ລະບຽບພວກເລວີ
20 ພະເຢໂຫວາເວົ້າກັບໂມເຊຕື່ມອີກວ່າ: 2 “ໃຫ້ບອກພວກອິດສະຣາເອນວ່າ ‘ຖ້າຄົນອິດສະຣາເອນແລະຄົນຕ່າງຊາດທີ່ຢູ່ນຳພວກເຈົ້າຄົນໃດເອົາລູກໄປເຜົາບູຊາພະໂມເລັກ ຜູ້ນັ້ນຕ້ອງຕາຍແນ່ນອນ.+ ຄົນອື່ນໆຢູ່ໃນແຜ່ນດິນຕ້ອງດຶກກ້ອນຫີນໃສ່ລາວຈົນຕາຍ. 3 ເຮົາຈະບໍ່ຍອມຮັບຜູ້ນັ້ນ ແລະລາວຈະຕ້ອງຕາຍຍ້ອນເອົາລູກເຜົາບູຊາພະໂມເລັກ ເຮັດໃຫ້ບ່ອນບໍລິສຸດຂອງເຮົາບໍ່ສະອາດ+ ແລະເຮັດໃຫ້ຊື່ທີ່ບໍລິສຸດຂອງເຮົາຖືກດູໝິ່ນ. 4 ຕອນທີ່ຜູ້ນັ້ນເອົາລູກໄປເຜົາບູຊາພະໂມເລັກ ຖ້າຄົນອື່ນໆເຮັດຄືບໍ່ຮູ້ບໍ່ເຫັນແລະບໍ່ໄດ້ຂ້າລາວໃຫ້ຕາຍ+ 5 ເຮົາຈະບໍ່ຍອມຮັບຜູ້ນັ້ນກັບຄອບຄົວຂອງລາວເດັດຂາດ.+ ເຮົາຈະຂ້າຜູ້ນັ້ນກັບທຸກຄົນທີ່ບໍ່ສັດຊື່ທີ່ໄປນະມັດສະການພະໂມເລັກກັບລາວ.
6 ຖ້າຜູ້ໃດບໍ່ສັດຊື່ຕໍ່ເຮົາ*ໂດຍໄປຫາໝໍຜີ+ກັບໝໍດູ+ ເຮົາຈະບໍ່ຍອມຮັບຜູ້ນັ້ນເດັດຂາດ ແລະລາວຈະຕ້ອງຕາຍ.+
7 ເຈົ້າຕ້ອງແຍກໂຕໄວ້ຕ່າງຫາກໃຫ້ເປັນຄົນສະອາດແລະບໍລິສຸດ+ ເພາະເຮົາແມ່ນເຢໂຫວາພະເຈົ້າຂອງເຈົ້າ. 8 ເຈົ້າຕ້ອງເຮັດຕາມກົດໝາຍຂອງເຮົາ.+ ເຮົາແມ່ນເຢໂຫວາຜູ້ທີ່ແຍກເຈົ້າໄວ້ຕ່າງຫາກ.+
9 ຖ້າຜູ້ໃດປ້ອຍດ່າພໍ່ຫຼືແມ່ຂອງໂຕເອງ ຜູ້ນັ້ນຈະຕ້ອງຕາຍແນ່ນອນ.+ ລາວຈະມີຄວາມຜິດຍ້ອນປ້ອຍດ່າພໍ່ແມ່ຂອງໂຕເອງ.
