ຂ່າວຄາວສະບັບທີສອງ
18 ກະສັດເຢໂຮຊາຟັດຮັ່ງແລະມີກຽດຫຼາຍ+ ແຕ່ລາວໄປເປັນມິດກັບອາຮາບແລະຍອມໃຫ້ຄົນໃນຄອບຄົວຂອງລາວໄປແຕ່ງດອງກັບຄົນໃນຄອບຄົວຂອງອາຮາບ.+ 2 ຫຼາຍປີຕໍ່ມາ ເຢໂຮຊາຟັດໄດ້ໄປຫາອາຮາບຢູ່ເມືອງຊາມາເຣຍ.+ ອາຮາບສັ່ງໃຫ້ຂ້າແກະແລະງົວບັກຫຼາຍໆເພື່ອເປັນເຄື່ອງບູຊາສຳລັບພະເຈົ້າແທນເຢໂຮຊາຟັດກັບຄົນທີ່ມານຳລາວ. ຈາກນັ້ນ ອາຮາບກໍຊວນເຢໂຮຊາຟັດໄປຕໍ່ສູ້ກັບເມືອງຣາໂມດກິລຽດນຳກັນ.+ 3 ອາຮາບກະສັດຂອງອິດສະຣາເອນຖາມເຢໂຮຊາຟັດກະສັດຂອງຢູດາວ່າ: “ຂ້ອຍຈະໄປຕໍ່ສູ້ກັບເມືອງຣາໂມດກິລຽດ ເຈົ້າຈະໄປນຳຂ້ອຍບໍ?” ເຢໂຮຊາຟັດຕອບວ່າ: “ໄປແທ້ ແລະຂ້ອຍຈະເອົາທະຫານກັບມ້າຂອງຂ້ອຍໄປນຳ.”
4 ເຢໂຮຊາຟັດເວົ້າກັບກະສັດອິດສະຣາເອນວ່າ: “ໃຫ້ເຮົາຖາມພະເຢໂຫວາກ່ອນເບາະ?”+ 5 ກະສັດອິດສະຣາເອນຈຶ່ງເອີ້ນຜູ້ພະຍາກອນ 400 ຄົນມາ ແລະຖາມເຂົາເຈົ້າວ່າ: “ພວກເຮົາຄວນຈະໄປຕໍ່ສູ້ຢູ່ເມືອງຣາໂມດກິລຽດຫຼືບໍ່ຄວນໄປ?” ເຂົາເຈົ້າບອກວ່າ: “ໄປໂລດກະສັດ. ພະເຈົ້າທ່ຽງແທ້ຈະໃຫ້ທ່ານຊະນະແນ່ນອນ.”
6 ແລ້ວເຢໂຮຊາຟັດກໍເວົ້າວ່າ: “ຢູ່ນີ້ບໍ່ມີຜູ້ພະຍາກອນຂອງພະເຢໂຫວາເລີຍບໍ?+ ພວກເຮົາຄວນຈະຖາມລາວນຳ.”+ 7 ກະສັດອິດສະຣາເອນຈຶ່ງຕອບເຢໂຮຊາຟັດວ່າ: “ຍັງມີອີກຜູ້ໜຶ່ງ+ທີ່ເຮົາຈະຖາມພະເຢໂຫວາຜ່ານທາງລາວໄດ້ ແຕ່ຂ້ອຍຊັງລາວ ຍ້ອນລາວພະຍາກອນແຕ່ເລື່ອງທີ່ບໍ່ດີກ່ຽວກັບຂ້ອຍ ບໍ່ເຄີຍມີເລື່ອງດີເລີຍ.+ ລາວຊື່ມີກາຢາເປັນລູກຊາຍຂອງອິມລາ.” ແຕ່ເຢໂຮຊາຟັດເວົ້າວ່າ: “ເຈົ້າບໍ່ຄວນເວົ້າແບບນັ້ນ.”
