ເອເຊກຽນ
36 “ລູກມະນຸດ ໃຫ້ເຈົ້າພະຍາກອນກ່ຽວກັບພູຢູ່ອິດສະຣາເອນວ່າ ‘ພູໃນອິດສະຣາເອນເອີ້ຍ ໃຫ້ຟັງສິ່ງທີ່ພະເຢໂຫວາເວົ້າ. 2 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າຈັ່ງຊີ້ “ສັດຕູໄດ້ເວົ້າໃຫ້ພວກເຈົ້າວ່າ ‘ແມ່ນແຕ່ໂນນພູທີ່ເກົ່າແກ່ກໍເປັນຂອງພວກເຮົາແລ້ວ.’”’+
3 ໃຫ້ເຈົ້າພະຍາກອນວ່າ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້ “ເຂົາເຈົ້າເຮັດໃຫ້ພວກເຈົ້າຮ້າງເປົ່າແລະໂຈມຕີພວກເຈົ້າຈາກທຸກທິດທຸກທາງ ເພື່ອພວກເຈົ້າຈະເປັນຊັບສົມບັດຂອງຄົນທີ່ລອດຊີວິດຢູ່ໃນຊາດຕ່າງໆ ແລະເພື່ອພວກເຈົ້າຈະຖືກຄົນອື່ນເວົ້າໃສ່ຮ້າຍຕະຫຼອດ.+ 4 ພູໃນອິດສະຣາເອນເອີ້ຍ ໃຫ້ຟັງສິ່ງທີ່ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າ. ນີ້ແມ່ນສິ່ງທີ່ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າກັບພູແລະໂນນພູ ເວົ້າກັບແມ່ນ້ຳແລະຮ່ອມພູ ເວົ້າກັບຊາກຫັກພັງທີ່ຖືກປະຖິ້ມໃຫ້ຮ້າງເປົ່າ+ ແລະເວົ້າກັບເມືອງຕ່າງໆເຊິ່ງຖືກຄົນທີ່ລອດຊີວິດໃນຊາດອື່ນໆທີ່ຢູ່ອ້ອມຂ້າງເວົ້າເຍາະເຍີ້ຍ ຖືກປຸ້ນເອົາເຄື່ອງໄປ ແລະຖືກຖິ້ມໃຫ້ຮ້າງເປົ່າ.+ 5 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຈະຕັດສິນຄົນທີ່ລອດຊີວິດໃນຊາດຕ່າງໆແລະພວກເອໂດມທັງໝົດ ຍ້ອນເຮົາໃຈຮ້າຍຫຼາຍ.+ ເຂົາເຈົ້າດີໃຈຫຼາຍແລະເວົ້າເຍາະເຍີ້ຍ+ຕອນທີ່ມາຍຶດເອົາທົ່ງຫຍ້າກັບປຸ້ນແຜ່ນດິນຂອງເຮົາ ແລະເວົ້າວ່າແຜ່ນດິນນັ້ນເປັນຂອງເຂົາເຈົ້າ.’”’+
6 ໃຫ້ເຈົ້າພະຍາກອນກ່ຽວກັບແຜ່ນດິນອິດສະຣາເອນ ແລະບອກພູກັບໂນນພູ ແລະແມ່ນ້ຳກັບຮ່ອມພູແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ຊາດອື່ນໆເຮັດໃຫ້ພວກເຈົ້າອັບອາຍຂາຍໜ້າ. ຍ້ອນແນວນີ້ ເຮົາຈຶ່ງໃຈຮ້າຍຫຼາຍ ແລະເຮົາຈະບອກເຂົາເຈົ້າວ່າເຮົາຈະຈັດການກັບເຂົາເຈົ້າແນວໃດ.”’+
