ປັນຍາຈານ
8 ໃຜຈະທຽບກັບຄົນສະຫຼາດໄດ້? ໃຜຮູ້ວິທີແກ້ບັນຫາ?* ຖ້າຄົນໜຶ່ງເປັນຄົນສະຫຼາດ ໜ້າຕາຂອງລາວກໍຈະສົດໃສແລະບໍ່ເຄັ່ງຕຶງອີກຕໍ່ໄປ.
2 ໃຫ້ເຊື່ອຟັງຄຳສັ່ງຂອງກະສັດ+ ຍ້ອນເຈົ້າໄດ້ສາບານກັບພະເຈົ້າໄວ້ແລ້ວ.+ 3 ຢ່າຟ້າວອອກໄປຈາກຕໍ່ໜ້າກະສັດ.+ ຢ່າເຮັດສິ່ງຊົ່ວ+ ຍ້ອນກະສັດຈະເຮັດຫຍັງກໍໄດ້ຕາມທີ່ລາວຢາກເຮັດ 4 ແລະຍ້ອນກະສັດເວົ້າແນວໃດ ທຸກຄົນກໍຕ້ອງເຮັດຕາມນັ້ນ.+ ໃຜຈະເວົ້າໃຫ້ກະສັດໄດ້ວ່າ: “ທ່ານຄືເຮັດຈັ່ງຊີ້?”
5 ຄົນທີ່ເຮັດຕາມຄຳສັ່ງຈະບໍ່ເຈິອັນຕະລາຍ+ແລະຫົວໃຈຂອງຄົນສະຫຼາດຈະຮູ້ວ່າຄວນຈະລົງມືເຮັດເວລາໃດແລະແນວໃດ.+ 6 ມີເວລາແລະວິທີທີ່ເໝາະສົມທີ່ຈະຈັດການກັບເລື່ອງຕ່າງໆ+ ຍ້ອນບັນຫາຂອງມະນຸດມີຫຼາຍແທ້ໆ. 7 ບໍ່ມີໃຜຮູ້ວ່າຈະເກີດຫຍັງຂຶ້ນໃນອະນາຄົດ ຈຶ່ງບໍ່ມີໃຜຮູ້ວ່າມັນຈະເກີດຂຶ້ນແນວໃດ.
8 ຄືກັບທີ່ມະນຸດບໍ່ມີອຳນາດຄວບຄຸມລົມ*ແລະມັດລົມໄວ້ບໍ່ໄດ້ ກໍບໍ່ມີໃຜຄວບຄຸມວັນຕາຍໄດ້.+ ຄືກັບທີ່ບໍ່ມີທະຫານຄົນໃດຖືກປ່ອຍໃຫ້ໄປຈາກກອງທັບຕອນທີ່ກຳລັງມີສົງຄາມ ຄວາມຊົ່ວກໍຈະບໍ່ປ່ອຍໃຫ້ຄົນຊົ່ວລອດຈາກຄວາມຊົ່ວໄດ້.*
9 ຂ້ອຍໄດ້ເຫັນສິ່ງທັງໝົດນີ້ແລະຂ້ອຍໄດ້ຄິດຄັກໆກ່ຽວກັບທຸກສິ່ງທີ່ເຮັດຢູ່ໃຕ້ດວງຕາເວັນ. ໃນຊ່ວງເວລານັ້ນ ມະນຸດປົກຄອງມະນຸດແລະຄົນທີ່ຢູ່ໃຕ້ການປົກຄອງກໍຕ້ອງທົນທຸກລຳບາກ.*+ 10 ຂ້ອຍໄດ້ເຫັນຄົນຊົ່ວຖືກຝັງ. ເຂົາເຈົ້າເປັນຄົນທີ່ເຂົ້າອອກບ່ອນບໍລິສຸດ* ແຕ່ບໍ່ດົນຄົນໃນເມືອງທີ່ເຄີຍເຫັນເຂົາເຈົ້າເຮັດຊົ່ວກໍລືມເຂົາເຈົ້າ.+ ສິ່ງນີ້ກໍບໍ່ມີປະໂຫຍດຄືກັນ.