8 ກະສັດອິດສະຣາເອນຈຶ່ງບອກຄົນຂອງລາວວ່າ: “ໄປພາມີກາຢາລູກຊາຍຂອງອິມລາມາດຽວນີ້.”+ 9 ອາຮາບກະສັດຂອງອິດສະຣາເອນແລະເຢໂຮຊາຟັດກະສັດຂອງຢູດາໃສ່ຊຸດກະສັດເຕັມຍົດແລະນັ່ງຢູ່ບັນລັງຂອງໂຕເອງໃນລານຟາດເຂົ້າທີ່ຢູ່ປະຕູທາງເຂົ້າເມືອງຊາມາເຣຍ ແລະພວກຜູ້ພະຍາກອນກໍກຳລັງພະຍາກອນຢູ່ຕໍ່ໜ້າເຂົາເຈົ້າ. 10 ແລ້ວເຊເດກີຢາລູກຊາຍຂອງເຄນາອານາໄດ້ເອົາເຫຼັກມາເຮັດເປັນຮູບເຂົາສັດ 2 ອັນແລະເວົ້າວ່າ: “ພະເຢໂຫວາເວົ້າແບບນີ້ ‘ທ່ານຈະຂ້າ*ພວກຊີເຣຍໃຫ້ຕາຍໝົດດ້ວຍເຂົາສັດ 2 ອັນນີ້.’” 11 ພວກຜູ້ພະຍາກອນຄົນອື່ນໆກໍເວົ້າແບບດຽວກັນວ່າ: “ໃຫ້ທ່ານໄປເມືອງຣາໂມດກິລຽດໂລດ. ທ່ານຈະຊະນະແນ່ນອນ.+ ພະເຢໂຫວາຈະຊ່ວຍທ່ານໃຫ້ຍຶດເອົາເມືອງນັ້ນຄືນມາໄດ້.”
12 ຄົນທີ່ກະສັດໃຫ້ໄປເອີ້ນມີກາຢາກໍເວົ້າກັບມີກາຢາວ່າ: “ຜູ້ພະຍາກອນທຸກຄົນເວົ້າແຕ່ເລື່ອງດີໆໃຫ້ກະສັດຟັງ. ຂໍໃຫ້ເຈົ້າເວົ້າແຕ່ເລື່ອງດີໆກັບກະສັດຄືກັນເດີ້.”+ 13 ແຕ່ມີກາຢາເວົ້າວ່າ: “ຂ້ອຍຂໍສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່ວ່າ ຂ້ອຍຈະເວົ້າຕາມສິ່ງທີ່ພະເຈົ້າຂອງຂ້ອຍບອກໃຫ້ເວົ້າເທົ່ານັ້ນ.”+ 14 ແລ້ວມີກາຢາກໍເຂົ້າໄປຫາກະສັດ ແລະກະສັດຖາມລາວວ່າ: “ມີກາຢາ ພວກເຮົາຄວນໄປຕໍ່ສູ້ຢູ່ເມືອງຣາໂມດກິລຽດຫຼືບໍ່ຄວນໄປ?” ລາວຕອບທັນທີວ່າ: “ໃຫ້ທ່ານໄປໂລດ. ທ່ານຈະຊະນະແນ່ນອນ. ພະເຈົ້າຈະຊ່ວຍທ່ານໃຫ້ຍຶດເອົາເມືອງນັ້ນຄືນມາໄດ້.” 15 ກະສັດອາຮາບເວົ້າກັບລາວວ່າ: “ຂ້ອຍຕ້ອງໃຫ້ເຈົ້າສາບານຈັກເທື່ອເຈົ້າຈຶ່ງຈະເວົ້າຄວາມຈິງ ແລະເວົ້າແຕ່ສິ່ງທີ່ພະເຢໂຫວາບອກໃຫ້ເຈົ້າເວົ້າເທົ່ານັ້ນ.” 16 ມີກາຢາຈຶ່ງບອກວ່າ: “ຂ້ອຍເຫັນພວກອິດສະຣາເອນແຕກຊະແຕກຊາຍຢູ່ຕາມພູຄືກັບແກະທີ່ບໍ່ມີຜູ້ລ້ຽງ.+ ພະເຢໂຫວາບອກວ່າ ‘ເຂົາເຈົ້າບໍ່ມີຜູ້ນຳແລ້ວ. ໃຫ້ແຕ່ລະຄົນກັບເມືອເຮືອນດ້ວຍຄວາມປອດໄພ.’”
