ກະສັດສະບັບທີສອງ
25 ໃນວັນທີ 10 ເດືອນທີ 10 ຂອງປີທີ 9 ທີ່ເຊເດກີຢາປົກຄອງ ເນບູກາດເນັດຊາ+ກະສັດຂອງບາບີໂລນໄດ້ຍົກກອງທັບມາຕໍ່ສູ້ເມືອງເຢຣູຊາເລັມ.+ ລາວໄດ້ຕັ້ງຄ້າຍແລະເຮັດກຳແພງອ້ອມເມືອງນັ້ນໄວ້.+ 2 ເຂົາເຈົ້າລ້ອມເມືອງຈົນຮອດປີທີ 11 ທີ່ເຊເດກີຢາປົກຄອງ. 3 ຕອນນັ້ນມີຄວາມອຶດຢາກໜັກຫຼາຍ+ໃນເມືອງເຢຣູຊາເລັມແລະຄົນໃນເມືອງບໍ່ມີຂອງກິນເລີຍ.+ ແລ້ວໃນວັນທີ 9 ເດືອນທີ 4 ຂອງປີນັ້ນ 4 ກຳແພງເມືອງກໍພັງລົງມາ.+ ພວກທະຫານທຸກຄົນຂອງກະສັດເຊເດກີຢາໄດ້ໜີໄປໃນຄືນນັ້ນທາງປະຕູຂອງກຳແພງ 2 ຊັ້ນທີ່ຢູ່ໃກ້ສວນຂອງກະສັດ. ຕອນນັ້ນ ພວກການເດອາກຳລັງລ້ອມເມືອງໄວ້ ແຕ່ກະສັດເຊເດກີຢາກໍໜີໄປທາງອາຣາບາ.+ 5 ພວກທະຫານການເດອາໄດ້ໄລ່ນຳກະສັດແລະນຳລາວທັນຢູ່ບ່ອນກັນດານເຢຣິໂກ. ເມື່ອເຫັນແບບນັ້ນ ພວກທະຫານຂອງເຊເດກີຢາກໍພາກັນໜີໄປຄົນລະທາງ. 6 ເຂົາເຈົ້າຈັບລາວໄດ້+ແລະພາໄປຫາກະສັດບາບີໂລນຢູ່ເມືອງຣິບລາ ແລ້ວກໍຕັດສິນລາວ. 7 ເຂົາເຈົ້າໄດ້ຂ້າພວກລູກຊາຍຂອງເຊເດກີຢາຢູ່ຕໍ່ໜ້າລາວ. ເນບູກາດເນັດຊາເຮັດໃຫ້ກະສັດເຊເດກີຢາຕາບອດ ເອົາໂສ້ທອງແດງລ່າມລາວໄວ້ ແລະພາລາວໄປບາບີໂລນ.+
8 ໃນວັນທີ 7 ເດືອນທີ 5 ຂອງປີທີ 19 ທີ່ເນບູກາດເນັດຊາເປັນກະສັດປົກຄອງບາບີໂລນ ເນບູຊາຣາດານ+ຫົວໜ້າທະຫານປ້ອງກັນໂຕກະສັດບາບີໂລນໄດ້ມາເມືອງເຢຣູຊາເລັມ.+ 9 ລາວໄດ້ຈູດວິຫານຂອງພະເຢໂຫວາ+ ວັງຂອງກະສັດ+ ເຮືອນທຸກຫຼັງໃນເມືອງເຢຣູຊາເລັມ+ ແລະເຮືອນຂອງຄົນສຳຄັນທຸກຄົນ.+ 10 ພວກທະຫານການເດອາທີ່ມານຳຫົວໜ້າທະຫານປ້ອງກັນໂຕກະສັດ+ໄດ້ທຳລາຍກຳແພງເມືອງເຢຣູຊາເລັມ. 11 ເນບູຊາຣາດານທີ່ເປັນຫົວໜ້າທະຫານປ້ອງກັນໂຕກະສັດໄດ້ຈັບຄົນທີ່ຍັງເຫຼືອຢູ່ໃນເມືອງໄປເປັນຊະເລີຍ. ໃນກຸ່ມນັ້ນມີປະຊາຊົນແລະພວກທີ່ໄປຢູ່ຝ່າຍກະສັດບາບີໂລນນຳ.