ເອເຊກຽນ
18 ພະເຢໂຫວາເວົ້າກັບຂ້ອຍອີກວ່າ: 2 “ຄົນໃນອິດສະຣາເອນມັກເວົ້າວ່າ ‘ພໍ່ກິນໝາກລະແຊັງສົ້ມ ແຕ່ລູກພັດເຂັດແຂ້ວ.’ ສຸພາສິດຂໍ້ນີ້ໝາຍຄວາມວ່າແນວໃດ?+
3 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາສາບານວ່າຕາບໃດທີ່ເຮົາຍັງມີຊີວິດຢູ່ ພວກເຈົ້າຈະບໍ່ເວົ້າສຸພາສິດນີ້ໃນອິດສະຣາເອນອີກຕໍ່ໄປ. 4 ທຸກຊີວິດເປັນຂອງເຮົາ ທັງຊີວິດຂອງພໍ່ແລະຊີວິດຂອງລູກກໍເປັນຂອງເຮົາ. ຜູ້ໃດເຮັດຜິດຜູ້ນັ້ນຈະຕາຍ.
5 ສົມມຸດວ່າມີຜູ້ໜຶ່ງເປັນຄົນດີ. ລາວເຮັດສິ່ງທີ່ຖືກຕ້ອງແລະຍຸຕິທຳ. 6 ລາວບໍ່ກິນເຄື່ອງບູຊາທີ່ເອົາໃຫ້ຮູບບູຊາຢູ່ເທິງພູ+ ແລະບໍ່ເພິ່ງຮູບບູຊາທີ່ເປັນຕາຂີ້ດຽດ*ຂອງພວກອິດສະຣາເອນ. ລາວບໍ່ຫຼິ້ນຊູ້ກັບເມຍຂອງຄົນອື່ນ+ ແລະບໍ່ນອນນຳຜູ້ຍິງທີ່ເປັນປະຈຳເດືອນ.+ 7 ລາວບໍ່ຂົ່ມເຫງຜູ້ໃດ+ ແຕ່ລາວເອົາເຄື່ອງທີ່ລູກໜີ້ມາຈຳສົ່ງຄືນ.+ ລາວບໍ່ປຸ້ນເອົາເຄື່ອງຂອງຄົນອື່ນ+ ແຕ່ລາວແບ່ງຂອງກິນໃຫ້ຜູ້ທີ່ຫິວ+ແລະເອົາເຄື່ອງນຸ່ງໃຫ້ຄົນທີ່ບໍ່ມີເຄື່ອງນຸ່ງໃສ່.+ 8 ລາວໃຫ້ຢືມເງິນໂດຍບໍ່ເອົາດອກເບ້ຍແລະບໍ່ຊອກຫາກຳໄລ+ຈາກຜູ້ທີ່ມາຢືມ. ລາວບໍ່ເຮັດສິ່ງທີ່ບໍ່ຍຸຕິທຳ+ ແລະເມື່ອຄົນມີເລື່ອງກັນລາວກໍຕັດສິນແບບຍຸຕິທຳສະເໝີ.+ 9 ລາວເຊື່ອຟັງກົດໝາຍແລະເຮັດຕາມຄຳຕັດສິນຂອງເຮົາເພື່ອເຮັດສິ່ງຕ່າງໆຢ່າງຖືກຕ້ອງ. ຄົນແບບນີ້ເປັນຄົນດີແລະລາວຈະມີຊີວິດຢູ່ຕໍ່ໄປແນ່ນອນ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
10 ‘ແຕ່ສົມມຸດວ່າລາວພັດມີລູກຊາຍເປັນຂີ້ລັກ+ ຫຼືເປັນຄົນທີ່ຂ້າຄົນ+ ຫຼືເປັນຄົນທີ່ເຮັດສິ່ງທີ່ບໍ່ດີແນວອື່ນ. 11 (ລາວເອງບໍ່ເຄີຍເຮັດສິ່ງເຫຼົ່ານີ້.) ລູກຊາຍຜູ້ນັ້ນກິນເຄື່ອງບູຊາທີ່ເອົາໄປໃຫ້ຮູບບູຊາຢູ່ເທິງພູ ແລະຫຼິ້ນຊູ້ກັບເມຍຂອງຄົນອື່ນ. 12 ລາວຂົ່ມເຫງຄົນທຸກຍາກ+ ປຸ້ນເອົາເຄື່ອງຂອງຄົນອື່ນ ບໍ່ສົ່ງຄືນເຄື່ອງທີ່ລູກໜີ້ເອົາມາຈຳ ເພິ່ງຮູບບູຊາທີ່ເປັນຕາຂີ້ດຽດ+ ແລະເຮັດສິ່ງທີ່ເປັນຕາຂີ້ດຽດ.+ 13 ລາວຊອກຫາກຳໄລແລະເອົາດອກເບ້ຍນຳຜູ້ທີ່ມາຢືມ.+ ຍ້ອນລາວເຮັດສິ່ງທີ່ເປັນຕາຂີ້ດຽດເຫຼົ່ານີ້ ລາວຈະບໍ່ມີຊີວິດອີກຕໍ່ໄປ. ລາວຈະຕາຍແນ່ນອນ. ລາວຈະຕາຍຍ້ອນຄວາມຜິດຂອງໂຕເອງ.
