ພວກຜູ້ຕັດສິນ
4 ຫຼັງຈາກທີ່ເອຮຸດຕາຍ ພວກອິດສະຣາເອນກໍເຮັດສິ່ງທີ່ພະເຢໂຫວາເຫັນວ່າຊົ່ວອີກ.+ 2 ພະເຢໂຫວາກໍເລີຍມອບເຂົາເຈົ້າໄວ້ໃນມືຂອງຢາບິນກະສັດຂອງພວກການາອານ+ທີ່ປົກຄອງຢູ່ເມືອງຮາໂສ. ຫົວໜ້າກອງທັບຂອງຢາບິນຊື່ຊີເຊຣາ. ລາວອາໄສຢູ່ຮາໂຣເຊັດຮາໂກອິມ.+ 3 ພວກອິດສະຣາເອນໄດ້ຮ້ອງຂໍໃຫ້ພະເຢໂຫວາຊ່ວຍ+ ຍ້ອນຢາບິນມີລົດຮົບທີ່ມີມີດເຫຼັກຍາວຕິດຢູ່ກົງລໍ້*+ 900 ຄັນ. ລາວກົດຂີ່ພວກອິດສະຣາເອນຢ່າງໜັກ+ຢູ່ 20 ປີ.
4 ໃນສະໄໝນັ້ນ ເດໂບຣາຜູ້ພະຍາກອນຍິງ+ທີ່ເປັນເມຍຂອງລັບປີໂດດເປັນຄົນເອົາຄຳຕັດສິນຂອງພະເຈົ້າມາບອກໃຫ້ພວກອິດສະຣາເອນຮູ້. 5 ລາວມັກນັ່ງຢູ່ກ້ອງຕົ້ນປາມຂອງເດໂບຣາ ເຊິ່ງຢູ່ລະຫວ່າງເມືອງຣາມາ+ກັບເມືອງເບເທນ+ໃນເຂດພູຂອງເອຟຣາຢິມ. ພວກອິດສະຣາເອນມັກຂຶ້ນໄປຫາລາວຢູ່ຫັ້ນເພື່ອຈະຮູ້ຄຳຕັດສິນຂອງພະເຈົ້າ. 6 ລາວສົ່ງຄົນໄປຫາບາຣາກ+ລູກຊາຍຂອງອາບີໂນອາມທີ່ຢູ່ເມືອງເກເດັດນັບທາລີ+ ແລະບອກບາຣາກວ່າ: “ພະເຢໂຫວາພະເຈົ້າຂອງອິດສະຣາເອນສັ່ງເຈົ້າວ່າ ‘ໃຫ້ເຈົ້າຂຶ້ນໄປພູຕາໂບ ແລ້ວພາທະຫານຈາກຕະກູນນັບທາລີແລະຕະກູນເຊບູລູນໄປກັບເຈົ້າ 10.000 ຄົນ. 7 ເຮົາຈະເຮັດໃຫ້ຊີເຊຣາຫົວໜ້າກອງທັບຂອງຢາບິນກັບລົດຮົບແລະກອງທະຫານຂອງລາວໄປທີ່ຫ້ວຍ*ກີໂຊນ+ ແລ້ວເຮົາຈະມອບລາວໄວ້ໃນມືຂອງເຈົ້າ.’”+
8 ບາຣາກເວົ້າກັບເດໂບຣາວ່າ: “ຖ້າເຈົ້າໄປກັບຂ້ອຍ ຂ້ອຍກໍຊິໄປ. ແຕ່ຖ້າເຈົ້າບໍ່ໄປກັບຂ້ອຍ ຂ້ອຍກໍຊິບໍ່ໄປ.” 9 ລາວຕອບວ່າ: “ຂ້ອຍຊິໄປກັບເຈົ້າແທ້ ແຕ່ການສູ້ຮົບເທື່ອນີ້ເຈົ້າຊິບໍ່ໄດ້ຮັບກຽດ ເພາະພະເຢໂຫວາຊິມອບຊີເຊຣາໄວ້ໃນມືຂອງຜູ້ຍິງຄົນໜຶ່ງ.”+ ແລ້ວເດໂບຣາກໍໄປເມືອງເກເດັດ+ກັບບາຣາກ. 10 ບາຣາກຈຶ່ງໄດ້ລວບລວມເອົາທະຫານ 10.000 ຄົນ ຈາກຕະກູນເຊບູລູນກັບຕະກູນນັບທາລີ+ໄປເມືອງເກເດັດກັບລາວ ແລະເດໂບຣາກໍໄປນຳ.
11 ຕອນນັ້ນ ເຮເບຄົນເກນີໄດ້ແຍກອອກມາຢູ່ຕ່າງຫາກຈາກພວກເກນີ+ທີ່ເປັນລູກຫຼານຂອງໂຮບັບທີ່ເປັນພໍ່ເຖົ້າໂມເຊ.+ ເຮເບຕັ້ງເຕັ້ນຢູ່ໃກ້ຕົ້ນໄມ້ໃຫຍ່ໃນຊາອັນອັນນີມເຊິ່ງຢູ່ໃນເມືອງເກເດັດ.
