ພວກຜູ້ຕັດສິນ
18 ໃນສະໄໝທີ່ພວກອິດສະຣາເອນຍັງບໍ່ທັນມີກະສັດເທື່ອ+ ຕະກູນດານ+ໄດ້ຊອກຫາບ່ອນທີ່ຈະຢູ່ ຍ້ອນດິນມູນທີ່ເຂົາເຈົ້າໄດ້ພ້ອມກັບຕະກູນຕ່າງໆຂອງອິດສະຣາເອນນັ້ນ ເຂົາເຈົ້າຍັງບໍ່ໄດ້ທັງໝົດເທື່ອ.+
2 ຄົນໃນຕະກູນດານຈຶ່ງສົ່ງຜູ້ຊາຍ 5 ຄົນທີ່ມີຄວາມສາມາດຈາກເມືອງໂຊຣາກັບເມືອງເອຊະຕາໂອນ+ໄປສອດແນມແລະສຳຫຼວດແຜ່ນດິນ. ຄົນໃນຕະກູນດານເວົ້າກັບພວກທີ່ຈະໄປສອດແນມວ່າ: “ໃຫ້ພວກເຈົ້າໄປສຳຫຼວດເບິ່ງແຜ່ນດິນເດີ້.” ເມື່ອໄປຮອດເຂດພູຂອງເອຟຣາຢິມ ເຂົາເຈົ້າກໍໄປເຮືອນຂອງມີກາ+ແລະພັກຄ້າງຄືນຢູ່ຫັ້ນ. 3 ແຕ່ຕອນທີ່ເຂົາເຈົ້າໃກ້ຊິຮອດເຮືອນຂອງມີກາ ເຂົາເຈົ້າຈື່ສຽງ*ຂອງຄົນເລວີທີ່ຍັງໜຸ່ມຄົນນັ້ນໄດ້ ກໍເລີຍເຂົ້າໄປຫາແລະຖາມວ່າ: “ໃຜໃຫ້ເຈົ້າມາຢູ່ນີ້? ເຈົ້າເຮັດວຽກຫຍັງຢູ່ນີ້? ເປັນຫຍັງເຈົ້າຈຶ່ງມາຢູ່ນີ້?” 4 ລາວກໍເລົ່າໃຫ້ເຂົາເຈົ້າຟັງວ່າມີກາໄດ້ໃຫ້ຫຍັງລາວແດ່. ລາວເວົ້າວ່າ: “ມີກາໄດ້ຈ້າງຂ້ອຍເພື່ອເຮັດວຽກປະໂລຫິດໃຫ້ລາວ.”+ 5 ເຂົາເຈົ້າຈຶ່ງເວົ້າກັບລາວວ່າ: “ໃຫ້ເຈົ້າຖາມພະເຈົ້າໃຫ້ແດ່ວ່າການເດີນທາງຂອງພວກເຮົາໃນເທື່ອນີ້ຈະປະສົບຜົນສຳເລັດຫຼືບໍ່?” 6 ປະໂລຫິດຄົນນັ້ນບອກວ່າ: “ໄປໂລດບໍ່ຕ້ອງຫ່ວງ. ພະເຢໂຫວາຢູ່ກັບພວກເຈົ້າ.”
7 ແລ້ວ 5 ຄົນນັ້ນກໍໄປຮອດເມືອງລາອິດ.+ ເຂົາເຈົ້າເຫັນຄົນໃນເມືອງນັ້ນຢູ່ແບບບໍ່ຕ້ອງເພິ່ງໃຜຄືກັບພວກຊີໂດນ. ພວກເຂົາຢູ່ຢ່າງສະຫງົບສຸກແລະບໍ່ຕ້ອງລະມັດລະວັງເລື່ອງຫຍັງເລີຍ.+ ບໍ່ມີຜູ້ໃດມາລົບກວນຫຼືມາໂຈມຕີແຜ່ນດິນຂອງພວກເຂົາເລີຍ. ພວກເຂົາຢູ່ໄກຈາກພວກຊີໂດນແລະບໍ່ໄດ້ຫຍຸ້ງກ່ຽວກັບຜູ້ໃດເລີຍ.