7 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຍົກມືສາບານວ່າ ຊາດຕ່າງໆທີ່ຢູ່ອ້ອມຂ້າງຈະຕ້ອງອັບອາຍຂາຍໜ້າເອງ.+ 8 ແຕ່ພູໃນອິດສະຣາເອນເອີ້ຍ ພວກເຈົ້າຈະມີຕົ້ນໄມ້ທີ່ແຕກງ່າຫຼາຍໆແລະເປັນໝາກດົກໃຫ້ພວກອິດສະຣາເອນປະຊາຊົນຂອງເຮົາ+ ຍ້ອນອີກບໍ່ດົນເຂົາເຈົ້າຈະກັບມາ. 9 ເຮົາຈະຢູ່ກັບພວກເຈົ້າແລະຈະເບິ່ງແຍງພວກເຈົ້າ. ປະຊາຊົນຂອງເຮົາຈະປູກຝັງແລະຫວ່ານເມັດພືດໃສ່ພວກເຈົ້າ. 10 ເຮົາຈະໃຫ້ຄົນຂອງພວກເຈົ້າເຊິ່ງແມ່ນຊາດອິດສະຣາເອນທັງໝົດມີຈຳນວນຫຼາຍຂຶ້ນ. ເມືອງຕ່າງໆຈະມີຄົນອາໄສຢູ່+ ແລະຊາກຫັກພັງຈະຖືກສ້າງຂຶ້ນໃໝ່.+ 11 ເຮົາຈະເຮັດໃຫ້ຄົນຂອງພວກເຈົ້າມີລູກມີຫຼານຫຼາຍໆ ແລະເຮົາຈະໃຫ້ຝູງສັດຂອງພວກເຈົ້າອອກແມ່ແພ່ລູກຫຼາຍໆ.+ ເຮົາຈະໃຫ້ພວກເຈົ້າມີຄົນມາຢູ່ຄືກັບແຕ່ກ່ອນ+ ແລະເຮົາຈະເຮັດໃຫ້ພວກເຈົ້າຈະເລີນຮຸ່ງເຮືອງຫຼາຍກວ່າແຕ່ກີ້+ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.+ 12 ເຮົາຈະເຮັດໃຫ້ພວກອິດສະຣາເອນປະຊາຊົນຂອງເຮົາຍ່າງຢູ່ເທິງພວກເຈົ້າ ແລະພວກເຈົ້າຈະເປັນຂອງເຂົາເຈົ້າ.+ ພວກເຈົ້າຈະເປັນມໍລະດົກຂອງເຂົາເຈົ້າ ແລະລູກຂອງເຂົາເຈົ້າຈະບໍ່ຕາຍຍ້ອນພວກເຈົ້າອີກ.’”+
13 “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຂົາເຈົ້າເວົ້າໃຫ້ພວກເຈົ້າແບບນີ້ “ພວກເຈົ້າເປັນແຜ່ນດິນທີ່ກິນຄົນ ແລະຂ້າລູກຂອງຊາດຕ່າງໆທີ່ຢູ່ນຳພວກເຈົ້າ.”’ 14 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຍ້ອນແນວນີ້ ພວກເຈົ້າຈະບໍ່ໄດ້ກິນຄົນແລະບໍ່ໄດ້ຂ້າລູກຂອງຊາດຕ່າງໆທີ່ຢູ່ນຳພວກເຈົ້າອີກຕໍ່ໄປ’. 15 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຈະບໍ່ໃຫ້ຊາດຕ່າງໆດູຖູກພວກເຈົ້າ ແລະຈະບໍ່ໃຫ້ຄົນເຍາະເຍີ້ຍພວກເຈົ້າອີກຕໍ່ໄປ.+ ພວກເຈົ້າຈະບໍ່ເຮັດໃຫ້ຊາດຕ່າງໆທີ່ຢູ່ນຳພວກເຈົ້າສະດຸດແລະລົ້ມລົງອີກ.’”
16 ພະເຢໂຫວາເວົ້າກັບຂ້ອຍອີກວ່າ: 17 “ລູກມະນຸດ ຕອນທີ່ພວກອິດສະຣາເອນຢູ່ແຜ່ນດິນຂອງເຂົາເຈົ້າ ເຂົາເຈົ້າເຮັດໃຫ້ແຜ່ນດິນນັ້ນບໍ່ສະອາດຍ້ອນສິ່ງທີ່ເຂົາເຈົ້າເຮັດ.+ ສຳລັບເຮົາແລ້ວ ການກະທຳຂອງເຂົາເຈົ້າບໍ່ສະອາດຄືກັບຜູ້ຍິງທີ່ເປັນປະຈຳເດືອນ.+ 18 ເຮົາໃຈຮ້າຍໃຫ້ເຂົາເຈົ້າຫຼາຍ ຍ້ອນເຂົາເຈົ້າຂ້າຄົນໃນແຜ່ນດິນນັ້ນ+ ແລະເຮັດໃຫ້ແຜ່ນດິນບໍ່ສະອາດຍ້ອນຮູບບູຊາທີ່ເປັນຕາຂີ້ດຽດ*ຂອງເຂົາເຈົ້າ.