ເພງສັນລະເສີນ
ຄຳອະທິດຖານຂອງດາວິດ.
17 ພະເຢໂຫວາເອີ້ຍ ຂໍພະອົງຟັງຄຳຮ້ອງຂໍຄວາມຍຸຕິທຳຂອງລູກ.
ຂໍພະອົງສົນໃຈຄຳຮ້ອງຂໍຄວາມຊ່ວຍເຫຼືອຂອງລູກ.
ຂໍພະອົງຟັງຄຳອະທິດຖານທີ່ຈິງໃຈຂອງລູກ.+
2 ຂໍພະອົງຕັດສິນຢ່າງຍຸຕິທຳເພື່ອລູກ.+
ຂໍພະອົງເບິ່ງວ່າລູກເປັນຄົນສັດຊື່.
3 ພະອົງໄດ້ກວດເບິ່ງຫົວໃຈຂອງລູກ. ພະອົງໄດ້ກວດສອບເບິ່ງລູກໃນຕອນກາງຄືນ.+
ພະອົງໄດ້ເຮັດໃຫ້ຫົວໃຈຂອງລູກສະອາດ.*+
ເມື່ອພະອົງກວດແລ້ວ ພະອົງຈະເຫັນວ່າລູກບໍ່ໄດ້ວາງແຜນຊົ່ວຫຍັງ
ແລະລູກຈະບໍ່ເຮັດຜິດທາງຄຳເວົ້າເລີຍ.
4 ລູກບໍ່ໄດ້ເຮັດຕາມແນວທາງຂອງໂຈນຄືກັບທີ່ຫຼາຍຄົນເຮັດ
ຍ້ອນລູກຟັງຄຳເວົ້າຂອງພະອົງ.+
5 ຂໍຊ່ວຍໃຫ້ລູກຍ່າງຢູ່ໃນທາງຂອງພະອົງ
ເພື່ອລູກຈະບໍ່ສະດຸດລົ້ມ.+
6 ພະເຈົ້າເອີ້ຍ ລູກໄດ້ຮ້ອງຫາພະອົງຍ້ອນລູກຮູ້ວ່າພະອົງຈະຕອບລູກ.+
ຂໍພະອົງກົ້ມລົງມາແລະຟັງລູກ.* ຂໍພະອົງຟັງສິ່ງທີ່ລູກເວົ້າ.+
7 ຂໍພະອົງສະແດງຄວາມຮັກທີ່ໝັ້ນຄົງຕໍ່ລູກໃນວິທີທີ່ພິເສດ.+
ພະອົງເປັນຜູ້ຊ່ວຍຄົນທີ່ເຂົ້າມາລີ້ຢູ່ໃນມືເບື້ອງຂວາຂອງພະອົງ
ຈາກພວກທີ່ກະບົດຕໍ່ພະອົງ.
8 ຂໍພະອົງປົກປ້ອງລູກຄືກັບປົກປ້ອງໜ່ວຍຕາຂອງພະອົງ.+
9 ຂໍພະອົງປົກປ້ອງລູກຈາກຄົນຊົ່ວທີ່ມາໂຈມຕີລູກ
ແລະຈາກສັດຕູອ້ອມຂ້າງທີ່ຢາກຂ້າລູກ.+
10 ເຂົາເຈົ້າເປັນຄົນໃຈດຳ*
ແລະມັກເວົ້າຈອງຫອງ.
11 ຕອນນີ້ ເຂົາເຈົ້າມາລ້ອມລູກກັບຄົນທີ່ຢູ່ນຳລູກ.+
ເຂົາເຈົ້າຊອກຫາໂອກາດທຳຮ້າຍພວກເຮົາ.*
12 ເຂົາເຈົ້າແຕ່ລະຄົນເປັນຄືກັບໂຕສິງທີ່ຢາກຈະຈີກເຫຍື່ອເປັນຕ່ອນໆ.
ຄືກັບໂຕສິງທີ່ຈອບຈະຄຸບເຫຍື່ອ.
13 ພະເຢໂຫວາເອີ້ຍ ຂໍພະອົງລຸກຂຶ້ນໄປເຈິເຂົາເຈົ້າ+ແລະຈັດການເຂົາເຈົ້າ.
ຂໍພະອົງໃຊ້ດາບຂອງພະອົງຊ່ວຍລູກໃຫ້ລອດຈາກສັດຕູ.
14 ພະເຢໂຫວາເອີ້ຍ ຂໍພະອົງຊ່ວຍລູກດ້ວຍມືຂອງພະອົງ.
ຂໍພະອົງຊ່ວຍລູກຈາກຄົນຊົ່ວໃນໂລກນີ້*ທີ່ຄິດເຖິງແຕ່ການໃຊ້ຊີວິດຂອງໂຕເອງເທົ່ານັ້ນ.+
ຄົນພວກນີ້ໄດ້ຮັບສິ່ງດີໆຫຼາຍຢ່າງຈາກພະອົງ+
ແລະໄດ້ເອົາມໍລະດົກໃຫ້ລູກຂອງເຂົາເຈົ້າ.