ລະບຽບພວກເລວີ
25 ພະເຢໂຫວາເວົ້າກັບໂມເຊຢູ່ພູຊີນາຍຕື່ມອີກວ່າ: 2 “ໃຫ້ບອກພວກອິດສະຣາເອນວ່າ ‘ເມື່ອໄປຮອດແຜ່ນດິນທີ່ເຮົາຈະເອົາໃຫ້ເຈົ້າ+ ເຈົ້າຕ້ອງຖືປີຊະບາໂຕສຳລັບພະເຢໂຫວາ ແລະປະແຜ່ນດິນນັ້ນໃຫ້ໄດ້ພັກ.+ 3 ເຈົ້າຫວ່ານແນວປູກ ຕັດແຕ່ງເຄືອໝາກລະແຊັງ ແລະເກັບກ່ຽວຜົນລະປູກໃນດິນຂອງເຈົ້າໄດ້ 6 ປີ.+ 4 ແຕ່ໃນປີທີ 7 ເຈົ້າຕ້ອງຖືປີຊະບາໂຕສຳລັບພະເຢໂຫວາ ແລະປະດິນໄວ້ເພື່ອໃຫ້ໄດ້ພັກ. ຫ້າມເຈົ້າຫວ່ານແນວປູກ ຫຼືຕັດແຕ່ງເຄືອໝາກລະແຊັງ. 5 ຫ້າມເກັບກ່ຽວຜົນລະປູກທີ່ເກີດຂຶ້ນເອງຫຼັງຈາກເຈົ້າເກັບກ່ຽວຜົນລະປູກຂອງປີທີ 6 ແລ້ວໆ ແລະຫ້າມເກັບໝາກລະແຊັງຢູ່ເຄືອທີ່ເຈົ້າບໍ່ໄດ້ຕັດແຕ່ງ. ເຈົ້າຕ້ອງປະໃຫ້ດິນໄດ້ພັກແທ້ໆໃນໄລຍະ 1 ປີນັ້ນ. 6 ແຕ່ຖ້າເຈົ້າຢາກເກັບຜົນລະປູກທີ່ເກີດຂຶ້ນເອງໃນປີຊະບາໂຕມາກິນເອງໃນແຕ່ລະມື້ກໍເຮັດໄດ້. ເຈົ້າກັບພວກທາດຂອງເຈົ້າ ຄົນທີ່ມາເຮັດວຽກໃຫ້ເຈົ້າ ຄົນຕ່າງຊາດທີ່ຢູ່ນຳເຈົ້າ 7 ແມ່ນແຕ່ສັດລ້ຽງແລະສັດປ່າຢູ່ໃນແຜ່ນດິນຂອງເຈົ້າຈະກິນຜົນລະປູກນັ້ນໄດ້. ຜົນລະປູກທຸກຢ່າງທີ່ເກີດຂຶ້ນເອງກິນໄດ້ໝົດ.
8 ໃຫ້ເຈົ້ານັບປີຊະບາໂຕ 7 ເທື່ອ. ນີ້ໝາຍເຖິງ 7 ປີຄູນ 7 ເທື່ອ ເຊິ່ງຈະເທົ່າກັບ 49 ປີ. 9 ໃຫ້ເຈົ້າເປົ່າແກດັງໆໃນວັນທີ 10 ຂອງເດືອນທີ 7 ຂອງປີນັ້ນ ເຊິ່ງເປັນວັນໄຖ່ຄວາມຜິດ.+ ເຈົ້າຕ້ອງເປົ່າແກໃຫ້ດັງກ້ອງໄປທົ່ວແຜ່ນດິນ. 10 ປີທີ 50 ພະເຈົ້າຈະຖືວ່າເປັນປີທີ່ບໍລິສຸດ. ເຈົ້າຕ້ອງປະກາດການປົດປ່ອຍໃຫ້ເປັນອິດສະຫຼະໃຫ້ທຸກຄົນ.+ ປີນັ້ນຈະເປັນປີແຫ່ງອິດສະຫຼະ.* ເຈົ້າຈະໄດ້ດິນທີ່ຂາຍໄປແລ້ວຄືນມາ ແລະຜູ້ໃດທີ່ຖືກຂາຍໄປເປັນທາດກໍຊິໄດ້ກັບໄປຢູ່ນຳຄອບຄົວຄືເກົ່າ.