ລະບຽບພວກເລວີ
13 ພະເຢໂຫວາເວົ້າກັບໂມເຊແລະອາໂຣນຕື່ມອີກວ່າ: 2 “ຖ້າຜິວໜັງຂອງຜູ້ໃດບວມ ຕົກເກັດ ຫຼືເປັນຮອຍດ່າງ ແລະເບິ່ງຄືວ່າອາດຈະເປັນພະຍາດຂີ້ທູດ*+ຢູ່ຜິວໜັງ ຈະຕ້ອງພາຜູ້ນັ້ນໄປຫາປະໂລຫິດໃຫຍ່ອາໂຣນ ຫຼືລູກຊາຍຄົນໜຶ່ງຂອງລາວທີ່ເປັນປະໂລຫິດ.+ 3 ປະໂລຫິດຈະກວດເບິ່ງຜິວໜັງທີ່ຕິດເຊື້ອ. ຖ້າຂົນຢູ່ບ່ອນນັ້ນປ່ຽນເປັນສີຂາວ ແລະເບິ່ງຄືວ່າມັນເລິກລົງກາຍຜິວໜັງ ສະແດງວ່າຜູ້ນັ້ນເປັນພະຍາດຂີ້ທູດ. ປະໂລຫິດຈະກວດເບິ່ງບ່ອນທີ່ຕິດເຊື້ອນັ້ນ ແລະປະກາດວ່າຜູ້ນັ້ນບໍ່ສະອາດ. 4 ຖ້າຮອຍດ່າງຢູ່ຜິວໜັງຂອງຄົນທີ່ຕິດເຊື້ອເປັນສີຂາວ ເບິ່ງຄືວ່າມັນບໍ່ໄດ້ເລິກລົງກາຍຜິວໜັງ ແລະຂົນທີ່ຢູ່ບ່ອນນັ້ນບໍ່ໄດ້ປ່ຽນເປັນສີຂາວ ປະໂລຫິດຈະກັກໂຕລາວໄວ້ 7 ມື້.+ 5 ເມື່ອຮອດມື້ທີ 7 ປະໂລຫິດຈະກວດເບິ່ງຜິວໜັງຂອງຜູ້ນັ້ນອີກເທື່ອໜຶ່ງ. ຖ້າເບິ່ງຄືວ່າການຕິດເຊື້ອນັ້ນບໍ່ໄດ້ລາມໄປໃສ ປະໂລຫິດຈະກັກໂຕລາວໄວ້ອີກ 7 ມື້.
6 ເມື່ອຮອດມື້ທີ 7 ປະໂລຫິດກໍຈະກວດເບິ່ງອີກ. ຖ້າຜິວໜັງທີ່ຕິດເຊື້ອນັ້ນເລີ່ມດີຂຶ້ນ ແລະບໍ່ໄດ້ລາມໄປບ່ອນອື່ນ ປະໂລຫິດຈະປະກາດວ່າຜູ້ນັ້ນສະອາດ.+ ຜິວໜັງຂອງລາວມີແຕ່ຕົກເກັດຊື່ໆ. ຜູ້ນັ້ນຈະຕ້ອງຊັກເຄື່ອງນຸ່ງຂອງໂຕເອງ ແລ້ວຈະຖືວ່າລາວສະອາດ. 7 ແຕ່ຫຼັງຈາກປະໂລຫິດປະກາດວ່າຜູ້ນັ້ນສະອາດແລ້ວ ຖ້າຜິວໜັງຂອງລາວຕົກເກັດອີກ ແລະລາມໄປບ່ອນອື່ນ ລາວຕ້ອງກັບໄປຫາປະໂລຫິດອີກ. 8 ປະໂລຫິດຈະກວດເບິ່ງ ແລະຖ້າບ່ອນຕົກເກັດຢູ່ຜິວໜັງນັ້ນລາມອອກໄປຫຼາຍກວ່າເກົ່າ ປະໂລຫິດຈະປະກາດວ່າຜູ້ນັ້ນບໍ່ສະອາດ. ນີ້ສະແດງວ່າລາວເປັນຂີ້ທູດ.+
