ເອັດຊະຣາ
8 ໃນຕອນທີ່ກະສັດອາຕາເຊເຊັດ*+ປົກຄອງ ຈຳນວນຄົນໃນຈຸ້ມເຈື້ອຕ່າງໆໃນປຶ້ມລາຍຊື່ຜູ້ທີ່ລົງທະບຽນແລະຫົວໜ້າຂອງແຕ່ລະກຸ່ມທີ່ອອກຈາກບາບີໂລນແລະກັບໄປເມືອງເຢຣູຊາເລັມນຳຂ້ອຍມີ: 2 ຈາກລູກຫຼານຂອງຟີເນຮາດ+ ເກໂຊມເປັນຫົວໜ້າ; ຈາກລູກຫຼານຂອງອີທາມາ+ ດານີເອນເປັນຫົວໜ້າ; ຈາກລູກຫຼານຂອງດາວິດ ຮັດຕຸຊະເປັນຫົວໜ້າ; 3 ຈາກລູກຫຼານຂອງເຊການີອາທີ່ເປັນລູກຫຼານຂອງປາຣົດມີຜູ້ຊາຍ 150 ຄົນທີ່ໄດ້ລົງທະບຽນ ແລະເຊຄາຣີຢາເປັນຫົວໜ້າຂອງເຂົາເຈົ້າ; 4 ຈາກລູກຫຼານຂອງປາຮາດໂມອາບ+ມີຜູ້ຊາຍ 200 ຄົນທີ່ໄດ້ລົງທະບຽນ ແລະເອລີເອໂຮນາຍລູກຊາຍຂອງເຊຣາຮີຢາເປັນຫົວໜ້າຂອງເຂົາເຈົ້າ; 5 ຈາກລູກຫຼານຂອງຊັດຕຸ+ມີຜູ້ຊາຍ 300 ຄົນທີ່ໄດ້ລົງທະບຽນ ແລະເຊການີອາລູກຊາຍຂອງຢາຮາຊີເອນເປັນຫົວໜ້າຂອງເຂົາເຈົ້າ; 6 ຈາກລູກຫຼານຂອງອາດິນ+ມີຜູ້ຊາຍ 50 ຄົນທີ່ໄດ້ລົງທະບຽນ ແລະເອເບັດລູກຊາຍຂອງໂຢນາທານເປັນຫົວໜ້າຂອງເຂົາເຈົ້າ; 7 ຈາກລູກຫຼານຂອງເອລາມ+ມີຜູ້ຊາຍ 70 ຄົນທີ່ໄດ້ລົງທະບຽນ ແລະເຢຊາຢາລູກຊາຍຂອງອາທາລີຢາເປັນຫົວໜ້າຂອງເຂົາເຈົ້າ; 8 ຈາກລູກຫຼານຂອງເຊຟາຕີຢາ+ມີຜູ້ຊາຍ 80 ຄົນທີ່ໄດ້ລົງທະບຽນ ແລະເຊບາດີຢາລູກຊາຍຂອງມີກາເອນເປັນຫົວໜ້າຂອງເຂົາເຈົ້າ; 9 ຈາກລູກຫຼານຂອງໂຢອາບມີຜູ້ຊາຍ 218 ຄົນທີ່ໄດ້ລົງທະບຽນ ແລະໂອບາດີຢາລູກຊາຍຂອງເຢຮີເອນເປັນຫົວໜ້າຂອງເຂົາເຈົ້າ; 10 ຈາກລູກຫຼານຂອງບານີມີຜູ້ຊາຍ 160 ຄົນທີ່ໄດ້ລົງທະບຽນ ແລະເຊໂລມິດລູກຊາຍຂອງໂຢຊີຟີຢາເປັນຫົວໜ້າຂອງເຂົາເຈົ້າ; 11 ຈາກລູກຫຼານຂອງເບບາຍ+ມີຜູ້ຊາຍ 28 ຄົນທີ່ໄດ້ລົງທະບຽນ ແລະເຊຄາຣີຢາລູກຊາຍຂອງເບບາຍເປັນຫົວໜ້າຂອງເຂົາເຈົ້າ; 12 ຈາກລູກຫຼານຂອງອາຊາກາດ+ມີຜູ້ຊາຍ 110 ຄົນທີ່ໄດ້ລົງທະບຽນ ແລະໂຢຮານານລູກຊາຍຂອງຮັກກາຕານເປັນຫົວໜ້າຂອງເຂົາເຈົ້າ; 13 ຈາກລູກຫຼານຂອງອາໂດນີກາມ+ມີຜູ້ຊາຍ 60 ຄົນທີ່ໄດ້ລົງທະບຽນ ແລະເອລີເຟເລັດ ເຢອີເອນກັບເຊມາຢາເປັນຫົວໜ້າຂອງເຂົາເຈົ້າ. ເຂົາເຈົ້າເປັນຄົນກຸ່ມສຸດທ້າຍໃນພວກລູກຫຼານຂອງອາໂດນີກາມທີ່ໄດ້ກັບມາ. 14 ຈາກລູກຫຼານຂອງບິກວາຍ+ມີຜູ້ຊາຍ 70 ຄົນທີ່ໄດ້ລົງທະບຽນ ແລະອຸທາຍກັບຊັບບຸດເປັນຫົວໜ້າຂອງເຂົາເຈົ້າ.