8 ເມື່ອ 5 ຄົນນັ້ນກັບມາຫາພີ່ນ້ອງຢູ່ເມືອງໂຊຣາກັບເມືອງເອຊະຕາໂອນ+ ພວກພີ່ນ້ອງຈຶ່ງຖາມເຂົາເຈົ້າວ່າ: “ຢູ່ຫັ້ນເປັນແນວໃດ?” 9 ເຂົາເຈົ້າຕອບວ່າ: “ພວກເຮົາໄດ້ເຫັນແລ້ວວ່າມັນເປັນແຜ່ນດິນທີ່ດີຫຼາຍ. ໃຫ້ພວກເຮົາໄປໂຈມຕີເອົາແຜ່ນດິນນັ້ນໂລດ. ບໍ່ຕ້ອງລັງເລ. ໃຫ້ຟ້າວໄປຍຶດເອົາໄວໆ. 10 ເມື່ອພວກເຈົ້າໄປຮອດຫັ້ນ ພວກເຈົ້າຊິເຫັນວ່າຄົນຢູ່ຫັ້ນບໍ່ໄດ້ລະມັດລະວັງໂຕເອງເລີຍ+ ແລະແຜ່ນດິນນັ້ນກໍກວ້າງໃຫຍ່. ພະເຈົ້າໄດ້ມອບແຜ່ນດິນນັ້ນໄວ້ໃນມືຂອງພວກເຮົາແລ້ວ. ຢູ່ຫັ້ນມີທຸກສິ່ງທຸກຢ່າງ.”+
11 ແລ້ວພວກຜູ້ຊາຍຕະກູນດານທີ່ຖືອາວຸດ 600 ຄົນກໍເດີນທາງອອກຈາກເມືອງໂຊຣາກັບເມືອງເອຊະຕາໂອນ.+ 12 ເຂົາເຈົ້າຂຶ້ນໄປຕັ້ງຄ້າຍຢູ່ໃກ້ໆເມືອງກີຣິອາດເຢອາຣີມ+ໃນເຂດຢູດາ. ຍ້ອນແນວນີ້ ບ່ອນນັ້ນຈຶ່ງຖືກເອີ້ນວ່າມາຮາເນະດານ*+ຈົນຮອດທຸກມື້ນີ້. ບ່ອນນັ້ນຢູ່ທາງທິດຕາເວັນຕົກຂອງເມືອງກີຣິອາດເຢອາຣີມ. 13 ແລ້ວເຂົາເຈົ້າກໍອອກຈາກບ່ອນນັ້ນໄປທີ່ເຂດພູຂອງເອຟຣາຢິມແລະໄປທາງເຮືອນຂອງມີກາ.+
14 ພວກ 5 ຄົນທີ່ເຄີຍໄປສອດແນມເມືອງລາອິດ+ເວົ້າກັບພີ່ນ້ອງຂອງເຂົາເຈົ້າວ່າ: “ພວກເຈົ້າຮູ້ບໍ່ ແຖວໆນີ້ມີເຮືອນຫຼັງໜຶ່ງມີເອໂຟດ* ຮູບພະເທຣາຟີມ* ຮູບແກະສະຫຼັກ ແລະຮູບຫຼໍ່ທີ່ເປັນເຫຼັກ?+ ພວກເຈົ້າກະຄືຊິຮູ້ວ່າພວກເຮົາໜ້າຈະເຮັດຫຍັງ.” 15 ແລ້ວເຂົາເຈົ້າກໍຢຸດຢູ່ຫັ້ນ. ສ່ວນພວກ 5 ຄົນນັ້ນກໍໄປເຮືອນຂອງຄົນເລວີ+ທີ່ຢູ່ໃກ້ເຮືອນຂອງມີກາ ແລະໄດ້ຖາມຂ່າວຄາວຄົນເລວີຄົນນັ້ນ. 16 ພວກຜູ້ຊາຍຕະກູນດານທີ່ຖືອາວຸດ 600 ຄົນ+ໄດ້ຢືນຖ້າຢູ່ທີ່ປະຕູເມືອງ. 17 ພວກ 5 ຄົນທີ່ເຄີຍໄປສອດແນມແຜ່ນດິນ+ກໍໄດ້ໄປເອົາຮູບແກະສະຫຼັກ ເອໂຟດ+ ຮູບພະເທຣາຟີມ+ ແລະຮູບຫຼໍ່ທີ່ເປັນເຫຼັກ.+ (ສ່ວນປະໂລຫິດ+ຄົນນັ້ນກໍຢືນຢູ່ປະຕູເມືອງກັບພວກທີ່ຖືອາວຸດ 600 ຄົນ.) 18 ເຂົາເຈົ້າເຂົ້າໄປໃນເຮືອນຂອງມີກາແລະເອົາຮູບແກະສະຫຼັກ ເອໂຟດ ຮູບພະເທຣາຟີມ ແລະຮູບຫຼໍ່ທີ່ເປັນເຫຼັກອອກມາ. ປະໂລຫິດຈຶ່ງຖາມວ່າ: “ພວກເຈົ້າກຳລັງເຮັດຫຍັງນິ?” 19 ແຕ່ເຂົາເຈົ້າບອກລາວວ່າ: “ມິດໆ ຢ່າປາກ ແລ້ວໄປກັບພວກເຮົາ. ໄປເປັນທີ່ປຶກສາ*ແລະເຮັດວຽກປະໂລຫິດໃຫ້ພວກເຮົາ. ໃຫ້ເຈົ້າລອງຄິດເບິ່ງວ່າອັນໃດຊິດີກວ່າກັນ ລະຫວ່າງເປັນປະໂລຫິດໃຫ້ພຽງຄອບຄົວດຽວ+ຫຼືໃຫ້ຕະກູນໜຶ່ງທີ່ມີຫຼາຍຈຸ້ມເຈື້ອ?”+ 20 ເມື່ອໄດ້ຍິນແນວນັ້ນ ປະໂລຫິດກໍພໍໃຈ. ລາວຈຶ່ງເອົາເອໂຟດ ຮູບພະເທຣາຟີມ ແລະຮູບແກະສະຫຼັກ+ໄປນຳເຂົາເຈົ້າ.