+ 11 ປີທີ 50 ຈະເປັນປີແຫ່ງອິດສະຫຼະຂອງເຈົ້າ. ບໍ່ໃຫ້ເຈົ້າຫວ່ານແນວປູກ ຫຼືເກັບກ່ຽວຜົນລະປູກທີ່ເກີດຂຶ້ນເອງຫຼັງຈາກທີ່ເກັບກ່ຽວແລ້ວ ແລະບໍ່ໃຫ້ເກັບກ່ຽວໝາກລະແຊັງຢູ່ເຄືອທີ່ເຈົ້າບໍ່ໄດ້ຕັດແຕ່ງ.+ 12 ເຈົ້າຕ້ອງຖືວ່າປີແຫ່ງອິດສະຫຼະນັ້ນເປັນປີບໍລິສຸດ. ເຈົ້າຕ້ອງກິນແຕ່ຜົນລະປູກທີ່ມັນເກີດຂຶ້ນເອງເທົ່ານັ້ນ.+
13 ໃນປີແຫ່ງອິດສະຫຼະ ເຈົ້າຈະໄດ້ດິນທີ່ຂາຍໄປແລ້ວຄືນມາ. ຜູ້ໃດທີ່ຖືກຂາຍໄປເປັນທາດກໍຊິໄດ້ກັບໄປຢູ່ນຳຄອບຄົວຄືເກົ່າ.+ 14 ຖ້າເຈົ້າຊື້ຫຼືຂາຍຫຍັງກໍບໍ່ໃຫ້ເອົາລັດເອົາປຽບກັນ.+ 15 ຖ້າເຈົ້າຈະຊື້ດິນ ເຈົ້າຕ້ອງຄິດໄລ່ວ່າປີແຫ່ງອິດສະຫຼະເທື່ອຫຼ້າສຸດນັ້ນຜ່ານໄປໄດ້ຈັກປີແລ້ວ ແລະຜູ້ຂາຍຕ້ອງກຳນົດລາຄາດິນນັ້ນໃຫ້ເຈົ້າ ໂດຍຄິດໄລ່ວ່າຈະເກັບກ່ຽວຜົນລະປູກໄດ້ຈັກປີ.+ 16 ຖ້າຍັງເຫຼືອຫຼາຍປີກໍຂາຍໃນລາຄາສູງໄດ້ ແຕ່ຖ້າເຫຼືອບໍ່ເທົ່າໃດປີກໍຕ້ອງຫຼຸດລາຄາລົງ ຍ້ອນລາວຕ້ອງຂາຍຕາມຈຳນວນປີທີ່ເຈົ້າຈະເກັບກ່ຽວໄດ້. 17 ຫ້າມເອົາລັດເອົາປຽບກັນ.+ ເຈົ້າຕ້ອງຢ້ານຢຳພະເຈົ້າຂອງເຈົ້າ.+ ເຮົາແມ່ນເຢໂຫວາພະເຈົ້າຂອງເຈົ້າ.+ 18 ຖ້າເຈົ້າເຊື່ອຟັງກົດໝາຍແລະຄຳສັ່ງຂອງເຮົາ ເຈົ້າຈະຢູ່ຫັ້ນໂດຍບໍ່ຕ້ອງກັງວົນຫຍັງ.+ 19 ແຜ່ນດິນຈະເກີດຜົນລະປູກຫຼາຍ+ ແລະເຈົ້າຊິໄດ້ກິນຈົນໜຳໃຈ. ເຈົ້າຈະຢູ່ຫັ້ນໂດຍບໍ່ຕ້ອງກັງວົນຫຍັງ.+
20 ເຈົ້າອາດຄິດວ່າ: “ຖ້າພວກເຮົາບໍ່ໄດ້ຫວ່ານແນວປູກຫຼືບໍ່ໄດ້ເກັບກ່ຽວຜົນລະປູກ ແລ້ວໃນປີທີ 7 ພວກເຮົາຊິກິນຫຍັງ?”+ 21 ເຈົ້າບໍ່ຕ້ອງເປັນຫ່ວງ. ໃນປີທີ 6 ເຮົາຈະອວຍພອນເຈົ້າ ແລະແຜ່ນດິນຈະເກີດຜົນລະປູກຫຼາຍຈົນກິນໄດ້ຮອດ 3 ປີ.+ 22 ເຖິງວ່າເຈົ້າຈະກັບໄປຫວ່ານແນວປູກອີກໃນປີທີ 8 ເຈົ້າຈະກິນຜົນລະປູກທີ່ເກັບກ່ຽວໄດ້ໃນປີທີ 6 ໄປຈົນຮອດຍາມເກັບກ່ຽວຜົນລະປູກຂອງປີທີ 9.
