ຈົດໝາຍເຖິງຄລິດສະຕຽນຄົນເຮັບເຣີ
12 ໃນເມື່ອພວກເຮົາມີພະຍານບັກຫຼາຍໆຄືກັບຂີ້ເຝື້ອກ້ອນໃຫຍ່ຢູ່ອ້ອມຂ້າງພວກເຮົາແບບນີ້ ກໍໃຫ້ພວກເຮົາປົດຂອງໜັກທຸກຢ່າງຖິ້ມ ລວມທັງບາບທີ່ຮັດພວກເຮົາໄດ້ງ່າຍ.+ ໃຫ້ພວກເຮົາແລ່ນດ້ວຍຄວາມອົດທົນໃນການແລ່ນແຂ່ງທີ່ຢູ່ຕໍ່ໜ້າພວກເຮົາ+ 2 ແລະແນມເບິ່ງພະເຢຊູໄປພ້ອມ. ເພິ່ນເປັນຜູ້ນຳຄົນສຳຄັນທີ່ເຮັດໃຫ້ຄວາມເຊື່ອຂອງພວກເຮົາສົມບູນຄົບຖ້ວນ.+ ເພິ່ນຍອມທົນທຸກທໍລະມານແລະບໍ່ຄິດເຖິງຄວາມອັບອາຍທີ່ຕ້ອງຕາຍເທິງເສົາທໍລະມານ*ຍ້ອນເພິ່ນຄິດເຖິງຄວາມຍິນດີທີ່ລໍຖ້າຢູ່ຂ້າງໜ້າ. ຕອນນີ້ ເພິ່ນນັ່ງຢູ່ເບື້ອງຂວາບັນລັງຂອງພະເຈົ້າແລ້ວ.+ 3 ຂໍໃຫ້ພວກເຈົ້າສັງເກດເບິ່ງພະເຢຊູໃຫ້ດີ ເພື່ອພວກເຈົ້າຈະບໍ່ທໍ້ຖອຍແລະບໍ່ຍອມແພ້.*+ ເພິ່ນອົດທົນກັບຄຳເວົ້າທີ່ດູຖູກຂອງຄົນບາບ+ ເຊິ່ງຄຳເວົ້ານັ້ນກັບມາຫາເຂົາເຈົ້າເອງ.
4 ພວກເຈົ້າຕໍ່ສູ້ກັບບາບນັ້ນ ແຕ່ຍັງບໍ່ໄດ້ຕໍ່ສູ້ຈົນເຖິງຕາຍ. 5 ພວກເຈົ້າລືມຄຳເວົ້າທີ່ໃຫ້ກຳລັງໃຈໄປໝົດແລ້ວທີ່ເວົ້າກັບພວກເຈົ້າໃນຖານະລູກວ່າ: “ລູກເອີ້ຍ ຢ່າຖືວ່າເປັນເລື່ອງເລັກນ້ອຍເມື່ອພະເຢໂຫວາ*ສັ່ງສອນ ແລະຢ່າໝົດກຳລັງໃຈເມື່ອເພິ່ນຕັກເຕືອນ. 6 ພະເຢໂຫວາ*ຮັກຜູ້ໃດ ເພິ່ນກໍສັ່ງສອນຜູ້ນັ້ນ. ທີ່ຈິງ ທຸກຄົນທີ່ເພິ່ນຮັບເປັນລູກ ເພິ່ນກໍອົບຮົມສັ່ງສອນລາວດ້ວຍໄມ້ແສ້.”+
7 ໃຫ້ພວກເຈົ້າອົດທົນເມື່ອຖືກອົບຮົມສັ່ງສອນ.* ພະເຈົ້າປະຕິບັດກັບພວກເຈົ້າຄືລູກ.+ ມີລູກຜູ້ໃດບໍທີ່ພໍ່ບໍ່ສັ່ງສອນ?+ 8 ຖ້າພະເຈົ້າບໍ່ໄດ້ສັ່ງສອນພວກເຈົ້າຄືກັບຄົນອື່ນໆ ພວກເຈົ້າກໍບໍ່ແມ່ນລູກແທ້ໆຂອງເພິ່ນ ແຕ່ເປັນລູກນອກກົດໝາຍ. 9 ເມື່ອພໍ່ທີ່ເປັນມະນຸດສັ່ງສອນພວກເຮົາ ພວກເຮົາກໍຍັງນັບຖືເພິ່ນ. ແລ້ວພະເຈົ້າຜູ້ເປັນພໍ່ທີ່ໃຫ້ກຳເນີດພວກເຮົາດ້ວຍພະລັງຂອງເພິ່ນເດ ພວກເຮົາກໍແຮ່ງຈະເຊື່ອຟັງຫຼາຍກວ່ານັ້ນອີກບໍ່ແມ່ນບໍເພື່ອພວກເຮົາຈະມີຊີວິດຢູ່?+ 10 ພໍ່ທີ່ເປັນມະນຸດເຄີຍຕີແລະສອນພວກເຮົາໄລຍະໜຶ່ງຕາມທີ່ລາວເຫັນວ່າເໝາະສົມ ແຕ່ພະເຈົ້າສັ່ງສອນພວກເຮົາສຳລັບປະໂຫຍດຂອງພວກເຮົາເພື່ອໃຫ້ພວກເຮົາໄດ້ມີສ່ວນຮ່ວມໃນຄວາມບໍລິສຸດຂອງເພິ່ນ.+ 11 ກະແມ່ນຢູ່ ຕອນທີ່ຖືກສັ່ງສອນນັ້ນບໍ່ມີຜູ້ໃດມັກຍ້ອນມັນເຈັບ* ແຕ່ຫຼັງຈາກນັ້ນຈະເກີດຜົນດີຍ້ອນການສັ່ງສອນຈະຝຶກຝົນພວກເຮົາໃຫ້ເຮັດສິ່ງທີ່ຖືກຕ້ອງແລະມີສັນຕິສຸກ.
