ເອເຊກຽນ
44 ລາວພາຂ້ອຍໄປທາງເຂົ້າທີ່ຢູ່ທາງທິດຕາເວັນອອກອີກເທື່ອໜຶ່ງ+ ແຕ່ປະຕູຂອງທາງເຂົ້ານີ້ອັດໄວ້.+ 2 ແລ້ວພະເຢໂຫວາເວົ້າກັບຂ້ອຍວ່າ: “ປະຕູທາງເຂົ້ານີ້ຈະຕ້ອງອັດໄວ້ແບບນີ້. ມັນຈະບໍ່ຖືກເປີດອີກເລີຍ ແລະຈະບໍ່ມີຜູ້ໃດເຂົ້າໄປທາງນີ້. ມັນຈະຖືກອັດໄວ້ແບບນີ້ຕະຫຼອດ ຍ້ອນພະເຢໂຫວາພະເຈົ້າຂອງອິດສະຣາເອນໄດ້ເຂົ້າໄປທາງນີ້ແລ້ວ.+ 3 ແຕ່ຫົວໜ້າຈະນັ່ງກິນເຂົ້າຈີ່ຕໍ່ໜ້າພະເຢໂຫວາຢູ່ນີ້+ ຍ້ອນລາວເປັນຫົວໜ້າ. ລາວຈະເຂົ້າໄປໃນທາງເຂົ້ານີ້ຜ່ານຫ້ອງໃຫຍ່ແລະຈະອອກມາທາງນີ້ຄືເກົ່າ.”+
4 ຈາກນັ້ນ ລາວກໍພາຂ້ອຍໄປໜ້າວິຫານຜ່ານທາງເຂົ້າທີ່ຢູ່ທິດເໜືອ. ຂ້ອຍເຫັນແສງລັດສະໝີຂອງພະເຢໂຫວາເຕັມວິຫານຂອງພະເຢໂຫວາ+ ຂ້ອຍຈຶ່ງໝູບໜ້າລົງພື້ນ.+ 5 ແລ້ວພະເຢໂຫວາກໍເວົ້າກັບຂ້ອຍວ່າ: “ລູກມະນຸດ ໃຫ້ເຈົ້າເບິ່ງຄັກໆ ຟັງດີໆ ແລະຈື່ທຸກສິ່ງທີ່ເຮົາບອກເຈົ້າກ່ຽວກັບຄຳສັ່ງແລະກົດຂອງວິຫານຂອງພະເຢໂຫວາ. ໃຫ້ເຈົ້າເບິ່ງທາງເຂົ້າທາງອອກຂອງວິຫານຄັກໆ.+ 6 ໃຫ້ເຈົ້າບອກພວກອິດສະຣາເອນທີ່ມັກກະບົດວ່າ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ພວກອິດສະຣາເອນເອີ້ຍ ພວກເຈົ້າເຮັດສິ່ງທີ່ເປັນຕາຂີ້ດຽດຫຼາຍແລ້ວ ເຊົາແມ້! 7 ເມື່ອພວກເຈົ້າພາຄົນຕ່າງຊາດທີ່ບໍ່ໄດ້ຮັບສິນຕັດ*ແລະມີໃຈດື້ດ້ານ*ເຂົ້າມາວິຫານຂອງເຮົາ ເຂົາເຈົ້າໄດ້ເຮັດໃຫ້ວິຫານຂອງເຮົາບໍ່ສະອາດ. ພວກເຈົ້າເອົາເຂົ້າຈີ່ ນ້ຳມັນສັດ ແລະເລືອດມາໃຫ້ເຮົາ ແຕ່ຍັງເຮັດສິ່ງທີ່ເປັນຕາຂີ້ດຽດຢູ່. ພວກເຈົ້າບໍ່ໄດ້ເຮັດຕາມສັນຍາທີ່ເຮັດໄວ້ກັບເຮົາ. 8 ພວກເຈົ້າບໍ່ໄດ້ເບິ່ງແຍງສິ່ງທີ່ບໍລິສຸດຂອງເຮົາ+ ແຕ່ພັດໃຫ້ຜູ້ອື່ນເບິ່ງແຍງວຽກໃນວິຫານຂອງເຮົາ.”’