+ 19 ເຮົາໄດ້ເຮັດໃຫ້ເຂົາເຈົ້າກະຈັດກະຈາຍກັນໄປຢູ່ນຳຫຼາຍໆຊາດ ແລະເຮົາໄລ່ເຂົາເຈົ້າໄປຢູ່ແຜ່ນດິນຕ່າງໆ.+ ເຮົາໄດ້ຕັດສິນເຂົາເຈົ້າຕາມການກະທຳຂອງເຂົາເຈົ້າ. 20 ແຕ່ເມື່ອເຂົາເຈົ້າໄປຢູ່ນຳຊາດເຫຼົ່ານັ້ນ ຄົນອື່ນໄດ້ເຍາະເຍີ້ຍຊື່ທີ່ບໍລິສຸດຂອງເຮົາ+ໂດຍເວົ້າໃຫ້ເຂົາເຈົ້າວ່າ ‘ພວກນີ້ເປັນຄົນຂອງພະເຢໂຫວາຕົ໋ວ ແຕ່ເປັນຫຍັງເຂົາເຈົ້າຈຶ່ງບໍ່ໄດ້ຢູ່ໃນແຜ່ນດິນທີ່ເພິ່ນເອົາໃຫ້ເຂົາເຈົ້າ?’ 21 ຍ້ອນພວກອິດສະຣາເອນເຮັດໃຫ້ຊື່ທີ່ບໍລິສຸດຂອງເຮົາບໍ່ສະອາດໃນຊາດຕ່າງໆທີ່ເຂົາເຈົ້າໄປຢູ່ນຳ ເຮົາຈຶ່ງຈະຈັດການເລື່ອງນີ້.”+
22 “ໃຫ້ເຈົ້າບອກພວກອິດສະຣາເອນແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ພວກອິດສະຣາເອນເອີ້ຍ ເຮົາຈະຈັດການເລື່ອງນີ້ ບໍ່ແມ່ນຍ້ອນເຫັນແກ່ພວກເຈົ້າ ແຕ່ຍ້ອນເຫັນແກ່ຊື່ທີ່ບໍລິສຸດຂອງເຮົາທີ່ພວກເຈົ້າເຮັດໃຫ້ບໍ່ສະອາດໃນຊາດຕ່າງໆທີ່ພວກເຈົ້າໄປຢູ່ນຳ.”’+ 23 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຈະເຮັດໃຫ້ຄົນໃນຊາດຕ່າງໆຮູ້ວ່າຊື່ທີ່ຍິ່ງໃຫຍ່ຂອງເຮົາບໍລິສຸດ+ ເຖິງວ່າພວກເຈົ້າເຮັດໃຫ້ເຂົາເຈົ້າບໍ່ນັບຖືຊື່ນັ້ນ. ແລ້ວທຸກຊາດຈະຮູ້ວ່າເຮົາແມ່ນເຢໂຫວາ+ ເມື່ອເຮົາເຮັດໃຫ້ເຂົາເຈົ້າເຫັນວ່າເຮົາເປັນພະເຈົ້າທີ່ບໍລິສຸດ. 24 ເຮົາຈະພາພວກເຈົ້າອອກມາຈາກຊາດຕ່າງໆ ແລະຈະລວບລວມພວກເຈົ້າກັບມາຈາກແຜ່ນດິນຕ່າງໆ. ແລ້ວເຮົາຈະພາພວກເຈົ້າກັບມາຢູ່ແຜ່ນດິນຂອງໂຕເອງ.+ 25 ເຮົາຈະຊິດນ້ຳທີ່ສະອາດໃສ່ພວກເຈົ້າ ແລະພວກເຈົ້າຈະສະອາດ.+ ເຮົາຈະເຮັດໃຫ້ພວກເຈົ້າສະອາດຈາກແນວເປື້ອນໆທຸກຢ່າງທີ່ພວກເຈົ້າເຮັດ+ ແລະຈາກຮູບບູຊາທີ່ເປັນຕາຂີ້ດຽດຂອງພວກເຈົ້າ.+ 26 ເຮົາຈະໃຫ້ພວກເຈົ້າມີຫົວໃຈໃໝ່+ແລະມີຄວາມຄິດໃໝ່.+ ເຮົາຈະເອົາຫົວໃຈທີ່ແຂງຄືຫີນ+ອອກຈາກໂຕພວກເຈົ້າ ແລະເຮົາຈະເອົາຫົວໃຈທີ່ອ່ອນໂຍນ*ມາໃສ່ແທນ. 27 ເຮົາຈະໃຊ້ພະລັງບໍລິສຸດຂອງເຮົາເພື່ອປ່ຽນຄວາມຄິດຂອງພວກເຈົ້າ. ເຮົາຈະເຮັດໃຫ້ພວກເຈົ້າເຮັດຕາມກົດໝາຍຂອງເຮົາ+ແລະເຊື່ອຟັງຄຳສັ່ງຂອງເຮົາ. 28 ແລ້ວພວກເຈົ້າຈະໄດ້ຢູ່ໃນແຜ່ນດິນທີ່ເຮົາເອົາໃຫ້ປູ່ຍ່າຕານາຍຂອງພວກເຈົ້າ. ພວກເຈົ້າຈະເປັນປະຊາຊົນຂອງເຮົາ ແລະເຮົາຈະເປັນພະເຈົ້າຂອງພວກເຈົ້າ.’+
