ຊາມູເອນສະບັບທີສອງ
21 ຕອນທີ່ດາວິດປົກຄອງໄດ້ມີຄວາມອຶດຢາກ+ຕິດຕໍ່ກັນ 3 ປີຊ້ອນ. ດາວິດຈຶ່ງຖາມພະເຢໂຫວາ ແລະພະເຢໂຫວາຕອບວ່າ: “ເປັນຍ້ອນຊາອູນແລະຄອບຄົວຂອງລາວເຮັດຜິດ. ລາວໄດ້ຂ້າພວກກິເບໂອນ.”+ 2 ກະສັດດາວິດຈຶ່ງໃຫ້ຄົນໄປເອີ້ນພວກກິເບໂອນ+ມາລົມກັບລາວ. (ພວກກິເບໂອນບໍ່ແມ່ນຄົນອິດສະຣາເອນ ແຕ່ແມ່ນຄົນອາໂມ+ທີ່ຍັງເຫຼືອຢູ່ເຊິ່ງພວກອິດສະຣາເອນສັນຍາວ່າຈະບໍ່ຂ້າເຂົາເຈົ້າ.+ ແຕ່ຊາອູນໄດ້ພະຍາຍາມໄລ່ຂ້າພວກນີ້ ຍ້ອນຊັງທີ່ເຂົາເຈົ້າມາຢູ່ຮ່ວມກັບພວກອິດສະຣາເອນແລະພວກຢູດາ.) 3 ດາວິດຖາມພວກກິເບໂອນວ່າ: “ຂ້ອຍຄວນເຮັດຫຍັງໃຫ້ພວກເຈົ້າ ແລະຂ້ອຍຄວນເຮັດແນວໃດເພື່ອຊົດໄຊ້ຄວາມຜິດທີ່ພວກເຮົາໄດ້ເຮັດ ເພື່ອພວກເຈົ້າຈະອວຍພອນປະຊາຊົນ*ຂອງພະເຢໂຫວາ?” 4 ພວກກິເບໂອນຕອບວ່າ: “ສິ່ງທີ່ຊາອູນກັບຄອບຄົວຂອງລາວເຮັດຕໍ່ພວກເຮົາຊົດໄຊ້ດ້ວຍເງິນແລະຄຳບໍ່ໄດ້+ ແລະພວກເຮົາກໍບໍ່ມີສິດຂ້າຄົນອິດສະຣາເອນ.” ດາວິດເວົ້າວ່າ: “ບໍ່ວ່າພວກເຈົ້າຈະຂໍຫຍັງ ຂ້ອຍກໍຈະເຮັດຕາມ.” 5 ເຂົາເຈົ້າຈຶ່ງບອກດາວິດວ່າ: “ຍ້ອນຊາອູນຂ້າພວກເຮົາແລະວາງແຜນກຳຈັດພວກເຮົາບໍ່ໃຫ້ເຫຼືອໃນເຂດແດນອິດສະຣາເອນ+ 6 ໃຫ້ເອົາລູກຫຼານຂອງລາວມາ 7 ຄົນ. ພວກເຮົາຈະເອົາສົບຂອງເຂົາເຈົ້າໄປແຂວນໄວ້+ຕໍ່ໜ້າພະເຢໂຫວາຢູ່ເມືອງກີເບອາ+ບ້ານເກີດຂອງຊາອູນຜູ້ທີ່ພະເຢໂຫວາເຄີຍເລືອກເປັນກະສັດ.”+ ດາວິດຕອບວ່າ: “ຂ້ອຍຈະເຮັດຕາມທີ່ພວກເຈົ້າຂໍ.”
