ເອເຊກຽນ
34 ພະເຢໂຫວາເວົ້າກັບຂ້ອຍອີກວ່າ: 2 “ລູກມະນຸດ ໃຫ້ເຈົ້າພະຍາກອນກ່ຽວກັບພວກຄົນລ້ຽງແກະຂອງອິດສະຣາເອນ. ເຈົ້າຕ້ອງພະຍາກອນແລະບອກເຂົາເຈົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ພວກຄົນລ້ຽງແກະຂອງອິດສະຣາເອນທີ່ລ້ຽງແຕ່ໂຕເອງ ພວກເຈົ້າຈະຕ້ອງຈິບຫາຍ!+ ຄົນລ້ຽງແກະຕ້ອງເບິ່ງແຍງຝູງແກະບໍ່ແມ່ນບໍ?+ 3 ພວກເຈົ້າກິນຊີ້ນສັດສ່ວນທີ່ດີທີ່ສຸດ* ນຸ່ງເຄື່ອງທີ່ເຮັດຈາກຂົນແກະ ແລະຂ້າສັດໂຕທີ່ຕຸ້ຍໆ+ ແຕ່ພວກເຈົ້າພັດບໍ່ໄດ້ລ້ຽງຝູງແກະ.+ 4 ໂຕທີ່ອ່ອນແອພວກເຈົ້າບໍ່ໄດ້ຊ່ວຍໃຫ້ແຂງແຮງ ໂຕທີ່ບໍ່ສະບາຍພວກເຈົ້າບໍ່ໄດ້ປົວ ໂຕທີ່ບາດເຈັບພວກເຈົ້າບໍ່ໄດ້ເອົາຜ້າພັນໃຫ້ ໂຕທີ່ຫຼົງທາງພວກເຈົ້າບໍ່ໄດ້ພາກັບມາ+ ແລະໂຕທີ່ເສຍພວກເຈົ້າກໍບໍ່ໄດ້ໄປຊອກຫາ ແຕ່ພວກເຈົ້າກົດຂີ່ແລະຂົ່ມເຫງພວກມັນ.+ 5 ພວກມັນຈຶ່ງກະຈັດກະຈາຍກັນໄປຍ້ອນບໍ່ມີຜູ້ລ້ຽງ.+ ພວກມັນກະຈັດກະຈາຍກັນໄປແລະຖືກສັດປ່າກິນ. 6 ແກະຂອງເຮົາຫຼົງຢູ່ຕາມພູທຸກໜ່ວຍ. ແກະຂອງເຮົາກະຈັດກະຈາຍກັນໄປຢູ່ທົ່ວໂລກ ແລະບໍ່ມີໃຜຊອກຫາພວກມັນ.
7 ພວກເຈົ້າທີ່ເປັນຄົນລ້ຽງແກະເອີ້ຍ ໃຫ້ຟັງສິ່ງທີ່ພະເຢໂຫວາເວົ້າ. 8 ‘“ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ເຮົາສາບານວ່າຕາບໃດທີ່ເຮົາຍັງມີຊີວິດຢູ່ ເຮົາຈະຈັດການກັບເລື່ອງນີ້. ແກະຂອງເຮົາຖືກສັດປ່າກິນຍ້ອນບໍ່ມີຜູ້ລ້ຽງ. ຜູ້ລ້ຽງແກະຂອງເຮົາບໍ່ໄດ້ໄປຊອກຫາແກະຂອງເຮົາ. ເຂົາເຈົ້າລ້ຽງແຕ່ໂຕເອງ ແຕ່ບໍ່ໄດ້ລ້ຽງແກະຂອງເຮົາ.”’ 9 ພວກເຈົ້າທີ່ເປັນຄົນລ້ຽງແກະເອີ້ຍ ໃຫ້ຟັງສິ່ງທີ່ພະເຢໂຫວາເວົ້າ. 10 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຈະລົງໂທດພວກຄົນລ້ຽງແກະ. ເຮົາຈະໃຫ້ເຂົາເຈົ້າຮັບຜິດຊອບຕໍ່ແກະຂອງເຮົາ.* ເຮົາຈະບໍ່ໃຫ້ເຂົາເຈົ້າລ້ຽງແກະຂອງເຮົາອີກ+ ແລະເຂົາເຈົ້າຈະບໍ່ໄດ້ລ້ຽງໂຕເອງອີກຕໍ່ໄປ. ເຮົາຈະຊ່ວຍແກະຂອງເຮົາ ແລະເຂົາເຈົ້າຈະບໍ່ໄດ້ກິນແກະຂອງເຮົາອີກຕໍ່ໄປ.’”
