ຈົດໝາຍສະບັບທຳອິດເຖິງຄລິດສະຕຽນໃນເມືອງໂກຣິນໂທ
14 ດັ່ງນັ້ນ ຂໍໃຫ້ສະແດງຄວາມຮັກໃຫ້ຫຼາຍໆ ແຕ່ກໍພະຍາຍາມຕໍ່ໄປເພື່ອຈະໄດ້ຄວາມສາມາດ*ທີ່ມາຈາກພະເຈົ້ານຳ ໂດຍສະເພາະຄວາມສາມາດໃນການພະຍາກອນ.+ 2 ຄົນທີ່ເວົ້າພາສາຕ່າງໆນັ້ນບໍ່ໄດ້ເວົ້າກັບມະນຸດ ແຕ່ເວົ້າກັບພະເຈົ້າ. ເຖິງວ່າລາວຈະເວົ້າເລື່ອງຄວາມລັບສັກສິດ+ດ້ວຍພະລັງຂອງພະເຈົ້າ ແຕ່ກໍບໍ່ມີຜູ້ໃດເຂົ້າໃຈ.+ 3 ສ່ວນຄົນທີ່ພະຍາກອນນັ້ນເວົ້າສິ່ງທີ່ເຮັດໃຫ້ຄົນຟັງເຂັ້ມແຂງຂຶ້ນ ໃຫ້ກຳລັງໃຈ ແລະປອບໃຈຄົນອື່ນ. 4 ຄົນທີ່ເວົ້າພາສາຕ່າງໆໄດ້ນັ້ນເຮັດໃຫ້ໂຕເອງໄດ້ຮັບປະໂຫຍດ ແຕ່ຄົນທີ່ພະຍາກອນໄດ້ເຮັດໃຫ້ປະຊາຄົມໄດ້ຮັບປະໂຫຍດ. 5 ແມ່ນຢູ່ວ່າຂ້ອຍຢາກໃຫ້ທຸກຄົນເວົ້າພາສາຕ່າງໆໄດ້+ ແຕ່ຂ້ອຍຢາກໃຫ້ພວກເຈົ້າພະຍາກອນໄດ້ຫຼາຍກວ່າ+ ຍ້ອນການພະຍາກອນກໍດີກວ່າການເວົ້າພາສາຕ່າງໆ. ການເວົ້າພາສາຕ່າງໆຕ້ອງມີຄົນແປເພື່ອປະຊາຄົມຈະໄດ້ຮັບປະໂຫຍດ. 6 ພີ່ນ້ອງເອີ້ຍ ຖ້າຕອນນີ້ຂ້ອຍເວົ້າພາສາອື່ນກັບພວກເຈົ້າ ພວກເຈົ້າຈະໄດ້ຮັບປະໂຫຍດຫຍັງ? ແຕ່ຖ້າຂ້ອຍເວົ້າເລື່ອງທີ່ພະເຈົ້າເປີດເຜີຍ+ ເລື່ອງທີ່ໃຫ້ຄວາມຮູ້+ ເລື່ອງທີ່ເປັນຄຳພະຍາກອນຫຼືຄຳສອນ ພວກເຈົ້າກໍຈະໄດ້ຮັບປະໂຫຍດ.