9 ຖ້າຜູ້ໃດເປັນຂີ້ທູດກໍຕ້ອງພາຜູ້ນັ້ນໄປຫາປະໂລຫິດ. 10 ປະໂລຫິດຈະກວດເບິ່ງ.+ ຖ້າຜິວໜັງຂອງຜູ້ນັ້ນມີຕຸ່ມໂພງທີ່ເປັນສີຂາວ ຂົນຢູ່ບ່ອນນັ້ນປ່ຽນເປັນສີຂາວ ແລ້ວຕຸ່ມໂພງນັ້ນແຕກອອກ+ 11 ກໍສະແດງວ່າລາວເປັນຂີ້ທູດຊ້ຳເຮື້ອ. ປະໂລຫິດຈະປະກາດວ່າຜູ້ນັ້ນບໍ່ສະອາດ. ປະໂລຫິດບໍ່ຄວນກັກໂຕລາວໄວ້ເພື່ອເບິ່ງອີກ+ ເພາະລາວບໍ່ສະອາດ. 12 ຖ້າປະໂລຫິດເຫັນຜູ້ນັ້ນມີຂີ້ທູດຢູ່ທົ່ວຜິວໜັງຕັ້ງແຕ່ຫົວຈົນຮອດຕີນ 13 ແລະເມື່ອກວດເບິ່ງແລ້ວເຫັນວ່າຂີ້ທູດນັ້ນໄປທົ່ວທຸກສ່ວນຂອງຜິວໜັງ ປະໂລຫິດຈະປະກາດວ່າຜູ້ນັ້ນບໍ່ສາມາດແພ່ເຊື້ອໃຫ້ຜູ້ອື່ນໄດ້ແລ້ວ ເພາະຜິວໜັງທຸກສ່ວນຂອງລາວປ່ຽນເປັນສີຂາວ ສະແດງວ່າລາວສະອາດແລ້ວ. 14 ແຕ່ຖ້າເມື່ອໃດຜິວໜັງຂອງລາວມີຕຸ່ມໂພງແລະແຕກອອກ ກໍຈະຖືວ່າລາວບໍ່ສະອາດ. 15 ຖ້າປະໂລຫິດເຫັນຕຸ່ມໂພງທີ່ແຕກອອກ ປະໂລຫິດຈະປະກາດວ່າຜູ້ນັ້ນບໍ່ສະອາດ.+ ຕຸ່ມໂພງທີ່ແຕກອອກນັ້ນເປັນສິ່ງທີ່ບໍ່ສະອາດ. ນີ້ສະແດງວ່າຜູ້ນັ້ນເປັນຂີ້ທູດ.+ 16 ຖ້າຕຸ່ມໂພງແຕກອອກ ແລະປ່ຽນເປັນສີຂາວແລ້ວ ຜູ້ນັ້ນຕ້ອງໄປຫາປະໂລຫິດ. 17 ປະໂລຫິດຈະກວດເບິ່ງ.+ ຖ້າບ່ອນທີ່ຕິດເຊື້ອປ່ຽນເປັນສີຂາວ ປະໂລຫິດຈະປະກາດວ່າຜູ້ນັ້ນສະອາດແລ້ວ.
18 ຖ້າຜູ້ໃດເປັນຝີຢູ່ຜິວໜັງແລະເຊົາແລ້ວ 19 ແຕ່ຫຼັງຈາກນັ້ນບ່ອນທີ່ເຄີຍເປັນຝີ ມີຕຸ່ມໂພງທີ່ເປັນສີຂາວ ຫຼືມີຮອຍດ່າງຂາວໆແດງໆ ລາວຕ້ອງໄປໃຫ້ປະໂລຫິດກວດເບິ່ງ. 20 ປະໂລຫິດກໍຈະກວດເບິ່ງຜິວໜັງຂອງຜູ້ນັ້ນ.