7 ແຕ່ກະສັດດາວິດຮູ້ສຶກອີ່ຕົນເມຟີໂບເຊັດ+ລູກຊາຍຂອງໂຢນາທານຫຼານຂອງຊາອູນ ຍ້ອນດາວິດກັບໂຢນາທານ+ລູກຊາຍຂອງຊາອູນໄດ້ສາບານຕໍ່ກັນຕໍ່ໜ້າພະເຢໂຫວາ. 8 ດາວິດຈຶ່ງເລືອກເອົາອາໂມນີແລະເມຟີໂບເຊັດທີ່ເປັນລູກຊາຍຂອງຣິດຊະປາ+ທີ່ເປັນລູກສາວຂອງອາອີຢາ. ຣິດຊະປາໄດ້ລູກຊາຍ 2 ຄົນນີ້ກັບຊາອູນ. ດາວິດຍັງໄດ້ເລືອກເອົາລູກຊາຍ 5 ຄົນຂອງມີການ+ລູກສາວຂອງຊາອູນ. ມີການໄດ້ລູກຊາຍ 5 ຄົນນີ້ກັບອັດຣີເອນ+ທີ່ເປັນລູກຊາຍຂອງບາຊິລາຍຄົນເມໂຮລາ. 9 ດາວິດສົ່ງ 7 ຄົນນີ້ໃຫ້ພວກກິເບໂອນ. ເຂົາເຈົ້າຂ້າ 7 ຄົນນີ້ແລ້ວເອົາສົບໄປແຂວນຢູ່ເທິງພູຕໍ່ໜ້າພະເຢໂຫວາ.+ ທັງເຈັດຄົນນີ້ຕາຍພ້ອມກັນໃນຕອນເລີ່ມຕົ້ນຂອງຍາມກ່ຽວເຂົ້າບາເລ. 10 ຣິດຊະປາ+ລູກສາວຂອງອາອີຢາໄດ້ເອົາຜ້າເນື້ອຫຍາບໄປປູຢູ່ເທິງກ້ອນຫີນແລະຢູ່ຫັ້ນຕັ້ງແຕ່ຕອນເລີ່ມຕົ້ນຂອງຍາມກ່ຽວເຂົ້າບາເລຈົນຮອດມື້ທີ່ຝົນຕົກ. ຕອນກາງເວັນລາວໄລ່ນົກບໍ່ໃຫ້ມາສັບກິນສົບເຫຼົ່ານັ້ນ ແລະຕອນກາງຄືນລາວກໍໄລ່ສັດປ່າບໍ່ໃຫ້ມາໃກ້ສົບເຫຼົ່ານັ້ນ.
11 ມີຄົນໄປບອກດາວິດເລື່ອງທີ່ຣິດຊະປາລູກສາວຂອງອາອີຢາເມຍນ້ອຍຂອງຊາອູນໄດ້ເຮັດ. 12 ພວກຟີລິດສະຕີນໄດ້ຂ້າຊາອູນຢູ່ພູກິນໂບອາ+ແລະເອົາສົບຂອງຊາອູນກັບໂຢນາທານໄປຫ້ອຍໄວ້ຢູ່ເດີ່ນຂອງເມືອງເບັດຊານ. ແຕ່ໃນມື້ນັ້ນ ພວກຜູ້ນຳຂອງເມືອງຢາເບັດກິລຽດໄດ້ໄປລັກເອົາສົບຢູ່ຫັ້ນ. ດາວິດຈຶ່ງໄປເອົາກະດູກຂອງຊາອູນແລະກະດູກຂອງໂຢນາທານຈາກພວກຜູ້ນຳຂອງເມືອງຢາເບັດກິລຽດ.+ 13 ດາວິດໄດ້ເອົາກະດູກຂອງຊາອູນແລະກະດູກຂອງໂຢນາທານກັບມາ ແລະເຂົາເຈົ້າຍັງເອົາກະດູກຂອງຜູ້ຊາຍ 7 ຄົນທີ່ຖືກຂ້າມານຳ.+ 14 ເຂົາເຈົ້າເອົາກະດູກຂອງຊາອູນກັບໂຢນາທານໄປຝັງຢູ່ບ່ອນຝັງສົບຂອງກີເຊ+ທີ່ເປັນພໍ່ຂອງຊາອູນຢູ່ເມືອງເຊລາ+ໃນເຂດຂອງຕະກູນເບັນຢາມິນ. ຫຼັງຈາກພວກອິດສະຣາເອນເຮັດທຸກຢ່າງຕາມທີ່ກະສັດດາວິດສັ່ງ ພະເຈົ້າກໍຟັງຄຳຂໍຂອງເຂົາເຈົ້າເລື່ອງແຜ່ນດິນນັ້ນ.+
