ຊາມູເອນສະບັບທີໜຶ່ງ
10 ຊາມູເອນເອົາຂວດນ້ຳມັນມາ ແລ້ວເທໃສ່ຫົວຂອງຊາອູນ.+ ລາວຈູບ*ຊາອູນແລະເວົ້າວ່າ: “ພະເຢໂຫວາເລືອກເຈົ້າໃຫ້ເປັນຜູ້ປົກຄອງ+ປະຊາຊົນຂອງເພິ່ນ.+ 2 ເມື່ອເຈົ້າຈາກຂ້ອຍໄປມື້ນີ້ ເຈົ້າຈະເຫັນຜູ້ຊາຍ 2 ຄົນຢູ່ໃກ້ບ່ອນຝັງສົບຂອງຣາເຄນ+ທີ່ຢູ່ເມືອງເຊັນຊາໃນເຂດຂອງຕະກູນເບັນຢາມິນ ແລະເຂົາເຈົ້າຈະບອກເຈົ້າວ່າ ‘ຝູງລາທີ່ເຈົ້າຊອກຫານັ້ນມີຄົນເຫັນແລ້ວ ຕອນນີ້ພໍ່ບໍ່ໄດ້ເປັນຫ່ວງຝູງລາແລ້ວ+ ແຕ່ລາວເປັນຫ່ວງເຈົ້າແທນ. ພໍ່ເຈົ້າເວົ້າວ່າ “ຂ້ອຍຊິເຮັດແນວໃດ? ລູກຂ້ອຍຍັງບໍ່ກັບມາປານນີ້.”’ 3 ຈາກບ່ອນນັ້ນ ໃຫ້ເຈົ້າຍ່າງໄປຈົນຮອດຕົ້ນໄມ້ໃຫຍ່ທີ່ຢູ່ເມືອງຕາໂບ ແລ້ວເຈົ້າຈະເຫັນຜູ້ຊາຍ 3 ຄົນກຳລັງຂຶ້ນໄປນະມັດສະການພະເຈົ້າທ່ຽງແທ້ຢູ່ເມືອງເບເທນ.+ ຜູ້ໜຶ່ງອູ້ມແບ້ນ້ອຍ 3 ໂຕ ຜູ້ໜຶ່ງຖືເຂົ້າຈີ່ 3 ກ້ອນ ແລະອີກຜູ້ໜຶ່ງແບກໄຫເຫຼົ້າແວງ 1 ໄຫໃຫຍ່. 4 ສາມຄົນນັ້ນຈະຖາມສະບາຍດີເຈົ້າແລະຈະເອົາເຂົ້າຈີ່ໃຫ້ເຈົ້າ 2 ກ້ອນ ແລະເຈົ້າຕ້ອງເອົາເຂົ້າຈີ່ນັ້ນ. 5 ຫຼັງຈາກນັ້ນ ເຈົ້າກໍຈະໄປຮອດໂນນພູຂອງພະເຈົ້າທ່ຽງແທ້ທີ່ມີຄ້າຍທະຫານຂອງພວກຟີລິດສະຕີນ. ເມື່ອເຈົ້າເຂົ້າໄປໃນເມືອງນັ້ນ ເຈົ້າຈະເຈິຜູ້ພະຍາກອນກຸ່ມໜຶ່ງທີ່ລົງມາຈາກບ່ອນນະມັດສະການ. ເຂົາເຈົ້າຈະພະຍາກອນ ແລະຢູ່ທາງໜ້າເຂົາເຈົ້າຈະມີຄົນຫຼິ້ນເຄື່ອງດົນຕີທີ່ມີສາຍ ຄົນຕີກອງແທມບູຣິນ* ຄົນເປົ່າຂຸ່ຍ ແລະຄົນດີດພິນ. 6 ເຈົ້າຈະໄດ້ຮັບພະລັງຂອງພະເຢໂຫວາ+ ແລ້ວເຈົ້າຈະພະຍາກອນໄປພ້ອມກັບເຂົາເຈົ້າ ແລະພະລັງນັ້ນຈະປ່ຽນເຈົ້າ.+ 7 ເມື່ອທຸກສິ່ງທີ່ຂ້ອຍເວົ້າເກີດຂຶ້ນ ນັ້ນກໍສະແດງວ່າພະເຈົ້າທ່ຽງແທ້ຢູ່ກັບເຈົ້າ. ໃຫ້ເຮັດທຸກສິ່ງທີ່ເຈົ້າສາມາດເຮັດໄດ້ເພື່ອໃຫ້ວຽກມອບໝາຍຂອງເຈົ້າສຳເລັດ. 8 ໃຫ້ເຈົ້າລົງໄປເມືອງກິນການ+ກ່ອນຂ້ອຍ ແລ້ວຂ້ອຍຈະໄປຫາເຈົ້າຢູ່ຫັ້ນເພື່ອເຜົາເຄື່ອງບູຊາທີ່ເປັນສັດແລະເຄື່ອງບູຊາສ້າງຄວາມສະຫງົບສຸກໃຫ້ພະເຈົ້າ. ໃຫ້ເຈົ້າຖ້າຂ້ອຍຢູ່ຫັ້ນ 7 ມື້ ແລ້ວຂ້ອຍຈະບອກເຈົ້າວ່າຄວນເຮັດຫຍັງ.”
