ຈົດໝາຍສະບັບທີສອງເຖິງຄລິດສະຕຽນໃນເມືອງໂກຣິນໂທ
10 ຕອນນີ້ ຂ້ອຍໂປໂລຂໍຮ້ອງພວກເຈົ້າຢ່າງອ່ອນໂຍນແລະກະລຸນາຄືກັບພະຄລິດ.+ ບາງຄົນເວົ້າວ່າຕອນທີ່ຂ້ອຍຢູ່ກັບພວກເຈົ້າຂ້ອຍເປັນຄົນບໍ່ກ້າ+ ແຕ່ຕອນທີ່ຂ້ອຍຂຽນຈົດໝາຍຂ້ອຍພັດມັກຂຽນແບບກົງໂພດ.+ 2 ຂ້ອຍຫວັງວ່າຕອນທີ່ໄປຮອດ ຂ້ອຍຈະບໍ່ຕ້ອງເຮັດແບບເດັດຂາດກັບຄົນທີ່ຄິດວ່າພວກເຮົາໃຊ້ຊີວິດຕາມຄວາມຄິດແບບໂລກ. 3 ເຖິງວ່າພວກເຮົາໃຊ້ຊີວິດແບບຄົນທົ່ວໄປ ແຕ່ເມື່ອພວກເຮົາສູ້ຮົບ ພວກເຮົາກໍບໍ່ໄດ້ເຮັດຄືກັບຄົນທົ່ວໄປ. 4 ອາວຸດທີ່ພວກເຮົາໃຊ້ສູ້ຮົບບໍ່ແມ່ນອາວຸດແບບທີ່ຄົນໃນໂລກນີ້ໃຊ້.+ ອາວຸດຂອງພວກເຮົາມາຈາກພະເຈົ້າແລະມີພະລັງຫຼາຍ.+ ມັນສາມາດທຳລາຍສິ່ງທີ່ຝັງຮາກເລິກໄດ້. 5 ພວກເຮົາກຳລັງຫັກລ້າງການຫາເຫດຜົນແບບຜິດໆແລະທຸກສິ່ງທີ່ຂັດກັບຄວາມຮູ້ກ່ຽວກັບພະເຈົ້າ.+ ພວກເຮົາກຳລັງເຮັດໃຫ້ຄວາມຄິດທຸກຢ່າງຢູ່ໃຕ້ການຄວບຄຸມເພື່ອໃຫ້ເຊື່ອຟັງພະຄລິດ. 6 ເມື່ອພວກເຈົ້າເຊື່ອຟັງຢ່າງຄົບຖ້ວນແລ້ວ ພວກເຮົາກໍພ້ອມຈະລົງໂທດຜູ້ໃດກໍຕາມທີ່ຍັງບໍ່ຍອມເຊື່ອຟັງ.+
7 ພວກເຈົ້າຕັດສິນຄົນຈາກພາຍນອກ. ຖ້າຜູ້ໃດໝັ້ນໃຈວ່າໂຕເອງເປັນລູກສິດຂອງພະຄລິດ ກໍຢ່າລືມຄວາມຈິງຂໍ້ນີ້ທີ່ວ່າ ພວກເຮົາກໍເປັນລູກສິດຂອງພະຄລິດຄືກັບຜູ້ນັ້ນແຫຼະ. 8 ເຖິງວ່າຂ້ອຍຈະອວດຫຼາຍແດ່ແຕ່ຂ້ອຍກໍບໍ່ອາຍ ຍ້ອນພວກເຮົາໄດ້ຮັບອຳນາດຈາກຜູ້ເປັນນາຍເພື່ອເຮັດໃຫ້ພວກເຈົ້າເຂັ້ມແຂງຂຶ້ນ ບໍ່ແມ່ນເພື່ອທຳລາຍ.