23 ຫ້າມຂາຍດິນຂອງເຈົ້າແບບຂາຍຂາດ+ ເພາະແຜ່ນດິນນັ້ນເປັນຂອງເຮົາ.+ ເຮົາຈະຖືວ່າພວກເຈົ້າມາອາໄສຢູ່ຄືຄົນຕ່າງຊາດຊື່ໆ+ 24 ແລະທົ່ວແຜ່ນດິນທີ່ເຮົາຈະໃຫ້ເຈົ້າໄປຢູ່ ເຈົ້າຕ້ອງໃຫ້ຄົນທີ່ຂາຍດິນມີສິດຊື້ຄືນໄດ້.
25 ຖ້າຄົນອິດສະຣາເອນຄົນໃດກາຍເປັນຄົນທຸກຍາກແລະຕ້ອງຂາຍດິນຂອງໂຕເອງ ພີ່ນ້ອງຜູ້ທີ່ໃກ້ຊິດຕ້ອງຊື້ດິນນັ້ນຄືນໃຫ້ລາວ.+ 26 ຖ້າຜູ້ໃດບໍ່ມີພີ່ນ້ອງທີ່ຈະຊ່ວຍຊື້ດິນນັ້ນຄືນ ແຕ່ຕໍ່ມາລາວກໍຫາເງິນພໍທີ່ຈະຊື້ດິນນັ້ນຄືນໄດ້ 27 ລາວຕ້ອງຄິດໄລ່ວ່າຜູ້ທີ່ຊື້ດິນໃນຕອນທຳອິດນັ້ນໄດ້ເງິນຈາກຜົນລະປູກທັງໝົດເທົ່າໃດ ແລະເອົາເງິນຈຳນວນນັ້ນມາລົບຈາກລາຄາດິນທີ່ເຄີຍຂາຍໄປ. ເມື່ອລາວຈ່າຍສ່ວນທີ່ຍັງຂາດຢູ່ຄົບແລ້ວ ລາວກໍຈະໄດ້ດິນຂອງລາວກັບຄືນ.+
28 ແຕ່ຖ້າລາວຫາເງິນມາບໍ່ພໍທີ່ຈະຊື້ດິນຄືນໄດ້ ຜູ້ທີ່ຊື້ກໍຈະໄດ້ດິນນັ້ນໄປຈົນຮອດປີແຫ່ງອິດສະຫຼະ+ ແລະໃນປີນັ້ນເຈົ້າຂອງເກົ່າກໍຈະໄດ້ດິນຄືນ.+
29 ຖ້າຜູ້ໃດຂາຍເຮືອນເຊິ່ງຢູ່ໃນເມືອງທີ່ມີກຳແພງອ້ອມ ລາວຈະຍັງມີສິດຊື້ຄືນພາຍໃນ 1 ປີ. ລາວຈະມີສິດນັ້ນ+ຕະຫຼອດ 1 ປີ ຕັ້ງແຕ່ມື້ທີ່ຂາຍໄປ. 30 ແຕ່ຖ້າເຈົ້າຂອງເກົ່າບໍ່ໄດ້ຊື້ເຮືອນຄືນພາຍໃນ 1 ປີ ເຮືອນນັ້ນກໍຈະເປັນຂອງຜູ້ທີ່ຊື້ຕະຫຼອດໄປ. ເຖິງວ່າຈະຮອດປີແຫ່ງອິດສະຫຼະ ລາວກໍຈະບໍ່ໄດ້ເຮືອນຄືນ. 31 ຖ້າເຮືອນຢູ່ນຳກັນເປັນບ້ານ ແຕ່ບໍ່ມີກຳແພງອ້ອມ ຕ້ອງຖືວ່າເຮືອນນັ້ນຢູ່ນອກເມືອງ. ເຈົ້າຂອງເກົ່າມີສິດຊື້ຄືນຍາມໃດກໍໄດ້ ແລະເມື່ອຮອດປີແຫ່ງອິດສະຫຼະ ລາວກໍຈະໄດ້ເຮືອນຄືນ.
