ເອຊາຢາ
33 ຄວາມຈິບຫາຍຈະເກີດກັບເຈົ້າ*ທີ່ມັກທຳລາຍຄົນອື່ນ ແຕ່ໂຕເອງຍັງບໍ່ເຄີຍຖືກທຳລາຍ+
ເຈົ້າທີ່ມັກທໍລະຍົດຄົນອື່ນ ແຕ່ຍັງບໍ່ເຄີຍຖືກລະຍົດ.
ເມື່ອເຈົ້າທຳລາຍຄົນອື່ນແລ້ວ ເຈົ້າກໍຈະຖືກທຳລາຍ.+
ເມື່ອເຈົ້າທໍລະຍົດຄົນອື່ນແລ້ວ ເຈົ້າກໍຈະຖືກທໍລະຍົດຄືກັນ.
2 ພະເຢໂຫວາ ຂໍພະອົງອີ່ຕົນພວກເຮົາ.+
ພວກເຮົາຫວັງເພິ່ງພະອົງ.
ຂໍພະອົງໃຊ້ກຳລັງ*+ເພື່ອຊ່ວຍພວກເຮົາທຸກໆເຊົ້າ.
ພະອົງເປັນຜູ້ຊ່ວຍພວກເຮົາໃຫ້ລອດໃນຍາມທີ່ຍາກລຳບາກ.+
3 ຄົນຈະແລ່ນໜີເມື່ອໄດ້ຍິນສຽງທີ່ມີພະລັງຂອງພະອົງ.
ເມື່ອພະອົງລຸກຂຶ້ນ ຊາດຕ່າງໆກໍແຕກຊະແຕກຊາຍ.+
4 ເຄື່ອງຂອງທີ່ພວກເຈົ້າປຸ້ນມາໄດ້ຈະມີຫຼາຍຄືກັບຝູງຕັກກະແຕນຫຸ້ມກັນຢູ່.
ຄົນຈະຟ້າວແລ່ນໄປເອົາເຄື່ອງຂອງເຫຼົ່ານັ້ນປານຝູງຕັກກະແຕນ.
5 ພະເຢໂຫວາຈະໄດ້ຮັບການຍົກຍ້ອງ
ຍ້ອນເພິ່ນຢູ່ບ່ອນທີ່ສູງຫຼາຍ.
ເພິ່ນຈະເຮັດໃຫ້ຊີໂອນມີແຕ່ຄວາມຍຸຕິທຳແລະຄວາມຖືກຕ້ອງ.
6 ພະເຢໂຫວາເຮັດໃຫ້ຊີວິດຂອງພວກເຈົ້າໝັ້ນຄົງ.
ເພິ່ນເປັນຜູ້ທີ່ຊ່ວຍພວກເຈົ້າໃຫ້ລອດ+ ໃຫ້ມີສະຕິປັນຍາ ໃຫ້ມີຄວາມຮູ້ ແລະໃຫ້ມີຄວາມຢ້ານຢຳເພິ່ນ.+
ທັງໝົດນີ້ເປັນສິ່ງທີ່ມີຄ່າຫຼາຍ.
7 ເບິ່ງແມ້! ພວກຜູ້ກ້າຫານຂອງເຂົາເຈົ້າ*ຮ້ອງດ້ວຍຄວາມຢ້ານຕາມຫົນທາງ
ແລະຜູ້ທີ່ຖືກສົ່ງໄປເຮັດສັນຍາຂໍສະຫງົບເສິກກໍຮ້ອງໄຫ້ເສຍໃຈຫຼາຍ.
8 ເສັ້ນທາງຫຼັກຖືກປະໄວ້
ແລະຕາມທາງຍ່າງກໍບໍ່ມີໃຜທຽວ.
9 ແຜ່ນດິນຈະໂສກເສົ້າ*ແລະແຫ້ງແລ້ງ.
ເລບານອນຈະຖືກເຮັດໃຫ້ອັບອາຍ+ແລະເສື່ອມໂຊມ.
ຊາໂຣນຈະເປັນຄືກັບທະເລຊາຍ.
ບາຊານແລະກາເມນຈະຖືກສັ່ນຈົນໃບຫຼົ່ນໝົດ.+
10 ພະເຢໂຫວາເວົ້າວ່າ: “ບັດນີ້ ເຮົາຈະລົງມືຈັດການ.
ເຮົາຈະເຮັດໃຫ້ໂຕເອງໄດ້ຮັບການຍົກຍ້ອງ+
ແລະເຮົາຈະເຮັດໃຫ້ໂຕເອງໄດ້ຮັບກຽດ.
11 ພວກຄົນຊົ່ວ ແຜນການແລະວຽກງານຂອງພວກເຈົ້າເປັນສິ່ງທີ່ບໍ່ມີຄ່າຫຍັງຄືກັບຫຍ້າແຫ້ງແລະຕໍເຟືອງ
ແລະຄວາມຄິດທີ່ຊົ່ວໆຂອງພວກເຈົ້າກໍຈະເປັນຄືກັບໄຟທີ່ຈູດພວກເຈົ້າ.+
12 ຊາດຕ່າງໆຈະຖືກຈູດຈົນບໍ່ເຫຼືອຫຍັງ.*
ເຂົາເຈົ້າຈະຖືກຈູດຄືກັບຟຸ່ມໜາມທີ່ຖືກຕັດຖິ້ມ.+
13 ພວກເຈົ້າທີ່ຢູ່ໄກໆ ຟັງເດີ້ວ່າເຮົາຈະເຮັດຫຍັງ!
