ລະບຽບພວກເລວີ
17 ພະເຢໂຫວາເວົ້າກັບໂມເຊຕໍ່ໄປອີກວ່າ: 2 “ໃຫ້ບອກອາໂຣນກັບພວກລູກຊາຍຂອງລາວແລະພວກອິດສະຣາເອນທັງໝົດແນວນີ້ ‘ພະເຢໂຫວາສັ່ງວ່າ
3 “ຫ້າມຄົນອິດສະຣາເອນຂ້າງົວໂຕຜູ້ ຫຼືແກະໂຕຜູ້ ຫຼືແບ້ໃນຄ້າຍຫຼືນອກຄ້າຍ. 4 ແທນທີ່ຈະເຮັດແນວນັ້ນ ລາວຈະຕ້ອງເອົາສັດໄປທີ່ທາງເຂົ້າເຕັ້ນສັກສິດ*ຂອງພະເຢໂຫວາ ເພື່ອໃຊ້ເປັນເຄື່ອງບູຊາໃຫ້ພະເຢໂຫວາ. ຖ້າລາວຂ້າສັດບໍ່ວ່າໃນຄ້າຍຫຼືນອກຄ້າຍ ລາວຈະມີຄວາມຜິດຍ້ອນເຮັດໃຫ້ເລືອດໄຫຼ. ລາວຈະຕ້ອງຕາຍ. 5 ເມື່ອເຮັດແນວນີ້ ພວກອິດສະຣາເອນຈະບໍ່ຂ້າສັດຂອງເຂົາເຈົ້າຢູ່ທົ່ງນາອີກຕໍ່ໄປ ແຕ່ເຂົາເຈົ້າຈະເອົາສັດນັ້ນໄປໃຫ້ປະໂລຫິດຢູ່ທາງເຂົ້າເຕັ້ນສັກສິດເພື່ອໃຫ້ພະເຢໂຫວາ. ເຂົາເຈົ້າຕ້ອງເຜົາສັດນັ້ນເປັນເຄື່ອງບູຊາສ້າງຄວາມສະຫງົບສຸກໃຫ້ພະເຢໂຫວາ.+ 6 ປະໂລຫິດຈະຊິດເລືອດຂອງສັດໃສ່ແທ່ນບູຊາຂອງພະເຢໂຫວາທີ່ຢູ່ທາງເຂົ້າເຕັ້ນສັກສິດ ແລະເຜົານ້ຳມັນຂອງສັດນັ້ນເພື່ອໃຫ້ມີກິ່ນຫອມທີ່ເຮັດໃຫ້ພະເຢໂຫວາພໍໃຈ.*+ 7 ຄົນອິດສະຣາເອນບໍ່ຄວນເອົາເຄື່ອງບູຊາໃຫ້ພະເຈົ້າອື່ນໆ+ທີ່ມີຮູບຮ່າງຄ້າຍຄືກັບໂຕແບ້*ທີ່ເຂົາເຈົ້ານະມັດສະການ*+ອີກຕໍ່ໄປ. ນີ້ແມ່ນຄຳສັ່ງທີ່ພວກເຈົ້າຕ້ອງເຮັດຕາມໄປຈົນຮອດລຸ້ນລູກລຸ້ນຫຼານຕໍ່ໆໄປ.”’
8 ໃຫ້ບອກເຂົາເຈົ້າວ່າ ‘ຖ້າຄົນອິດສະຣາເອນຫຼືຄົນຕ່າງຊາດທີ່ຢູ່ນຳພວກເຈົ້າຄົນໃດຈະເຜົາເຄື່ອງບູຊາເຜົາ ຫຼືເຄື່ອງບູຊາຊະນິດອື່ນໆ 9 ແຕ່ບໍ່ໄດ້ເອົາເຄື່ອງບູຊານັ້ນໄປໃຫ້ພະເຢໂຫວາຢູ່ທາງເຂົ້າເຕັ້ນສັກສິດ ຄົນນັ້ນຈະຕ້ອງຕາຍ.+
10 ຄົນອິດສະຣາເອນທຸກຄົນແລະຄົນຕ່າງຊາດທຸກຄົນທີ່ຢູ່ນຳພວກເຈົ້າຫ້າມກິນເລືອດ+ທຸກຢ່າງ. ຖ້າຜູ້ໃດກິນເລືອດ ເຮົາຈະບໍ່ຍອມຮັບຜູ້ນັ້ນແລະລາວຈະຕ້ອງຕາຍ 11 ເພາະຊີວິດຂອງຄົນແລະສັດທຸກຊະນິດຢູ່ໃນເລືອດ.+ ເຮົາໃຫ້ເລືອດກັບພວກເຈົ້າເພື່ອໃຫ້ພວກເຈົ້າເອົາໄປຊິດໃສ່ແທ່ນບູຊາ+ແລະໄດ້ຮັບການຍົກໂທດ. ເລືອດໄຖ່ຄວາມຜິດໄດ້+ເພາະຊີວິດຢູ່ໃນເລືອດ. 12 ຍ້ອນແນວນີ້ ເຮົາຈຶ່ງເວົ້າກັບພວກອິດສະຣາເອນວ່າ “ຫ້າມພວກເຈົ້າກິນເລືອດ ແລະຫ້າມຄົນຕ່າງຊາດທີ່ຢູ່ນຳພວກເຈົ້າ+ກິນເລືອດ.”+
13 ຖ້າຄົນອິດສະຣາເອນຫຼືຄົນຕ່າງຊາດທີ່ຢູ່ນຳພວກເຈົ້າຄົນໃດໄປລ່າສັດປ່າຫຼືນົກທີ່ພວກເຈົ້າກິນໄດ້ ລາວຈະຕ້ອງໃຫ້ເລືອດສັດນັ້ນໄຫຼອອກ+ຈົນໝົດແລະເອົາດິນຖົມໄວ້ 14 ເພາະເລືອດໝາຍເຖິງຊີວິດຂອງຄົນແລະສັດທຸກຊະນິດ. ຊີວິດຢູ່ໃນເລືອດ. ຍ້ອນແນວນີ້ ເຮົາຈຶ່ງບອກພວກອິດສະຣາເອນວ່າ “ຫ້າມພວກເຈົ້າກິນເລືອດທຸກຢ່າງ ເພາະເລືອດໝາຍເຖິງຊີວິດຂອງຄົນແລະສັດທຸກຊະນິດ. ຖ້າຜູ້ໃດກິນເລືອດ ຜູ້ນັ້ນຈະຕ້ອງຕາຍ.”+ 15 ຖ້າຄົນອິດສະຣາເອນຫຼືຄົນຕ່າງຊາດຄົນໃດກິນຊີ້ນສັດທີ່ຕາຍເອງ ຫຼືຊີ້ນສັດທີ່ຖືກສັດປ່າກັດຕາຍ+ ລາວຕ້ອງຊັກເຄື່ອງນຸ່ງຂອງໂຕເອງແລະອາບນ້ຳ ແລ້ວຈະຖືວ່າລາວບໍ່ສະອາດຈົນຮອດຄ່ຳ.+ ຫຼັງຈາກນັ້ນຈຶ່ງຈະຖືວ່າລາວສະອາດ. 16 ແຕ່ຖ້າລາວບໍ່ໄດ້ຊັກເຄື່ອງນຸ່ງຂອງໂຕເອງແລະບໍ່ໄດ້ອາບນ້ຳ ລາວຈະຖືກລົງໂທດ.’”+