ພະບັນຍັດ
5 ໂມເຊເອີ້ນພວກອິດສະຣາເອນທັງໝົດມາລວມກັນ ແລະເວົ້າກັບເຂົາເຈົ້າວ່າ: “ໃຫ້ຟັງຂໍ້ກຳນົດກົດໝາຍທີ່ຂ້ອຍຈະເວົ້າໃຫ້ພວກເຈົ້າຟັງມື້ນີ້. ພວກເຈົ້າຕ້ອງຮຽນຮູ້ແລະເຮັດຕາມຢ່າງເຄັ່ງຄັດ. 2 ພະເຢໂຫວາພະເຈົ້າຂອງພວກເຮົາໄດ້ເຮັດສັນຍາກັບພວກເຮົາຢູ່ທີ່ໂຮເຣັບ.+ 3 ພະເຢໂຫວາບໍ່ໄດ້ເຮັດສັນຍານີ້ກັບປູ່ຍ່າຕານາຍຂອງພວກເຮົາ ແຕ່ເພິ່ນໄດ້ເຮັດສັນຍາກັບພວກເຮົາທຸກຄົນທີ່ມາປະຊຸມກັນໃນມື້ນີ້. 4 ພະເຢໂຫວາເວົ້າກັບພວກເຈົ້າໂດຍກົງຈາກໄຟທີ່ລຸກຢູ່ເທິງພູ.+ 5 ຕອນນັ້ນ ຂ້ອຍຢືນຢູ່ລະຫວ່າງພະເຢໂຫວາກັບພວກເຈົ້າ+ ເພື່ອຈະໄດ້ບອກໃຫ້ພວກເຈົ້າຮູ້ວ່າພະເຢໂຫວາເວົ້າຫຍັງແດ່ ຍ້ອນພວກເຈົ້າຢ້ານໄຟນັ້ນແລະບໍ່ໄດ້ຂຶ້ນໄປເທິງພູ.+ ເພິ່ນເວົ້າວ່າ
6 ‘ເຮົາແມ່ນເຢໂຫວາພະເຈົ້າຂອງເຈົ້າ. ເຮົາພາເຈົ້າອອກມາຈາກເອຢິບ ແລະປົດປ່ອຍເຈົ້າອອກຈາກການເປັນທາດ.+ 7 ຫ້າມນະມັດສະການພະເຈົ້າອື່ນນອກຈາກເຮົາ.+
8 ຫ້າມເຮັດຮູບຫຍັງກໍຕາມເພື່ອນະມັດສະການ+ ບໍ່ວ່າຮູບນັ້ນຈະມີຮູບຮ່າງຄ້າຍຄືສິ່ງທີ່ຢູ່ເທິງຟ້າ ສິ່ງທີ່ຢູ່ໃນໂລກ ຫຼືສິ່ງທີ່ຢູ່ໃນນ້ຳ. 9 ຫ້າມຂາບໄຫວ້ຫຼືນະມັດສະການສິ່ງເຫຼົ່ານັ້ນ.+ ເຮົາແມ່ນເຢໂຫວາພະເຈົ້າຂອງເຈົ້າ. ເຮົາເປັນພະເຈົ້າທີ່ຕ້ອງການໃຫ້ນະມັດສະການເຮົາພຽງຜູ້ດຽວ.+ ຖ້າຜູ້ໃດຊັງເຮົາ ເຮົາຈະລົງໂທດຜູ້ນັ້ນຈົນຮອດລູກ ຫຼານ ແລະເຫຼນຂອງລາວ.+ 10 ແຕ່ຖ້າຜູ້ໃດຮັກເຮົາແລະເຊື່ອຟັງຄຳສັ່ງຂອງເຮົາ ເຮົາກໍຈະສະແດງຄວາມຮັກທີ່ໝັ້ນຄົງຕໍ່ຜູ້ນັ້ນ ແລະຕໍ່ລູກຫຼານຂອງລາວຈົນຮອດຫຼາຍພັນລຸ້ນ.