+ 12 ແຕ່ລາວຈົ່ງຄົນທີ່ທຸກທີ່ສຸດໄວ້ເພື່ອໃຫ້ເຮັດສວນໝາກລະແຊັງແລະເຮັດໄຮ່ເຮັດນາ.+ 13 ພວກການເດອາມ້າງເສົາທອງແດງ 2 ຕົ້ນ+ທີ່ຢູ່ວິຫານຂອງພະເຢໂຫວາ ແລະມ້າງລໍ້+ກັບອ່າງທະເລທອງແດງ+ທີ່ຢູ່ວິຫານຂອງພະເຢໂຫວາ ແລ້ວເຂົາເຈົ້າກໍຂົນທອງແດງໄປບາບີໂລນ.+ 14 ເຂົາເຈົ້າຍັງໄດ້ເອົາຖັງໃສ່ຂີ້ເທົ່າ* ຊວ້ານ ມີດຕັດສຳລັບຕັດໄສ້ຕະກຽງ ຈອກ ແລະເຄື່ອງໃຊ້ທຸກຢ່າງທີ່ເປັນທອງແດງທີ່ຢູ່ໃນວິຫານໄປນຳ. 15 ຫົວໜ້າທະຫານປ້ອງກັນໂຕກະສັດໄດ້ເອົາຖາດສຳລັບໃສ່ຖ່ານທີ່ຮ້ອນໆກັບຖ້ວຍທີ່ເປັນເງິນແທ້+ແລະຄຳແທ້+ໄປຄືກັນ. 16 ຈຳນວນທອງແດງທີ່ໃຊ້ເຮັດເສົາ 2 ຕົ້ນ ແລະອ່າງທະເລທອງແດງກັບລໍ້ທີ່ໂຊໂລໂມນໄດ້ເຮັດສຳລັບວິຫານຂອງພະເຢໂຫວາມີຫຼາຍແທ້ຫຼາຍວ່າຈົນຊັ່ງນ້ຳໜັກບໍ່ໄດ້.+ 17 ເສົາແຕ່ລະຕົ້ນສູງ 18 ສອກ*+ ບົວຫົວເສົາທີ່ເປັນທອງແດງທີ່ຢູ່ເທິງເສົານັ້ນສູງ 3 ສອກ* ແລະຕານ່າງທີ່ຢູ່ກັບໝາກພິລາທີ່ຢູ່ອ້ອມບົວເປັນທອງແດງທັງໝົດ.+ ເສົາທັງສອງຕົ້ນເຮັດແບບດຽວກັນ.
18 ຫົວໜ້າທະຫານປ້ອງກັນໂຕກະສັດໄດ້ຈັບເສຣາຢາ+ທີ່ເປັນປະໂລຫິດໃຫຍ່ ເຊຟານີຢາ+ທີ່ເປັນຜູ້ຊ່ວຍປະໂລຫິດໃຫຍ່ ແລະຄົນຍາມປະຕູ 3 ຄົນໄປນຳ.+ 19 ນອກຈາກນັ້ນ ລາວຍັງໄດ້ຈັບຂ້າລາຊະການຄົນໜຶ່ງທີ່ເປັນຜູ້ບັນຊາການທະຫານ ທີ່ປຶກສາ 5 ຄົນຂອງກະສັດທີ່ຍັງຢູ່ໃນເມືອງເຢຣູຊາເລັມ ເລຂາຂອງຫົວໜ້າກອງທັບທີ່ຮັບຜິດຊອບເກນຄົນເຂົ້າມາເປັນທະຫານ ແລະປະຊາຊົນ 60 ຄົນທີ່ຍັງຢູ່ໃນເມືອງ. 20 ເນບູຊາຣາດານ+ທີ່ເປັນຫົວໜ້າທະຫານປ້ອງກັນໂຕກະສັດຈັບຄົນເຫຼົ່ານີ້ໄປໃຫ້ກະສັດບາບີໂລນຢູ່ເມືອງຣິບລາ.+ 21 ກະສັດບາບີໂລນໄດ້ຂ້າເຂົາເຈົ້າຢູ່ເມືອງຣິບລາໃນເຂດຮາມັດ.+ ພວກຢູດາຈຶ່ງຖືກໄລ່ອອກຈາກແຜ່ນດິນຂອງໂຕເອງ ແລະຖືກຈັບໄປເປັນຊະເລີຍ.+