12 ມີຄົນມາບອກຊີເຊຣາວ່າບາຣາກລູກຊາຍຂອງອາບີໂນອາມໄດ້ຂຶ້ນໄປພູຕາໂບແລ້ວ.+ 13 ຊີເຊຣາຈຶ່ງຟ້າວເອົາລົດຮົບທີ່ມີມີດເຫຼັກຍາວຕິດຢູ່ກົງລໍ້ 900 ຄັນ ພ້ອມກັບກອງທະຫານຂອງລາວອອກໄປຮາໂຣເຊັດຮາໂກອິມເພື່ອໄປທີ່ຫ້ວຍ*ກີໂຊນ.+ 14 ເດໂບຣາຈຶ່ງເວົ້າກັບບາຣາກວ່າ: “ໄປໂລດ ມື້ນີ້ພະເຢໂຫວາຊິມອບຊີເຊຣາໄວ້ໃນມືຂອງເຈົ້າ. ພະເຢໂຫວາຊິອອກໜ້າໄປກ່ອນເຈົ້າ.” ແລ້ວບາຣາກກໍພາທະຫານທັງ 10.000 ຄົນລົງມາຈາກພູຕາໂບ. 15 ແລ້ວພະເຢໂຫວາໄດ້ເຮັດໃຫ້ຊີເຊຣາ ລົດຮົບກັບທະຫານຂອງລາວສັບສົນວຸ່ນວາຍ+ຕໍ່ໜ້າບາຣາກ. ຊີເຊຣາໄດ້ຖິ້ມລົດຮົບຂອງໂຕເອງແລ້ວແລ່ນໜີໄປ. 16 ບາຣາກໄດ້ໄລ່ນຳລົດຮົບແລະພວກທະຫານຂອງຊີເຊຣາໄປຈົນຮອດຮາໂຣເຊັດຮາໂກອິມ. ທະຫານຂອງຊີເຊຣາຖືກຂ້າຕາຍໝົດບໍ່ເຫຼືອຈັກຄົນ.+
17 ແຕ່ຊີເຊຣາແລ່ນໄປເຕັ້ນຂອງຢາເອນ+ເມຍຂອງເຮເບ+ຄົນເກນີ ຍ້ອນຕອນນັ້ນຢາບິນ+ກະສັດຂອງຄົນຮາໂສບໍ່ໄດ້ເປັນສັດຕູກັບຄອບຄົວຂອງເຮເບຄົນເກນີ. 18 ແລ້ວຢາເອນກໍອອກມາຫາຊີເຊຣາແລະເວົ້າວ່າ: “ນາຍເອີ້ຍ ເຂົ້າມາທາງໃນກ່ອນ. ບໍ່ຕ້ອງຢ້ານເດີ້.” ຊີເຊຣາກໍເຂົ້າໄປໃນເຕັ້ນຂອງຢາເອນ. ແລ້ວຢາເອນກໍເອົາຜ້າຫົ່ມມາຕຸ້ມໃຫ້ລາວ. 19 ຊີເຊຣາເວົ້າກັບຢາເອນວ່າ: “ຂ້ອຍຫິວນ້ຳ. ຂໍກິນນ້ຳແດ່!” ແລ້ວຢາເອນກໍເອົານົມຢູ່ໃນຖົງໜັງມາຖອກໃຫ້ລາວກິນ+ ແລະຫົ່ມຜ້າໃຫ້ລາວອີກ. 20 ຊີເຊຣາບອກຢາເອນວ່າ: “ໃຫ້ເຈົ້າຢືນເຝົ້າຢູ່ທາງເຂົ້າເຕັ້ນ ຖ້າມີຄົນມາຖາມວ່າມີຜູ້ຊາຍຢູ່ໃນເຕັ້ນນີ້ບໍ ໃຫ້ເຈົ້າບອກວ່າບໍ່ມີເດີ້.”
21 ແຕ່ຢາເອນເມຍຂອງເຮເບໄດ້ເອົາຫຼັກໄມ້ທີ່ຍຶດເຕັ້ນກັບຄ້ອນມາ. ຕອນທີ່ຊີເຊຣາກຳລັງນອນຫຼັບແຈບຍ້ອນເມື່ອຍແຮງ ຢາເອນກໍຄ່ອຍໆຈອບເຂົ້າໄປຫາລາວ ແລ້ວເອົາຫຼັກໄມ້ທີ່ຍຶດເຕັ້ນຕອກໃສ່ຂະໝັບລາວຊອດຈົນຮອດດິນ. ແລ້ວຊີເຊຣາກໍຕາຍ.+
22 ບາຣາກໄລ່ນຳຫຼັງຊີເຊຣາມາ ແລ້ວຢາເອນກໍອອກຈາກເຕັ້ນມາຫາລາວ ແລະເວົ້າວ່າ: “ເຂົ້າມາເບິ່ງແມ້ ຄົນທີ່ເຈົ້າກຳລັງຊອກຫາຢູ່ນີ້ເດ້.” ບາຣາກກໍເຂົ້າໄປນຳຢາເອນ ແລ້ວກໍເຫັນຊີເຊຣານອນຕາຍຢູ່ພື້ນ. ມີຫຼັກໄມ້ຍຶດເຕັ້ນສຽບຄາຢູ່ຂະໝັບ.
23 ໃນມື້ນັ້ນ ພະເຈົ້າໄດ້ຊ່ວຍໃຫ້ພວກອິດສະຣາເອນຊະນະຢາບິນກະສັດຂອງພວກການາອານ.+ 24 ພວກອິດສະຣາເອນໄດ້ຕໍ່ສູ້ກັບຢາບິນກະສັດຂອງພວກການາອານຫຼາຍຂຶ້ນເລື້ອຍໆ+ ຈົນໃນທີ່ສຸດເຂົາເຈົ້າກໍຂ້າຢາບິນກະສັດຂອງພວກການາອານໄດ້.+