9 ຕອນທີ່ຊາອູນກຳລັງຈະໄປຈາກຊາມູເອນ ພະເຈົ້າກໍເລີ່ມປ່ຽນລາວ ແລະທຸກສິ່ງທີ່ຊາມູເອນເວົ້າກໍເກີດຂຶ້ນແທ້ໃນມື້ນັ້ນ. 10 ຊາອູນແລະຄົນຮັບໃຊ້ຂອງລາວໄປໂນນພູ ແລະເຈິພວກຜູ້ພະຍາກອນ. ທັນໃດນັ້ນ ລາວກໍໄດ້ຮັບພະລັງຂອງພະເຈົ້າ+ ແລະເລີ່ມພະຍາກອນ+ນຳເຂົາເຈົ້າ. 11 ເມື່ອຄົນທີ່ຮູ້ຈັກຊາອູນເຫັນລາວກຳລັງພະຍາກອນກັບພວກຜູ້ພະຍາກອນ ເຂົາເຈົ້າກໍພາກັນເວົ້າວ່າ: “ເກີດຫຍັງຂຶ້ນກັບລູກຊາຍຂອງກີເຊ? ຊາອູນກໍເປັນຜູ້ພະຍາກອນບໍ?” 12 ຜູ້ຊາຍຄົນໜຶ່ງທີ່ຢູ່ຫັ້ນເວົ້າວ່າ: “ພວກຜູ້ພະຍາກອນເປັນລູກຂອງໃຜ?” ດັ່ງນັ້ນຈຶ່ງມີຄຳເວົ້າທີ່ວ່າ: “ຊາອູນກໍເປັນຜູ້ພະຍາກອນບໍ?”+
13 ເມື່ອຊາອູນພະຍາກອນແລ້ວໆ ລາວກໍໄປບ່ອນນະມັດສະການ. 14 ພີ່ນ້ອງຂອງພໍ່ຊາອູນຖາມຊາອູນແລະຄົນຮັບໃຊ້ວ່າ: “ພວກເຈົ້າໄປໃສມາ?” ຊາອູນຕອບວ່າ: “ພວກເຮົາໄປຊອກຫາຝູງລາ+ ແຕ່ບໍ່ເຫັນ ພວກເຮົາຈຶ່ງໄປຫາຊາມູເອນ.” 15 ພີ່ນ້ອງຈຶ່ງຖາມວ່າ: “ບອກຂ້ອຍໄດ້ບໍ່ ຊາມູເອນເວົ້າຫຍັງກັບພວກເຈົ້າ?” 16 ຊາອູນຕອບວ່າ: “ລາວບອກພວກເຮົາວ່າມີຄົນເຫັນຝູງລາແລ້ວ.” ແຕ່ເລື່ອງທີ່ຊາມູເອນບອກວ່າຊາອູນຈະໄດ້ເປັນກະສັດ ລາວບໍ່ໄດ້ເລົ່າໃຫ້ພີ່ນ້ອງຟັງ.
