ຈົດໝາຍຂອງຢາໂກໂບ
5 ຟັງເດີ້! ພວກເຈົ້າທີ່ເປັນຄົນຮັ່ງ ໃຫ້ຮ້ອງໄຫ້ເສຍໃຈໄວ້ຖ້າໂລດ ຍ້ອນພວກເຈົ້າກຳລັງຈະເຈິກັບຄວາມທຸກລຳບາກ.+ 2 ຊັບສົມບັດຂອງພວກເຈົ້າຄ່ອຍໆສູນຫາຍໄປ ແລະເຄື່ອງນຸ່ງຂອງພວກເຈົ້າກໍຖືກໂຕແມງກິນໝົດແລ້ວ.+ 3 ເງິນກັບຄຳທີ່ພວກເຈົ້າສະສົມໄວ້ຖືກຂີ້ໝ້ຽງກິນໝົດແລ້ວ ແລະຂີ້ໝ້ຽງນັ້ນຈະເປັນສິ່ງທີ່ຢືນຢັນວ່າພວກເຈົ້າເຮັດຜິດ ແລະມັນຈະກັດກິນພວກເຈົ້າ. ສິ່ງທີ່ພວກເຈົ້າສະສົມໄວ້ຈະເປັນຄືກັບໄຟໃນສະໄໝສຸດທ້າຍ.+ 4 ຟັງເດີ້! ຄົນຮັບຈ້າງກ່ຽວເຂົ້າໃນນາຂອງພວກເຈົ້າກຳລັງຮ້ອງຂໍຄວາມຍຸຕິທຳຍ້ອນພວກເຈົ້າບໍ່ຈ່າຍຄ່າຈ້າງເຂົາເຈົ້າ ແລະພະເຢໂຫວາ*ຜູ້ ບັນຊາການກອງທັບກໍໄດ້ຍິນສຽງຮ້ອງຂໍຄວາມຊ່ວຍເຫຼືອຂອງເຂົາເຈົ້າ.+ 5 ພວກເຈົ້າໃຊ້ຊີວິດແບບຫຼູຫຼາຟຸມເຟືອຍຄືຄົນໃນໂລກແລະມີແຕ່ຫາຄວາມສຸກໃສ່ໂຕເອງ. ພວກເຈົ້າກິນຈົນຕຸ້ຍຈົນພີຄືກັບງົວທີ່ຕຸ້ຍໆໃນມື້ທີ່ມັນຈະຖືກຂ້າ.+ 6 ພວກເຈົ້າຕັດສິນຄົນທີ່ເຊື່ອຟັງພະເຈົ້າວ່າມີຄວາມຜິດແລະຂ້າລາວ. ແລ້ວຜູ້ນັ້ນ*ຈະບໍ່ຕໍ່ສູ້ພວກເຈົ້າບໍ?
7 ພີ່ນ້ອງເອີ້ຍ ຂໍໃຫ້ອົດທົນລໍຖ້າຈົນຮອດເວລາທີ່ຜູ້ເປັນນາຍກັບມາ*+ ຄືກັບທີ່ຊາວໄຮ່ຊາວນາລໍຖ້າຜົນລະປູກທີ່ມີຄ່າ. ເຂົາເຈົ້າອົດທົນລໍຖ້າຈົນກວ່າຈະຮອດຕອນທີ່ຝົນຕົ້ນລະດູແລະຝົນທ້າຍລະດູຈະມາ.+ 8 ພວກເຈົ້າກໍຄືກັນ ຂໍໃຫ້ອົດທົນລໍຖ້າ+ ແລະເຮັດໃຫ້ໃຈໝັ້ນຄົງ ຍ້ອນການກັບມາ*ຂອງຜູ້ເປັນນາຍໃກ້ເຂົ້າມາແລ້ວ.+
9 ພີ່ນ້ອງເອີ້ຍ ຢ່າຈົ່ມໃຫ້ກັນ ເພື່ອພວກເຈົ້າຈະບໍ່ຖືກຕັດສິນລົງໂທດ.+ ລະວັງໃຫ້ດີ! ຜູ້ຕັດສິນຢືນຢູ່ໜ້າປະຕູແລ້ວ. 10 ພີ່ນ້ອງເອີ້ຍ ໃຫ້ພວກເຈົ້າຮຽນແບບພວກຜູ້ພະຍາກອນທີ່ເວົ້າໃນນາມຂອງພະເຢໂຫວາ*+ ເຂົາເຈົ້າເຈິຄວາມລຳບາກຫຼາຍຢ່າງ+ແຕ່ກໍອົດທົນໄດ້.+ 11 ພວກເຮົາຖືວ່າຄົນທີ່ອົດທົນກໍມີຄວາມສຸກ.*+ ພວກເຈົ້າກໍເຄີຍໄດ້ຍິນວ່າໂຢບອົດທົນຫຼາຍສ່ຳໃດ+ແລະຮູ້ວ່າໃນທີ່ສຸດພະເຢໂຫວາ*ໄດ້ອວຍພອນລາວແນວໃດ.+ ເລື່ອງນີ້ສະແດງວ່າພະເຢໂຫວາ*ມີຄວາມອີ່ຕົນແລະເຫັນອົກເຫັນໃຈຫຼາຍແທ້ໆ.+
12 ພີ່ນ້ອງເອີ້ຍ ສຳຄັນຫຼາຍທີ່ພວກເຈົ້າຕ້ອງເຊົາສາບານໂດຍອ້າງສະຫວັນ ຫຼືອ້າງໂລກ ຫຼືອ້າງສິ່ງໃດໆກໍຕາມ. ໃຫ້ຄຳເວົ້າຂອງພວກເຈົ້າທີ່ວ່າ “ແມ່ນ” ໝາຍຄວາມວ່າແມ່ນ ແລະທີ່ວ່າ “ບໍ່” ໝາຍຄວາມວ່າບໍ່+ ເພື່ອພວກເຈົ້າຈະບໍ່ຖືກຕັດສິນລົງໂທດ.