+ 9 ຂ້ອຍບໍ່ຢາກໃຫ້ພວກເຈົ້າຄິດວ່າຂ້ອຍກຳລັງໃຊ້ຈົດໝາຍຂູ່ພວກເຈົ້າໃຫ້ຢ້ານ. 10 ມີບາງຄົນເວົ້າວ່າ: “ແມ່ນຢູ່ຈົດໝາຍຂອງລາວມີນ້ຳໜັກແລະມີພະລັງ ແຕ່ຕອນທີ່ລາວຢູ່ນີ້ ລາວເບິ່ງຄືອ່ອນແອແລະຄຳເວົ້າຂອງລາວກໍບໍ່ມີຄ່າ.” 11 ໃຫ້ຄົນເຫຼົ່ານັ້ນຮູ້ວ່າ ພວກເຮົາເວົ້າໃນຈົດໝາຍແບບໃດຕອນທີ່ບໍ່ໄດ້ຢູ່ນຳ ພວກເຮົາກໍຈະເຮັດແບບນັ້ນຕອນທີ່ຢູ່ຫັ້ນ.+ 12 ພວກເຮົາບໍ່ກ້າໄປທຽບລະດັບຫຼືເອົາໂຕໄປສົມທຽບກັບບາງຄົນທີ່ຍົກຍ້ອງໂຕເອງດອກ.+ ຄົນເຫຼົ່ານີ້ເອົາໂຕເອງເປັນມາດຕະຖານຕັດສິນໂຕເອງແລະປຽບທຽບກັນເອງ. ເຂົາເຈົ້າບໍ່ເຂົ້າໃຈຫຍັງເລີຍ.+
13 ພວກເຮົາຈະອວດ ແຕ່ກໍບໍ່ຫຼາຍເກີນໄປ. ພວກເຮົາຈະບໍ່ອວດໃນວຽກທີ່ພວກເຮົາບໍ່ໄດ້ເຮັດ ແຕ່ຈະອວດສະເພາະວຽກທີ່ພະເຈົ້າມອບໝາຍໃຫ້ເຮັດເທົ່ານັ້ນ ເຊິ່ງລວມເຖິງການປະກາດກັບພວກເຈົ້ານຳ.+ 14 ຕອນທີ່ພວກເຮົາໄປຫາພວກເຈົ້າ ພວກເຮົາບໍ່ໄດ້ເຮັດແນວອື່ນນອກຈາກວຽກທີ່ພະເຈົ້າມອບໝາຍໃຫ້ເຮັດ ແລະພວກເຮົາເປັນພວກທຳອິດທີ່ໄປປະກາດຂ່າວດີເລື່ອງພະຄລິດກັບພວກເຈົ້າ.+ 15 ພວກເຮົາຈະອວດສະເພາະສິ່ງທີ່ກ່ຽວຂ້ອງກັບວຽກທີ່ໄດ້ຮັບມອບໝາຍ ບໍ່ແມ່ນວຽກໜັກທີ່ຄົນອື່ນເຮັດ. ພວກເຮົາຫວັງວ່າເມື່ອຄວາມເຊື່ອຂອງພວກເຈົ້າເພີ່ມຂຶ້ນ ວຽກທີ່ພວກເຮົາເຮັດກໍຈະເກີດຜົນໃນເຂດປະກາດຂອງພວກເຮົາຫຼາຍຂຶ້ນຄືກັນ. ແລ້ວພວກເຮົາຈະໄດ້ຂະຫຍາຍວຽກໃຫ້ກວ້າງຂຶ້ນອີກ 16 ເພື່ອພວກເຮົາຈະປະກາດຂ່າວດີໃນດິນແດນອື່ນໆທີ່ຢູ່ໄກກວ່າພວກເຈົ້າອີກ. ພວກເຮົາຈຶ່ງບໍ່ຕ້ອງອວດໃນວຽກທີ່ຄົນອື່ນໄດ້ເຮັດແລ້ວ. 17 “ຄົນທີ່ອວດກໍໃຫ້ອວດຍ້ອນວ່າລາວຮູ້ຈັກພະເຢໂຫວາ.”*+ 18 ພະເຢໂຫວາ*ບໍ່ຍອມຮັບຄົນທີ່ຍົກຍ້ອງໂຕເອງ+ ແຕ່ຍອມຮັບຄົນທີ່ເພິ່ນຍົກຍ້ອງ.+