14 ສົມມຸດວ່າຜູ້ຊາຍຄົນໜຶ່ງມີພໍ່ທີ່ເຮັດຜິດທຸກຢ່າງ. ລາວເຫັນພໍ່ເຮັດຜິດ ແຕ່ລາວບໍ່ໄດ້ເຮັດຄືກັບພໍ່. 15 ລາວບໍ່ກິນເຄື່ອງບູຊາທີ່ເອົາໃຫ້ຮູບບູຊາຢູ່ເທິງພູແລະບໍ່ເພິ່ງຮູບບູຊາທີ່ເປັນຕາຂີ້ດຽດຂອງພວກອິດສະຣາເອນ. ລາວບໍ່ຫຼິ້ນຊູ້ກັບເມຍຂອງຄົນອື່ນ. 16 ລາວບໍ່ຂົ່ມເຫງຜູ້ໃດ ບໍ່ຍຶດເອົາເຄື່ອງທີ່ລູກໜີ້ເອົາມາຈຳ ແລະບໍ່ປຸ້ນເອົາເຄື່ອງຂອງຄົນອື່ນ. ລາວແບ່ງຂອງກິນໃຫ້ຜູ້ທີ່ຫິວແລະເອົາເຄື່ອງນຸ່ງໃຫ້ຄົນທີ່ບໍ່ມີເຄື່ອງນຸ່ງໃສ່. 17 ລາວບໍ່ຂົ່ມເຫງຄົນທຸກ ແລະໃຫ້ຢືມເງິນໂດຍບໍ່ເອົາດອກເບ້ຍແລະບໍ່ຊອກຫາກຳໄລຈາກຜູ້ທີ່ມາຢືມ. ລາວເຮັດຕາມຄຳສັ່ງແລະກົດໝາຍຂອງເຮົາ. ຄົນແບບນີ້ຈະບໍ່ຕາຍຍ້ອນຄວາມຜິດຂອງພໍ່. ລາວຈະມີຊີວິດຢູ່ຕໍ່ໄປແນ່ນອນ. 18 ແຕ່ພໍ່ຂອງລາວຈະຕາຍຍ້ອນຄວາມຜິດຂອງໂຕເອງ. ລາວຈະຕາຍຍ້ອນສໍ້ໂກງ ປຸ້ນເອົາເຄື່ອງຂອງພີ່ນ້ອງໂຕເອງ ແລະເຮັດສິ່ງທີ່ບໍ່ດີກັບຄົນຊາດດຽວກັນ.
19 ແຕ່ພວກເຈົ້າຈະຖາມວ່າ “ເປັນຫຍັງລູກຈຶ່ງບໍ່ຖືກໂທດຍ້ອນຄວາມຜິດຂອງພໍ່?” ກໍຍ້ອນລູກຜູ້ນັ້ນເຮັດສິ່ງທີ່ຖືກຕ້ອງແລະຍຸຕິທຳ. ລາວເຊື່ອຟັງແລະເຮັດຕາມກົດໝາຍຂອງເຮົາ. ຍ້ອນແນວນີ້ ລາວຈະມີຊີວິດຢູ່ຕໍ່ໄປແນ່ນອນ.+ 20 ຜູ້ໃດທີ່ເຮັດຜິດຜູ້ນັ້ນຈະຕ້ອງຕາຍ.+ ລູກບໍ່ຕ້ອງຖືກໂທດຍ້ອນຄວາມຜິດຂອງພໍ່ ແລະພໍ່ກໍບໍ່ຕ້ອງຖືກໂທດຍ້ອນຄວາມຜິດຂອງລູກ. ຄົນດີຈະໄດ້ຮັບຜົນດີຈາກການເຮັດດີຂອງໂຕເອງ ແລະຄົນຊົ່ວຈະຖືກໂທດຍ້ອນຄວາມຊົ່ວຂອງໂຕເອງ.+
21 ແຕ່ສົມມຸດວ່າຄົນຊົ່ວຄົນໜຶ່ງເຊົາເຮັດຜິດທຸກຢ່າງທີ່ລາວເຄີຍເຮັດ ແລ້ວປ່ຽນມາເຮັດຕາມກົດໝາຍຂອງເຮົາ ແລະເຮັດສິ່ງທີ່ຖືກຕ້ອງແລະຍຸຕິທຳ ລາວກໍຈະມີຊີວິດຢູ່ຕໍ່ໄປແນ່ນອນ. ລາວຈະບໍ່ຕາຍ.+ 22 ເຮົາຈະບໍ່ລົງໂທດລາວຍ້ອນຄວາມຜິດທັງໝົດທີ່ລາວເຄີຍເຮັດ.+ ລາວຈະມີຊີວິດຢູ່ຕໍ່ໄປຍ້ອນລາວເຮັດສິ່ງທີ່ຖືກຕ້ອງ.’+