15 ພວກຟີລິດສະຕີນໄດ້ເຮັດສົງຄາມກັບພວກອິດສະຣາເອນອີກເທື່ອໜຶ່ງ.+ ດາວິດກັບພວກທະຫານຂອງລາວຈຶ່ງໄປຕໍ່ສູ້ພວກຟີລິດສະຕີນ ແຕ່ດາວິດເມື່ອຍຫຼາຍ. 16 ລູກຫຼານຄົນໜຶ່ງຂອງພວກເຣຟາຢິມ+ຊື່ອິດບີເບໂນບຢາກຂ້າດາວິດ. ລາວມີຫອກທອງແດງໜັກ 300 ເຊເກນ*+ແລະມີດາບໃໝ່ດວງໜຶ່ງ. 17 ອາບີຊາຍ+ລູກຊາຍຂອງເຊຣູຢາກໍມາຊ່ວຍດາວິດທັນທີ+ ແລະຂ້າຄົນຟີລິດສະຕີນຜູ້ນັ້ນຕາຍ. ຈາກນັ້ນ ພວກທະຫານຂອງດາວິດສາບານກັບລາວວ່າ: “ພວກເຮົາບໍ່ຢາກໃຫ້ແສງຕະກຽງຂອງອິດສະຣາເອນມອດ.*+ ດັ່ງນັ້ນ ນັບຕັ້ງແຕ່ນີ້ໄປ ພວກເຮົາຈະບໍ່ໃຫ້ທ່ານອອກໄປຕໍ່ສູ້ນຳກັນກັບພວກເຮົາອີກ.”+
18 ຕໍ່ມາ ພວກຟີລິດສະຕີນ+ຕໍ່ສູ້ກັບພວກອິດສະຣາເອນອີກຢູ່ໂກບ. ຕອນນັ້ນ ສິບເບກາຍ+ຄົນຮູຊາໄດ້ຂ້າສາເຟ*ທີ່ເປັນລູກຫຼານຂອງພວກເຣຟາຢິມ.+
19 ຫຼັງຈາກນັ້ນ ພວກຟີລິດສະຕີນ+ໄດ້ຕໍ່ສູ້ກັບພວກອິດສະຣາເອນອີກເທື່ອໜຶ່ງຢູ່ໂກບ. ເອນຮະນັນລູກຊາຍຂອງຢາອາເຣໂອເຣກີມຄົນເບັດເລເຮັມໄດ້ຂ້າໂກລີອາດຄົນເມືອງກັດເຊິ່ງຖືຫອກທີ່ມີດ້າມເປັນໄມ້ທີ່ໃຫຍ່ສ່ຳກັບໄມ້ຄານກີ່ຕ່ຳຫູກ.+
20 ແລ້ວກໍມີການຕໍ່ສູ້ອີກຢູ່ເມືອງກັດ. ຢູ່ຫັ້ນມີລູກຫຼານຂອງຄົນເຣຟາຢິມອີກຜູ້ໜຶ່ງທີ່ໂຕໃຫຍ່ຫຼາຍ. ລາວມີນິ້ວມືເບື້ອງລະ 6 ນິ້ວແລະນິ້ວຕີນເບື້ອງລະ 6 ນິ້ວ ລວມທັງໝົດເປັນ 24 ນິ້ວ.+ 21 ລາວເວົ້າເຍາະເຍີ້ຍພວກອິດສະຣາເອນຕະຫຼອດ.+ ໂຢນາທານລູກຊາຍຂອງຊິເມອີ+ທີ່ເປັນອ້າຍຂອງດາວິດຈຶ່ງຂ້າລາວ.
22 ພວກຟີລິດສະຕີນ 4 ຄົນນີ້ເປັນລູກຫຼານຂອງພວກເຣຟາຢິມໃນເມືອງກັດ. ດາວິດແລະພວກທະຫານຂອງລາວໄດ້ຂ້າເຂົາເຈົ້າຕາຍ.+