9 ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ຄົນຕ່າງຊາດທີ່ຢູ່ອິດສະຣາເອນທີ່ບໍ່ໄດ້ຮັບສິນຕັດແລະມີໃຈດື້ດ້ານຈະເຂົ້າມາໃນວິຫານຂອງເຮົາບໍ່ໄດ້.”’
10 ‘ສຳລັບພວກເລວີທີ່ເຄີຍປະຖິ້ມເຮົາ+ຕອນທີ່ພວກອິດສະຣາເອນປະຖິ້ມເຮົາໄປນະມັດສະການຮູບບູຊາທີ່ເປັນຕາຂີ້ດຽດ* ເຮົາຈະໃຫ້ເຂົາເຈົ້າໄດ້ຮັບຜົນສຳລັບຄວາມຜິດຂອງໂຕເອງ. 11 ແຕ່ຫຼັງຈາກນັ້ນ ເຂົາເຈົ້າຈະກັບມາເຮັດວຽກຢູ່ວິຫານຂອງເຮົາ ເພື່ອຈະເບິ່ງແຍງທາງເຂົ້າຂອງວິຫານ+ແລະຮັບໃຊ້ຢູ່ວິຫານ. ເຂົາເຈົ້າຈະຂ້າສັດເພື່ອເປັນເຄື່ອງບູຊາເຜົາກັບເຄື່ອງບູຊາອື່ນໆ ແລະຈະຮັບໃຊ້ປະຊາຊົນຢູ່ບ່ອນທີ່ເຂົາເຈົ້າໄດ້ຮັບມອບໝາຍ. 12 ຍ້ອນເຂົາເຈົ້າໄດ້ຮັບໃຊ້ປະຊາຊົນຕອນທີ່ຄົນເຫຼົ່ານີ້ນະມັດສະການຮູບບູຊາທີ່ເປັນຕາຂີ້ດຽດຂອງເຂົາເຈົ້າ ແລະເປັນຕົ້ນເຫດພາໃຫ້ພວກອິດສະຣາເອນເຮັດຜິດ+ ເຮົາຈຶ່ງຍົກມືສາບານວ່າ ເຮົາຈະລົງໂທດເຂົາເຈົ້າ ແລະເຂົາເຈົ້າຈະໄດ້ຮັບຜົນຈາກການກະທຳຂອງໂຕເອງ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້. 13 ‘ເຂົາເຈົ້າຈະບໍ່ໄດ້ເປັນປະໂລຫິດຮັບໃຊ້ຢູ່ຕໍ່ໜ້າເຮົາແລະຈະບໍ່ໄດ້ເຂົ້າໃກ້ສິ່ງທີ່ບໍລິສຸດທີ່ສຸດຂອງເຮົາ. ເຂົາເຈົ້າຈະອັບອາຍຍ້ອນສິ່ງທີ່ເປັນຕາຂີ້ດຽດທີ່ເຂົາເຈົ້າໄດ້ເຮັດ 14 ແຕ່ເຮົາຈະໃຫ້ເຂົາເຈົ້າເບິ່ງແຍງວຽກຕ່າງໆຂອງວິຫານ. ເຂົາເຈົ້າຈະເບິ່ງແຍງວຽກຮັບໃຊ້ແລະວຽກອື່ນໆທີ່ຄວນຈະເຮັດຢູ່ຫັ້ນ.’+