17 ແລ້ວກະສັດອາຮາບກໍເວົ້າກັບເຢໂຮຊາຟັດວ່າ: “ຂ້ອຍບອກເຈົ້າແລ້ວແມ່ນເບາະວ່າລາວພະຍາກອນແຕ່ເລື່ອງທີ່ບໍ່ດີກ່ຽວກັບຂ້ອຍ. ບໍ່ເຄີຍມີເລື່ອງດີເລີຍ.”+
18 ມີກາຢາຈຶ່ງບອກວ່າ: “ຂໍໃຫ້ທ່ານຟັງສິ່ງທີ່ພະເຢໂຫວາບອກ. ຂ້ອຍເຫັນພະເຢໂຫວານັ່ງຢູ່ບັນລັງຂອງເພິ່ນ+ແລະມີທູດສະຫວັນທັງໝົດ+ຢືນຢູ່ເບື້ອງຂວາແລະເບື້ອງຊ້າຍຂອງເພິ່ນ.+ 19 ພະເຢໂຫວາຖາມວ່າ ‘ແມ່ນໃຜຈະໄປຕົວະອາຮາບກະສັດຂອງອິດສະຣາເອນໃຫ້ໄປຕໍ່ສູ້ຢູ່ເມືອງຣາໂມດກິລຽດແລະຕາຍຢູ່ຫັ້ນ?’ ທູດສະຫວັນອົງໜຶ່ງເວົ້າແບບໜຶ່ງ ແລະທູດສະຫວັນອີກອົງໜຶ່ງກໍເວົ້າອີກແບບໜຶ່ງ. 20 ແລ້ວກໍມີທູດສະຫວັນອົງໜຶ່ງ+ອອກມາຢືນຢູ່ຕໍ່ໜ້າພະເຢໂຫວາແລະເວົ້າວ່າ ‘ລູກຈະໄປຕົວະລາວ.’ ພະເຢໂຫວາຖາມວ່າ ‘ເຈົ້າຈະຕົວະລາວແນວໃດ?’ 21 ທູດສະຫວັນອົງນັ້ນຕອບວ່າ ‘ລູກຈະໄປເຮັດໃຫ້ພວກຜູ້ພະຍາກອນຂອງລາວເວົ້າຕົວະລາວ.’ ເພິ່ນຈຶ່ງບອກທູດສະຫວັນອົງນັ້ນວ່າ ‘ໄປໂລດ ເຈົ້າຈະຕົວະລາວໄດ້ແນ່ນອນ.’ 22 ຕອນນີ້ພະເຢໂຫວາໄດ້ໃຫ້ທູດສະຫວັນອົງນັ້ນມາເຮັດໃຫ້ພວກຜູ້ພະຍາກອນທຸກຄົນຂອງທ່ານເວົ້າຕົວະທ່ານ+ ແຕ່ພະເຢໂຫວາຕັດສິນແລ້ວວ່າທ່ານຈະຕ້ອງຕາຍ.”
23 ທັນໃດນັ້ນ ເຊເດກີຢາ+ລູກຊາຍຂອງເຄນາອານາກໍເຂົ້າມາຕົບໜ້າ+ມີກາຢາ+ແລະເວົ້າວ່າ: “ເຈົ້າໝາຍຄວາມວ່າພະລັງຂອງພະເຢໂຫວາອອກຈາກຂ້ອຍແລ້ວໄປເວົ້າກັບເຈົ້າຫວະ?”+ 24 ມີກາຢາຕອບວ່າ: “ແລ້ວເຈົ້າຈະຮູ້ໃນມື້ທີ່ເຈົ້າເຂົ້າໄປລີ້ຢູ່ຫ້ອງທາງໃນ.” 25 ກະສັດອາຮາບຈຶ່ງບອກວ່າ: “ເອົາມີກາຢາໄປໃຫ້ອາໂມນທີ່ເປັນເຈົ້າເມືອງແລະໂຢອາດລູກຊາຍຂອງກະສັດ. 26 ໃຫ້ບອກເຂົາເຈົ້າວ່າ ‘ກະສັດສັ່ງວ່າ “ຂັງລາວໄວ້ໃນຄຸກ+ແລະເອົາເຂົ້າເອົານ້ຳໃຫ້ລາວກິນໜ້ອຍດຽວຈົນກວ່າຂ້ອຍຈະກັບມາຢ່າງປອດໄພ.”’” 27 ແຕ່ມີກາຢາບອກວ່າ: “ຖ້າທ່ານກັບມາຢ່າງປອດໄພກໍສະແດງວ່າພະເຢໂຫວາບໍ່ໄດ້ເວົ້າຜ່ານທາງຂ້ອຍ.”+ ແລ້ວລາວກໍເວົ້າຕື່ມອີກວ່າ: “ໃຫ້ທຸກຄົນຈື່ຄຳເວົ້າຂອງຂ້ອຍໄວ້ເດີ້.”