13 ໃນພວກເຈົ້າມີຜູ້ໃດທີ່ເຈິຄວາມລຳບາກຢູ່ບໍ? ຖ້າມີ ໃຫ້ລາວອະທິດຖານເລື້ອຍໆ.+ ໃນພວກເຈົ້າມີຜູ້ໃດທີ່ອາລົມດີມີຄວາມສຸກບໍ? ຖ້າມີກໍໃຫ້ລາວຮ້ອງເພງສັນລະເສີນພະເຈົ້າ.+ 14 ໃນພວກເຈົ້າມີຜູ້ໃດບໍ່ສະບາຍ*ບໍ? ຖ້າມີ ໃຫ້ລາວເອີ້ນພວກຜູ້ເບິ່ງແຍງ+ປະຊາຄົມໃຫ້ມາຫາ ແລ້ວຂໍໃຫ້ເຂົາເຈົ້າອະທິດຖານເພື່ອລາວແລະເອົານ້ຳມັນທາໃຫ້ລາວ*+ໃນນາມຂອງພະເຢໂຫວາ.* 15 ການອະທິດຖານດ້ວຍຄວາມເຊື່ອຈະເຮັດໃຫ້ຜູ້ທີ່ບໍ່ສະບາຍນັ້ນດີເປັນປົກກະຕິ* ແລະພະເຢໂຫວາ*ຈະເຮັດໃຫ້ລາວຟື້ນໂຕໄດ້. ຖ້າລາວໄດ້ເຮັດຜິດ ເພິ່ນກໍຈະຍົກໂທດໃຫ້ລາວ.
16 ໃຫ້ສາລະພາບຜິດ+ຕໍ່ກັນແລະອະທິດຖານເພື່ອກັນແລະກັນ ເພື່ອພວກເຈົ້າຈະເຊົາເຈັບປ່ວຍ. ຄຳອະທິດຖານຂອງຄົນທີ່ເຮັດສິ່ງທີ່ຖືກຕ້ອງມີພະລັງຫຼາຍແລະຊ່ວຍຄົນອື່ນໄດ້ແທ້ໆ.+ 17 ເອລີຢາເປັນຄົນທຳມະດາຄືກັບພວກເຮົາ* ແຕ່ເມື່ອລາວອະທິດຖານຢ່າງຈິງຈັງຂໍບໍ່ໃຫ້ຝົນຕົກ ຝົນກໍບໍ່ຕົກຮອດ 3 ປີກັບ 6 ເດືອນ.+ 18 ເມື່ອລາວອະທິດຖານອີກເທື່ອໜຶ່ງ ຝົນກໍຕົກ ແລະແຜ່ນດິນກໍເກີດຜົນລະປູກ.+
19 ພີ່ນ້ອງເອີ້ຍ ໃນພວກເຈົ້າມີຜູ້ໃດຖືກຊັກຈູງໃຫ້ຫຼົງອອກໄປຈາກທາງຂອງຄວາມຈິງ ແລ້ວໄດ້ຮັບການຊ່ວຍໃຫ້ກັບມາບໍ? 20 ຜູ້ທີ່ຊ່ວຍລາວໃຫ້ເຊົາເຮັດຜິດ+ ກໍໄດ້ຊ່ວຍລາວໃຫ້ລອດຈາກຄວາມຕາຍ ແລະພະເຈົ້າຈະຍົກໂທດຄວາມຜິດຫຼາຍຢ່າງທີ່ລາວໄດ້ເຮັດ.+