15 ຂ້ອຍໃຫ້ເຂົາເຈົ້າມາລວມກັນຢູ່ແຄມແມ່ນ້ຳທີ່ໄຫຼໄປອາຮາວາ.+ ພວກເຮົາຕັ້ງຄ້າຍແລະພັກຢູ່ຫັ້ນ 3 ມື້. ເມື່ອຂ້ອຍກວດເບິ່ງຄົນຢູ່ຫັ້ນກໍເຫັນແຕ່ປະຊາຊົນກັບພວກປະໂລຫິດ* ແຕ່ບໍ່ເຫັນພວກເລວີຈັກຄົນ. 16 ຂ້ອຍຈຶ່ງໃຫ້ຄົນໄປເອີ້ນຫົວໜ້າທີ່ຊື່ເອລີເອເຊ ອາຣີເອນ ເຊມາຢາ ເອນນາທານ ຢາຣິບ ເອນນາທານ ນາທານ ເຊຄາຣີຢາ ແລະເມຊຸນລຳກັບຜູ້ສອນທີ່ຊື່ໂຢຢາຣິບແລະເອນນາທານໃຫ້ມາຫາ. 17 ຈາກນັ້ນ ຂ້ອຍສັ່ງເຂົາເຈົ້າໃຫ້ໄປຫາອິດໂດທີ່ເປັນຫົວໜ້າຢູ່ກາຊິເຟຍ ແລະໃຫ້ບອກລາວກັບພວກພີ່ນ້ອງທີ່ເປັນຜູ້ຮັບໃຊ້ໃນວິຫານ*ເຊິ່ງອາໄສຢູ່ກາຊິເຟຍວ່າ ພວກເຮົາຢາກໃຫ້ເຂົາເຈົ້າພາຜູ້ຮັບໃຊ້ໃນວິຫານຂອງພະເຈົ້າມານີ້. 18 ຍ້ອນພະເຈົ້າຊ່ວຍພວກເຮົາ ເຂົາເຈົ້າຈຶ່ງພາຜູ້ຊາຍຄົນໜຶ່ງທີ່ສຸຂຸມມາ. ລາວຊື່ເຊເຣບີຢາ.+ (ລາວເປັນລູກຫຼານຂອງມາລີ+ ມາລີເປັນຫຼານຊາຍຂອງເລວີ ເລວີເປັນລູກຊາຍຂອງອິດສະຣາເອນ.) ລາວມາກັບພວກລູກຊາຍແລະພວກພີ່ນ້ອງຂອງລາວ ລວມທັງໝົດ 18 ຄົນ. 19 ເຂົາເຈົ້າຍັງໄດ້ພາຮາຊາບີຢາກັບເຢຊາຢາທີ່ເປັນລູກຫຼານຂອງເມຣາຣີ+ກັບພວກອ້າຍນ້ອງແລະພວກລູກຊາຍຂອງເຂົາເຈົ້າມານຳ ລວມທັງໝົດ 20 ຄົນ. 20 ນອກຈາກນັ້ນຍັງມີຄົນຮັບໃຊ້ໃນວິຫານອີກ 220 ຄົນ. ເຂົາເຈົ້າມີຊື່ໃນປຶ້ມລາຍຊື່ຜູ້ທີ່ລົງທະບຽນ. ໃນສະໄໝແຕ່ກີ້ ດາວິດກັບພວກເຈົ້ານາຍໄດ້ເລືອກປູ່ຍ່າຕານາຍຂອງເຂົາເຈົ້າໃຫ້ຊ່ວຍວຽກພວກເລວີ.
