ເອັດຊະຣາ
7 ຕອນທີ່ອາຕາເຊເຊັດ*+ກະສັດຂອງເປີເຊຍປົກຄອງ ເອັດຊະຣາ*+ໄດ້ກັບມາເມືອງເຢຣູຊາເລັມ. ເອັດຊະຣາເປັນລູກຊາຍຂອງເສຣາຢາ+ ເສຣາຢາເປັນລູກຊາຍຂອງອາຊາຣີຢາ ອາຊາຣີຢາເປັນລູກຊາຍຂອງຮິນກີຢາ+ 2 ຮິນກີຢາເປັນລູກຊາຍຂອງຊາລຶມ ຊາລຶມເປັນລູກຊາຍຂອງຊາໂດກ ຊາໂດກເປັນລູກຊາຍຂອງອາຮີຕຸບ 3 ອາຮີຕຸບເປັນລູກຊາຍຂອງອາມາຣີຢາ ອາມາຣີຢາເປັນລູກຊາຍຂອງອາຊາຣີຢາ+ ອາຊາຣີຢາເປັນລູກຊາຍຂອງເມຣາໂຢດ 4 ເມຣາໂຢດເປັນລູກຊາຍຂອງເຊຣາຮີຢາ ເຊຣາຮີຢາເປັນລູກຊາຍຂອງອຸດຊີ ອຸດຊີເປັນລູກຊາຍຂອງບຸກກີ 5 ບຸກກີເປັນລູກຊາຍຂອງອາບີຊູອາ ອາບີຊູອາເປັນລູກຊາຍຂອງຟີເນຮາດ+ ຟີເນຮາດເປັນລູກຊາຍຂອງເອເລອາຊາ+ ເອເລອາຊາເປັນລູກຊາຍຂອງປະໂລຫິດໃຫຍ່ອາໂຣນ.+ 6 ເອັດຊະຣາມາຈາກບາບີໂລນ. ລາວຊຳນານໃນການຄັດລອກກົດໝາຍຂອງໂມເຊ+ເຊິ່ງເປັນກົດໝາຍທີ່ພະເຢໂຫວາພະເຈົ້າຂອງອິດສະຣາເອນເອົາໃຫ້ປະຊາຊົນຂອງເພິ່ນ. ເອັດຊະຣາຂໍຫຍັງນຳກະສັດກໍໄດ້ໝົດ ຍ້ອນວ່າພະເຢໂຫວາພະເຈົ້າຂອງລາວຢູ່ກັບລາວ.
7 ໃນປີທີ 7 ທີ່ກະສັດອາຕາເຊເຊັດປົກຄອງ ບາງຄົນທີ່ເປັນຄົນອິດສະຣາເອນ ເປັນປະໂລຫິດ ຄົນເລວີ+ ນັກຮ້ອງ+ ຄົນຍາມປະຕູ+ ແລະຄົນຮັບໃຊ້ໃນວິຫານ*+ໄດ້ກັບໄປເມືອງເຢຣູຊາເລັມ. 8 ເອັດຊະຣາກັບໄປເມືອງເຢຣູຊາເລັມໃນເດືອນທີ 5 ຂອງປີທີ 7 ທີ່ກະສັດອາຕາເຊເຊັດປົກຄອງ. 9 ເອັດຊະຣາເລີ່ມເດີນທາງອອກຈາກບາບີໂລນໃນວັນທີ 1 ຂອງເດືອນທີ 1 ແລະຍ້ອນວ່າພະເຈົ້າຢູ່ກັບລາວຕະຫຼອດການເດີນທາງນັ້ນ+ ລາວຈຶ່ງໄປຮອດເມືອງເຢຣູຊາເລັມໃນວັນທີ 1 ຂອງເດືອນທີ 5. 10 ເອັດຊະຣາກຽມໂຕ*ເພື່ອຈະສຶກສາແລະເຮັດຕາມກົດໝາຍຂອງພະເຢໂຫວາ+ ແລະສອນຂໍ້ກຳນົດແລະການຕັດສິນທີ່ຢູ່ໃນກົດໝາຍນັ້ນໃຫ້ພວກອິດສະຣາເອນ.+
11 ນີ້ແມ່ນຈົດໝາຍທີ່ກະສັດອາຕາເຊເຊັດເອົາໃຫ້ເອັດຊະຣາທີ່ເປັນປະໂລຫິດ ເປັນຜູ້ຄັດລອກ ແລະເປັນຜູ້ທີ່ຊຳນານໃນເລື່ອງກົດໝາຍແລະຂໍ້ກຳນົດຕ່າງໆທີ່ພະເຢໂຫວາໃຫ້ພວກອິດສະຣາເອນ. ຈົດໝາຍນັ້ນຂຽນວ່າ:
12 * “ຈາກອາຕາເຊເຊັດ+ກະສັດຜູ້ຍິ່ງໃຫຍ່ ເຖິງເອັດຊະຣາທີ່ເປັນປະໂລຫິດແລະເປັນຜູ້ຄັດລອກກົດໝາຍຂອງພະເຈົ້າທີ່ຢູ່ໃນສະຫວັນ. ຂໍໃຫ້ເຈົ້າມີຄວາມສຸກ. 13 ຂ້ອຍອອກຄຳສັ່ງວ່າ ຖ້າປະໂລຫິດ ຫຼືຄົນເລວີ ຫຼືຄົນອິດສະຣາເອນຜູ້ໃດກໍຕາມທີ່ຢູ່ໃນແຜ່ນດິນຂອງຂ້ອຍຢາກກັບໄປເຢຣູຊາເລັມນຳກັນກັບເຈົ້າ ເຂົາເຈົ້າກໍໄປໄດ້.+ 14 ຂ້ອຍກັບທີ່ປຶກສາ 7 ຄົນສົ່ງເຈົ້າໄປເມືອງເຢຣູຊາເລັມເພື່ອເບິ່ງວ່າຄົນຢູດາກັບຄົນໃນເມືອງເຢຣູຊາເລັມກຳລັງເຮັດຕາມກົດໝາຍຂອງພະເຈົ້າຂອງເຈົ້າ*ຫຼືບໍ່. 15 ໃຫ້ເຈົ້າເອົາເງິນເອົາຄຳທີ່ຂ້ອຍກັບພວກທີ່ປຶກສາຂອງຂ້ອຍບໍລິຈາກໃຫ້ໄປນຳເພື່ອເອົາໄປໃຫ້ພະເຈົ້າຂອງອິດສະຣາເອນທີ່ຢູ່ເມືອງເຢຣູຊາເລັມ. 16 ເງິນຄຳທັງໝົດທີ່ໄດ້ຈາກທົ່ວແຂວງບາບີໂລນກັບເຄື່ອງທຸກຢ່າງທີ່ຄົນບໍລິຈາກໃຫ້ພະເຈົ້າທີ່ຢູ່ເມືອງເຢຣູຊາເລັມກໍໃຫ້ເຈົ້າເອົາໄປນຳຄືກັນ.+ 17 ໃຫ້ເຈົ້າເອົາເງິນນີ້ໄປຊື້ງົວໂຕຜູ້+ ແກະໂຕຜູ້+ ແກະນ້ອຍໂຕຜູ້+ ເຄື່ອງບູຊາທີ່ເຮັດຈາກເມັດເຂົ້າ+ ແລະເຄື່ອງບູຊາດື່ມ+ ແລ້ວເອົາໄປເຜົາເທິງແທ່ນບູຊາຢູ່ວິຫານຂອງພະເຈົ້າຂອງເຈົ້າໃນເມືອງເຢຣູຊາເລັມ.
18 ເຈົ້າກັບພວກພີ່ນ້ອງຂອງເຈົ້າຢາກເຮັດແນວໃດກັບເງິນຄຳທີ່ເຫຼືອກໍເຮັດໄດ້ຕາມທີ່ພະເຈົ້າຂອງພວກເຈົ້າຕ້ອງການ. 19 ເຄື່ອງໃຊ້ທຸກຢ່າງທີ່ເອົາໃຫ້ເຈົ້າເຊິ່ງໃຊ້ໃນການນະມັດສະການຢູ່ວິຫານພະເຈົ້າຂອງເຈົ້າ ໃຫ້ເຈົ້າເອົາໄປໃຫ້ເພິ່ນຢູ່ເມືອງເຢຣູຊາເລັມ.+ 20 ສຳລັບເຄື່ອງໃຊ້ອື່ນໆທີ່ຈຳເປັນຕ້ອງໃຊ້ໃນວິຫານພະເຈົ້າຂອງເຈົ້າ ໃຫ້ເຈົ້າເອົາຈາກຄັງຊັບສິນໃນວັງຂອງກະສັດ.+