15 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ສຳລັບພວກປະໂລຫິດຄົນເລວີທີ່ເປັນລູກຫຼານຂອງຊາໂດກ+ທີ່ເຮັດວຽກຮັບໃຊ້ຕ່າງໆຢູ່ບ່ອນບໍລິສຸດຂອງເຮົາຕອນທີ່ພວກອິດສະຣາເອນປະຖິ້ມເຮົາ+ ເຂົາເຈົ້າຈະໄດ້ຮັບໃຊ້ຢູ່ຕໍ່ໜ້າເຮົາແລະເຂົາເຈົ້າຈະເອົານ້ຳມັນ+ກັບເລືອດມາໃຫ້ເຮົາ.+ 16 ເຂົາເຈົ້າຈະໄດ້ເຂົ້າມາວິຫານຂອງເຮົາແລະຮັບໃຊ້ຢູ່ໂຕະຂອງເຮົາ.+ ເຂົາເຈົ້າຈະເຮັດວຽກຕ່າງໆໃຫ້ເຮົາ.+
17 ເມື່ອເຂົ້າໄປທາງເຂົ້າຂອງເດີ່ນທາງໃນ ເຂົາເຈົ້າຕ້ອງໃສ່ເຄື່ອງນຸ່ງທີ່ເປັນຜ້າລີນິນ.+ ເມື່ອຮັບໃຊ້ຢູ່ທາງເຂົ້າຂອງເດີນທາງໃນຫຼືຢູ່ບໍລິເວນນັ້ນ ເຂົາເຈົ້າຕ້ອງບໍ່ໃສ່ເຄື່ອງນຸ່ງທີ່ເປັນຂົນແກະ. 18 ເຂົາເຈົ້າຕ້ອງໃສ່ຜ້າຄຽນຫົວທີ່ເປັນຜ້າລີນິນ ແລະຕ້ອງໃສ່ໂສ້ງຂາສັ້ນທີ່ເປັນຜ້າລີນິນ.+ ເຂົາເຈົ້າຕ້ອງບໍ່ໃສ່ເຄື່ອງນຸ່ງທີ່ເຮັດໃຫ້ເຫື່ອອອກ. 19 ກ່ອນຈະອອກໄປເດີ່ນທາງນອກເຊິ່ງເປັນເດີ່ນສຳລັບຄົນທົ່ວໄປ ເຂົາເຈົ້າຕ້ອງແກ້ເຄື່ອງນຸ່ງທີ່ນຸ່ງຕອນຮັບໃຊ້ພະເຈົ້າອອກກ່ອນ+ ແລະເອົາເຄື່ອງນຸ່ງເຫຼົ່ານັ້ນໄປໄວ້ຢູ່ຫ້ອງກິນເຂົ້າທີ່ບໍລິສຸດ*+ ແລ້ວໃສ່ເຄື່ອງນຸ່ງໂຕອື່ນແທນ ເພື່ອເຂົາເຈົ້າຈະບໍ່ສົ່ງຕໍ່ຄວາມບໍລິສຸດໃຫ້ຄົນອື່ນໂດຍທາງເຄື່ອງນຸ່ງນັ້ນ. 20 ເຂົາເຈົ້າຕ້ອງບໍ່ແຖຫົວ+ຫຼືຈົ່ງຜົມຍາວ ແຕ່ຕ້ອງຕັດຜົມໃຫ້ຮຽບຮ້ອຍ. 21 ພວກປະໂລຫິດຕ້ອງບໍ່ກິນເຫຼົ້າແວງຕອນທີ່ເຂົ້າໄປເດີ່ນທາງໃນ.+ 22 ເຂົາເຈົ້າຕ້ອງບໍ່ເອົາແມ່ຮ້າງຫຼືແມ່ໝ້າຍມາເປັນເມຍ+ ແຕ່ເຂົາເຈົ້າແຕ່ງດອງກັບສາວບໍລິສຸດທີ່ເປັນລູກຫຼານຂອງຄົນອິດສະຣາເອນໄດ້ ຫຼືແຕ່ງກັບແມ່ໝ້າຍທີ່ເຄີຍມີຜົວເປັນປະໂລຫິດກໍໄດ້.’+