11 ຫ້າມໃຊ້ຊື່ເຢໂຫວາພະເຈົ້າຂອງເຈົ້າໃນທາງທີ່ຜິດ.+ ຖ້າຜູ້ໃດໃຊ້ຊື່ນັ້ນໃນທາງທີ່ຜິດ ພະເຢໂຫວາຈະລົງໂທດຜູ້ນັ້ນແນ່ນອນ.+
12 ໃຫ້ຖືວ່າວັນຊະບາໂຕເປັນມື້ທີ່ສັກສິດຄືກັບພະເຢໂຫວາພະເຈົ້າຂອງເຈົ້າໄດ້ສັ່ງໄວ້.+ 13 ເຈົ້າມີ 6 ມື້ທີ່ຈະເຮັດວຽກໄດ້+ 14 ແຕ່ມື້ທີ 7 ເປັນວັນຊະບາໂຕສຳລັບພະເຢໂຫວາພະເຈົ້າຂອງເຈົ້າ.+ ຫ້າມເຈົ້າເຮັດວຽກ.+ ພວກລູກ ພວກທາດ ງົວ ລາ ສັດລ້ຽງ ແລະຄົນຕ່າງຊາດທີ່ຢູ່ໃນເມືອງຕ່າງໆຂອງເຈົ້າກໍຫ້າມເຮັດວຽກຄືກັນ+ ເພື່ອໃຫ້ທາດຂອງເຈົ້າໄດ້ພັກຄືກັນກັບເຈົ້າ.+ 15 ຢ່າລືມວ່າເຈົ້າກໍເຄີຍເປັນທາດຢູ່ໃນເອຢິບ ແລະພະເຢໂຫວາພະເຈົ້າຂອງເຈົ້າກໍໃຊ້ລິດເດດທີ່ຍິ່ງໃຫຍ່*ຂອງເພິ່ນພາເຈົ້າອອກມາຈາກບ່ອນນັ້ນ.+ ຍ້ອນແນວນີ້ ພະເຢໂຫວາພະເຈົ້າຂອງເຈົ້າຈຶ່ງສັ່ງເຈົ້າໃຫ້ຖືວັນຊະບາໂຕ.
16 ໃຫ້ເຈົ້ານັບຖືພໍ່ແມ່+ ຕາມທີ່ພະເຢໂຫວາພະເຈົ້າຂອງເຈົ້າໄດ້ສັ່ງໄວ້ ເພື່ອເຈົ້າຈະມີອາຍຸຍືນຍາວ ແລະຢູ່ດີມີແຮງໃນແຜ່ນດິນທີ່ພະເຢໂຫວາພະເຈົ້າຈະເອົາໃຫ້ເຈົ້າ.+
17 ຫ້າມຂ້າຄົນ.+
18 ຫ້າມຫຼິ້ນຊູ້.+
19 ຫ້າມລັກ.+
20 ຫ້າມເວົ້າຕົວະຕອນທີ່ເປັນພະຍານໃຫ້ຄົນອື່ນ.+
21 ຫ້າມຄິດຢາກໄດ້ເມຍຂອງຄົນອື່ນ.+ ຫ້າມເຫັນແກ່ໂຕຢາກໄດ້ເຮືອນ ນາ ທາດ ງົວ ລາ ຫຼືອີ່ຫຍັງກໍຕາມທີ່ເປັນຂອງຄົນອື່ນ.’+
22 ນີ້ແມ່ນກົດໝາຍທີ່ພະເຢໂຫວາໄດ້ບອກພວກເຈົ້າຢູ່ເທິງພູຈາກໄຟທີ່ລຸກຢູ່. ຕອນນັ້ນ ມີຂີ້ເຝື້ອຕຶບໜາ+ແລະມີສຽງດັງແຮງ. ເພິ່ນບໍ່ໄດ້ບອກຫຍັງຕື່ມອີກ ແລ້ວເພິ່ນກໍຂຽນກົດໝາຍນີ້ໃສ່ຫີນ 2 ແຜ່ນແລະເອົາໃຫ້ຂ້ອຍ.+