23 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາບໍ່ດີໃຈທີ່ເຫັນຄົນຊົ່ວຕາຍ+ ແຕ່ເຮົາຢາກໃຫ້ລາວເຊົາເຮັດຊົ່ວເພື່ອຈະມີຊີວິດຢູ່ຕໍ່ໄປ.’+
24 ‘ຖ້າຄົນດີເຊົາເຮັດສິ່ງທີ່ຖືກຕ້ອງແລ້ວໄປເຮັດຊົ່ວ* ແລະເຮັດສິ່ງທີ່ເປັນຕາຂີ້ດຽດຄືກັບທີ່ຄົນຊົ່ວເຮັດ ລາວຈະມີຊີວິດຢູ່ຕໍ່ໄປບໍ? ລາວຈະຕາຍຍ້ອນບໍ່ເຊື່ອຟັງເຮົາແລະຍ້ອນເຮັດຜິດ+ ແລ້ວຈະບໍ່ມີໃຜຈື່ສິ່ງດີໆທີ່ລາວເຄີຍເຮັດ.+
25 ແຕ່ພວກເຈົ້າຈະເວົ້າວ່າ “ແນວທາງຂອງພະເຢໂຫວາບໍ່ຍຸຕິທຳ.”+ ຊາດອິດສະຣາເອນເອີ້ຍ ຂໍໃຫ້ຟັງເດີ້. ແນວທາງຂອງເຮົາບໍ່ຍຸຕິທຳບໍ?+ ບໍ່ແມ່ນແນວທາງຂອງພວກເຈົ້າບໍທີ່ບໍ່ຍຸຕິທຳ?+
26 ຖ້າຄົນດີເຊົາເຮັດສິ່ງທີ່ຖືກຕ້ອງແລ້ວໄປເຮັດຊົ່ວ ລາວຈະຕາຍຍ້ອນເຮັດແບບນັ້ນ. ລາວຈະຕາຍຍ້ອນຄວາມຜິດຂອງໂຕເອງ.
27 ແຕ່ຖ້າຄົນຊົ່ວເຊົາເຮັດຜິດແບບທີ່ລາວເຄີຍເຮັດ ແລ້ວປ່ຽນມາເຮັດສິ່ງທີ່ຖືກຕ້ອງແລະຍຸຕິທຳ ລາວຈະປົກປ້ອງຊີວິດຂອງໂຕເອງໄວ້ໄດ້.+ 28 ຖ້າລາວສຳນຶກໄດ້ວ່າລາວເຮັດຜິດຫຼາຍຢ່າງ ແລ້ວເຊົາເຮັດສິ່ງເຫຼົ່ານັ້ນ. ລາວຈະມີຊີວິດຢູ່ຕໍ່ໄປແນ່ນອນ. ລາວຈະບໍ່ຕາຍ.
29 ແຕ່ຊາດອິດສະຣາເອນຈະເວົ້າວ່າ “ແນວທາງຂອງພະເຢໂຫວາບໍ່ຍຸຕິທຳ.” ຊາດອິດສະຣາເອນເອີ້ຍ ແນວທາງຂອງເຮົາບໍ່ຍຸຕິທຳບໍ?+ ບໍ່ແມ່ນແນວທາງຂອງພວກເຈົ້າບໍທີ່ບໍ່ຍຸຕິທຳ?’
30 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຊາດອິດສະຣາເອນເອີ້ຍ ເຮົາຈະຕັດສິນພວກເຈົ້າຕາມການກະທຳຂອງແຕ່ລະຄົນ.+ ເຊົາສະ. ໃຫ້ພວກເຈົ້າເຊົາເຮັດຜິດທຸກຢ່າງເພື່ອພວກເຈົ້າຈະບໍ່ເຮັດຜິດແລະຖືກໂທດຍ້ອນສິ່ງເຫຼົ່ານີ້. 31 ຊາດອິດສະຣາເອນເອີ້ຍ ໃຫ້ພວກເຈົ້າເຊົາເຮັດຜິດທຸກຢ່າງ+ແລະປ່ຽນຄວາມຄິດຈິດໃຈໃໝ່+ເພື່ອພວກເຈົ້າຈະບໍ່ຕາຍ.’+
32 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາບໍ່ດີໃຈທີ່ເຫັນຜູ້ໃດຜູ້ໜຶ່ງຕາຍ.+ ດັ່ງນັ້ນ ໃຫ້ເຊົາເຮັດຊົ່ວເພື່ອຈະມີຊີວິດຢູ່ຕໍ່ໄປ.’”+