ຊາມູເອນສະບັບທີໜຶ່ງ
24 ຫຼັງຈາກຊາອູນກັບມາຈາກການຕໍ່ສູ້ກັບພວກຟີລິດສະຕີນ ມີຄົນມາບອກລາວວ່າ: “ດາວິດຢູ່ບ່ອນກັນດານເອັນເກດີ.”+
2 ຊາອູນຈຶ່ງພາທະຫານ 3.000 ຄົນທີ່ລາວເລືອກຈາກພວກອິດສະຣາເອນໄປໄລ່ລ່າດາວິດກັບພວກທະຫານຢູ່ເທິງພູທີ່ເປັນຫີນເຊິ່ງເປັນບ່ອນຢູ່ຂອງແບ້ປ່າ. 3 ຊາອູນມາຮອດຄອກແກະ*ທີ່ຢູ່ແຄມທາງ ແລະຢູ່ຫັ້ນກໍມີຖ້ຳ ຊາອູນຈຶ່ງເຂົ້າໄປຖ່າຍໃນນັ້ນ. ຕອນນັ້ນດາວິດກັບພວກທະຫານນັ່ງຢູ່ທາງໃນສຸດຂອງຖ້ຳ.+ 4 ພວກທະຫານເວົ້າກັບດາວິດວ່າ: “ມື້ນີ້ພະເຢໂຫວາບອກເຈົ້າວ່າ ‘ເຮົາຈະໃຫ້ສັດຕູຂອງເຈົ້າຕົກຢູ່ໃນກຳມືເຈົ້າ+ ແລະເຈົ້າຢາກເຮັດຫຍັງໃຫ້ລາວກໍເຮັດໂລດ.’” ດາວິດຈຶ່ງລຸກຂຶ້ນແລະຄ່ອຍໆລັກເຂົ້າໄປຕັດຍອຍເສື້ອແຂນກິ້ນຂອງຊາອູນ. 5 ແຕ່ຫຼັງຈາກນັ້ນ ດາວິດກໍຮູ້ສຶກເສຍໃຈຫຼາຍ+ທີ່ໄດ້ຕັດຍອຍເສື້ອແຂນກິ້ນຂອງຊາອູນ. 6 ດາວິດເວົ້າກັບພວກທະຫານວ່າ: “ຂ້ອຍບໍ່ຄວນເຮັດແບບນີ້ກັບນາຍຂອງຂ້ອຍ ເພາະລາວເປັນຜູ້ທີ່ພະເຢໂຫວາເລືອກ. ພະເຢໂຫວາຕ້ອງບໍ່ພໍໃຈແທ້ໆຖ້າຂ້ອຍທຳຮ້າຍຜູ້ທີ່ພະເຢໂຫວາເລືອກ.”+ 7 ດາວິດເວົ້າແບບນີ້ກໍເພື່ອຫ້າມ*ພວກທະຫານ ແລະລາວບໍ່ອະນຸຍາດໃຫ້ເຂົາເຈົ້າທຳຮ້າຍຊາອູນ. ຈາກນັ້ນ ຊາອູນກໍອອກໄປຈາກຖ້ຳ.
8 ແລ້ວດາວິດກໍອອກມາຈາກຖ້ຳແລະຮ້ອງໃສ່ຊາອູນວ່າ: “ກະສັດຜູ້ເປັນນາຍຂອງຂ້ອຍ!”+ ເມື່ອຊາອູນຫຼຽວຫຼັງໄປເບິ່ງ ດາວິດກໍໝູບໜ້າລົງເພື່ອສະແດງຄວາມນັບຖືລາວ. 9 ດາວິດຖາມຊາອູນວ່າ: “ເປັນຫຍັງທ່ານຈຶ່ງຟັງຄົນທີ່ບອກວ່າຂ້ອຍຢາກທຳຮ້າຍທ່ານ?+ 10 ມື້ນີ້ທ່ານກໍເຫັນດ້ວຍໂຕເອງແລ້ວວ່າພະເຢໂຫວາໄດ້ມອບທ່ານໃຫ້ຢູ່ໃນກຳມືຂ້ອຍຕອນທີ່ຢູ່ໃນຖ້ຳ. ແຕ່ເມື່ອມີຄົນບອກຂ້ອຍໃຫ້ຂ້າທ່ານ+ ຂ້ອຍກໍອີ່ຕົນທ່ານແລະເວົ້າວ່າ ‘ຂ້ອຍຈະບໍ່ທຳຮ້າຍນາຍຂອງຂ້ອຍ ເພາະລາວເປັນຜູ້ທີ່ພະເຢໂຫວາເລືອກ.’