29 ‘ເຮົາຈະຊ່ວຍພວກເຈົ້າໃຫ້ພົ້ນຈາກແນວທີ່ບໍ່ສະອາດທຸກຢ່າງ. ເຮົາຈະເຮັດໃຫ້ມີເຂົ້າອຸດົມສົມບູນແລະບໍ່ໃຫ້ພວກເຈົ້າເຈິຄວາມອຶດຢາກ.+ 30 ເຮົາຈະເຮັດໃຫ້ຕົ້ນໄມ້ເປັນໝາກດົກ ແລະເຮົາຈະເຮັດໃຫ້ມີຜົນລະປູກຢູ່ໄຮ່ຢູ່ສວນຫຼາຍໆ ເພື່ອພວກເຈົ້າຈະບໍ່ຕ້ອງອັບອາຍຕໍ່ໜ້າຊາດຕ່າງໆຍ້ອນຄວາມອຶດຢາກອີກຕໍ່ໄປ.+ 31 ພວກເຈົ້າຈະຈື່ແນວຊົ່ວໆທີ່ພວກເຈົ້າເຄີຍເຮັດ ແລະພວກເຈົ້າຈະຊັງໂຕເອງຍ້ອນຄວາມຜິດແລະສິ່ງທີ່ເປັນຕາຂີ້ດຽດທີ່ພວກເຈົ້າເຄີຍເຮັດນັ້ນ.+ 32 ແຕ່ພວກອິດສະຣາເອນເອີ້ຍ ໃຫ້ພວກເຈົ້າຮູ້ເດີ້ວ່າ ເຮົາເຮັດແນວນີ້ບໍ່ແມ່ນຍ້ອນເຫັນແກ່ພວກເຈົ້າ.+ ພວກເຈົ້າຕ້ອງອັບອາຍຂາຍໜ້າຍ້ອນການກະທຳຂອງພວກເຈົ້າເອງ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
33 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ໃນມື້ທີ່ເຮົາເຮັດໃຫ້ພວກເຈົ້າສະອາດຈາກຄວາມຜິດທຸກຢ່າງຂອງພວກເຈົ້າ ເຮົາຈະເຮັດໃຫ້ເມືອງຕ່າງໆມີຄົນອາໄສຢູ່+ ແລະຊາກຫັກພັງຕ່າງໆຈະຖືກສ້າງຂຶ້ນໃໝ່.+ 34 ແຜ່ນດິນທີ່ຄົນກາຍໄປກາຍມາແນມເຫັນວ່າຮ້າງເປົ່ານັ້ນ ເຮົາຈະເຮັດໃຫ້ກາຍເປັນບ່ອນທີ່ມີຜົນລະປູກ. 35 ຄົນຈະເວົ້າວ່າ “ແຜ່ນດິນທີ່ເຄີຍເປັນບ່ອນທີ່ຮ້າງເປົ່າ ຕອນນີ້ເປັນຄືກັບສວນເອເດັນ+ ແລະເມືອງທີ່ເຄີຍເປັນຊາກຫັກພັງແລະຮ້າງເປົ່າ ຕອນນີ້ເປັນບ່ອນທີ່ປອດໄພແລະມີຄົນອາໄສຢູ່.”+ 36 ແລ້ວຊາດຕ່າງໆທີ່ເຫຼືອຢູ່ອ້ອມຂ້າງພວກເຈົ້າຈະຮູ້ວ່າ ເຮົາເຢໂຫວາໄດ້ສ້າງສິ່ງທີ່ເປັນຊາກຫັກພັງຄືນໃໝ່ແລະເຮັດໃຫ້ແຜ່ນດິນທີ່ເຄີຍຮ້າງເປົ່າເປັນບ່ອນທີ່ປູກຝັງໄດ້. ເຮົາເຢໂຫວາໄດ້ເວົ້າໄວ້ແບບນີ້ ແລະເຮົາໄດ້ເຮັດຕາມທີ່ເວົ້າໄວ້ແລ້ວ.’+
37 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຈະຍອມໃຫ້ພວກອິດສະຣາເອນຂໍໃຫ້ຄົນຂອງເຂົາເຈົ້າມີຈຳນວນຫຼາຍຂຶ້ນຄືກັບຝູງແກະ ແລະເຮົາຈະເຮັດຕາມທີ່ເຂົາເຈົ້າຂໍ. 38 ເມືອງຕ່າງໆທີ່ເຄີຍເປັນຊາກຫັກພັງຈະມີຄົນບັກຫຼາຍໆ+ຄືກັບຕອນທີ່ຄົນບໍລິສຸດເຕັມເມືອງເຢຣູຊາເລັມ*ໃນຍາມເທດສະການຕ່າງໆ+ ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາ.’”