ຈົດໝາຍສະບັບທຳອິດເຖິງຄລິດສະຕຽນໃນເມືອງໂກຣິນໂທ
16 ໃນເລື່ອງການລວບລວມເງິນເພື່ອຊ່ວຍພວກຜູ້ບໍລິສຸດນັ້ນ+ ຂໍໃຫ້ພວກເຈົ້າເຮັດຄືກັບທີ່ຂ້ອຍໄດ້ສັ່ງປະຊາຄົມຕ່າງໆໃນແຂວງຄາລາເຕຍ. 2 ໃນມື້ທຳອິດຂອງທຸກໆອາທິດ ໃຫ້ແຕ່ລະຄົນແບ່ງເງິນໄວ້ຕາມຄວາມສາມາດຂອງໂຕເອງ ເພື່ອຈະບໍ່ຕ້ອງລວບລວມເງິນຕອນທີ່ຂ້ອຍມາ. 3 ເມື່ອໄປຮອດ ຂ້ອຍຈະໃຫ້ຄົນທີ່ມີໜັງສືຮັບຮອງຈາກພວກເຈົ້າ+ເອົາເງິນທີ່ພວກເຈົ້າມີນ້ຳໃຈບໍລິຈາກໄປສົ່ງຢູ່ເມືອງເຢຣູຊາເລັມ. 4 ແຕ່ຖ້າເຫັນວ່າຂ້ອຍຄວນໄປນຳ ຂ້ອຍກໍຈະໄປກັບເຂົາເຈົ້າ.
5 ຂ້ອຍຈະໄປຫາພວກເຈົ້າເມື່ອເດີນທາງຜ່ານແຂວງມາເກໂດເນຍແລ້ວ ຍ້ອນຂ້ອຍຕັ້ງໃຈຈະຜ່ານທາງແຂວງນັ້ນຢູ່ແລ້ວ.+ 6 ຂ້ອຍອາດຈະພັກຢູ່ກັບພວກເຈົ້າໄລຍະໜຶ່ງ. ຖ້າເປັນແນວນັ້ນ ຂ້ອຍອາດຈະພັກຈົນໝົດຍາມໜາວ ເພື່ອວ່າຕອນທີ່ຂ້ອຍເດີນທາງໄປຕໍ່ພວກເຈົ້າຈະໄປສົ່ງຂ້ອຍຈັກໄລຍະໜຶ່ງ. 7 ຂ້ອຍຍັງບໍ່ຢາກໄປຫາພວກເຈົ້າຕອນນີ້ ແລ້ວຢູ່ໄດ້ບຶດດຽວ ແຕ່ຂ້ອຍຢາກຢູ່ກັບພວກເຈົ້າດົນໆ+ ຖ້ານັ້ນແມ່ນສິ່ງທີ່ພະເຢໂຫວາ*ຕ້ອງການ. 8 ຕອນນີ້ ຂ້ອຍຈະຢູ່ເມືອງເອເຟໂຊກ່ອນ+ຈົນກວ່າຈະຮອດເທດສະການເພັນເຕກອດ. 9 ຢູ່ນີ້ມີໂອກາດ*ເປີດກວ້າງໃຫ້ຂ້ອຍໄດ້ເຮັດວຽກແລ້ວ+ ແຕ່ກໍມີຜູ້ຕໍ່ຕ້ານຫຼາຍຄືກັນ.
10 ຖ້າຕີໂມທຽວ+ໄປຮອດ ຕອນທີ່ລາວຢູ່ກັບພວກເຈົ້າ ຢ່າໃຫ້ລາວກັງວົນຫຍັງ ຍ້ອນລາວເຮັດວຽກຂອງພະເຢໂຫວາ*+ຄືກັບຂ້ອຍ. 11 ດັ່ງນັ້ນ ຢ່າໃຫ້ຜູ້ໃດດູຖູກລາວ. ຕອນທີ່ລາວກັບ ຂໍໃຫ້ໄປສົ່ງລາວຈັກໄລຍະໜຶ່ງເພື່ອລາວຈະກັບມາຫາຂ້ອຍຢ່າງປອດໄພ ຍ້ອນຂ້ອຍກັບພວກພີ່ນ້ອງລໍຖ້າລາວຢູ່.