+ ຖ້າເບິ່ງຄືວ່າມັນເລິກລົງກາຍຜິວໜັງ ແລະຂົນຢູ່ບ່ອນນັ້ນປ່ຽນເປັນສີຂາວ ປະໂລຫິດຈະປະກາດວ່າຜູ້ນັ້ນບໍ່ສະອາດ. ນີ້ສະແດງວ່າລາວເປັນຂີ້ທູດ ຫຼັງຈາກທີ່ລາວເຊົາເປັນຝີແລ້ວ. 21 ແຕ່ຖ້າປະໂລຫິດກວດເບິ່ງແລ້ວ ແລະຂົນຢູ່ບ່ອນນັ້ນບໍ່ໄດ້ປ່ຽນເປັນສີຂາວ ການຕິດເຊື້ອນັ້ນບໍ່ໄດ້ເລິກລົງກາຍຜິວໜັງ ແລະສີຂອງຜິວໜັງກໍເລີ່ມກັບມາເປັນປົກກະຕິ ປະໂລຫິດຈະກັກໂຕຜູ້ນັ້ນໄວ້ 7 ມື້.+ 22 ຖ້າເຫັນວ່າການຕິດເຊື້ອນັ້ນລາມອອກໄປຫຼາຍກວ່າເກົ່າ ປະໂລຫິດຈະປະກາດວ່າຜູ້ນັ້ນບໍ່ສະອາດ. ນີ້ສະແດງວ່າລາວເປັນຂີ້ທູດ. 23 ແຕ່ຖ້າຮອຍດ່າງນັ້ນຢູ່ບ່ອນດຽວແລະບໍ່ໄດ້ລາມໄປໃສ ສະແດງວ່າມັນອັກເສບຍ້ອນຝີຊື່ໆ. ປະໂລຫິດຈະປະກາດວ່າຜູ້ນັ້ນສະອາດ.+
24 ຖ້າຜູ້ໃດມີບາດຍ້ອນໄຟໄໝ້ ແລະຊີ້ນທີ່ຢູ່ບ່ອນບາດນັ້ນເປັນສີຂາວ ຫຼືມີຮອຍດ່າງຂາວໆແດງໆ 25 ປະໂລຫິດຈະກວດເບິ່ງບາດນັ້ນ. ຖ້າຂົນຢູ່ບ່ອນນັ້ນປ່ຽນເປັນສີຂາວ ແລະເບິ່ງຄືວ່າຮອຍດ່າງນັ້ນເລິກລົງກາຍຜິວໜັງ ສະແດງວ່າລາວເປັນຂີ້ທູດຫຼັງຈາກເປັນບາດໄຟໄໝ້. ປະໂລຫິດຈະປະກາດວ່າຜູ້ນັ້ນບໍ່ສະອາດ. ລາວເປັນຂີ້ທູດ. 26 ແຕ່ຖ້າປະໂລຫິດກວດເບິ່ງແລ້ວເຫັນວ່າຂົນທີ່ຢູ່ບ່ອນນັ້ນບໍ່ໄດ້ປ່ຽນເປັນສີຂາວ ຮອຍດ່າງນັ້ນບໍ່ໄດ້ເລິກລົງກາຍຜິວໜັງ ແລະສີຂອງຜິວໜັງກໍເລີ່ມກັບມາເປັນປົກກະຕິ ປະໂລຫິດກໍຈະກັກໂຕຜູ້ນັ້ນໄວ້ 7 ມື້.+ 27 ເມື່ອຮອດມື້ທີ 7 ປະໂລຫິດກໍຈະກວດເບິ່ງອີກເທື່ອໜຶ່ງ. ຖ້າເຫັນວ່າການຕິດເຊື້ອນັ້ນລາມອອກໄປຫຼາຍກວ່າເກົ່າ ປະໂລຫິດກໍຈະປະກາດວ່າຜູ້ນັ້ນບໍ່ສະອາດ. ນີ້ສະແດງວ່າລາວເປັນຂີ້ທູດ. 28 ແຕ່ຖ້າຮອຍດ່າງນັ້ນຢູ່ບ່ອນດຽວ ບໍ່ໄດ້ລາມໄປຜິວໜັງສ່ວນອື່ນ ແລະສີຂອງຜິວໜັງກໍເລີ່ມກັບມາເປັນປົກກະຕິ ສະແດງວ່າບາດມັນບວມຊື່ໆ. ປະໂລຫິດຈະປະກາດວ່າຜູ້ນັ້ນສະອາດ ເພາະບາດນັ້ນອັກເສບຊື່ໆ.
