີ່ອາໄສຢູ່ທາງທິດຕາເວັນອອກ.
29 ເຕັ້ນແລະຝູງສັດຂອງເຂົາເຈົ້າຈະຖືກເອົາໄປ.
ຜ້າເຕັ້ນແລະເຄື່ອງຂອງທັງໝົດຂອງເຂົາເຈົ້າກໍຈະຖືກເອົາໄປ.
ຝູງອູດຂອງເຂົາເຈົ້າຈະຖືກເອົາໄປ
ແລະຄົນທີ່ມາໂຈມຕີຈະຮ້ອງໃສ່ເຂົາເຈົ້າວ່າ ‘ມີແຕ່ຄວາມຢ້ານເຕັມໄປໝົດ.’”
30 ພະເຢໂຫວາບອກວ່າ: “ຄົນທີ່ຢູ່ໃນເມືອງຮາໂສເອີ້ຍ ໃຫ້ໜີໄປໄກໆ
ໃຫ້ລົງໄປໃນບ່ອນທີ່ເລິກໆ
ຍ້ອນເນບູກາດເນັດຊາກະສັດຂອງບາບີໂລນໄດ້ວາງແຜນຕໍ່ສູ້ພວກເຈົ້າ
ແລະໄດ້ຄິດແຜນໂຈມຕີພວກເຈົ້າ.”
31 ພະເຢໂຫວາບອກວ່າ: “ໃຫ້ລຸກຂຶ້ນໄປຕໍ່ສູ້ຊາດທີ່ຢູ່ຢ່າງສະຫງົບສຸກ
ແລະຢູ່ຢ່າງປອດໄພ.
ຊາດນັ້ນບໍ່ມີປະຕູຫຼືກອນປະຕູ ແລະຢູ່ຫ່າງໄກຈາກຊາດອື່ນ.
32 ຝູງອູດຂອງເຂົາເຈົ້າ
ແລະຝູງສັດຫຼາຍໆຂອງເຂົາເຈົ້າຈະຖືກປຸ້ນໄປ.
ເຮົາຈະເຮັດໃຫ້ຄົນທີ່ແຖຜົມຂ້າງຫູ+
ກະຈັດກະຈາຍໄປທຸກທິດທຸກທາງ*
ແລະເຮົາຈະເຮັດໃຫ້ເຂົາເຈົ້າເຈິຄວາມຈິບຫາຍຈາກທຸກດ້ານ.” ພະເຢໂຫວາເວົ້າໄວ້ແນວນີ້.
33 “ຮາໂສຈະກາຍເປັນບ່ອນຢູ່ຂອງໝາໄນ
ຈະເປັນບ່ອນທີ່ຮ້າງເປົ່າຕະຫຼອດໄປ
ຈະບໍ່ມີຈັກຄົນຢູ່ບ່ອນນັ້ນ
ແລະຈະບໍ່ມີໃຜອາໄສຢູ່ຫັ້ນເລີຍ.”
34 ໃນຕອນທີ່ເຊເດກີຢາເລີ່ມເປັນກະສັດປົກຄອງ+ຢູດາ ພະເຢໂຫວາເວົ້າກັບຜູ້ພະຍາກອນເຢເຣມີຢາກ່ຽວກັບເອລາມວ່າ:+ 35 “ພະເຢໂຫວາຜູ້ບັນຊາການກອງທັບບອກວ່າ ‘ເຮົາຈະຫັກທະນູຂອງເອລາມ+ ເຊິ່ງເປັນກຳລັງທີ່ສຳຄັນທີ່ສຸດໃນກອງທັບຂອງເຂົາເຈົ້າ. 36 ເຮົາຈະເຮັດໃຫ້ລົມຈາກສຸດຂອບຟ້າທັງສີ່ທິດພັດໃສ່ເອລາມ ແລະເຮົາຈະເຮັດໃຫ້ເຂົາເຈົ້າກະຈັດກະຈາຍໄປຢູ່ຕາມລົມເຫຼົ່ານີ້. ຈະບໍ່ມີຊາດໃດເລີຍທີ່ບໍ່ມີຄົນເອລາມໄປຢູ່.’”
37 ພະເຢໂຫວາບອກວ່າ: “ເຮົາຈະເຮັດໃຫ້ຄົນເອລາມຢ້ານພວກສັດຕູແລະຄົນທີ່ຢາກຂ້າເຂົາເຈົ້າ. ເຮົາຈະເຮັດໃຫ້ເຂົາເຈົ້າເຈິຄວາມຈິບຫາຍຍ້ອນເຮົາໃຈຮ້າຍແຮງ ແລະເຮົາຈະສົ່ງດາບມາຂ້າເຂົາເຈົ້າຈົນເຂົາເຈົ້າບໍ່ເຫຼືອຈັກຄົນ.”
38 ພະເຢໂຫວາບອກວ່າ: “ເຮົາຈະຕັ້ງບັນລັງຂອງເຮົາຂຶ້ນຢູ່ເອລາມ+ ແລະເຮົາຈະທຳລາຍກະສັດແລະພວກເຈົ້ານາຍຂອງເຂົາເຈົ້າ.
39 ແຕ່ໃນສະໄໝສຸດທ້າຍ ເຮົາຈະລວບລວມຄົນເອລາມທີ່ຖືກຈັບໄປເປັນຊະເລີຍໃຫ້ກັບມາ.” ພະເຢໂຫວາເວົ້າໄວ້ແນວນີ້.