10 ຕໍ່ໄປນີ້ແມ່ນກົດໝາຍກ່ຽວກັບຜູ້ຊາຍທີ່ຫຼິ້ນຊູ້ກັບເມຍຂອງຄົນອື່ນ. ຄົນທີ່ຫຼິ້ນຊູ້ກັບເມຍຂອງເພື່ອນບ້ານຈະຕ້ອງຕາຍແນ່ນອນ. ໃຫ້ຂ້າທັງຜູ້ຊາຍແລະຜູ້ຍິງ.+ 11 ຜູ້ທີ່ມີເພດສຳພັນກັບເມຍຂອງພໍ່ກໍເຮັດໃຫ້ພໍ່ຂອງລາວອັບອາຍ*+ ທັງສອງຄົນຈະຕ້ອງຕາຍແນ່ນອນ. ເຂົາເຈົ້າຈະຕ້ອງຕາຍຍ້ອນຄວາມຜິດຂອງເຂົາເຈົ້າ. 12 ຖ້າພໍ່ຄົນໃດມີເພດສຳພັນກັບລູກໃພ້ຂອງໂຕເອງ ທັງລາວກັບລູກໃພ້ຈະຕ້ອງຕາຍແນ່ນອນ. ເຂົາເຈົ້າເຮັດສິ່ງທີ່ເປັນຕາຂີ້ດຽດ. ເຂົາເຈົ້າຈະຕ້ອງຕາຍຍ້ອນຄວາມຜິດຂອງເຂົາເຈົ້າ.+
13 ຖ້າຜູ້ຊາຍກັບຜູ້ຊາຍມີເພດສຳພັນກັນ* ທັງສອງຄົນກໍໄດ້ເຮັດສິ່ງທີ່ເປັນຕາໜ້າລັງກຽດ.+ ເຂົາເຈົ້າຈະຕ້ອງຕາຍແນ່ນອນ. ເຂົາເຈົ້າຈະຕ້ອງຕາຍຍ້ອນຄວາມຜິດຂອງເຂົາເຈົ້າ.
14 ຖ້າຜູ້ຊາຍມີເພດສຳພັນກັບຜູ້ຍິງຄົນໜຶ່ງ ແລະໄປມີເພດສຳພັນກັບແມ່ຂອງຜູ້ຍິງຄົນນັ້ນນຳ ລາວກໍເຮັດສິ່ງທີ່ເປັນຕາໜ້າລັງກຽດ.*+ ທັງສາມຄົນຕ້ອງຖືກຂ້າແລະເອົາໄປເຜົາ+ ເພື່ອບໍ່ໃຫ້ສິ່ງທີ່ເປັນຕາໜ້າລັງກຽດນັ້ນຢູ່ນຳພວກເຈົ້າອີກຕໍ່ໄປ.
15 ຖ້າຜູ້ຊາຍມີເພດສຳພັນກັບສັດ ລາວຈະຕ້ອງຕາຍແນ່ນອນ ແລະໃຫ້ພວກເຈົ້າຂ້າສັດໂຕນັ້ນນຳ.+ 16 ຖ້າຜູ້ຍິງມີເພດສຳພັນກັບສັດ+ ພວກເຈົ້າຕ້ອງຂ້າທັງຜູ້ຍິງແລະສັດໂຕນັ້ນ. ຜູ້ຊາຍຫຼືຜູ້ຍິງທີ່ມີເພດສຳພັນກັບສັດຈະຕ້ອງຕາຍແນ່ນອນ. ລາວຈະຕ້ອງຕາຍຍ້ອນຄວາມຜິດຂອງລາວ.
17 ຖ້າຜູ້ຊາຍມີເພດສຳພັນກັບເອື້ອຍນ້ອງຂອງລາວ ຫຼືລູກສາວຂອງພໍ່ລາວ ຫຼືລູກສາວຂອງແມ່ລາວ ລາວກໍເຮັດສິ່ງທີ່ເປັນຕາໜ້າອາຍ.+ ເຂົາເຈົ້າຈະຕ້ອງຕາຍຕໍ່ໜ້າຜູ້ຄົນໃນແຜ່ນດິນ. ລາວເຮັດໃຫ້ເອື້ອຍນ້ອງຂອງລາວອັບອາຍ.* ລາວຈະຕ້ອງຖືກລົງໂທດ.
18 ຖ້າຜູ້ຊາຍມີເພດສຳພັນກັບຜູ້ຍິງຕອນທີ່ຜູ້ຍິງເປັນປະຈຳເດືອນ ທັງສອງຄົນກໍບໍ່ໄດ້ນັບຖືເລືອດຂອງລາວ.+ ເຂົາເຈົ້າຈະຕ້ອງຕາຍ.
