ກະສັດສະບັບທີໜຶ່ງ
3 ຕໍ່ມາ ໂຊໂລໂມນຢາກເປັນມິດກັບກະສັດເອຢິບ* ລາວຈຶ່ງແຕ່ງດອງກັບລູກສາວຂອງກະສັດເອຢິບ+ ແລະໂຊໂລໂມນໄດ້ພາເມຍມາຢູ່ເມືອງຂອງດາວິດ+ຈົນຮອດຕອນທີ່ລາວສ້າງວັງຂອງໂຕເອງ+ ວິຫານຂອງພະເຢໂຫວາ+ ແລະກຳແພງອ້ອມເມືອງເຢຣູຊາເລັມແລ້ວໆ.+ 2 ໃນຕອນນັ້ນ ປະຊາຊົນຍັງເອົາເຄື່ອງບູຊາໄປເຜົາຢູ່ບ່ອນນະມັດສະການຕ່າງໆ+ ຍ້ອນວ່າເຂົາເຈົ້າຍັງບໍ່ໄດ້ສ້າງວິຫານເພື່ອສັນລະເສີນຊື່ຂອງພະເຢໂຫວາ.+ 3 ໂຊໂລໂມນຍັງຮັກພະເຢໂຫວາຕໍ່ໆໄປໂດຍໃຊ້ຊີວິດຕາມກົດໝາຍທີ່ດາວິດພໍ່ຂອງລາວໄດ້ສອນລາວ ແຕ່ວ່າລາວຍັງເອົາເຄື່ອງບູຊາໄປເຜົາຢູ່ບ່ອນນະມັດສະການຕ່າງໆ.+
4 ກະສັດໂຊໂລໂມນໄປເມືອງກິເບໂອນເພື່ອເຜົາເຄື່ອງບູຊາ ຍ້ອນວ່າບ່ອນນັ້ນເປັນບ່ອນນະມັດສະການທີ່ສຳຄັນທີ່ສຸດ.+ ໂຊໂລໂມນໄດ້ເຜົາສັດ 1.000 ໂຕເທິງແທນບູຊາຢູ່ຫັ້ນ.+ 5 ມີຄືນໜຶ່ງຕອນທີ່ໂຊໂລໂມນກຳລັງນອນຢູ່ເມືອງກິເບໂອນ ພະເຢໂຫວາໄດ້ຖາມລາວທາງຄວາມຝັນວ່າ: “ເຈົ້າຢາກຂໍຫຍັງນຳເຮົາ?”+ 6 ໂຊໂລໂມນຕອບວ່າ: “ພະອົງໄດ້ສະແດງຄວາມຮັກທີ່ໝັ້ນຄົງຢ່າງລົ້ນເຫຼືອຕໍ່ດາວິດພໍ່ຂອງລູກທີ່ເປັນຜູ້ຮັບໃຊ້ຂອງພະອົງ ຍ້ອນເພິ່ນໃຊ້ຊີວິດໃນແນວທາງຂອງພະອົງຢ່າງສັດຊື່ ຖືກຕ້ອງ ແລະຈາກໃຈຈິງ. ພະອົງຍັງໄດ້ສະແດງຄວາມຮັກແບບນັ້ນຕໍ່ໆໄປໂດຍໃຫ້ລູກຊາຍຂອງເພິ່ນໄດ້ເປັນກະສັດ.+ 7 ເຖິງວ່າຕອນນີ້ລູກຍັງນ້ອຍແລະບໍ່ມີປະສົບການ+ ແຕ່ພະເຢໂຫວາພະເຈົ້າຂອງລູກກໍຍັງໃຫ້ລູກເປັນກະສັດຕໍ່ຈາກດາວິດພໍ່ຂອງລູກ. 8 ພະອົງເລືອກລູກທີ່ເປັນຜູ້ຮັບໃຊ້ຂອງພະອົງ+ຈາກປະຊາຊົນຂອງພະອົງທີ່ມີຫຼາຍແທ້ຫຼາຍວ່າ. 9 ຂໍໃຫ້ຜູ້ຮັບໃຊ້ຂອງພະອົງຜູ້ນີ້ເຕັມໃຈເຊື່ອຟັງ ເພື່ອຈະຕັດສິນປະຊາຊົນຂອງພະອົງ+ ແລະເພື່ອຈະຮູ້ວ່າອັນໃດຖືກອັນໃດຜິດ.+ ຄັນບໍ່ຊັ້ນ ລູກຈະປົກຄອງປະຊາຊົນຂອງພະອົງທີ່ມີຈຳນວນຫຼາຍ*ແບບນີ້ໄດ້ແນວໃດ.”