17 ຊາມູເອນໄດ້ເອີ້ນພວກອິດສະຣາເອນໃຫ້ມາລວມກັນຕໍ່ໜ້າພະເຢໂຫວາຢູ່ເມືອງມິດຊະປາ.+ 18 ລາວບອກເຂົາເຈົ້າວ່າ: “ພະເຢໂຫວາພະເຈົ້າຂອງອິດສະຣາເອນເວົ້າວ່າ ‘ເຮົາແມ່ນຜູ້ທີ່ພາພວກເຈົ້າອອກມາຈາກເອຢິບ ແລະເປັນຜູ້ທີ່ຊ່ວຍພວກເຈົ້າໃຫ້ລອດຈາກພວກເອຢິບ+ແລະຈາກຊາດຕ່າງໆທີ່ຂົ່ມເຫງພວກເຈົ້າ. 19 ແຕ່ມື້ນີ້ພວກເຈົ້າໄດ້ຖິ້ມພະເຈົ້າຂອງພວກເຈົ້າ+ຜູ້ທີ່ຊ່ວຍພວກເຈົ້າໃຫ້ລອດຈາກສິ່ງຊົ່ວຮ້າຍແລະຄວາມທຸກຍາກທຸກຢ່າງ. ພວກເຈົ້າເວົ້າວ່າ “ເຈົ້າຕ້ອງໃຫ້ມີກະສັດປົກຄອງພວກເຮົາ.” ຕອນນີ້ໃຫ້ພວກເຈົ້າມາຢືນຢູ່ຕໍ່ໜ້າພະເຢໂຫວາຕາມຕະກູນແລະຕາມຈຸ້ມເຈື້ອ.’”*
20 ຊາມູເອນໃຫ້ທຸກຕະກູນຂອງອິດສະຣາເອນຫຍັບເຂົ້າມາ+ ແລ້ວຕະກູນເບັນຢາມິນກໍຖືກເລືອກ.+ 21 ຈາກນັ້ນ ລາວໄດ້ໃຫ້ຕະກູນເບັນຢາມິນເຂົ້າມາເປັນຄອບຄົວ ແລ້ວຄອບຄົວຂອງມາຕຣີກໍຖືກເລືອກ ແລະສຸດທ້າຍຊາອູນລູກຊາຍຂອງກີເຊກໍຖືກເລືອກ.+ ແຕ່ເມື່ອເຂົາເຈົ້າໄປຊອກຫາຊາອູນກໍບໍ່ມີໃຜເຫັນລາວ. 22 ເຂົາເຈົ້າຈຶ່ງຖາມພະເຢໂຫວາວ່າ:+ “ລາວມາແລ້ວບໍ?” ພະເຢໂຫວາຕອບວ່າ: “ລາວລີ້ຢູ່ກອງເຄື່ອງຫັ້ນເດ້.” 23 ເຂົາເຈົ້າກໍແລ່ນໄປເອົາລາວອອກມາ. ຕອນທີ່ຊາອູນຢືນຢູ່ກັບທຸກຄົນ ເຂົາເຈົ້າສູງພຽງບ່າລາວ.+ 24 ຊາມູເອນເວົ້າກັບທຸກຄົນວ່າ: “ນີ້ແມ່ນຜູ້ທີ່ພະເຢໂຫວາເລືອກ.+ ລາວພິເສດກວ່າຄົນອື່ນ.” ແລ້ວທຸກຄົນກໍຮ້ອງວ່າ: “ຂໍໃຫ້ກະສັດມີອາຍຸຍືນຍາວ!”
25 ຊາມູເອນຈຶ່ງບອກທຸກຄົນກ່ຽວກັບສິ່ງທີ່ກະສັດຢາກໃຫ້ເຂົາເຈົ້າເຮັດ+ ແລະຂຽນໄວ້ໃນປຶ້ມ ແລ້ວເອົາປຶ້ມນັ້ນໄປໄວ້ໃນເຕັ້ນສັກສິດຂອງພະເຢໂຫວາ. ຈາກນັ້ນ ຊາມູເອນກໍບອກໃຫ້ທຸກຄົນເມືອເຮືອນ. 26 ຊາອູນກັບເມືອເຮືອນຂອງລາວຢູ່ເມືອງກີເບອາ ແລະພະເຢໂຫວາໄດ້ກະຕຸ້ນໃຈທະຫານກຸ່ມໜຶ່ງໃຫ້ໄປນຳລາວ. 27 ແຕ່ມີຄົນບໍ່ດີກຸ່ມໜຶ່ງເວົ້າວ່າ: “ຜູ້ນີ້ຫວະຈະຊ່ວຍເຮົາໃຫ້ລອດ?”+ ພວກນັ້ນຊັງຊາອູນແລະບໍ່ເອົາຂອງຂວັນໃຫ້ລາວ.+ ແຕ່ຊາອູນກໍບໍ່ໄດ້ເວົ້າຫຍັງ.