+ 11 ພໍ່ຂອງຂ້ອຍ ເບິ່ງແມ້ ທ່ານເຫັນຍອຍເສື້ອທີ່ຢູ່ໃນມືຂ້ອຍບໍ? ຕອນທີ່ຂ້ອຍຕັດຍອຍເສື້ອແຂນກິ້ນຂອງທ່ານ ຂ້ອຍສາມາດຂ້າທ່ານໄດ້ ແຕ່ຂ້ອຍກໍບໍ່ໄດ້ຂ້າ. ຕອນນີ້ ທ່ານເຫັນແລະເຂົ້າໃຈແລ້ວວ່າຂ້ອຍບໍ່ຕ້ອງການທຳຮ້າຍຫຼືຕໍ່ຕ້ານທ່ານ ແລະຂ້ອຍກໍບໍ່ເຄີຍເຮັດຜິດຕໍ່ທ່ານເລີຍ+ ແຕ່ທ່ານພັດໄລ່ລ່າຢາກຂ້າຂ້ອຍ.+ 12 ຂໍໃຫ້ພະເຢໂຫວາຕັດສິນເລື່ອງລະຫວ່າງທ່ານກັບຂ້ອຍ+ ແລະຂໍໃຫ້ພະເຢໂຫວາແກ້ແຄ້ນທ່ານແທນຂ້ອຍ.+ ແຕ່ຂ້ອຍຈະບໍ່ທຳຮ້າຍທ່ານ.+ 13 ສຸພາສິດບູຮານບອກວ່າ ‘ຄວາມຊົ່ວອອກມາຈາກຄົນຊົ່ວ.’ ແຕ່ຂ້ອຍຈະບໍ່ທຳຮ້າຍທ່ານ. 14 ທ່ານທີ່ເປັນກະສັດຂອງອິດສະຣາເອນມາໄລ່ລ່າຂ້ອຍເຮັດຫຍັງ? ຂ້ອຍແມ່ນໃຜ? ຂ້ອຍເປັນພຽງແຕ່ໝາໂຕໜຶ່ງທີ່ຕາຍແລ້ວ ແລະເປັນໝັດໂຕໜຶ່ງເທົ່ານັ້ນ.+ 15 ຂໍພະເຢໂຫວາຕັດສິນເລື່ອງລະຫວ່າງທ່ານກັບຂ້ອຍ. ເພິ່ນຈະເຫັນແລະຈະສູ້ຄະດີແທນຂ້ອຍ.+ ເພິ່ນຈະຕັດສິນຂ້ອຍແລະຈະຊ່ວຍຂ້ອຍໃຫ້ລອດຈາກມືທ່ານ.”
16 ເມື່ອດາວິດເວົ້າຈົບ ຊາອູນກໍຖາມວ່າ: “ດາວິດ ນັ້ນແມ່ນສຽງຂອງລູກບໍ?”+ ແລ້ວຊາອູນກໍຮ້ອງໄຫ້ສຽງດັງ. 17 ຊາອູນເວົ້າກັບດາວິດວ່າ: “ເຈົ້າເປັນຄົນດີກວ່າຂ້ອຍອີກ. ເຈົ້າເຮັດດີຕໍ່ຂ້ອຍ ແຕ່ຂ້ອຍພັດເຮັດຊົ່ວຕໍ່ເຈົ້າ.+ 18 ມື້ນີ້ເຈົ້າໄດ້ພິສູດໃຫ້ເຫັນແລ້ວວ່າເຈົ້າດີຕໍ່ຂ້ອຍເພາະເຈົ້າບໍ່ໄດ້ຂ້າຂ້ອຍ ເຖິງວ່າພະເຢໂຫວາໄດ້ມອບຂ້ອຍໃຫ້ຢູ່ໃນກຳມືຂອງເຈົ້າ.+ 19 ມີໃຜບໍທີ່ເຫັນສັດຕູຂອງໂຕເອງແລ້ວປ່ອຍໄປໂດຍທີ່ບໍ່ທຳຮ້າຍເລີຍ? ຍ້ອນເຈົ້າໄດ້ເຮັດດີຕໍ່ຂ້ອຍໃນມື້ນີ້ ພະເຢໂຫວາຈະຕອບແທນເຈົ້າດ້ວຍສິ່ງທີ່ດີໆ.+ 20 ຂ້ອຍຮູ້ວ່າເຈົ້າຈະເປັນກະສັດແນ່ນອນ+ ແລະເຈົ້າຈະປົກຄອງອິດສະຣາເອນຕໍ່ໆໄປ. 21 ຕອນນີ້ ຂໍໃຫ້ເຈົ້າສາບານກັບຂ້ອຍຕໍ່ໜ້າພະເຢໂຫວາ+ວ່າ ຫຼັງຈາກທີ່ຂ້ອຍຕາຍແລ້ວ ເຈົ້າຈະບໍ່ກຳຈັດລູກຫຼານຂອງຂ້ອຍແລະຈະບໍ່ລຶບຊື່ຂ້ອຍອອກຈາກຄອບຄົວພໍ່ຂອງຂ້ອຍ.”+ 22 ດາວິດຈຶ່ງສາບານກັບຊາອູນ. ຫຼັງຈາກນັ້ນ ຊາອູນກໍກັບເມືອວັງຂອງລາວ+ ແຕ່ດາວິດກັບພວກທະຫານກໍໄປລີ້ຢູ່ບ່ອນທີ່ປອດໄພ.+