21 ຈາກນັ້ນ ຂ້ອຍໄດ້ປະກາດຢູ່ແຄມແມ່ນ້ຳອາຮາວາວ່າ ໃຫ້ພວກເຮົາທຸກຄົນອົດເຂົ້າ. ພວກເຮົາໄດ້ຖ່ອມໂຕຕໍ່ພະເຈົ້າເພື່ອໃຫ້ເພິ່ນຊີ້ນຳແລະປົກປ້ອງພວກເຮົາກັບພວກລູກຂອງເຮົາແລະເຄື່ອງຂອງເງິນຄຳທຸກຢ່າງໃນການເດີນທາງເທື່ອນີ້. 22 ຂ້ອຍຮູ້ສຶກອາຍທີ່ຈະຂໍນຳກະສັດວ່າໃຫ້ມີພວກທະຫານໄປປົກປ້ອງພວກເຮົາຈາກພວກສັດຕູທີ່ຢູ່ນຳທາງ ຍ້ອນພວກເຮົາບອກກະສັດວ່າ: “ພະເຈົ້າຢູ່ກັບຄົນທີ່ຮັບໃຊ້ເພິ່ນ+ ແລະເພິ່ນຈະໃຈຮ້າຍຫຼາຍໃຫ້ຄົນທີ່ປະຖິ້ມເພິ່ນ.”+ 23 ພວກເຮົາຈຶ່ງອົດເຂົ້າແລະອ້ອນວອນຫາພະເຈົ້າກ່ຽວກັບເລື່ອງນີ້ ແລະເພິ່ນໄດ້ຟັງຄຳອ້ອນວອນຂອງພວກເຮົາ.+
24 ຂ້ອຍໄດ້ເລືອກ 12 ຄົນໃຫ້ເປັນຫົວໜ້າຂອງພວກປະໂລຫິດເຊິ່ງກໍຄືເຊເຣບີຢາ ຮາຊາບີຢາ+ກັບພວກພີ່ນ້ອງຂອງເຂົາເຈົ້າ 10 ຄົນ. 25 ຈາກນັ້ນ ຂ້ອຍກໍຊັ່ງເງິນ ຄຳ ແລະເຄື່ອງໃຊ້ຕ່າງໆທີ່ກະສັດ ພວກທີ່ປຶກສາກັບພວກເຈົ້ານາຍທີ່ເຮັດວຽກໃຫ້ກະສັດ ແລະພວກອິດສະຣາເອນທຸກຄົນບໍລິຈາກໃຫ້ວິຫານຂອງພະເຈົ້າ.+ 26 ຫຼັງຈາກທີ່ຊັ່ງເຄື່ອງທັງໝົດແລ້ວ ຂ້ອຍກໍເອົາໃຫ້ພວກຫົວໜ້າຂອງປະໂລຫິດ. ຂ້ອຍຊັ່ງເງິນໜັກ 650 ຕະລັນ;* ເຄື່ອງໃຊ້ທີ່ເປັນເງິນ 100 ອັນທີ່ມີລາຄາສ່ຳກັບ 2 ຕະລັນ;* ຄຳ 100 ຕະລັນ;* 27 ຖ້ວຍນ້ອຍ 20 ໃບທີ່ເປັນຄຳເຊິ່ງມີລາຄາສ່ຳກັບ 1.000 ດາຣິກ* ກັບເຄື່ອງໃຊ້ 2 ອັນທີ່ເປັນທອງແດງຄຸນນະພາບດີ ເຫຼື້ອມ ແລະມີຄ່າສ່ຳກັບຄຳ.