29 ຖ້າຜູ້ໃດຕິດເຊື້ອຢູ່ຫົວຫຼືຢູ່ຄາງ ປະໂລຫິດຈະກວດເບິ່ງຜູ້ນັ້ນ. 30 ຖ້າການຕິດເຊື້ອນັ້ນເບິ່ງຄືວ່າເລິກລົງກາຍຜິວໜັງ ແລ້ວຜົມຫຼືໜວດກາຍເປັນສີເຫຼືອງ ແລະເປັນເສັ້ນບາງໆ ປະໂລຫິດ+ຈະປະກາດວ່າຜູ້ນັ້ນບໍ່ສະອາດ. ນີ້ແມ່ນການຕິດເຊື້ອຢູ່ໜັງຫົວຫຼືຢູ່ໜວດເຄົາ ສະແດງວ່າຜູ້ນັ້ນເປັນຂີ້ທູດຢູ່ຫົວຫຼືຢູ່ຄາງ. 31 ແຕ່ຖ້າປະໂລຫິດເຫັນວ່າການຕິດເຊື້ອເບິ່ງຄືວ່າບໍ່ໄດ້ເລິກລົງກາຍຜິວໜັງ ແລະບໍ່ມີຜົມຫຼືໜວດສີດຳຢູ່ບ່ອນນັ້ນ ປະໂລຫິດຕ້ອງກັກໂຕຜູ້ທີ່ຕິດເຊື້ອໄວ້ 7 ມື້.+ 32 ເມື່ອຮອດມື້ທີ 7 ປະໂລຫິດຈະກວດເບິ່ງອີກເທື່ອໜຶ່ງ. ຖ້າການຕິດເຊື້ອບໍ່ໄດ້ລາມອອກໄປຫຼາຍກວ່າເກົ່າ ບ່ອນນັ້ນບໍ່ມີຜົມຫຼືໜວດສີເຫຼືອງປົ່ງຂຶ້ນ ແລະການຕິດເຊື້ອນັ້ນເບິ່ງຄືວ່າບໍ່ໄດ້ເລິກລົງກາຍຜິວໜັງ 33 ຜູ້ທີ່ຕິດເຊື້ອຈະຕ້ອງແຖຫົວຫຼືແຖໜວດ ແຕ່ບໍ່ແຖບ່ອນທີ່ຕິດເຊື້ອ ແລ້ວປະໂລຫິດຈະກັກໂຕຜູ້ນັ້ນໄວ້ອີກ 7 ມື້.
34 ເມື່ອຮອດມື້ທີ 7 ປະໂລຫິດຈະກວດເບິ່ງອີກເທື່ອໜຶ່ງ. ຖ້າການຕິດເຊື້ອຢູ່ຫົວຫຼືຢູ່ໜວດເຄົາ ບໍ່ໄດ້ລາມໄປຜິວໜັງສ່ວນອື່ນ ແລະເບິ່ງຄືວ່າມັນບໍ່ໄດ້ເລິກລົງກາຍຜິວໜັງ ປະໂລຫິດຈະປະກາດວ່າຜູ້ນັ້ນສະອາດ. ລາວຕ້ອງຊັກເຄື່ອງນຸ່ງຂອງໂຕເອງ ແລະຈະຖືວ່າລາວສະອາດ. 35 ແຕ່ຫຼັງຈາກປະໂລຫິດປະກາດວ່າຜູ້ນັ້ນສະອາດແລ້ວ ຖ້າເຊື້ອນັ້ນກັບມາອີກ ແລະລາມໄປຜິວໜັງສ່ວນອື່ນ 36 ປະໂລຫິດຈະກວດເບິ່ງຜູ້ນັ້ນອີກເທື່ອໜຶ່ງ. ຖ້າການຕິດເຊື້ອນັ້ນລາມໄປບ່ອນອື່ນ ປະໂລຫິດກໍບໍ່ຕ້ອງຊອກຫາເສັ້ນຜົມຫຼືໜວດເຄົາສີເຫຼືອງແລ້ວ ຍ້ອນລາວບໍ່ສະອາດ. 37 ເມື່ອປະໂລຫິດກວດເບິ່ງແລ້ວເຫັນວ່າການຕິດເຊື້ອບໍ່ໄດ້ລາມໄປບ່ອນອື່ນ ແລະຢູ່ບ່ອນນັ້ນມີຜົມຫຼືໜວດເຄົາສີດຳປົ່ງຂຶ້ນ ສະແດງວ່າຜູ້ນັ້ນເຊົາແລ້ວ. ປະໂລຫິດຈະປະກາດວ່າລາວສະອາດ.+
38 ຖ້າຜູ້ໃດມີຮອຍດ່າງຢູ່ຜິວໜັງ ແລະຮອຍດ່າງນັ້ນເປັນສີຂາວ 39 ປະໂລຫິດຈະກວດເບິ່ງເຂົາເຈົ້າ.+ ຖ້າຮອຍດ່າງນັ້ນເປັນສີດ່າງຂາວ ສະແດງວ່າມັນບໍ່ໄດ້ອັນຕະລາຍຫຍັງ. ຜູ້ນັ້ນສະອາດ.