32 ສຳລັບເມືອງຕ່າງໆຂອງພວກເລວີ+ ຖ້າຄົນເລວີຂາຍເຮືອນ ລາວມີສິດຊື້ຄືນຍາມໃດກໍໄດ້. 33 ຖ້າຄົນເລວີຄົນນັ້ນບໍ່ໄດ້ຊື້ເຮືອນທີ່ຢູ່ໃນເມືອງຄືນ ລາວກໍຈະໄດ້ເຮືອນຄືນເມື່ອຮອດປີແຫ່ງອິດສະຫຼະ.+ ເປັນແນວນີ້ກໍຍ້ອນວ່າເຮືອນນັ້ນຢູ່ໃນເມືອງຂອງພວກເລວີ ເຊິ່ງເປັນສ່ວນແບ່ງຂອງເຂົາເຈົ້າໃນແຜ່ນດິນຂອງພວກອິດສະຣາເອນ.+ 34 ແຕ່ທົ່ງຫຍ້າ+ຂອງເຂົາເຈົ້າທີ່ຢູ່ອ້ອມໆເມືອງຈະຂາຍບໍ່ໄດ້ ເພາະເປັນສ່ວນແບ່ງຂອງເຂົາເຈົ້າຕະຫຼອດໄປ.
35 ຖ້າຄົນອິດສະຣາເອນຄົນໃດກາຍເປັນຄົນທຸກຍາກ ແລະບໍ່ສາມາດຫາລ້ຽງໂຕເອງໄດ້ ເຈົ້າຕ້ອງຊ່ວຍເຫຼືອລາວ+ຄືກັບຊ່ວຍຄົນຕ່າງຊາດແລະຄົນທີ່ຍ້າຍມາຢູ່ນຳເຈົ້າ+ ເພື່ອລາວຊິບໍ່ຕາຍ. 36 ຢ່າເອົາດອກເບ້ຍຫຼືຫາກຳໄລນຳລາວ.+ ເຈົ້າຕ້ອງຢ້ານຢຳພະເຈົ້າ+ ແລະລາວຈະມີຊີວິດຢູ່ຕໍ່ໄປໄດ້. 37 ຖ້າເຈົ້າເອົາເງິນໃຫ້ລາວຢືມກໍຫ້າມເອົາດອກເບ້ຍນຳ+ ຫຼືຖ້າເອົາອາຫານໃຫ້ກໍບໍ່ຕ້ອງຫວັງເອົາກຳໄລ. 38 ເຮົາແມ່ນເຢໂຫວາພະເຈົ້າຂອງເຈົ້າ. ເຮົາພາເຈົ້າອອກມາຈາກເອຢິບ+ ແລະຈະເອົາແຜ່ນດິນການາອານໃຫ້ເຈົ້າ ເພື່ອສະແດງວ່າເຮົາເປັນພະເຈົ້າຂອງເຈົ້າ.+
39 ຖ້າຄົນອິດສະຣາເອນຄົນໃດກາຍເປັນຄົນທຸກຍາກ ແລະຕ້ອງຂາຍໂຕເອງໃຫ້ເຈົ້າ+ ຫ້າມບັງຄັບລາວໃຫ້ເຮັດວຽກຄືກັບທາດ.+ 40 ເຈົ້າຕ້ອງໃຊ້ລາວຄືກັບຄົນຮັບຈ້າງ+ ແລະຄືກັບຄົນຕ່າງຊາດທີ່ເຮັດວຽກໃຫ້ເຈົ້າ. ລາວຈະເຮັດວຽກໃຫ້ເຈົ້າຈົນຮອດປີແຫ່ງອິດສະຫຼະ. 41 ຈາກນັ້ນ ລາວກັບພວກລູກຂອງລາວຈະກັບໄປຢູ່ກັບພີ່ນ້ອງຂອງລາວ. ລາວຈະກັບໄປຢູ່ດິນຂອງປູ່ຍ່າຕານາຍຂອງລາວ.+ 42 ເຮົາໄດ້ຊື້ຄົນອິດສະຣາເອນທຸກຄົນຈາກແຜ່ນດິນເອຢິບມາເປັນທາດຂອງເຮົາ.+ ຍ້ອນແນວນີ້ ເຂົາເຈົ້າບໍ່ຄວນຖືກຊື້ຂາຍຄືກັບເປັນທາດ. 43 ຫ້າມເຈົ້າກົດຂີ່ເຂົາເຈົ້າ.+ ເຈົ້າຕ້ອງຢ້ານຢຳພະເຈົ້າຂອງເຈົ້າ.