19 ຫ້າມມີເພດສຳພັນກັບເອື້ອຍນ້ອງຂອງແມ່ເຈົ້າຫຼືເອື້ອຍນ້ອງຂອງພໍ່ເຈົ້າ ເພາະການເຮັດແນວນີ້ຈະເຮັດໃຫ້ພີ່ນ້ອງສາຍເລືອດດຽວກັນກັບເຈົ້າອັບອາຍ.+ ເຂົາເຈົ້າຈະຕ້ອງຖືກລົງໂທດ. 20 ຖ້າຜູ້ຊາຍຄົນໃດມີເພດສຳພັນກັບເມຍຂອງລຸງຫຼືເມຍຂອງອາວ ຜູ້ນັ້ນກໍເຮັດໃຫ້ລຸງຫຼືອາວອັບອາຍ*+ ທັງຜູ້ຊາຍແລະຜູ້ຍິງຈະຕ້ອງຖືກລົງໂທດ. ເຂົາເຈົ້າຈະຕາຍແລະບໍ່ມີລູກ. 21 ຖ້າຜູ້ຊາຍເອົາເມຍຂອງອ້າຍນ້ອງມາເປັນເມຍຂອງໂຕເອງ ລາວກໍເຮັດສິ່ງທີ່ເປັນຕາໜ້າລັງກຽດ.+ ລາວເຮັດໃຫ້ອ້າຍນ້ອງຂອງລາວອັບອາຍ.* ເຂົາເຈົ້າຈະຕາຍແລະບໍ່ມີລູກ.
22 ພວກເຈົ້າຕ້ອງເຊື່ອຟັງກົດໝາຍ+ແລະເຮັດຕາມຄຳສັ່ງຂອງເຮົາ+ ເພື່ອພວກເຈົ້າຈະບໍ່ຖືກຂັບໄລ່ອອກຈາກແຜ່ນດິນທີ່ເຮົາຈະໃຫ້ພວກເຈົ້າໄປຢູ່ນັ້ນ.+ 23 ຫ້າມພວກເຈົ້າເຮັດຕາມກົດໝາຍຂອງຊາດຕ່າງໆເຊິ່ງເຮົາຈະໄລ່ອອກຈາກແຜ່ນດິນທີ່ເຮົາຈະໃຫ້ພວກເຈົ້າໄປຢູ່+ ຍ້ອນພວກເຂົາເຮັດສິ່ງທີ່ເວົ້າມາທັງໝົດນີ້ແລະເຮົາກຽດຊັງພວກເຂົາ.+ 24 ຍ້ອນແນວນີ້ເຮົາຈຶ່ງບອກພວກເຈົ້າວ່າ “ພວກເຈົ້າຈະໄດ້ແຜ່ນດິນຂອງພວກເຂົາ. ເຮົາຈະເອົາແຜ່ນດິນຂອງພວກເຂົາທີ່ມີນ້ຳນົມແລະນ້ຳເຜີ້ງຫຼາຍໃຫ້ພວກເຈົ້າ.+ ເຮົາແມ່ນເຢໂຫວາພະເຈົ້າຂອງພວກເຈົ້າ ຜູ້ທີ່ແຍກພວກເຈົ້າໄວ້ຕ່າງຫາກຈາກຊາດອື່ນໆ.”+ 25 ພວກເຈົ້າຕ້ອງແຍກໃຫ້ໄດ້ວ່າສັດຊະນິດໃດທີ່ຖືວ່າສະອາດແລະສັດຊະນິດໃດທີ່ຖືວ່າບໍ່ສະອາດ ນົກຊະນິດໃດທີ່ຖືວ່າສະອາດແລະນົກຊະນິດໃດທີ່ຖືວ່າບໍ່ສະອາດ.+ ພວກເຈົ້າຕ້ອງບໍ່ເຮັດໃຫ້ໂຕເອງເປັນຕາໜ້າລັງກຽດຍ້ອນສັດ ຫຼືນົກ ຫຼືສັດທີ່ໄຕ່ໄປໄດ້ທີ່ເຮົາໄດ້ແຍກໄວ້ເປັນສັດທີ່ຖືວ່າບໍ່ສະອາດ.+ 26 ພວກເຈົ້າຕ້ອງເປັນຄົນບໍລິສຸດສຳລັບເຮົາ ເພາະເຮົາເຢໂຫວາເປັນພະເຈົ້າທີ່ບໍລິສຸດ+ ແລະເຮົາໄດ້ແຍກພວກເຈົ້າໄວ້ຕ່າງຫາກຈາກຊາດອື່ນໆເພື່ອເປັນປະຊາຊົນຂອງເຮົາ.+
27 ຖ້າຜູ້ໃດເຮັດໂຕເປັນໝໍຜີຫຼືໝໍດູ ຜູ້ນັ້ນຈະຕ້ອງຕາຍແນ່ນອນ.+ ພວກເຈົ້າຕ້ອງດຶກກ້ອນຫີນໃສ່ລາວຈົນຕາຍ. ລາວຕ້ອງຕາຍຍ້ອນຄວາມຜິດຂອງລາວ.’”