22 ເນບູກາດເນັດຊາກະສັດຂອງບາບີໂລນໄດ້ແຕ່ງຕັ້ງເກດາລີຢາ+ລູກຊາຍຂອງອາຮີກາມ+ຫຼານຂອງຊາຟານ+ໃຫ້ເບິ່ງແຍງຄົນທີ່ລາວປະໄວ້ຢູ່ຢູດາ.+ 23 ເມື່ອພວກຫົວໜ້າກອງທັບຂອງຢູດາແລະພວກທະຫານຂອງເຂົາເຈົ້າຮູ້ວ່າກະສັດບາບີໂລນໄດ້ແຕ່ງຕັ້ງເກດາລີຢາ ເຂົາເຈົ້າກໍຟ້າວມາຫາເກດາລີຢາຢູ່ເມືອງມິດຊະປາ. ຄົນກຸ່ມນີ້ມີອິດຊະມາເອນລູກຊາຍຂອງເນທານີອາ ໂຢຮານານລູກຊາຍຂອງກາເຣອາ ເສຣາຢາລູກຊາຍຂອງຕັນຮູເມັດຄົນເນໂຕຟາ ຢາອາຊານີຢາຄົນມາອາກາ ແລະພວກທະຫານຂອງເຂົາເຈົ້າ.+ 24 ເກດາລີຢາສາບານກັບພວກຫົວໜ້າກອງທັບແລະພວກທະຫານຂອງເຂົາເຈົ້າແລະບອກວ່າ: “ບໍ່ຕ້ອງຢ້ານທີ່ຈະຮັບໃຊ້ພວກການເດອາ ໃຫ້ຢູ່ແຜ່ນດິນນີ້ແລະຮັບໃຊ້ກະສັດບາບີໂລນ ແລ້ວພວກເຈົ້າຈະມີຊີວິດທີ່ດີ.”+
25 ອິດຊະມາເອນ+ເປັນລູກຊາຍຂອງເນທານີອາແລະເປັນຫຼານຂອງເອລີຊາມາ. ລາວເປັນລູກຫຼານຂອງກະສັດ. ໃນເດືອນທີ 7 ລາວພາຄົນຂອງລາວ 10 ຄົນໄປເມືອງມິດຊະປາເພື່ອຂ້າເກດາລີຢາກັບພວກຢິວແລະພວກການເດອາທີ່ຢູ່ນຳເກດາລີຢາ.+ 26 ຫຼັງຈາກນັ້ນ ປະຊາຊົນທຸກຄົນ ລວມທັງພວກຫົວໜ້າກອງທັບກໍໜີໄປເອຢິບ+ ຍ້ອນເຂົາເຈົ້າຢ້ານພວກການເດອາ.+
27 ໃນປີທີ 37 ທີ່ເຢໂຮຢາກິນ+ກະສັດຂອງຢູດາຖືກຈັບມາເປັນຊະເລີຍ ເອວິນເມໂຣດັກກໍເລີ່ມເປັນກະສັດປົກຄອງບາບີໂລນ. ໃນວັນທີ 27 ເດືອນທີ 12 ຂອງປີນັ້ນ ເອວິນເມໂຣດັກໄດ້ປ່ອຍເຢໂຮຢາກິນກະສັດຂອງຢູດາອອກຈາກຄຸກ.+ 28 ເອວິນເມໂຣດັກໄດ້ເຮັດດີກັບເຢໂຮຢາກິນ ແລະໃຫ້ກຽດລາວຫຼາຍກວ່າກະສັດອົງອື່ນໆ*ທີ່ຖືກຈັບມາເປັນຊະເລີຍຢູ່ບາບີໂລນ. 29 ເຢໂຮຢາກິນບໍ່ຕ້ອງນຸ່ງເຄື່ອງນັກໂທດ ແລະລາວໄດ້ນັ່ງກິນເຂົ້າກັບກະສັດຈົນຮອດມື້ຕາຍ. 30 ກະສັດໃຫ້ເຢໂຮຢາກິນມີຂອງກິນທຸກມື້ຕະຫຼອດຊີວິດຂອງເຢໂຮຢາກິນ.