10 ພະເຢໂຫວາພໍໃຈຫຼາຍທີ່ໂຊໂລໂມນຂໍແບບນີ້.+ 11 ພະເຈົ້າຈຶ່ງເວົ້າກັບລາວວ່າ: “ຍ້ອນເຈົ້າຂໍແບບນີ້ແລະບໍ່ໄດ້ຂໍໃຫ້ມີອາຍຸຍືນ ບໍ່ໄດ້ຂໍໃຫ້ຮັ່ງໃຫ້ມີ ຫຼືບໍ່ໄດ້ຂໍໃຫ້ສັດຕູຂອງເຈົ້າຕາຍ ແຕ່ເຈົ້າຂໍໃຫ້ມີສະຕິປັນຍາເພື່ອຈະຕັດສິນຢ່າງຍຸຕິທຳ+ 12 ເຮົາຈະໃຫ້ຕາມທີ່ເຈົ້າຂໍ.+ ເຮົາຈະໃຫ້ເຈົ້າມີສະຕິປັນຍາແລະຄວາມເຂົ້າໃຈ+ຫຼາຍຈົນບໍ່ມີໃຜຈະທຽບເຈົ້າໄດ້ ທັງຄົນທີ່ຢູ່ກ່ອນໜ້າເຈົ້າແລະຫຼັງຈາກເຈົ້າ.+ 13 ນອກຈາກນັ້ນ ເຖິງວ່າເຈົ້າບໍ່ໄດ້ຂໍ ເຮົາກໍຈະເຮັດໃຫ້ເຈົ້າ+ຮັ່ງແລະໄດ້ຮັບຄວາມນັບຖືຫຼາຍທີ່ສຸດ.+ ບໍ່ມີກະສັດອົງໃດຈະທຽບເຈົ້າໄດ້ໃນຕອນທີ່ເຈົ້າມີຊີວິດຢູ່.+ 14 ຖ້າເຈົ້າໃຊ້ຊີວິດຕາມກົດໝາຍແລະຕາມຄຳສັ່ງຂອງເຮົາຕໍ່ໆໄປຄືກັບດາວິດພໍ່ຂອງເຈົ້າ+ ເຮົາຈະໃຫ້ເຈົ້າມີຊີວິດຍືນຍາວ.”+
15 ເມື່ອໂຊໂລໂມນຕື່ນ ລາວກໍຮູ້ວ່າພະເຈົ້າໄດ້ເວົ້າກັບລາວທາງຄວາມຝັນ. ລາວຈຶ່ງໄປເມືອງເຢຣູຊາເລັມແລະໄປຢືນຢູ່ຕໍ່ໜ້າຫີບສັນຍາຂອງພະເຢໂຫວາ ແລ້ວກໍເຜົາເຄື່ອງບູຊາເຜົາກັບເຄື່ອງບູຊາສ້າງຄວາມສະຫງົບສຸກໃຫ້ເພິ່ນ.+ ຫຼັງຈາກນັ້ນ ລາວກໍຈັດງານລ້ຽງໃຫ້ພວກຂ້າລາຊະການຂອງລາວ.