21 ແລ້ວຄົນໃນຕະກູນດານກໍເດີນທາງຕໍ່ໄປ ໂດຍໃຫ້ເດັກນ້ອຍ ຝູງສັດ ແລະຂອງມີຄ່າຢູ່ທາງໜ້າ. 22 ເມື່ອເຂົາເຈົ້າອອກຈາກເຮືອນຂອງມີກາໄດ້ບໍ່ໄກປານໃດ ພວກຜູ້ຊາຍທີ່ຢູ່ແຖວໆເຮືອນຂອງມີກາກໍໄລ່ນຳຫຼັງເຂົາເຈົ້າທັນ. 23 ເມື່ອພວກນັ້ນເອີ້ນໃສ່ຄົນໃນຕະກູນດານ ເຂົາເຈົ້າກໍປິ່ນໜ້າມາຖາມມີກາວ່າ: “ມີຫຍັງບໍ່? ເປັນຫຍັງຄືພາກັນມາຫຼາຍແທ້?” 24 ມີກາຕອບວ່າ: “ພວກເຈົ້າເອົາປະໂລຫິດແລະຮູບບູຊາຂອງຂ້ອຍໄປໝົດແລ້ວ ແລະຍັງຊິມາຖາມອີກຫວະວ່າມີຫຍັງ?” 25 ຄົນໃນຕະກູນດານກໍຕອບວ່າ: “ຢ່າມາຮ້ອງໃສ່ພວກເຮົາເດີ້. ຖ້າຄົນຂອງຂ້ອຍໃຈຮ້າຍຂຶ້ນມາ ເຂົາເຈົ້າອາດຈະຂ້າເຈົ້າກັບຄອບຄົວຂອງເຈົ້າກະໄດ້.” 26 ເມື່ອມີກາເຫັນວ່າຄົນໃນຕະກູນດານມີຫຼາຍກວ່າ ລາວຈຶ່ງກັບເມືອເຮືອນ. ສ່ວນຄົນໃນຕະກູນດານກໍເດີນທາງຕໍ່ໄປ.
27 ຫຼັງຈາກທີ່ຄົນໃນຕະກູນດານເອົາຮູບບູຊາກັບປະໂລຫິດຂອງມີກາມາແລ້ວ ເຂົາເຈົ້າກໍອອກເດີນທາງໄປເມືອງລາອິດ.+ ຄົນໃນເມືອງນັ້ນຢູ່ຢ່າງສະຫງົບສຸກແລະບໍ່ໄດ້ລະວັງໂຕ.+ ຄົນໃນຕະກູນດານກໍເອົາດາບຂ້າຄົນໃນເມືອງນັ້ນແລະເຜົາເມືອງຖິ້ມ. 28 ບໍ່ມີຜູ້ໃດມາຊ່ວຍຄົນໃນເມືອງນັ້ນໄດ້ ເພາະພວກເຂົາຢູ່ໄກຈາກເມືອງຊີໂດນແລະບໍ່ໄດ້ຫຍຸ້ງກ່ຽວກັບຜູ້ໃດເລີຍ. ເມືອງລາອິດຢູ່ທົ່ງພຽງເບັດເຣໂຮບ.+ ແລ້ວຄົນໃນຕະກູນດານກໍສ້າງເມືອງນີ້ຄືນໃໝ່ແລະອາໄສຢູ່ຫັ້ນ. 29 ເຂົາເຈົ້າຕັ້ງຊື່ເມືອງນີ້ວ່າດານ+ຕາມຊື່ປູ່ຍ່າຕານາຍຂອງເຂົາເຈົ້າທີ່ຊື່ດານເຊິ່ງເປັນລູກຊາຍຂອງອິດສະຣາເອນ.+ ແຕ່ກີ້ເມືອງນີ້ຊື່ວ່າລາອິດ.+ 30 ຫຼັງຈາກນັ້ນ ຄົນໃນຕະກູນດານກໍເອົາຮູບແກະສະຫຼັກ+ມາໄວ້ຢູ່ເມືອງນັ້ນ. ແລ້ວໂຢນາທານກັບລູກຫຼານຂອງລາວກໍມາເຮັດວຽກປະໂລຫິດໃຫ້ຕະກູນດານ. ໂຢນາທານ+ເປັນລູກຫຼານຂອງເກໂຊນ.+ ເກໂຊນເປັນລູກຊາຍຂອງໂມເຊ. ໂຢນາທານກັບລູກຫຼານຂອງລາວເປັນປະໂລຫິດຈົນຮອດມື້ທີ່ຄົນໃນແຜ່ນດິນນັ້ນຖືກຈັບໄປເປັນຊະເລີຍ. 31 ຄົນໃນຕະກູນດານໄດ້ນະມັດສະການຮູບແກະສະຫຼັກຂອງມີກາຢູ່ຫັ້ນຕະຫຼອດໄລຍະທີ່ເຕັ້ນສັກສິດຂອງພະເຈົ້າທ່ຽງແທ້ຍັງຢູ່ໃນເມືອງຊີໂລ.+