11 ຍ້ອນຄົນຊົ່ວບໍ່ໄດ້ຖືກລົງໂທດໄວໆ+ ເຂົາເຈົ້າຈຶ່ງແຮ່ງຕັ້ງໃຈເຮັດຊົ່ວ.+ 12 ເຖິງວ່າຄົນຊົ່ວຈະເຮັດຜິດຮ້ອຍເທື່ອແລະມີອາຍຸຍືນ ແຕ່ຂ້ອຍກໍຮູ້ວ່າໃນທີ່ສຸດແລ້ວ ຄົນທີ່ຢ້ານຢຳພະເຈົ້າທ່ຽງແທ້ຈະໄດ້ຮັບສິ່ງທີ່ດີຍ້ອນເຂົາເຈົ້າຢ້ານຢຳເພິ່ນ.+ 13 ແຕ່ຄົນຊົ່ວຈະບໍ່ໄດ້ຮັບສິ່ງທີ່ດີ+ແລະຊີວິດຂອງເຂົາເຈົ້າທີ່ເປັນຄືກັບເງົາກໍຈະບໍ່ຍືນຍາວ+ ຍ້ອນເຂົາເຈົ້າບໍ່ໄດ້ຢ້ານຢຳເພິ່ນ.
14 ບາງຢ່າງທີ່ເກີດຂຶ້ນໃນໂລກນີ້ເປັນສິ່ງທີ່ບໍ່ມີປະໂຫຍດ*ເຊັ່ນ: ຄົນທີ່ເຮັດສິ່ງທີ່ຖືກຕ້ອງບາງຄົນຖືກເຮັດຄືກັບວ່າລາວເປັນຄົນຊົ່ວ+ ແລະຄົນທີ່ເຮັດຊົ່ວບາງຄົນພັດຖືກເຮັດຄືກັບວ່າລາວເປັນຄົນທີ່ເຮັດສິ່ງທີ່ຖືກຕ້ອງ.+ ຂ້ອຍຄິດວ່າສິ່ງນີ້ກໍບໍ່ມີປະໂຫຍດຄືກັນ.
15 ຂ້ອຍຈຶ່ງແນະນຳຄົນອື່ນໃຫ້ໃຊ້ຊີວິດຢ່າງມີຄວາມສຸກ+ ຍ້ອນສຳລັບມະນຸດແລ້ວ ໃຕ້ດວງຕາເວັນນີ້ບໍ່ມີຫຍັງດີກວ່າການໄດ້ກິນ ໄດ້ດື່ມ ແລະມີຄວາມສຸກ. ລາວຄວນມີຄວາມສຸກເຖິງວ່າຈະຕ້ອງເຮັດວຽກໜັກໃນຊ່ວງຊີວິດ+ທີ່ພະເຈົ້າທ່ຽງແທ້ເອົາໃຫ້ລາວໃຕ້ດວງຕາເວັນນີ້.
16 ຂ້ອຍຕັ້ງໃຈເພື່ອຈະໄດ້ສະຕິປັນຍາແລະເພື່ອຈະສັງເກດເບິ່ງທຸກສິ່ງທີ່ເກີດຂຶ້ນໃນໂລກນີ້+ຈົນເຖິງຂັ້ນວ່າບໍ່ຫຼັບບໍ່ນອນທັງເວັນທັງຄືນ.* 17 ແລ້ວຂ້ອຍກໍຄິດກ່ຽວກັບທຸກສິ່ງທີ່ພະເຈົ້າທ່ຽງແທ້ເຮັດ ແລະຂ້ອຍກໍໄດ້ຮູ້ວ່າມະນຸດບໍ່ສາມາດເຂົ້າໃຈສິ່ງທີ່ເກີດຂຶ້ນໃຕ້ດວງຕາເວັນ.+ ບໍ່ວ່າຈະພະຍາຍາມຫຼາຍສ່ຳໃດກໍບໍ່ເຂົ້າໃຈ. ເຖິງວ່າບາງຄົນຈະອ້າງວ່າໂຕເອງສະຫຼາດພໍ ແຕ່ເຂົາເຈົ້າກໍບໍ່ໄດ້ເຂົ້າໃຈແທ້ໆ.+