ພວກເຈົ້າທີ່ຢູ່ໃກ້ໆ ຖ້າເບິ່ງລິດເດດຂອງເຮົາໂລດເດີ້!
14 ຄົນເຮັດຜິດທີ່ຢູ່ເມືອງຊີໂອນພາກັນຢ້ານ.+
ພວກຄົນທີ່ທໍລະຍົດພະເຈົ້າຢ້ານຈົນໂຕສັ່ນແລະເວົ້າວ່າ
‘ພວກເຮົາຢູ່ໃນບ່ອນທີ່ມີໄຟລຸກແຮງປານນັ້ນບໍ່ໄດ້ດອກ.+
ບ່ອນທີ່ມີໄຟລຸກຢູ່ຕະຫຼອດແບບນັ້ນ ຈັ່ງໃດພວກເຮົາກໍຢູ່ບໍ່ໄດ້.’
15 ຖ້າຜູ້ໃດເຮັດສິ່ງທີ່ຖືກຕ້ອງສະເໝີ+
ເວົ້າແຕ່ຄວາມຈິງ+
ສັດຊື່ ບໍ່ສໍ້ໂກງ
ບໍ່ຮັບສິນບົນ+
ບໍ່ຟັງແຜນການຂ້າຄົນ
ແລະບໍ່ເບິ່ງສິ່ງຊົ່ວ
16 ຜູ້ນັ້ນກໍຈະໄດ້ຢູ່ບ່ອນທີ່ສູງໆ.
ລາວຈະລີ້ຢູ່ບ່ອນທີ່ປອດໄພ*ແຖວຫີນຜາ
ແລະລາວຈະມີເຂົ້າມີນ້ຳກິນຕະຫຼອດ.”+
17 ປະຊາຊົນຂອງເຮົາ ພວກເຈົ້າຈະໄດ້ເຫັນກະສັດທີ່ສະຫງ່າງາມ
ແລະຈະໄດ້ເຫັນແຜ່ນດິນໜຶ່ງທີ່ຢູ່ໄກໆ.
18 ພວກເຈົ້າຈະຄິດເຖິງສິ່ງທີ່ພວກເຈົ້າເຄີຍຢ້ານແລະເວົ້າວ່າ:
“ເລຂາຢູ່ໃສ?
ຄົນຊັ່ງນ້ຳໜັກສ່ວຍຕ່າງໆໄປໃສແລ້ວ?+
ແລະຜູ້ທີ່ນັບປ້ອມເດ້ໄປຢູ່ໃສ?”
19 ຄົນຍິ່ງທີ່ເວົ້າຄຳສັບຍາກໆ
ແລະເວົ້າພາສາແປກໆທີ່ຄົນອື່ນບໍ່ເຂົ້າໃຈ+
ພວກເຈົ້າຈະບໍ່ເຫັນລາວອີກຕໍ່ໄປ.
20 ໃຫ້ເບິ່ງຊີໂອນເມືອງທີ່ເປັນບ່ອນສະຫຼອງເທດສະການຂອງພວກເຮົາ.+
ພວກເຈົ້າຈະເຫັນວ່າເຢຣູຊາເລັມເປັນບ່ອນຢູ່ທີ່ງຽບສະຫງົບ.
ເຕັ້ນໃນເມືອງນີ້ຈະບໍ່ຖືກຍ້າຍໄປໃສ.+
ຫຼິ້ມ*ທີ່ໃຊ້ຍຶດເຕັ້ນຈະບໍ່ຖືກດຶງອອກ
ແລະເຊືອກທີ່ໃຊ້ຄຶງເຕັ້ນກໍຈະບໍ່ຂາດ.
21 ຢູ່ບ່ອນນັ້ນ ພະເຢໂຫວາພະເຈົ້າອົງຍິ່ງໃຫຍ່
ຈະເປັນຄືກັບບ່ອນທີ່ມີແມ່ນ້ຳແລະຄອງນ້ຳກວ້າງໆ
ເຮືອຮົບແລະເຮືອໃຫຍ່ຕ່າງໆຈະຜ່ານໄປບໍ່ໄດ້.
22 ພະເຢໂຫວາເປັນຜູ້ຕັດສິນຂອງພວກເຮົາ+
ພະເຢໂຫວາເປັນຜູ້ໃຫ້ກົດໝາຍພວກເຮົາ+
ແລະພະເຢໂຫວາເປັນກະສັດຂອງພວກເຮົາ.+
ເພິ່ນເປັນຜູ້ທີ່ຈະຊ່ວຍພວກເຮົາໃຫ້ລອດ.+
23 ເຊືອກຢູ່ເຮືອຂອງສັດຕູຈະຍານ.
ມັນຈະມັດເສົາກາງໃບເຮືອໃຫ້ຕັ້ງຊື່ບໍ່ໄດ້ ແລະຄຶງໃບເຮືອໃຫ້ກາງອອກກໍບໍ່ໄດ້.
ໃນຕອນນັ້ນ ເຄື່ອງຂອງຫຼາຍໆທີ່ປຸ້ນມາຈະຖືກແບ່ງ
ແມ່ນແຕ່ຄົນເປັນລ່ອຍກໍໄປເອົາເຄື່ອງເຫຼົ່ານັ້ນມາໄດ້ບັກຫຼາຍໆ.+
24 ຢູ່ແຜ່ນດິນນັ້ນຈະບໍ່ມີໃຜເວົ້າວ່າ: “ຂ້ອຍບໍ່ສະບາຍ.”+
ຄົນທີ່ຢູ່ຫັ້ນຈະໄດ້ຮັບການຍົກໂທດສຳລັບຄວາມຜິດຂອງເຂົາເຈົ້າ.+