+ 44 ຖ້າເຈົ້າຢາກໄດ້ທາດຊາຍຫຼືທາດຍິງ ໃຫ້ເຈົ້າຊື້ຈາກຊາດຕ່າງໆທີ່ຢູ່ອ້ອມຂ້າງເຈົ້າ 45 ຫຼືເຈົ້າຈະຊື້ຄົນຕ່າງຊາດທີ່ຢູ່ນຳພວກເຈົ້າ+ມາເປັນທາດກໍໄດ້. ຖ້າເຈົ້າຊື້ເຂົາເຈົ້າຫຼືລູກຂອງເຂົາເຈົ້າທີ່ເກີດໃນແຜ່ນດິນຂອງເຈົ້າ ທາດເຫຼົ່ານັ້ນກໍຈະເປັນຂອງເຈົ້າ. 46 ເມື່ອເຈົ້າຕາຍ ເຈົ້າຍົກທາດເຫຼົ່ານັ້ນເປັນມໍລະດົກໃຫ້ລູກຂອງເຈົ້າໄດ້. ເຂົາເຈົ້າຈະເຮັດວຽກໃຫ້ລູກຂອງເຈົ້າຕໍ່ໄປ. ແຕ່ຫ້າມກົດຂີ່ຄົນອິດສະຣາເອນນຳກັນ.+
47 ຖ້າຄົນຕ່າງຊາດທີ່ຍ້າຍມາຢູ່ກັບເຈົ້າລວຍຂຶ້ນ ແລ້ວມີຄົນອິດສະຣາເອນຄົນໜຶ່ງກາຍເປັນຄົນທຸກຍາກ ແລະຕ້ອງຂາຍໂຕເອງໃຫ້ຄົນຕ່າງຊາດຄົນນັ້ນຫຼືລູກຫຼານຂອງຄົນນັ້ນ 48 ລາວຍັງມີສິດທີ່ຈະໃຫ້ຄົນອື່ນຊື້ລາວຄືນໄດ້. ອ້າຍນ້ອງຂອງລາວມີສິດຊື້ລາວຄືນໄດ້+ 49 ແລະລຸງ ອາວ ລູກຂອງລຸງ ລູກຂອງອາວ ຫຼືພີ່ນ້ອງໃກ້ຊິດ*ກໍມີສິດຊື້ລາວຄືນໄດ້.
ຖ້າຄົນອິດສະຣາເອນທີ່ຂາຍໂຕເອງໄປເປັນທາດນັ້ນມີເງິນມີຄຳຫຼາຍຂຶ້ນ ລາວກໍມີສິດຊື້ໂຕເອງຄືນໄດ້ຄືກັນ.+ 50 ລາວກັບຄົນທີ່ຈະຊື້ໂຕລາວຕ້ອງຄິດໄລ່ນຳກັນວ່າ ຕັ້ງແຕ່ປີທີ່ລາວຂາຍໂຕເອງໄປຈົນຮອດປີແຫ່ງອິດສະຫຼະມີຈັກປີ.+ ລາຄາທີ່ລາວຖືກຂາຍຕ້ອງຂຶ້ນຢູ່ກັບຈຳນວນປີທີ່ໄດ້ຄິດໄລ່ມານັ້ນ+ ແລະຕາມຄ່າແຮງງານຂອງຄົນຮັບຈ້າງທົ່ວໄປ.+ 51 ຖ້າຍັງເຫຼືອອີກຫຼາຍປີຈົນກວ່າຈະຮອດປີແຫ່ງອິດສະຫຼະ ລາວກໍຕ້ອງຈ່າຍຄືນຕາມຈຳນວນປີທີ່ຍັງເຫຼືອນັ້ນ 52 ຫຼືຖ້າຍັງເຫຼືອບໍ່ຫຼາຍປີ ລາວກໍຕ້ອງຄິດໄລ່ແລະຈ່າຍຄືນຕາມຈຳນວນປີທີ່ຍັງເຫຼືອນັ້ນຄືກັນ. 53 ຕະຫຼອດໄລຍະທີ່ລາວຢູ່ກັບເຈົ້ານາຍທີ່ເປັນຄົນຕ່າງຊາດນັ້ນ ລາວຕ້ອງເຮັດວຽກຄືກັບຄົນຮັບຈ້າງ ແລະຫ້າມເຈົ້ານາຍກົດຂີ່ລາວ.+ 54 ແຕ່ຖ້າລາວບໍ່ສາມາດຊື້ໂຕເອງຄືນໄດ້ ລາວຈະຕ້ອງຖ້າຈົນຮອດປີແຫ່ງອິດສະຫຼະ+ ແລ້ວລາວກັບລູກກໍຈະເປັນອິດສະຫຼະ.
55 ຄົນອິດສະຣາເອນທຸກຄົນເປັນທາດຂອງເຮົາ. ເຮົາໄດ້ຊື້ເຂົາເຈົ້າຈາກແຜ່ນດິນເອຢິບໃຫ້ມາເປັນທາດຂອງເຮົາ.+ ເຮົາແມ່ນເຢໂຫວາພະເຈົ້າຂອງເຈົ້າ.’”