12 ດັ່ງນັ້ນ ໃຫ້ມືຂອງພວກເຈົ້າທີ່ລ່ອຍຢູ່ແລະຫົວເຂົ່າທີ່ອ່ອນເພຍມີແຮງຂຶ້ນ.+ 13 ໃຫ້ເຮັດທາງຍ່າງຂອງພວກເຈົ້າໃຫ້ຊື່ຢູ່ສະເໝີ+ເພື່ອຂາທີ່ເປັນລ່ອຍຈະບໍ່ຫຼຸດຈາກຂໍ້ ແຕ່ຈະດີເປັນປົກກະຕິ. 14 ໃຫ້ພະຍາຍາມສ້າງສັນຕິສຸກກັບທຸກຄົນ+ແລະຮັກສາຄວາມບໍລິສຸດໄວ້*+ ຍ້ອນຖ້າຜູ້ໃດບໍ່ບໍລິສຸດກໍຈະບໍ່ມີທາງໄດ້ເຫັນຜູ້ເປັນນາຍ. 15 ລະວັງໃຫ້ດີ ຢ່າໃຫ້ຜູ້ໃດພາດໄປຈາກຄວາມກະລຸນາທີ່ຍິ່ງໃຫຍ່ຂອງພະເຈົ້າ ແລະຢ່າໃຫ້ມີຮາກທີ່ເປັນພິດປົ່ງຂຶ້ນມາສ້າງບັນຫາແລະເຮັດໃຫ້ຫຼາຍຄົນບໍ່ສະອາດ.+ 16 ລະວັງຢ່າໃຫ້ຜູ້ໃດໃນພວກເຈົ້າເຮັດຜິດສິນລະທຳທາງເພດ* ຫຼືບໍ່ເຫັນຄຸນຄ່າສິ່ງສັກສິດຄືກັບເອຊາວທີ່ເອົາສິດຂອງລູກກົກໄປແລກກັບອາຫານຄາບດຽວ.+ 17 ພວກເຈົ້າກໍຮູ້ວ່າຫຼັງຈາກນັ້ນ ເຖິງວ່າລາວຢາກໄດ້ພອນນັ້ນເປັນມໍລະດົກ ແຕ່ກໍຖືກປະຕິເສດ. ລາວພະຍາຍາມພ້ອມທັງຮ້ອງໄຫ້ເພື່ອໃຫ້ພໍ່ປ່ຽນໃຈ+ ແຕ່ກໍບໍ່ໄດ້ຜົນ.