7 ໃຫ້ຄິດເຖິງເຄື່ອງດົນຕີທີ່ບໍ່ມີຊີວິດເຊັ່ນຂຸ່ຍຫຼືພິນ. ຖ້າຫຼິ້ນບໍ່ຖືກທຳນອງ ຄົນທີ່ຟັງຈະຮູ້ໄດ້ແນວໃດວ່າກຳລັງຫຼິ້ນເພງຫຍັງຢູ່? 8 ຖ້າຄົນທີ່ເປົ່າແກໃຫ້ສັນຍານໄປສູ້ຮົບເປົ່າບໍ່ແຈ້ງ ຈະມີໃຜກຽມໂຕໄປສູ້ຮົບບໍ? 9 ຄ້າຍຄືກັນ ຖ້າພວກເຈົ້າບໍ່ໃຊ້ພາສາທີ່ເຂົ້າໃຈງ່າຍໆ ຜູ້ໃດຈະຮູ້ວ່າພວກເຈົ້າເວົ້າຫຍັງ? ມັນກໍສ່ຳກັບວ່າພວກເຈົ້າເວົ້າໄປໂດຍບໍ່ມີຄວາມໝາຍ. 10 ໃນໂລກນີ້ມີຫຼາຍພາສາ ແລະທຸກພາສາມີຄວາມໝາຍທີ່ເຂົ້າໃຈໄດ້. 11 ຖ້າຂ້ອຍບໍ່ເຂົ້າໃຈສິ່ງທີ່ຄົນໜຶ່ງເວົ້າ ຂ້ອຍກໍເປັນຄືຄົນຕ່າງຊາດສຳລັບລາວ ແລະລາວກໍເປັນຄືຄົນຕ່າງຊາດສຳລັບຂ້ອຍ. 12 ພວກເຈົ້າກໍຄືກັນ ໃນເມື່ອພວກເຈົ້າພະຍາຍາມຫຼາຍທີ່ຈະໄດ້ຄວາມສາມາດຕ່າງໆຈາກພະລັງຂອງພະເຈົ້າ ກໍໃຫ້ພະຍາຍາມມີຄວາມສາມາດນັ້ນຫຼາຍໆເພື່ອເຮັດໃຫ້ປະຊາຄົມເຂັ້ມແຂງຂຶ້ນ.+
13 ດັ່ງນັ້ນ ໃຫ້ຜູ້ທີ່ເວົ້າອີກພາສາໜຶ່ງໄດ້ນັ້ນອະທິດຖານຂໍໃຫ້ລາວແປໄດ້ໃນສິ່ງທີ່ລາວເວົ້າ.+ 14 ຖ້າຂ້ອຍອະທິດຖານເປັນອີກພາສາໜຶ່ງ ຂ້ອຍກໍອະທິດຖານຍ້ອນຄວາມສາມາດທີ່ມາຈາກພະລັງຂອງພະເຈົ້າ ແຕ່ຂ້ອຍເອງບໍ່ເຂົ້າໃຈຄຳອະທິດຖານນັ້ນ. 15 ແລ້ວຂ້ອຍຄວນຈະເຮັດແນວໃດ? ຂ້ອຍກໍຈະອະທິດຖານໂດຍໃຊ້ຄວາມສາມາດທີ່ມາຈາກພະລັງຂອງພະເຈົ້າ ແລະຂ້ອຍກໍຈະອະທິດຖານແບບທີ່ຂ້ອຍເຂົ້າໃຈນຳ. ຂ້ອຍຈະຮ້ອງເພງສັນລະເສີນໂດຍໃຊ້ຄວາມສາມາດທີ່ມາຈາກພະລັງຂອງພະເຈົ້າ ແລະຂ້ອຍຈະຮ້ອງເພງສັນລະເສີນໃນແບບທີ່ຂ້ອຍເອງກໍເຂົ້າໃຈໄດ້ນຳ. 16 ຄັນບໍ່ຊັ້ນ ເມື່ອອະທິດຖານຂອບໃຈແລະສັນລະເສີນພະເຈົ້າດ້ວຍຄວາມສາມາດທີ່ມາຈາກພະລັງຂອງເພິ່ນ ຄົນທີ່ຟັງຢູ່ຈະເວົ້າວ່າ “ອາແມນ”* ໄດ້ແນວໃດ ຖ້າລາວບໍ່ເຂົ້າໃຈວ່າເຈົ້າເວົ້າຫຍັງ? 17 ແມ່ນຢູ່ວ່າພວກເຈົ້າອະທິດຖານຂອບໃຈໄດ້ດີ ແຕ່ຄົນອື່ນບໍ່ໄດ້ຮັບປະໂຫຍດ. 