40 ຖ້າຜູ້ຊາຍຜົມຫຼົ່ນຈົນຫົວລ້ານ ກໍຖືວ່າລາວສະອາດ. 41 ຖ້າຜົມທາງໜ້າຂອງລາວຫຼົ່ນຈົນຫົວລ້ານທາງໜ້າ ກໍຖືວ່າລາວສະອາດ. 42 ແຕ່ຖ້າບ່ອນທີ່ລ້ານນັ້ນມີບາດຂາວໆແດງໆ ສະແດງວ່າລາວເປັນຂີ້ທູດຢູ່ບ່ອນນັ້ນ. 43 ປະໂລຫິດຈະກວດເບິ່ງລາວ. ຖ້າບ່ອນຕິດເຊື້ອບວມ ເປັນຂາວໆແດງໆຢູ່ບ່ອນທີ່ລ້ານນັ້ນ ແລະມັນຄ້າຍຄືກັບຂີ້ທູດຢູ່ບ່ອນອື່ນໆ 44 ສະແດງວ່າຜູ້ນັ້ນເປັນຂີ້ທູດ. ລາວບໍ່ສະອາດ ແລະປະໂລຫິດຈະປະກາດວ່າລາວບໍ່ສະອາດຍ້ອນເປັນຂີ້ທູດ. 45 ຄົນທີ່ເປັນຂີ້ທູດຕ້ອງຈີກເຄື່ອງນຸ່ງຂອງໂຕເອງ ແລະປ່ອຍໃຫ້ຜົມຫຍຸ້ງ. ລາວຕ້ອງເອົາຜ້າອັດປາກ*ແລະຮ້ອງວ່າ ‘ຂ້ອຍບໍ່ສະອາດ ຂ້ອຍບໍ່ສະອາດ!’ 46 ຕະຫຼອດໄລຍະທີ່ລາວເປັນຂີ້ທູດ ກໍຈະຖືວ່າລາວບໍ່ສະອາດ. ລາວຕ້ອງໄປຢູ່ນອກຄ້າຍພັກຕ່າງຫາກເພາະລາວບໍ່ສະອາດ.+
47 ຖ້າເຊື້ອຂີ້ທູດໄປຕິດຢູ່ເຄື່ອງນຸ່ງ ບໍ່ວ່າຈະເປັນເຄື່ອງນຸ່ງທີ່ເຮັດຈາກຂົນແກະ ຫຼືຜ້າລີນິນ 48 ຢູ່ເສັ້ນດ້າຍຂອງຜ້າລີນິນ ຫຼືຜ້າທີ່ເຮັດຈາກຂົນແກະນັ້ນ ຫຼືເຄື່ອງທຸກຢ່າງທີ່ເຮັດຈາກໜັງສັດ 49 ຖ້ານ້ຳໜອງສີເຫຼືອງໆຂຽວໆ ຫຼືສີແດງໆ ຈາກບ່ອນທີ່ເປັນຂີ້ທູດໄປຖືກເຄື່ອງນຸ່ງ ດ້າຍຂອງຜ້າ ຫຼືເຄື່ອງທີ່ເຮັດຈາກໜັງສັດ ສະແດງວ່າເຄື່ອງນັ້ນເປື້ອນເຊື້ອຂີ້ທູດ. ເຈົ້າຕ້ອງເອົາໄປໃຫ້ປະໂລຫິດກວດເບິ່ງ. 50 ປະໂລຫິດຈະກວດເບິ່ງເຄື່ອງເຫຼົ່ານັ້ນ ແລະເອົາໄປມ້ຽນໄວ້ຕ່າງຫາກ 7 ມື້.+ 51 ເມື່ອຮອດມື້ທີ 7 ປະໂລຫິດຈະກວດເບິ່ງເຄື່ອງນັ້ນອີກເທື່ອໜຶ່ງ. ຖ້າເຊື້ອນັ້ນທີ່ຢູ່ເຄື່ອງນຸ່ງ ເສັ້ນດ້າຍ ຫຼືໜັງສັດລາມອອກໄປຫຼາຍກວ່າເກົ່າ ສະແດງວ່າເຊື້ອນັ້ນຈະຕິດຕໍ່ໃສ່ຄົນອື່ນໄດ້ ແລະຕ້ອງຖືວ່າເຄື່ອງນັ້ນບໍ່ສະອາດ.+ 52 ປະໂລຫິດຕ້ອງເອົາເຄື່ອງນຸ່ງ ຜ້າລີນິນ ຜ້າທີ່ເຮັດຈາກຂົນແກະ ຫຼືເຄື່ອງທີ່ເຮັດຈາກໜັງສັດທີ່ມີເຊື້ອຂີ້ທູດນັ້ນໄປຈູດຖິ້ມ ເພາະມັນເປັນຂີ້ທູດທີ່ຕິດຕໍ່ໃສ່ຄົນອື່ນໄດ້. ຕ້ອງຈູດເຄື່ອງເຫຼົ່ານັ້ນຖິ້ມ.