18 ພວກເຈົ້າບໍ່ໄດ້ເຂົ້າໄປໃກ້ພູທີ່ຈັບບາຍໄດ້+ແລະມີໄຟລຸກໄໝ້+ ແລະບໍ່ໄດ້ເຂົ້າໄປໃກ້ຂີ້ເຝື້ອຕຶບໜາ ຄວາມມືດຄຶ້ມ ພາຍຸ+ 19 ສຽງແກ+ ແລະສຽງເວົ້າ+ ເມື່ອປະຊາຊົນໄດ້ຍິນແລ້ວກໍຂໍຮ້ອງບໍ່ໃຫ້ເວົ້າກັບເຂົາເຈົ້າອີກ.+ 20 ຍ້ອນເຂົາເຈົ້າຢ້ານຄຳສັ່ງທີ່ວ່າ: “ແມ່ນແຕ່ສັດທີ່ເຂົ້າໄປຊູນພູນີ້ກໍຕ້ອງຖືກດຶກກ້ອນຫີນໃສ່ໃຫ້ຕາຍ.”+ 21 ສິ່ງທີ່ເຫັນນັ້ນເປັນຕາຢ້ານແທ້ໆຈົນໂມເຊເວົ້າວ່າ: “ຂ້ອຍຢ້ານຈົນໂຕສັ່ນ.”+ 22 ແຕ່ພວກເຈົ້າໄດ້ເຂົ້າໄປໃກ້ພູຊີໂອນ+ແລະເມືອງຂອງພະເຈົ້າຜູ້ມີຊີວິດຢູ່ເຊິ່ງແມ່ນເຢຣູຊາເລັມໃນສະຫວັນ+ ແລະເຂົ້າໄປໃກ້ທູດສະຫວັນເປັນໝື່ນເປັນແສນ 23 ໃນບ່ອນປະຊຸມໃຫຍ່+ ແລະເຂົ້າໄປໃກ້ປະຊາຄົມຂອງລູກກົກຂອງພະເຈົ້າທີ່ມີຊື່ຂຽນໄວ້ໃນສະຫວັນ ແລະເຂົ້າໄປໃກ້ພະເຈົ້າຜູ້ຕັດສິນທຸກຄົນ+ ແລະເຂົ້າໄປໃກ້ຄົນທີ່ພະເຈົ້າຍອມຮັບເຊິ່ງເປັນຄົນທີ່ໃຊ້ຊີວິດສອດຄ່ອງກັບພະລັງບໍລິສຸດ+ແລະເປັນຄົນທີ່ຖືກເຮັດໃຫ້ສົມບູນແລ້ວ+ 24 ແລະເຂົ້າໄປໃກ້ພະເຢຊູທີ່ເປັນຄົນກາງ+ຂອງສັນຍາໃໝ່+ ແລະເຂົ້າໄປໃກ້ເລືອດທີ່ເພິ່ນຊິດໃສ່ໂຕເຮົາເຊິ່ງດີກວ່າເລືອດຂອງອາເບັນ.+
25 ລະວັງໃຫ້ດີ ຢ່າເປັນຄົນຫົວແຂງ*ເວລາເພິ່ນເວົ້າ. ຄົນສະໄໝແຕ່ກີ້ກໍຍັງຖືກລົງໂທດ ເມື່ອເຂົາເຈົ້າບໍ່ຍອມຟັງຄຳເຕືອນຂອງພະເຈົ້າທີ່ເວົ້າໃນໂລກນີ້. ແລ້ວພວກເຮົາຈະລອດຈາກການລົງໂທດໄດ້ແນວໃດຖ້າພວກເຮົາບໍ່ຟັງພະເຈົ້າເວົ້າຈາກສະຫວັນ?+ 26 ຕອນນັ້ນ ສຽງຂອງພະເຈົ້າເຮັດໃຫ້ແຜ່ນດິນສັ່ນສະເທືອນ+ ແຕ່ຕອນນີ້ເພິ່ນສັນຍາວ່າ: “ເຮົາຈະສັ່ນທັງໂລກແລະທ້ອງຟ້າອີກເທື່ອໜຶ່ງ.”+ 27 ຄຳເວົ້າທີ່ວ່າ “ອີກເທື່ອໜຶ່ງ” ສະແດງວ່າພະເຈົ້າຈະກຳຈັດສິ່ງທີ່ຖືກສັ່ນໃຫ້ໝົດໄປ. ນັ້ນແມ່ນສິ່ງທີ່ເພິ່ນບໍ່ໄດ້ສ້າງ ເພື່ອໃຫ້ສິ່ງທີ່ບໍ່ຖືກສັ່ນຍັງເຫຼືອຢູ່. 28 ເມື່ອເຫັນວ່າພວກເຮົາຈະໄດ້ຢູ່ໃນການປົກຄອງທີ່ບໍ່ມີສິ່ງໃດຈະສັ່ນມັນໄດ້ ກໍຂໍໃຫ້ພວກເຮົາຮັບປະໂຫຍດຈາກຄວາມກະລຸນາທີ່ຍິ່ງໃຫຍ່ຕໍ່ໄປ. ຄວາມກະລຸນານີ້ເຮັດໃຫ້ພວກເຮົາເຮັດວຽກຮັບໃຊ້ທີ່ສັກສິດໃຫ້ພະເຈົ້າດ້ວຍຄວາມຢ້ານຢຳແບບທີ່ເພິ່ນຍອມຮັບໄດ້. 29 ຍ້ອນພະເຈົ້າຂອງພວກເຮົາເປັນຄືກັບໄຟທີ່ເຜົາຜານ.+