18 ຂ້ອຍຂອບໃຈພະເຈົ້າທີ່ຂ້ອຍເວົ້າພາສາຕ່າງໆໄດ້ຫຼາຍກວ່າພວກເຈົ້າທຸກຄົນ. 19 ແຕ່ໃນປະຊາຄົມ ຖ້າຂ້ອຍເວົ້າແຕ່ 5 ຄຳທີ່ຂ້ອຍເອງເຂົ້າໃຈແລະສອນຄົນອື່ນໄດ້ ກໍດີກວ່າເວົ້າເປັນ 10.000 ຄຳ ດ້ວຍພາສາທີ່ຄົນບໍ່ເຂົ້າໃຈ.+
20 ພີ່ນ້ອງເອີ້ຍ ຢ່າຄິດຄືເດັກນ້ອຍ.+ ໃຫ້ເປັນຄືເດັກນ້ອຍທີ່ບໍ່ຮູ້ຫຍັງເລື່ອງຄວາມຊົ່ວ+ ແຕ່ໃຫ້ຄິດແບບຄົນທີ່ເປັນຜູ້ໃຫຍ່ແລ້ວ.+ 21 ກົດໝາຍຂອງໂມເຊຂຽນໄວ້ວ່າ: “ພະເຢໂຫວາ*ເວົ້າວ່າ ‘ເຮົາຈະເວົ້າກັບຊົນຊາດນີ້ດ້ວຍພາສາຕ່າງປະເທດແລະດ້ວຍຄຳເວົ້າຂອງຄົນຕ່າງຖິ່ນ ແຕ່ເຂົາເຈົ້າຈະບໍ່ຟັງເຮົາ.’”+ 22 ດັ່ງນັ້ນ ການເວົ້າພາສາຕ່າງໆຈຶ່ງເປັນຫຼັກຖານສຳລັບຄົນທີ່ບໍ່ເຊື່ອ ບໍ່ແມ່ນສຳລັບຄົນທີ່ເຊື່ອ.+ ສ່ວນການພະຍາກອນມີໄວ້ສຳລັບຄົນທີ່ເຊື່ອ ບໍ່ແມ່ນສຳລັບຄົນທີ່ບໍ່ເຊື່ອ. 23 ຖ້າທຸກຄົນໃນປະຊາຄົມມາປະຊຸມກັນແລະເວົ້າພາສາຕ່າງໆ ເມື່ອຄົນທົ່ວໄປຫຼືຄົນທີ່ບໍ່ມີຄວາມເຊື່ອເຂົ້າມາ ເຂົາເຈົ້າຈະບໍ່ຄິດບໍວ່າພວກເຈົ້າເປັນບ້າແລ້ວ? 24 ແຕ່ຖ້າພວກເຈົ້າທຸກຄົນກຳລັງພະຍາກອນ ແລ້ວມີຄົນທີ່ບໍ່ມີຄວາມເຊື່ອຫຼືຄົນທົ່ວໄປເຂົ້າມາ ຄຳເວົ້າຂອງພວກເຈົ້າຈະເຮັດໃຫ້ລາວສຳນຶກແລະກວດເບິ່ງໂຕເອງຢ່າງຈິງຈັງ. 25 ສິ່ງທີ່ເຊື່ອງຢູ່ໃນໃຈລາວກໍຈະປາກົດອອກມາ ແລ້ວລາວຈະໝູບໜ້າລົງນະມັດສະການພະເຈົ້າແລະເວົ້າວ່າ: “ພະເຈົ້າຢູ່ກັບພວກເຈົ້າແທ້ໆ.”+
26 ພີ່ນ້ອງເອີ້ຍ ຖ້າເປັນແນວນັ້ນພວກເຮົາຄວນຈະເຮັດແນວໃດ? ເມື່ອພວກເຈົ້າມາປະຊຸມກັນ ບາງຄົນກໍຮ້ອງເພງສັນລະເສີນ ບາງຄົນກໍສອນ ບາງຄົນກໍເວົ້າເລື່ອງທີ່ພະເຈົ້າເປີດເຜີຍ ບາງຄົນກໍເວົ້າພາສາຕ່າງໆ ແລະບາງຄົນກໍເປັນຜູ້ແປ.