ເພງຂອງໂຊໂລໂມນ
2 “ໃນກຸ່ມພວກຜູ້ສາວ
ຄົນຮັກຂອງຂ້ອຍເປັນຄືກັບດອກລິນລີ້ທີ່ຢູ່ທ່າມກາງຕົ້ນໜາມ.”
3 “ໃນກຸ່ມພວກຜູ້ບ່າວ
ຄົນຮັກຂອງຂ້ອຍເປັນຄືກັບຕົ້ນໝາກແອັບເປິ້ນທີ່ຢູ່ທ່າມກາງຕົ້ນໄມ້ໃນປ່າ.
ຂ້ອຍຢາກໄປນັ່ງຢູ່ກ້ອງຕົ້ນໄມ້ນັ້ນ.
ໝາກຂອງມັນຫວານຖືກໃຈຂ້ອຍຫຼາຍ.
4 ລາວພາຂ້ອຍເຂົ້າໄປໃນເຮືອນທີ່ມີງານລ້ຽງ.
ທຸກຄົນທີ່ຢູ່ຫັ້ນກໍເຫັນວ່າລາວຮັກຂ້ອຍຫຼາຍ.
5 ຂໍໃຫ້ເອົາໝາກລະແຊັງແຫ້ງ+ກັບໝາກແອັບເປິ້ນມາໃຫ້ຂ້ອຍກິນແດ່
ເພື່ອຂ້ອຍຈະສົດຊື່ນແລະມີແຮງ
ຍ້ອນວ່າຂ້ອຍກຳລັງມີຄວາມຮັກ.
6 ລາວເອົາແຂນເບື້ອງຊ້າຍໃຫ້ຂ້ອຍໝູນ
ແລະເອົາແຂນເບື້ອງຂວາກອດຂ້ອຍໄວ້.+
7 ຜູ້ຍິງເມືອງເຢຣູຊາເລັມເອີ້ຍ
ຂ້ອຍຂໍໃຫ້ພວກເຈົ້າສາບານໂດຍອ້າງກວາງໂຕແມ່+ໃນທົ່ງຫຍ້າວ່າ
ພວກເຈົ້າຈະບໍ່ຍົວະຂ້ອຍໃຫ້ຮັກຜູ້ໃດຜູ້ໜຶ່ງ ແຕ່ປ່ອຍໃຫ້ຄວາມຮັກເກີດຂຶ້ນເອງ.+
8 ຂ້ອຍໄດ້ຍິນສຽງຄົນຮັກຂອງຂ້ອຍ!
ຫັ້ນເດ້ ລາວກຳລັງມາ!
ລາວປີນພູແລະໂດດຂ້າມໂນນພູມາ.
9 ຄົນຮັກຂອງຂ້ອຍເປັນຄືກັບໂຕກວາງ.+
ລາວຢູ່ຫັ້ນເດ້ ລາວຢືນຢູ່ນອກເຮືອນ.
ລາວກຳລັງແນມເຂົ້າມາທາງປ່ອງຢ້ຽມ.
ລາວກຳລັງຈອບເບິ່ງຢູ່ປ່ອງຢ້ຽມ.*
10 ຄົນຮັກຂອງຂ້ອຍບອກຂ້ອຍວ່າ:
‘ທີ່ຮັກຂອງອ້າຍ ລຸກຂຶ້ນແມ້.
ຄົນງາມຂອງອ້າຍ ໄປ໋ ໄປນຳອ້າຍ.
11 ຍາມໜາວ*ກໍຜ່ານໄປແລ້ວ.
ຝົນກໍເຊົາຕົກແລ້ວ.
12 ດອກໄມ້ບານເຕັມທົ່ວແຜ່ນດິນ.+
ຕອນນີ້ ຮອດເວລາຕັດແຕ່ງເຄືອໝາກລະແຊັງແລ້ວ+
ແລະສຽງນົກເຂົາກໍດັງໄປທົ່ວແຜ່ນດິນຂອງພວກເຮົາ.+
13 ໝາກເດື່ອຊຸດທຳອິດກຳລັງສຸກ+
ຕົ້ນໝາກລະແຊັງກໍກຳລັງອອກດອກແລະມີກິ່ນຫອມ.
ທີ່ຮັກຂອງອ້າຍ ລຸກຂຶ້ນແມ້.
ຄົນງາມຂອງອ້າຍ ໄປ໋ ໄປນຳອ້າຍ.
14 ນ້ອງເປັນນົກເຂົາຂອງອ້າຍທີ່ຢູ່ໃນໂກນຫີນ
ຢູ່ໃນຫຼືບຫີນທີ່ຢູ່ຜາສູງໆ.+
ຂໍໃຫ້ອ້າຍໄດ້ເຫັນນ້ອງແລະໄດ້ຍິນສຽງຂອງນ້ອງ+
ເພາະສຽງຂອງນ້ອງມ່ວນແລະນ້ອງກໍງາມຫຼາຍ.’”+
15 “ຈັບໝາໄນໃຫ້ແດ່.
ໝາໄນນ້ອຍພວກນີ້ທຳລາຍສວນໝາກລະແຊັງຂອງພວກເຮົາ.
ສວນໝາກລະແຊັງຂອງພວກເຮົາກຳລັງອອກດອກ.”
16 “ຄົນຮັກຂອງຂ້ອຍເປັນຂອງຂ້ອຍ ແລະຂ້ອຍກໍເປັນຂອງລາວ.+
ລາວກຳລັງລ້ຽງແກະ+ຢູ່ທ່າມກາງດອກລິນລີ້.+
17 ທີ່ຮັກເອີ້ຍ ໃຫ້ຟ້າວກັບມາໄວໆ.
ໃຫ້ມາຕອນທີ່ຍັງມີລົມພັດຄ່ອຍໆຢູ່ແລະຍັງບໍ່ທັນແຈ້ງ.
ໃຫ້ໂດດຂ້າມພູທີ່ຂັ້ນພວກເຮົາໄວ້ຄືກັບກວາງໂດດ.”+