12 ສ່ວນອາໂປໂລ+ພີ່ນ້ອງຂອງພວກເຮົາ ຂ້ອຍຂໍຮ້ອງລາວໃຫ້ໄປຫາພວກເຈົ້າພ້ອມກັບພວກພີ່ນ້ອງແລ້ວ ແຕ່ລາວຍັງບໍ່ຢາກໄປຕອນນີ້. ລາວຈະໄປຕອນທີ່ມີໂອກາດ.
13 ໃຫ້ພວກເຈົ້າຕື່ນໂຕສະເໝີ+ ມີຄວາມເຊື່ອທີ່ໝັ້ນຄົງ+ ມີໃຈກ້າ+ ແລະເຂັ້ມແຂງ.+ 14 ໃຫ້ເຮັດທຸກສິ່ງດ້ວຍຄວາມຮັກ.+
15 ພວກເຈົ້າກໍຮູ້ວ່າຊະເຕຟານາກັບຄົນໃນເຮືອນຂອງລາວເປັນລູກສິດກຸ່ມທຳອິດໃນແຂວງອະຂາຢາ ແລະເຂົາເຈົ້າທຸ່ມເທໂຕເພື່ອຊ່ວຍເຫຼືອ*ພວກຜູ້ບໍລິສຸດ. ດັ່ງນັ້ນ ພີ່ນ້ອງເອີ້ຍ ຂ້ອຍຂໍຮ້ອງວ່າ 16 ໃຫ້ພວກເຈົ້າຍອມເຊື່ອຟັງຄົນແບບນັ້ນ ລວມທັງໝູ່ທຸກຄົນທີ່ເຮັດວຽກໜັກນຳກັນ.+ 17 ຂ້ອຍດີໃຈທີ່ຊະເຕຟານາ+ ຟໍຕູນາໂຕ ແລະອະຂາອີໂກໄດ້ມາຫາຂ້ອຍ. ເຂົາເຈົ້າເຮັດໃຫ້ຂ້ອຍຮູ້ສຶກຄືກັບວ່າພວກເຈົ້າທຸກຄົນກໍຢູ່ນີ້ຄືກັນ. 18 ເຂົາເຈົ້າເຮັດໃຫ້ຂ້ອຍແລະພວກເຈົ້າໄດ້ກຳລັງໃຈ. ຂໍໃຫ້ນັບຖືແລະຂອບໃຈຄົນແບບນັ້ນ.
19 ປະຊາຄົມຕ່າງໆໃນແຂວງອາຊີ*ຝາກຄວາມຄິດຮອດໄປເຖິງພວກເຈົ້າ. ອາກີລາແລະປີຊະກາກັບປະຊາຄົມທີ່ປະຊຸມກັນໃນເຮືອນຂອງເຂົາເຈົ້າ+ກໍຝາກຄວາມຮັກທີ່ອົບອຸ່ນແບບຄລິດສະຕຽນມາໃຫ້ຄືກັນ. 20 ພີ່ນ້ອງທຸກຄົນກໍຝາກຄວາມຄິດຮອດໄປເຖິງພວກເຈົ້າ. ຂໍໃຫ້ຈູບທັກທາຍກັນແບບພີ່ນ້ອງ.
21 ຂ້ອຍໂປໂລຂຽນຄຳທັກທາຍສ່ວນນີ້ດ້ວຍໂຕເອງ.
22 ຖ້າຜູ້ໃດບໍ່ຮັກຜູ້ເປັນນາຍ ກໍໃຫ້ຜູ້ນັ້ນຖືກສາບແຊ່ງ. ຂໍໃຫ້ຜູ້ເປັນນາຍຂອງພວກເຮົາມາໄວໆ! 23 ຂໍໃຫ້ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ຈາກພະເຢຊູຜູ້ເປັນນາຍ. 24 ຂ້ອຍຂໍຝາກຄວາມຮັກໃຫ້ທຸກຄົນທີ່ເປັນລູກສິດຂອງພະຄລິດເຢຊູ.