21 ຂ້ອຍກະສັດອາຕາເຊເຊັດອອກຄຳສັ່ງໃຫ້ທຸກຄົນທີ່ເປັນຜູ້ເບິ່ງແຍງຄັງຊັບສິນທີ່ຢູ່ເຂດທາງທິດຕາເວັນຕົກຂອງແມ່ນ້ຳເອິຟາຣາດວ່າ ຖ້າເອັດຊະຣາ+ທີ່ເປັນປະໂລຫິດແລະເປັນຜູ້ຄັດລອກກົດໝາຍຂອງພະເຈົ້າທີ່ຢູ່ໃນສະຫວັນຂໍຫຍັງຈາກພວກເຈົ້າ ພວກເຈົ້າກໍຕ້ອງເຮັດຕາມທັນທີ. 22 ຖ້າລາວຢາກໄດ້ເກືອ+ ເຖິງວ່າຈະຫຼາຍສ່ຳໃດກໍໃຫ້ລາວໂລດ. ເຖິງວ່າລາວຂໍເງິນ 100 ຕະລັນ* ເຂົ້າວີດ* 100 ໂຄເຣ* ເຫຼົ້າແວງ+ 100 ບັດ* ແລະນ້ຳມັນໝາກກອກ+ 100 ບັດ ພວກເຈົ້າກໍຕ້ອງເອົາໃຫ້ລາວ. 23 ພະເຈົ້າທີ່ຢູ່ໃນສະຫວັນສັ່ງໃຫ້ເຮັດຫຍັງສຳລັບວິຫານຂອງເພິ່ນ+ ພວກເຈົ້າກໍຕ້ອງຕັ້ງໃຈເຮັດເພື່ອພະເຈົ້າທີ່ຢູ່ໃນສະຫວັນຈະບໍ່ໃຈຮ້າຍໃຫ້ຂ້ອຍກັບພວກລູກຂອງຂ້ອຍແລະປະຊາຊົນ.+ 24 ຂ້ອຍຍັງອອກຄຳສັ່ງບໍ່ໃຫ້ເກັບພາສີ ເງິນເສຍສ່ວຍ+ ຫຼືຄ່າທຳນຽມຕ່າງໆນຳພວກປະໂລຫິດກັບພວກເລວີ ພວກນັກດົນຕີ+ ພວກຄົນຍາມປະຕູ ພວກຄົນຮັບໃຊ້ໃນວິຫານ+ ແລະຄົນອື່ນໆທີ່ເຮັດວຽກຢູ່ວິຫານຂອງພະເຈົ້າ.
25 ສຳລັບເຈົ້າ ເອັດຊະຣາ ໃຫ້ເຈົ້າໃຊ້ສະຕິປັນຍາທີ່ໄດ້ຮັບຈາກພະເຈົ້າຂອງເຈົ້າເພື່ອແຕ່ງຕັ້ງພວກຜູ້ປົກຄອງແລະພວກຜູ້ຕັດສິນ ແລ້ວໃຫ້ເຂົາເຈົ້າຕັດສິນທຸກຄົນທີ່ຢູ່ເຂດທາງທິດຕາເວັນຕົກຂອງແມ່ນ້ຳເອິຟາຣາດທີ່ຮູ້ຈັກກົດໝາຍຂອງພະເຈົ້າຂອງເຈົ້າ. ແຕ່ຖ້າຜູ້ໃດບໍ່ຮູ້ຈັກກົດໝາຍນັ້ນກໍໃຫ້ເຈົ້າສອນເຂົາເຈົ້າ.+ 26 ຜູ້ໃດທີ່ບໍ່ເຮັດຕາມກົດໝາຍຂອງພະເຈົ້າຂອງເຈົ້າແລະບໍ່ເຮັດຕາມກົດໝາຍຂອງກະສັດ ລາວຕ້ອງຖືກຕັດສິນລົງໂທດທັນທີ. ຜູ້ນັ້ນອາດຖືກຂ້າຖິ້ມ ຖືກເນລະເທດ ຖືກປັບໄໝ ຫຼືຖືກຂັງຄຸກ.”
27 ຂໍໃຫ້ພະເຢໂຫວາພະເຈົ້າຂອງປູ່ຍ່າຕານາຍຂອງພວກເຮົາໄດ້ຮັບການສັນລະເສີນ ຍ້ອນເພິ່ນໄດ້ກະຕຸ້ນກະສັດໃຫ້ສ້າງວິຫານຂອງພະເຢໂຫວາຢູ່ເມືອງເຢຣູຊາເລັມໃຫ້ງາມ.+ 28 ເພິ່ນສະແດງຄວາມຮັກທີ່ໝັ້ນຄົງຕໍ່ຂ້ອຍ ເພິ່ນຈຶ່ງໃຫ້ກະສັດ+ ພວກທີ່ປຶກສາ+ ແລະພວກເຈົ້ານາຍທຸກຄົນຂອງກະສັດມັກຂ້ອຍແລະຢາກຊ່ວຍຂ້ອຍ. ຍ້ອນພະເຢໂຫວາພະເຈົ້າຂອງຂ້ອຍຢູ່ນຳຂ້ອຍ ຂ້ອຍຈຶ່ງກ້າຫານ ແລະຂ້ອຍໄດ້ພາຫົວໜ້າບາງຄົນຂອງພວກອິດສະຣາເອນກັບໄປເມືອງເຢຣູຊາເລັມນຳ.