23 ‘ເຂົາເຈົ້າຕ້ອງສອນປະຊົນໃຫ້ຮູ້ຄວາມແຕກຕ່າງລະຫວ່າງສິ່ງທີ່ບໍລິສຸດກັບສິ່ງທີ່ບໍ່ບໍລິສຸດ ແລະລະຫວ່າງສິ່ງທີ່ສະອາດກັບສິ່ງທີ່ບໍ່ສະອາດ.+ 24 ເຂົາເຈົ້າຕ້ອງເຮັດໜ້າທີ່ເປັນຜູ້ຕັດສິນຄະດີ+ ແລະຕ້ອງຕັດສິນຕາມກົດໝາຍຂອງເຮົາ.+ ເຂົາເຈົ້າຕ້ອງເຮັດຕາມກົດໝາຍແລະຄຳສັ່ງຂອງເຮົາກ່ຽວກັບເທດສະການຕ່າງໆ+ ແລະຕ້ອງຖືວັນຊະບາໂຕຂອງເຮົາ. 25 ເຂົາເຈົ້າຕ້ອງບໍ່ໄປໃກ້ຄົນຕາຍ ຄັນບໍ່ຊັ້ນເຂົາເຈົ້າຈະບໍ່ສະອາດ. ແຕ່ເຂົາເຈົ້າອາດເຮັດໃຫ້ໂຕເອງບໍ່ສະອາດກໍໄດ້ ຖ້າຄົນທີ່ຕາຍແມ່ນພໍ່ ແມ່ ລູກຊາຍ ລູກສາວ ອ້າຍ ນ້ອງຊາຍ ຫຼືເອື້ອຍຫຼືນ້ອງສາວທີ່ຍັງບໍ່ໄດ້ແຕ່ງດອງ.+ 26 ຫຼັງຈາກປະໂລຫິດເຮັດໃຫ້ໂຕເອງສະອາດແລ້ວ ລາວຕ້ອງຖ້າອີກ 7 ມື້ເພື່ອຈະເຮັດວຽກຮັບໃຊ້ໄດ້ອີກ. 27 ໃນມື້ທີ່ລາວເຂົ້າໄປເຮັດວຽກຮັບໃຊ້ຢູ່ບ່ອນບໍລິສຸດທີ່ຢູ່ເດີ່ນທາງໃນ ລາວຕ້ອງເອົາເຄື່ອງບູຊາໄຖ່ບາບສຳລັບໂຕເອງໄປໃຫ້ພະເຈົ້າ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
28 ‘ເຂົາເຈົ້າຈະໄດ້ຮັບມໍລະດົກ. ເຮົາຈະເປັນມໍລະດົກຂອງເຂົາເຈົ້າ.+ ພວກເຈົ້າບໍ່ຕ້ອງແບ່ງດິນມູນໃຫ້ເຂົາເຈົ້າ ຍ້ອນເຮົາຈະເປັນມໍລະດົກຂອງເຂົາເຈົ້າ. 29 ເຂົາເຈົ້າຈະໄດ້ກິນເຄື່ອງບູຊາທີ່ເຮັດຈາກເມັດເຂົ້າ+ ເຄື່ອງບູຊາໄຖ່ບາບ ເຄື່ອງບູຊາໄຖ່ຄວາມຜິດ+ ແລະທຸກສິ່ງທີ່ພວກອິດສະຣາເອນເອົາມາໃຫ້ພະເຈົ້າກໍຈະເປັນຂອງເຂົາເຈົ້າ.+ 30 ຜົນລະປູກຊຸດທຳອິດທີ່ດີທີ່ສຸດແລະເຄື່ອງທຸກຢ່າງທີ່ພວກອິດສະຣາເອນເອົາມາໃຫ້ຈະເປັນຂອງພວກປະໂລຫິດ.+ ພວກເຈົ້າຕ້ອງເອົາແປ້ງທີ່ບົດບໍ່ລະອຽດທີ່ໄດ້ຈາກຜົນລະປູກຊຸດທຳອິດມາໃຫ້ພວກປະໂລຫິດ.+ ຖ້າເຮັດແບບນີ້ ຄອບຄົວຂອງພວກເຈົ້າກໍຈະໄດ້ຮັບພອນ.+ 31 ພວກປະໂລຫິດຕ້ອງບໍ່ກິນນົກ ສັດທີ່ຕາຍເອງ ຫຼືສັດທີ່ຖືກສັດໂຕອື່ນກັດຕາຍ.’”+