ຈົດໝາຍສະບັບທີສອງເຖິງຄລິດສະຕຽນໃນເມືອງໂກຣິນໂທ
6 ພວກເຮົາເປັນໝູ່ທີ່ເຮັດວຽກກັບພະເຈົ້າ+ ພວກເຮົາຈຶ່ງຂໍແນະນຳພວກເຈົ້າວ່າ ຢ່າຮັບຄວາມກະລຸນາທີ່ຍິ່ງໃຫຍ່ຂອງພະເຈົ້າ ແລ້ວບໍ່ເຮັດຕາມຈຸດປະສົງຂອງຄວາມກະລຸນານັ້ນ.+ 2 ເພິ່ນບອກວ່າ: “ໃນເວລາທີ່ເຮົາເມດຕາເຈົ້າ ເຮົາຟັງເຈົ້າ ແລະໃນມື້ທີ່ຊ່ວຍໃຫ້ລອດ ເຮົາໄດ້ຊ່ວຍເຈົ້າ.”+ ຕອນນີ້ແຫຼະເປັນເວລາທີ່ພະເຈົ້າເມດຕາພວກເຮົາເປັນພິເສດແລະເປັນວັນແຫ່ງຄວາມລອດ.
3 ພວກເຮົາບໍ່ເຮັດຫຍັງໃຫ້ຄົນອື່ນຮູ້ສຶກບໍ່ດີ ເພື່ອຈະບໍ່ມີຜູ້ໃດຕຳໜິວຽກຮັບໃຊ້ຂອງພວກເຮົາໄດ້.+ 4 ແຕ່ພວກເຮົາພະຍາຍາມເຮັດທຸກຢ່າງເພື່ອໃຫ້ເຫັນວ່າພວກເຮົາເປັນຜູ້ຮັບໃຊ້ຂອງພະເຈົ້າ.+ ພວກເຮົາອົດທົນກັບຫຼາຍເລື່ອງ ທັງຄວາມທຸກລຳບາກ ຄວາມຂັດສົນ ແລະຄວາມຫຍຸ້ງຍາກ.+ 5 ພວກເຮົາຖືກເອົາແສ້ຟາດ ຖືກຂັງຄຸກ+ ເຈິຄວາມວຸ່ນວາຍ ເຮັດວຽກໜັກ ອົດຫຼັບອົດນອນ ແລະບາງເທື່ອກໍບໍ່ມີຫຍັງກິນ.+ 6 ພວກເຮົາເຮັດໃຫ້ເຫັນວ່າພວກເຮົາເປັນຄົນບໍລິສຸດ ມີຄວາມຮູ້ ມີຄວາມອົດທົນ+ ມີຄວາມເມດຕາ+ ມີພະລັງບໍລິສຸດ ແລະມີຄວາມຮັກຈາກໃຈຈິງ.+ 7 ພວກເຮົາເວົ້າຄວາມຈິງ ເພິ່ງລິດເດດຈາກພະເຈົ້າ+ ແລະຖືອາວຸດຂອງຄວາມຍຸຕິທຳ+ໃນມືຂວາ*ກັບມືຊ້າຍ.* 8 ພວກເຮົາໄດ້ຮັບກຽດແລະຖືກດູຖູກ ຖືກຄົນໃສ່ຮ້າຍແລະຖືກເວົ້າເຖິງໃນທາງທີ່ດີ. ຄົນອື່ນຄິດວ່າພວກເຮົາເປັນຄົນຫຼອກລວງທັງໆທີ່ພວກເຮົາເວົ້າຄວາມຈິງ. 9 ຄົນອື່ນຄິດວ່າພວກເຮົາເປັນຄົນທີ່ບໍ່ມີຜູ້ໃດຮູ້ຈັກ ແຕ່ພະເຈົ້າຮູ້ຈັກພວກເຮົາ. ພວກເຮົາເກືອບຕາຍ* ແຕ່ເຫັນບໍວ່າພວກເຮົາຍັງມີຊີວິດຢູ່?