28 ຈາກນັ້ນ ຂ້ອຍບອກເຂົາເຈົ້າວ່າ: “ພວກເຈົ້າເປັນຄົນບໍລິສຸດສຳລັບພະເຢໂຫວາ+ ເຄື່ອງໃຊ້ຕ່າງໆກໍບໍລິສຸດ ແລະເງິນກັບຄຳເປັນສິ່ງທີ່ບໍລິຈາກໃຫ້ພະເຢໂຫວາພະເຈົ້າຂອງປູ່ຍ່າຕານາຍຂອງພວກເຈົ້າດ້ວຍຄວາມສະໝັກໃຈ. 29 ໃຫ້ພວກເຈົ້າເບິ່ງເຄື່ອງທັງໝົດນີ້ດີໆຈົນໄປຮອດເມືອງເຢຣູຊາເລັມ+ແລະຊັ່ງເຄື່ອງເຫຼົ່ານີ້ຢູ່ຫ້ອງມ້ຽນເຄື່ອງ*ໃນວິຫານຂອງພະເຢໂຫວາຕໍ່ໜ້າພວກຫົວໜ້າຂອງປະໂລຫິດ ພວກເລວີ ແລະພວກຫົວໜ້າໃນຈຸ້ມເຈື້ອຕ່າງໆຂອງອິດສະຣາເອນ.” 30 ພວກປະໂລຫິດກັບພວກເລວີກໍເອົາເງິນເອົາຄຳ ແລະເຄື່ອງໃຊ້ຕ່າງໆທີ່ຊັ່ງຕໍ່ໜ້າເຂົາເຈົ້າໄປວິຫານຂອງພະເຈົ້າຢູ່ເມືອງເຢຣູຊາເລັມ.
31 ໃນວັນທີ 12 ຂອງເດືອນທີ 1+ ພວກເຮົາເດີນທາງອອກຈາກແຄມແມ່ນ້ຳອາຮາວາ+ເພື່ອໄປເມືອງເຢຣູຊາເລັມ. ຍ້ອນພະເຈົ້າຢູ່ກັບພວກເຮົາແລະປົກປ້ອງພວກເຮົາ ພວກເຮົາຈຶ່ງລອດຈາກສັດຕູແລະບໍ່ຖືກລັດຂ້າ. 32 ແລ້ວພວກເຮົາກໍມາຮອດເມືອງເຢຣູຊາເລັມ+ ແລະພັກຜ່ອນຢູ່ຫັ້ນ 3 ມື້. 33 ໃນມື້ທີ 4 ພວກເຮົາໄດ້ເອົາເງິນເອົາຄຳກັບເຄື່ອງໃຊ້ຕ່າງໆທີ່ຢູ່ວິຫານຂອງພະເຈົ້າ+ອອກມາຊັ່ງແລະເອົາໃຫ້ເມເຣໂມດ+ລູກຊາຍຂອງປະໂລຫິດອຸຣີຢາ. ຢູ່ກັບເມເຣໂມດມີເອເລອາຊາລູກຊາຍຂອງຟີເນຮາດ ຄົນເລວີທີ່ຊື່ໂຢຊາບັດ+ລູກຊາຍຂອງເຢຊູອາ ແລະໂນອາດີຢາລູກຊາຍຂອງບິນນຸຍ.+ 34 ພວກເຮົານັບ ຊັ່ງນ້ຳໜັກ ແລະຈົດທຸກຢ່າງໄວ້. 35 ພວກເຮົາທີ່ກັບມາຈາກບາບີໂລນໄດ້ເຜົາເຄື່ອງບູຊາໃຫ້ພະເຈົ້າຂອງອິດສະຣາເອນ. ພວກເຮົາເຜົາງົວໂຕຜູ້+ 12 ໂຕສຳລັບພວກອິດສະຣາເອນທຸກຄົນ ແກະໂຕຜູ້+ 96 ໂຕ ແລະແກະນ້ອຍໂຕຜູ້ 77 ໂຕ. ພວກເຮົາຍັງໄດ້ເຜົາແບ້ໂຕຜູ້+ 12 ໂຕເພື່ອເປັນເຄື່ອງບູຊາໄຖ່ບາບ. ພວກເຮົາເຜົາສັດທັງໝົດນີ້ເປັນເຄື່ອງບູຊາເຜົາໃຫ້ພະເຢໂຫວາ.+
36 ຈາກນັ້ນ ພວກເຮົາເອົາຄຳສັ່ງຂອງກະສັດ+ໄປໃຫ້ຕົວແທນ*ຂອງກະສັດແລະເຈົ້າແຂວງທີ່ຢູ່ເຂດທາງທິດຕາເວັນຕົກຂອງແມ່ນ້ຳເອິຟາຣາດ.+ ເຂົາເຈົ້າສະໜັບສະໜູນປະຊາຊົນແລະເອົາສິ່ງທີ່ຈຳເປັນໃຫ້ວິຫານຂອງພະເຈົ້າທ່ຽງແທ້.+