ຈົດໝາຍສະບັບທີສອງເຖິງຄລິດສະຕຽນໃນເມືອງເທຊະໂລນິກ
3 ສຸດທ້າຍນີ້ ພີ່ນ້ອງເອີ້ຍ ຂໍໃຫ້ອະທິດຖານເພື່ອພວກເຮົາຕໍ່ໆໄປ+ ເພື່ອຄຳສອນຂອງພະເຢໂຫວາ*ຈະແພ່ອອກໄປໄວໆ+ແລະຄົນຈະຍົກຍ້ອງຄຳສອນນັ້ນຄືກັບທີ່ພວກເຈົ້າກຳລັງເຮັດຢູ່. 2 ຂໍໃຫ້ອະທິດຖານໃຫ້ພະເຈົ້າປົກປ້ອງພວກເຮົາຈາກຄົນຊົ່ວທີ່ມັກທຳຮ້າຍຄົນອື່ນ+ ຍ້ອນວ່າບໍ່ແມ່ນທຸກຄົນຈະມີຄວາມເຊື່ອ.+ 3 ແຕ່ຜູ້ເປັນນາຍຈະໃຫ້ກຳລັງໃຈພວກເຈົ້າແລະປົກປ້ອງພວກເຈົ້າໄວ້ຈາກໂຕຊົ່ວຮ້າຍຍ້ອນເພິ່ນສັດຊື່. 4 ພວກເຮົາທີ່ເປັນລູກສິດຂອງຜູ້ເປັນນາຍໝັ້ນໃຈວ່າພວກເຈົ້າກຳລັງເຮັດຕາມທີ່ພວກເຮົາສັ່ງໄວ້ແລະຈະເຮັດຕໍ່ໆໄປ. 5 ຂໍໃຫ້ຜູ້ເປັນນາຍຊ່ວຍພວກເຈົ້າຕໍ່ໆໄປໃຫ້ຮັກພະເຈົ້າ+ແລະອົດທົນ+ເພື່ອພະຄລິດ.
6 ພີ່ນ້ອງເອີ້ຍ ໃນນາມຂອງພະເຢຊູຄລິດຜູ້ເປັນນາຍ ພວກເຮົາຂໍສັ່ງພວກເຈົ້າໃຫ້ຢູ່ໄກໆພີ່ນ້ອງທຸກຄົນທີ່ບໍ່ເຊື່ອຟັງ*+ແລະບໍ່ເຮັດຕາມທຳນຽມ*ທີ່ໄດ້ຮັບຈາກພວກເຮົາ.+ 7 ພວກເຈົ້າກໍຮູ້ແລ້ວວ່າຄວນຈະຮຽນແບບພວກເຮົາແນວໃດ+ ຍ້ອນຕອນທີ່ຢູ່ກັບພວກເຈົ້າ ພວກເຮົາບໍ່ໄດ້ເຮັດຄືກັບເຂົາເຈົ້າທີ່ບໍ່ຍອມເຊື່ອຟັງ. 8 ພວກເຮົາບໍ່ໄດ້ກິນເຂົ້າຜູ້ໃດລ້າໆ+ ແຕ່ພວກເຮົາເຮັດວຽກໜັກທັງເວັນທັງຄືນເພື່ອຈະບໍ່ເປັນພາລະໃຫ້ພວກເຈົ້າຜູ້ໃດຜູ້ໜຶ່ງຕ້ອງເສຍຄ່າໃຊ້ຈ່າຍຫຼາຍ.+ 9 ເຖິງວ່າພວກເຮົາມີສິດຈະເຮັດແບບນັ້ນ+ ແຕ່ພວກເຮົາກໍຢາກເປັນຕົວຢ່າງໃຫ້ພວກເຈົ້າຮຽນແບບ.+ 10 ທີ່ຈິງ ຕອນທີ່ພວກເຮົາຢູ່ກັບພວກເຈົ້າ ພວກເຮົາເຄີຍສັ່ງໄວ້ວ່າ: “ຖ້າຜູ້ໃດບໍ່ຢາກເຮັດວຽກ ກໍບໍ່ຕ້ອງໃຫ້ລາວກິນເຂົ້າ.”+ 11 ພວກເຮົາໄດ້ຍິນວ່າມີພວກເຈົ້າບາງຄົນທີ່ບໍ່ເຊື່ອຟັງ+ແລະບໍ່ເຮັດວຽກຫຍັງເລີຍ ແຕ່ພັດມັກທຽວໄປຫຍຸ້ງເລື່ອງຂອງຄົນອື່ນ.+ 12 ໃນນາມຂອງພະເຢຊູຄລິດຜູ້ເປັນນາຍ ພວກເຮົາຂໍສັ່ງແລະແນະນຳຄົນເຫຼົ່ານັ້ນໃຫ້ເຊົາຫຍຸ້ງກັບເລື່ອງຂອງຄົນອື່ນແລະໃຫ້ເຮັດວຽກຫາລ້ຽງໂຕເອງ.+
13 ພີ່ນ້ອງເອີ້ຍ ສ່ວນພວກເຈົ້າກໍຢ່າເຊົາເຮັດດີ. 14 ແຕ່ຖ້າຜູ້ໃດບໍ່ເຊື່ອຟັງສິ່ງທີ່ພວກເຮົາບອກໃນຈົດໝາຍສະບັບນີ້ ກໍໃຫ້ລະວັງຄົນແບບນີ້*ແລະເຊົາຄົບຫາກັບລາວ+ເພື່ອລາວຈະຮູ້ສຶກອາຍ. 15 ແຕ່ຢ່າຖືວ່າລາວເປັນສັດຕູ ໃຫ້ເຕືອນສະຕິລາວຕໍ່ໄປ+ຍ້ອນລາວຍັງເປັນພີ່ນ້ອງຢູ່.
16 ຂໍໃຫ້ຜູ້ເປັນນາຍທີ່ເປັນຜູ້ໃຫ້ສັນຕິສຸກຊ່ວຍພວກເຈົ້າໃຫ້ມີຄວາມສະຫງົບສຸກສະເໝີໃນທຸກໆເລື່ອງ.+ ຂໍໃຫ້ຜູ້ເປັນນາຍຢູ່ກັບພວກເຈົ້າທຸກຄົນ.
17 ຂ້ອຍໂປໂລຂຽນຄຳທັກທາຍສ່ວນນີ້ດ້ວຍໂຕເອງ.+ ຂ້ອຍຂຽນແບບນີ້ໃນຈົດໝາຍທຸກສະບັບເພື່ອພວກເຈົ້າຈະຮູ້ວ່າຂ້ອຍເປັນຄົນຂຽນ.
18 ຂໍໃຫ້ພວກເຈົ້າທຸກຄົນໄດ້ຮັບຄວາມກະລຸນາທີ່ຍິ່ງໃຫຍ່ຈາກພະເຢຊູຄລິດຜູ້ເປັນນາຍຂອງພວກເຮົາ.