28 ອາຮາບກະສັດອິດສະຣາເອນແລະເຢໂຮຊາຟັດກະສັດຢູດາກໍໄປເມືອງຣາໂມດກິລຽດ.+ 29 ກະສັດອາຮາບເວົ້າກັບເຢໂຮຊາຟັດວ່າ: “ຂ້ອຍຈະປອມໂຕແລະເຂົ້າໄປຕໍ່ສູ້ ແຕ່ໃຫ້ເຈົ້າໃສ່ຊຸດກະສັດເດີ້.” ແລ້ວກະສັດອາຮາບກໍປອມໂຕ ແລະເຂົາເຈົ້າກໍເຂົ້າໄປໃນສະໜາມຮົບ. 30 ກະສັດຊີເຣຍໄດ້ສັ່ງພວກຫົວໜ້າກອງທັບລົດມ້າວ່າ: “ພວກເຈົ້າຢ່າຕໍ່ສູ້ກັບໃຜບໍ່ວ່າຈະມີຕຳແໜ່ງນ້ອຍຫຼືຕຳແໜ່ງໃຫຍ່ ແຕ່ໃຫ້ຕໍ່ສູ້ກັບກະສັດອິດສະຣາເອນເທົ່ານັ້ນ.” 31 ເມື່ອພວກຫົວໜ້າກອງທັບລົດມ້າເຫັນເຢໂຮຊາຟັດ ເຂົາເຈົ້າກໍຄິດວ່າ: “ຜູ້ນີ້ຕ້ອງແມ່ນກະສັດອິດສະຣາເອນແຫຼະ.” ເຂົາເຈົ້າຈຶ່ງຫຸ້ມໄປຕໍ່ສູ້ລາວ ແລ້ວເຢໂຮຊາຟັດກໍຮ້ອງໃຫ້ຄົນມາຊ່ວຍ+ ແລະພະເຢໂຫວາໄດ້ຊ່ວຍລາວ. ພະເຈົ້າເຮັດໃຫ້ພວກຊີເຣຍໄປອີກທາງໜຶ່ງ. 32 ເມື່ອພວກຫົວໜ້າກອງທັບລົດມ້າເຫັນວ່າບໍ່ແມ່ນກະສັດອິດສະຣາເອນ ເຂົາເຈົ້າກໍເຊົາໄລ່ນຳລາວທັນທີ.
33 ມີທະຫານຄົນໜຶ່ງຍິງທະນູ ແລ້ວບັງເອີນໄປຖືກອາຮາບກະສັດອິດສະຣາເອນຢູ່ບ່ອນຮອຍຕໍ່ຂອງເສື້ອເກາະ. ອາຮາບຈຶ່ງບອກຄົນຂັບລົດມ້າຂອງລາວວ່າ: “ພາຂ້ອຍອອກໄປຈາກນີ້ໄວໆ ຂ້ອຍເຈັບໜັກຫຼາຍ.”+ 34 ເຂົາເຈົ້າຕໍ່ສູ້ກັນໝົດມື້. ທະຫານໄດ້ໂຈມກະສັດອາຮາບຢູ່ເທິງລົດມ້າແລະໃຫ້ລາວປິ່ນໜ້າໄປທາງພວກຊີເຣຍຈົນຮອດຕອນແລງ ແລ້ວອາຮາບກໍຕາຍຕອນຕາເວັນຕົກດິນ.+