23 ແຕ່ເມື່ອພວກເຈົ້າໄດ້ຍິນສຽງອອກມາຈາກຄວາມມືດແລະເຫັນໄຟລຸກຢູ່ເທິງພູ+ ພວກຫົວໜ້າຕະກູນກັບພວກຜູ້ນຳກໍພາກັນມາຫາຂ້ອຍ. 24 ເຂົາເຈົ້າເວົ້າກັບຂ້ອຍວ່າ ‘ພະເຢໂຫວາພະເຈົ້າຂອງພວກເຮົາໃຫ້ພວກເຮົາເຫັນຄວາມຍິ່ງໃຫຍ່ແລະລິດເດດຂອງເພິ່ນ. ພວກເຮົາໄດ້ຍິນສຽງເພິ່ນຈາກໄຟ.+ ມື້ນີ້ພວກເຮົາໄດ້ເຫັນພະເຈົ້າເວົ້າກັບຄົນ ແລະຄົນກໍຍັງມີຊີວິດຢູ່.+ 25 ແຕ່ຖ້າພະເຢໂຫວາພະເຈົ້າເວົ້າກັບພວກເຮົາຕໍ່ໄປ ພວກເຮົາຕ້ອງຕາຍແທ້ໆ ຍ້ອນໄຟທີ່ລຸກແຮງນີ້ຈະເຜົາພວກເຮົາ. ພວກເຮົາບໍ່ຢາກຕາຍ. 26 ໃນໂລກນີ້ມີໃຜບໍທີ່ໄດ້ຍິນພະເຈົ້າທີ່ມີຊີວິດຢູ່ເວົ້າອອກມາຈາກໄຟ ແລ້ວຍັງມີຊີວິດຢູ່ຄືກັບພວກເຮົາ? 27 ຂໍໃຫ້ເຈົ້າເປັນຄົນໄປຫາພະເຢໂຫວາພະເຈົ້າຂອງພວກເຮົາ ແລ້ວເອົາສິ່ງທີ່ພະເຢໂຫວາພະເຈົ້າເວົ້າມາບອກພວກເຮົາ. ພວກເຮົາຈະຟັງແລະເຮັດຕາມ.’+
28 ພະເຢໂຫວາໄດ້ຍິນສິ່ງທີ່ພວກເຈົ້າເວົ້າກັບຂ້ອຍແລ້ວ ແລະພະເຢໂຫວາບອກຂ້ອຍວ່າ ‘ເຮົາໄດ້ຍິນສິ່ງທີ່ປະຊາຊົນເວົ້າກັບເຈົ້າແລ້ວ. ເຂົາເຈົ້າເວົ້າຖືກຕ້ອງ.+ 29 ຖ້າເຂົາເຈົ້າຢ້ານຢຳເຮົາຈາກໃຈສະເໝີ+ ແລະເຮັດຕາມກົດໝາຍທຸກຂໍ້ຂອງເຮົາ+ ເຂົາເຈົ້າກັບລູກຫຼານຂອງເຂົາເຈົ້າກໍຈະຢູ່ດີມີແຮງຕະຫຼອດໄປ.+ 30 ໃຫ້ໄປບອກເຂົາເຈົ້າວ່າ “ກັບໄປທີ່ເຕັ້ນຂອງໂຕເອງໄດ້ແລ້ວ.” 31 ແຕ່ໃຫ້ເຈົ້າຢູ່ນີ້ກ່ອນ. ເຮົາຈະບອກກົດໝາຍ ຂໍ້ກຳນົດ ແລະຄຳສັ່ງທຸກຢ່າງໃຫ້ເຈົ້າ ເພື່ອເຈົ້າຈະໄດ້ເອົາໄປສອນເຂົາເຈົ້າ ແລະເຂົາເຈົ້າຈະໄດ້ເຮັດຕາມເມື່ອເຂົ້າໄປຢູ່ໃນແຜ່ນດິນທີ່ເຮົາຈະເອົາໃຫ້ເຂົາເຈົ້າ.’ 32 ທຸກສິ່ງທີ່ພະເຢໂຫວາພະເຈົ້າຂອງພວກເຈົ້າສັ່ງໄວ້ ພວກເຈົ້າຕ້ອງໄດ້ເຮັດຕາມຢ່າງເຄັ່ງຄັດ.+ ຫ້າມເຈີດຊ້າຍເຈີດຂວາ.+ 33 ພວກເຈົ້າຕ້ອງໃຊ້ຊີວິດຕາມທາງທີ່ພະເຢໂຫວາພະເຈົ້າຂອງພວກເຈົ້າສັ່ງໄວ້+ ເພື່ອພວກເຈົ້າຈະຢູ່ດີມີແຮງ ແລະມີອາຍຸຍືນຍາວໃນແຜ່ນດິນທີ່ພວກເຈົ້າຈະໄປຢູ່ນັ້ນ.”+