+ ພວກເຮົາຖືກລົງໂທດ ແຕ່ກໍຍັງບໍ່ຕາຍ.+ 10 ຄົນອື່ນຄິດວ່າພວກເຮົາເປັນຄົນໂສກເສົ້າ ແຕ່ພວກເຮົາກໍມີຄວາມສຸກຢູ່ສະເໝີ. ຄົນອື່ນຄິດວ່າພວກເຮົາເປັນຄົນທຸກ ແຕ່ພວກເຮົາກໍເຮັດໃຫ້ຫຼາຍຄົນຮັ່ງ. ຄົນອື່ນຄິດວ່າພວກເຮົາເປັນຄົນບໍ່ມີຫຍັງເລີຍ ແຕ່ພວກເຮົາກໍມີທຸກສິ່ງ.+
11 ພີ່ນ້ອງໃນເມືອງໂກຣິນໂທເອີ້ຍ ພວກເຮົາເວົ້າກັບພວກເຈົ້າແບບກົງໄປກົງມາ ແລະພວກເຮົາກໍເປີດໃຈໃຫ້ກວ້າງແລ້ວ. 12 ພວກເຮົາສະແດງຄວາມຮັກຕໍ່ພວກເຈົ້າຢ່າງເຕັມທີ+ ແຕ່ພວກເຈົ້າບໍ່ໄດ້ສະແດງຄວາມຮັກແບບນັ້ນຕໍ່ພວກເຮົາ. 13 ດັ່ງນັ້ນ ຂ້ອຍຂໍເວົ້າກັບພວກເຈົ້າຄືກັບເປັນລູກຂອງຂ້ອຍວ່າ ໃຫ້ພວກເຈົ້າເປີດໃຈໃຫ້ກວ້າງຄືກັບທີ່ພວກເຮົາເຮັດຕໍ່ພວກເຈົ້າ.+
14 ຢ່າມີສ່ວນຮ່ວມຫຍັງກັບຄົນທີ່ບໍ່ເຊື່ອ*+ ຍ້ອນຄວາມດີຈະມີສ່ວນຮ່ວມກັບຄວາມຊົ່ວໄດ້ແນວໃດ?+ ຄວາມສະຫວ່າງຈະເຂົ້າກັບຄວາມມືດໄດ້ບໍ?+ 15 ພະຄລິດກັບເບລີອານ*ຈະເຫັນດີນຳກັນໄດ້ບໍ?+ ຄົນທີ່ເຊື່ອຈະມີຫຍັງຄືກັບຄົນທີ່ບໍ່ເຊື່ອບໍ?+ 16 ວິຫານຂອງພະເຈົ້າຈະມີຮູບບູຊາໄດ້ບໍ?+ ພວກເຮົາເປັນວິຫານຂອງພະເຈົ້າຜູ້ມີຊີວິດຢູ່+ ຄືກັບທີ່ເພິ່ນບອກໄວ້ວ່າ: “ເຮົາຈະຢູ່ກັບເຂົາເຈົ້າ+ແລະຈະໄປກັບເຂົາເຈົ້າ. ເຮົາຈະເປັນພະເຈົ້າຂອງເຂົາເຈົ້າ ແລະເຂົາເຈົ້າຈະເປັນປະຊາຊົນຂອງເຮົາ.”+ 17 “ພະເຢໂຫວາ*ສັ່ງວ່າ ‘ດັ່ງນັ້ນ ໃຫ້ອອກມາຈາກເຂົາເຈົ້າແລະແຍກຢູ່ຕ່າງຫາກ. ເຊົາຈັບບາຍສິ່ງທີ່ບໍ່ສະອາດ’”+ “‘ແລະເຮົາຈະຮັບພວກເຈົ້າໄວ້.’”+ 18 “ພະເຢໂຫວາ*ຜູ້ມີລິດເດດສູງສຸດບອກວ່າ ‘ເຮົາຈະເປັນພໍ່ຂອງພວກເຈົ້າ+ ແລະພວກເຈົ້າຈະເປັນລູກຊາຍລູກສາວຂອງເຮົາ.’”+