16 ຕໍ່ມາ ມີໂສເພນີ 2 ຄົນໄດ້ເຂົ້າມາຫາກະສັດ. 17 ຜູ້ຍິງຄົນທຳອິດເວົ້າວ່າ: “ກະສັດເອີ້ຍ ຂ້ອຍກັບຜູ້ຍິງຄົນນີ້ຢູ່ເຮືອນຫຼັງດຽວກັນ ແລະຕອນທີ່ຂ້ອຍເກີດລູກ ລາວກໍຢູ່ເຮືອນ. 18 ຫຼັງຈາກຂ້ອຍເກີດລູກໄດ້ 3 ມື້ ລາວກໍເກີດລູກຄືກັນ. ຢູ່ເຮືອນຫຼັງນີ້ມີແຕ່ພວກເຮົາ 2 ຄົນຢູ່ນຳກັນ. 19 ຄືນມື້ໜຶ່ງ ລາວໄດ້ນອນເຕັງລູກຊາຍຂອງໂຕເອງຕາຍ. 20 ໃນຕອນເດິກໆທີ່ຂ້ອຍນອນຫຼັບຢູ່ ລາວກໍມາລັກເອົາລູກຊາຍຂອງຂ້ອຍທີ່ນອນຢູ່ທາງຂ້າງຂ້ອຍໄປ ແລະເອົາລູກຊາຍຂອງລາວທີ່ຕາຍແລ້ວມາວາງໄວ້ແທນ. ຫຼັງຈາກນັ້ນ ລາວກໍເອົາລູກຊາຍຂອງຂ້ອຍທີ່ຍັງບໍ່ຕາຍໄປນອນຢູ່ທາງຂ້າງລາວ.* 21 ເມື່ອຂ້ອຍຕື່ນມາຕອນເຊົ້າເພື່ອຈະເອົານົມໃຫ້ລູກກິນກໍເຫັນວ່າລູກຕາຍແລ້ວ. ແຕ່ເມື່ອເບິ່ງລູກຄັກໆ ຂ້ອຍກໍຮູ້ວ່າບໍ່ແມ່ນລູກຂ້ອຍ.” 22 ແຕ່ຜູ້ຍິງອີກຄົນໜຶ່ງເວົ້າຂຶ້ນມາວ່າ: “ບໍ່ແມ່ນ ລູກຂ້ອຍຍັງບໍ່ຕາຍ ລູກເຈົ້າແມ່ນຜູ້ທີ່ຕາຍ!” ແຕ່ຜູ້ຍິງຄົນທຳອິດເວົ້າວ່າ: “ບໍ່ແມ່ນ ລູກເຈົ້າຫັ້ນແຫຼະຕາຍ ລູກຂ້ອຍຍັງບໍ່ຕາຍ.” ເຂົາເຈົ້າຖຽງກັນແບບນີ້ຕໍ່ໜ້າກະສັດ.
23 ແລ້ວກະສັດໂຊໂລໂມນກໍເວົ້າວ່າ: “ຜູ້ນີ້ບອກວ່າ ‘ລູກຂ້ອຍຍັງບໍ່ຕາຍ ລູກເຈົ້າຫັ້ນແຫຼະຕາຍ!’ ແລະຜູ້ນັ້ນກໍບອກວ່າ ‘ບໍ່ແມ່ນ ລູກເຈົ້າຫັ້ນແຫຼະຕາຍ ລູກຂ້ອຍຍັງບໍ່ຕາຍ!’” 24 ກະສັດໂຊໂລໂມນຈຶ່ງບອກວ່າ: “ເອົາດາບມາໃຫ້ຂ້ອຍ.” ແລ້ວຄົນຮັບໃຊ້ຂອງກະສັດກໍເອົາດາບມາໃຫ້ລາວ. 25 ຈາກນັ້ນ ກະສັດກໍສັ່ງວ່າ: “ໃຫ້ຜ່າແອນ້ອຍທີ່ຍັງບໍ່ຕາຍນີ້ ແລ້ວແບ່ງໃຫ້ເຂົາເຈົ້າຄົນລະເຄິ່ງ.” 26 ຜູ້ທີ່ເປັນແມ່ແທ້ໆຂອງແອນ້ອຍທີ່ຍັງບໍ່ຕາຍອີ່ຕົນລູກຈຶ່ງອ້ອນວອນກະສັດວ່າ: “ກະສັດເອີ້ຍ ຢ່າຂ້າແອນ້ອຍ! ເອົາໃຫ້ລາວໂລດ.” ແຕ່ຜູ້ຍິງອີກຄົນໜຶ່ງເວົ້າວ່າ: “ຜ່າເຄິ່ງໂລດ ບໍ່ຕ້ອງໃຫ້ໃຜໄດ້!” 27 ກະສັດໂຊໂລໂມນຈຶ່ງບອກວ່າ: “ບໍ່ຕ້ອງຂ້າແອນ້ອຍ. ເອົາໃຫ້ຜູ້ຍິງຄົນທຳອິດເພາະລາວເປັນແມ່ແທ້ໆ.”
28 ເມື່ອພວກອິດສະຣາເອນໄດ້ຍິນກ່ຽວກັບວິທີທີ່ກະສັດໂຊໂລໂມນຕັດສິນຄະດີ ເຂົາເຈົ້າກໍຮູ້ສຶກງຶດ*ຫຼາຍ+ ເພາະເຂົາເຈົ້າເຫັນວ່າພະເຈົ້າໄດ້ໃຫ້ສະຕິປັນຍາລາວໃນການຕັດສິນ.+