11 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາຈະໄປຊອກຫາແກະຂອງເຮົາເອງ ແລະເຮົາຈະເບິ່ງແຍງພວກມັນ.+ 12 ເຮົາຈະເບິ່ງແຍງແກະຂອງເຮົາຄືກັບຄົນລ້ຽງແກະທີ່ຊອກແລະເບິ່ງແຍງແກະຂອງລາວ+ທີ່ກະຈັດກະຈາຍກັນໄປໃນມື້ທີ່ມືດຄຶ້ມແລະມີຂີ້ເຝື້ອຕຶບໜາ.+ 13 ເຮົາຈະພາພວກມັນອອກມາຈາກຊາດຕ່າງໆແລະລວບລວມພວກມັນຈາກແຜ່ນດິນຕ່າງໆ. ເຮົາຈະພາພວກມັນກັບມາແຜ່ນດິນຂອງໂຕເອງແລະລ້ຽງພວກມັນຢູ່ຕາມພູຂອງອິດສະຣາເອນ+ ຕາມແຄມແມ່ນ້ຳ ແລະຕາມບ່ອນທີ່ຄົນອາໄສຢູ່. 14 ເຮົາຈະລ້ຽງພວກມັນຢູ່ທົ່ງຫຍ້າທີ່ງາມໆ ແລະພວກມັນຈະກິນຫຍ້າຢູ່ຕາມພູຂອງອິດສະຣາເອນ.+ ພວກມັນຈະນອນຢູ່ຫັ້ນແລະກິນຫຍ້າທີ່ຂຽວໆ+ຢູ່ເທິງພູຂອງອິດສະຣາເອນ.”
15 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາຈະເບິ່ງແຍງແກະຂອງເຮົາ+ ແລະເຮົາຈະໃຫ້ພວກມັນມີບ່ອນນອນ.+ 16 ໂຕທີ່ເສຍເຮົາຈະຊອກຫາ+ ໂຕທີ່ຫຼົງເຮົາຈະພາກັບຄືນມາ ໂຕທີ່ບາດເຈັບເຮົາຈະພັນບາດໃຫ້ ແລະໂຕທີ່ອ່ອນແອເຮົາຈະຊ່ວຍໃຫ້ແຂງແຮງ ແຕ່ໂຕທີ່ຕຸ້ຍແລະແຂງແຮງເຮົາຈະຈັດການພວກມັນ. ເຮົາຈະຕັດສິນແລະລົງໂທດພວກມັນ.”
17 ພວກເຈົ້າທີ່ເປັນແກະຂອງເຮົາ ເຮົາເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາຈະຕັດສິນແກະຂອງເຮົາ ແລະເຮົາຈະຕັດສິນແກະໂຕຜູ້ກັບແບ້ໂຕຜູ້.+ 18 ພວກເຈົ້າໄດ້ກິນຫຍ້າໃນທົ່ງຫຍ້າທີ່ດີທີ່ສຸດແລ້ວ ແຕ່ກໍຍັງບໍ່ພໍບໍ? ພວກເຈົ້າຕ້ອງຢຽບຫຍ້າທີ່ເຫຼືອຢູ່ໃນທົ່ງໃຫ້ມຸ່ນນຳບໍ? ຫຼັງຈາກໄດ້ກິນນ້ຳທີ່ສະອາດແລ້ວ ພວກເຈົ້າຕ້ອງຢຽບນ້ຳໃຫ້ເປື້ອນອີກບໍ? 19 ແກະຂອງເຮົາຄວນໄດ້ກິນຫຍ້າທີ່ຖືກຢຽບຈົນມຸ່ນ ແລະກິນນ້ຳທີ່ຖືກຢຽບຈົນເປື້ອນບໍ?”