53 ແຕ່ຖ້າປະໂລຫິດກວດເບິ່ງເຄື່ອງນຸ່ງ ຜ້າທີ່ຕ່ຳ ຫຼືເຄື່ອງທີ່ເຮັດຈາກໜັງສັດ ແລະເຫັນວ່າເຊື້ອນັ້ນບໍ່ໄດ້ລາມອອກໄປຫຼາຍກວ່າເກົ່າ 54 ປະໂລຫິດກໍຈະສັ່ງເຈົ້າຂອງເຄື່ອງໃຫ້ຊັກຫຼືລ້າງເຄື່ອງນັ້ນ ແລະລາວຈະມ້ຽນເຄື່ອງນັ້ນໄວ້ອີກ 7 ມື້. 55 ຫຼັງຈາກທີ່ຊັກຫຼືລ້າງເຄື່ອງນັ້ນດີໆແລ້ວ ປະໂລຫິດຈະກວດເບິ່ງອີກເທື່ອໜຶ່ງ. ຖ້າເບິ່ງຄືວ່າເຊື້ອນັ້ນຍັງມີຢູ່ຄືເກົ່າ ເຖິງວ່າມັນບໍ່ໄດ້ລາມໄປບ່ອນອື່ນ ສະແດງວ່າເຄື່ອງນັ້ນບໍ່ສະອາດ. ເຈົ້າຕ້ອງຈູດເຄື່ອງນັ້ນຖິ້ມ ເພາະເຊື້ອນັ້ນອາດຈະທຳລາຍທາງນອກຫຼືທາງໃນເຄື່ອງນັ້ນແລ້ວ.
56 ແຕ່ຫຼັງຈາກທີ່ຊັກຫຼືລ້າງເຄື່ອງນັ້ນດີໆແລ້ວ ຖ້າປະໂລຫິດກວດເບິ່ງແລະເຫັນວ່າຮອຍເປື້ອນນັ້ນຈາງລົງ ລາວຕ້ອງຈີກບ່ອນເປື້ອນນັ້ນອອກຈາກເຄື່ອງນຸ່ງ ໜັງສັດ ຫຼືຜ້າທີ່ຕ່ຳນັ້ນ. 57 ແຕ່ຖ້າເຫັນເຊື້ອນັ້ນມີຢູ່ບ່ອນອື່ນໆຂອງເຄື່ອງນຸ່ງ ຜ້າທີ່ຕ່ຳ ຫຼືເຄື່ອງທີ່ເຮັດຈາກໜັງສັດ ສະແດງວ່າເຊື້ອນັ້ນລາມອອກໄປບ່ອນອື່ນ. ເຈົ້າຕ້ອງຈູດເຄື່ອງນັ້ນຖິ້ມ.+ 58 ແຕ່ຫຼັງຈາກເອົາເຄື່ອງນັ້ນໄປຊັກຫຼືລ້າງແລ້ວ ຖ້າເຫັນວ່າເຄື່ອງນຸ່ງ ຜ້າທີ່ຕ່ຳ ຫຼືເຄື່ອງທີ່ເຮັດຈາກໜັງສັດບໍ່ມີຮອຍເປື້ອນນັ້ນແລ້ວ ກໍໃຫ້ຊັກຫຼືລ້າງເຄື່ອງນັ້ນອີກເທື່ອໜຶ່ງ ແລະຈະຖືວ່າມັນສະອາດ.
59 ນີ້ແມ່ນກົດໝາຍທີ່ຊ່ວຍໃຫ້ປະໂລຫິດຮູ້ວ່າເຄື່ອງນຸ່ງທີ່ເຮັດຈາກຂົນແກະ ຫຼືຜ້າລີນິນ ຫຼືຜ້າທີ່ຕ່ຳ ຫຼືເຄື່ອງທີ່ເຮັດຈາກໜັງສັດທີ່ຖືກເຊື້ອຂີ້ທູດນັ້ນ ຖືວ່າສະອາດຫຼືບໍ່ສະອາດ.”