+ ຂໍໃຫ້ເຮັດທຸກສິ່ງເພື່ອເສີມສ້າງກັນ. 27 ຖ້າມີຄົນເວົ້າພາສາຕ່າງໆ ຂໍໃຫ້ເວົ້າແຕ່ສອງຄົນຫຼືຫຼາຍສຸດກໍສາມຄົນ ແລະໃຫ້ເວົ້າເທື່ອລະຄົນ ແລ້ວໃຫ້ມີຄົນແປພ້ອມ.+ 28 ແຕ່ຖ້າບໍ່ມີຜູ້ໃດແປໄດ້ກໍຢ່າໃຫ້ລາວເວົ້າໃນປະຊາຄົມ ໃຫ້ລາວເວົ້າກັບໂຕເອງແລະກັບພະເຈົ້າດີກວ່າ. 29 ສ່ວນການພະຍາກອນນັ້ນ ໃຫ້ມີສອງຫຼືສາມຄົນພະຍາກອນ+ ແລະໃຫ້ຄົນອື່ນຟັງເພື່ອຈະເຂົ້າໃຈຄວາມໝາຍ. 30 ແຕ່ຖ້າພະເຈົ້າເປີດເຜີຍເລື່ອງໜຶ່ງກັບຄົນໜຶ່ງທີ່ນັ່ງຢູ່ ກໍໃຫ້ຄົນທີ່ເວົ້າຢູ່ນັ້ນເຊົາເວົ້າກ່ອນ. 31 ພວກເຈົ້າພະຍາກອນໄດ້ເທື່ອລະຄົນ ເພື່ອທຸກຄົນຈະໄດ້ຮຽນຮູ້ແລະໄດ້ກຳລັງໃຈ.+ 32 ໃຫ້ຄົນທີ່ມີຄວາມສາມາດໃນການພະຍາກອນຮູ້ຈັກຄວບຄຸມຄວາມສາມາດນັ້ນ. 33 ພະເຈົ້າບໍ່ແມ່ນພະເຈົ້າທີ່ເຮັດໃຫ້ສັບສົນວຸ່ນວາຍ ແຕ່ເປັນພະເຈົ້າທີ່ເຮັດໃຫ້ເກີດສັນຕິສຸກ.+
ຄືກັບທີ່ເຮັດໃນທຸກປະຊາຄົມຂອງພວກຜູ້ບໍລິສຸດ 34 ໃຫ້ຜູ້ຍິງໃນປະຊາຄົມມິດຢູ່ ຍ້ອນເຂົາເຈົ້າບໍ່ໄດ້ຮັບອະນຸຍາດໃຫ້ເວົ້າຕໍ່ໜ້າປະຊາຄົມ.*+ ໃຫ້ເຂົາເຈົ້າຍອມຢູ່ໃຕ້ອຳນາດ+ຕາມທີ່ກົດໝາຍຂອງພະເຈົ້າບອກໄວ້. 35 ຖ້າເຂົາເຈົ້າສົງໄສຫຍັງກໍໃຫ້ຖາມຜົວຢູ່ເຮືອນ ເພາະຖ້າຜູ້ຍິງຈະເວົ້າຕໍ່ໜ້າປະຊາຄົມກໍເປັນເລື່ອງໜ້າອາຍ.
36 ຄຳສອນຂອງພະເຈົ້າມາຈາກພວກເຈົ້າບໍ? ມີແຕ່ພວກເຈົ້າບໍທີ່ໄດ້ຮັບຄຳສອນຂອງເພິ່ນ?
37 ຖ້າຜູ້ໃດຄິດວ່າໂຕເອງເປັນຜູ້ພະຍາກອນຫຼືໄດ້ຮັບຄວາມສາມາດທີ່ມາຈາກພະລັງຂອງພະເຈົ້າ ກໍໃຫ້ຜູ້ນັ້ນຍອມຮັບວ່າສິ່ງທີ່ຂ້ອຍຂຽນເຖິງພວກເຈົ້າເປັນຄຳສັ່ງຈາກຜູ້ເປັນນາຍ. 38 ແຕ່ຖ້າຜູ້ໃດບໍ່ຍອມຮັບເລື່ອງນີ້ ພະເຈົ້າກໍຈະບໍ່ຍອມຮັບລາວຄືກັນ. 39 ດັ່ງນັ້ນ ພີ່ນ້ອງເອີ້ຍ ໃຫ້ພວກເຈົ້າພະຍາຍາມຕໍ່ໄປເພື່ອຈະພະຍາກອນ+ ແຕ່ຢ່າຫ້າມຄົນທີ່ເວົ້າພາສາຕ່າງໆ.+ 40 ໃຫ້ເຮັດທຸກສິ່ງຢ່າງເໝາະສົມແລະເປັນລະບຽບຮຽບຮ້ອຍ.+