20 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈຶ່ງເວົ້າກັບພວກແກະວ່າ “ເຮົາຈະຕັດສິນແກະຕຸ້ຍກັບແກະຈ່ອຍ. 21 ພວກເຈົ້າເອົາໂຕດັນແລະເອົາເຂົາຍູ້ແກະໂຕທີ່ບໍ່ສະບາຍໃຫ້ພວກມັນກະຈັດກະຈາຍກັນໄປ. 22 ເຮົາຈະຊ່ວຍແກະຂອງເຮົາ ແລະພວກມັນຈະບໍ່ເປັນເຫຍື່ອຂອງສັດອີກຕໍ່ໄປ.+ ເຮົາຈະຕັດສິນພວກມັນ. 23 ເຮົາຈະກຽມຜູ້ລ້ຽງແກະຜູ້ໜຶ່ງໃຫ້ພວກມັນ.+ ຜູ້ນັ້ນແມ່ນດາວິດ*ຜູ້ຮັບໃຊ້ຂອງເຮົາ.+ ລາວຈະລ້ຽງແລະເບິ່ງແຍງພວກມັນ.+ 24 ເຮົາເຢໂຫວາຈະເປັນພະເຈົ້າຂອງພວກມັນ+ ແລະດາວິດຜູ້ຮັບໃຊ້ຂອງເຮົາຈະເປັນຫົວໜ້າພວກມັນ.+ ເຮົາເຢໂຫວາເວົ້າໄວ້ແບບນີ້.
25 ເຮົາຈະເຮັດສັນຍາກັບພວກມັນເພື່ອພວກມັນຈະມີຄວາມສະຫງົບສຸກ.+ ເຮົາຈະບໍ່ໃຫ້ມີສັດປ່າທີ່ດຸຮ້າຍໃນແຜ່ນດິນ+ ເພື່ອພວກມັນຈະຢູ່ຢ່າງປອດໄພໃນບ່ອນກັນດານແລະນອນຢູ່ໃນປ່າໄດ້.+ 26 ເຮົາຈະອວຍພອນໃຫ້ພວກມັນແລະອວຍພອນໃຫ້ເຂດທີ່ຢູ່ອ້ອມແອ້ມໂນນພູຂອງເຮົາ+ ແລະເຮົາຈະໃຫ້ຝົນຕົກຖືກຍາມ. ພອນນັ້ນຈະຫຼາຍຄືກັບຝົນຕົກລົງມາ.+ 27 ຕົ້ນໄມ້ຢູ່ທົ່ງຈະເປັນໝາກ ແລະຈະມີພືດຜັກປົ່ງຂຶ້ນຫຼາຍຢູ່ຕາມດິນ+ ແລະພວກມັນຈະໄດ້ຢູ່ໃນແຜ່ນດິນນັ້ນຢ່າງປອດໄພ. ພວກມັນຈະຮູ້ວ່າເຮົາແມ່ນເຢໂຫວາ ເມື່ອເຮົາຫັກແອກຂອງພວກມັນ+ແລະຊ່ວຍພວກມັນບໍ່ໃຫ້ເປັນທາດ. 28 ພວກມັນຈະບໍ່ເປັນເຫຍື່ອຂອງຊາດຕ່າງໆອີກຕໍ່ໄປແລະສັດປ່າຈະບໍ່ກິນພວກມັນ. ພວກມັນຈະຢູ່ຢ່າງປອດໄພແລະຈະບໍ່ມີໃຜເຮັດໃຫ້ພວກມັນຢ້ານ.+
29 ເຮົາຈະເອົາແຜ່ນດິນໜຶ່ງໃຫ້ເຂົາເຈົ້າ. ແຜ່ນດິນນັ້ນຈະມີຊື່ສຽງຍ້ອນສິ່ງທີ່ເຂົາເຈົ້າປູກ. ໃນແຜ່ນດິນນັ້ນ ເຂົາເຈົ້າຈະບໍ່ຕາຍຍ້ອນຄວາມອຶດຢາກ+ ແລະຊາດຕ່າງໆຈະບໍ່ເຮັດໃຫ້ເຂົາເຈົ້າອັບອາຍອີກຕໍ່ໄປ.+ 30 ‘ແລ້ວເຂົາເຈົ້າຈະຮູ້ວ່າ ເຮົາເຢໂຫວາພະເຈົ້າຂອງເຂົາເຈົ້າຢູ່ນຳເຂົາເຈົ້າ ແລະເຂົາເຈົ້າແມ່ນພວກອິດສະຣາເອນປະຊາຊົນຂອງເຮົາ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”’
31 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ພວກເຈົ້າທີ່ເປັນແກະຂອງເຮົາທີ່ເຮົາເບິ່ງແຍງ+ ພວກເຈົ້າເປັນພຽງມະນຸດ ແຕ່ເຮົາເປັນພະເຈົ້າຂອງພວກເຈົ້າ.’”