ຂ່າວຄາວສະບັບທີສອງ
6 ໃນຕອນນັ້ນໂຊໂລໂມນຈຶ່ງເວົ້າວ່າ: “ພະເຢໂຫວາບອກວ່າເພິ່ນຈະຢູ່ໃນຂີ້ເຝື້ອທີ່ໜາໆ.+ 2 ຂ້ອຍໄດ້ສ້າງວິຫານທີ່ງາມໆນີ້ໃຫ້ພະອົງເຊິ່ງເປັນບ່ອນທີ່ພະອົງຈະຢູ່ຕະຫຼອດໄປ.”+
3 ຈາກນັ້ນ ກະສັດໂຊໂລໂມນກໍປິ່ນໜ້າມາຫາພວກອິດສະຣາເອນທີ່ຢືນຢູ່ຫັ້ນແລະເລີ່ມອວຍພອນເຂົາເຈົ້າ.+ 4 ລາວເວົ້າວ່າ: “ຂໍໃຫ້ພະເຢໂຫວາພະເຈົ້າຂອງອິດສະຣາເອນໄດ້ຮັບການສັນລະເສີນ. ເພິ່ນເປັນຜູ້ສັນຍາກັບດາວິດພໍ່ຂອງຂ້ອຍດ້ວຍໂຕເອງ ແລະເພິ່ນກໍໄດ້ເຮັດໃຫ້ຄຳສັນຍານັ້ນເກີດຂຶ້ນແທ້ໆ. ເພິ່ນເວົ້າວ່າ 5 ‘ນັບຕັ້ງແຕ່ມື້ທີ່ເຮົາພາປະຊົນຂອງເຮົາອອກມາຈາກເອຢິບ ເຮົາບໍ່ໄດ້ເລືອກເມືອງໃດເມືອງໜຶ່ງຈາກທຸກເມືອງໃນຕະກູນຕ່າງໆຂອງອິດສະຣາເອນໃຫ້ເປັນບ່ອນຕັ້ງວິຫານເພື່ອສັນລະເສີນຊື່ຂອງເຮົາ+ ແລະເຮົາບໍ່ໄດ້ເລືອກຜູ້ໃດໃຫ້ເປັນຜູ້ນຳພວກອິດສະຣາເອນປະຊາຊົນຂອງເຮົາ. 6 ແຕ່ເຮົາໄດ້ເລືອກເຢຣູຊາເລັມ+ເພື່ອໃຫ້ຊື່ຂອງເຮົາໄດ້ຮັບການສັນລະເສີນຢູ່ເມືອງນີ້ ແລະໄດ້ເລືອກດາວິດໃຫ້ປົກຄອງປະຊາຊົນຂອງເຮົາ.’+ 7 ດາວິດພໍ່ຂອງຂ້ອຍຢາກສ້າງວິຫານເພື່ອສັນລະເສີນຊື່ຂອງພະເຢໂຫວາພະເຈົ້າຂອງອິດສະຣາເອນ.+ 8 ແຕ່ພະເຢໂຫວາໄດ້ເວົ້າກັບດາວິດພໍ່ຂອງຂ້ອຍວ່າ ‘ດີຫຼາຍທີ່ເຈົ້າຢາກສ້າງວິຫານເພື່ອສັນລະເສີນຊື່ຂອງເຮົາ 9 ແຕ່ເຈົ້າຈະບໍ່ໄດ້ສ້າງ. ລູກຊາຍຜູ້ໜຶ່ງຂອງເຈົ້າທີ່ຍັງບໍ່ທັນເກີດຈະເປັນຜູ້ສ້າງວິຫານເພື່ອສັນລະເສີນຊື່ຂອງເຮົາ.’+ 10 ພະເຢໂຫວາໄດ້ເຮັດໃຫ້ຄຳສັນຍາຂອງເພິ່ນເກີດຂຶ້ນແທ້. ຂ້ອຍໄດ້ເປັນກະສັດຕໍ່ຈາກດາວິດພໍ່ຂອງຂ້ອຍແລະໄດ້ປົກຄອງອິດສະຣາເອນ+ຄືກັບທີ່ພະເຢໂຫວາສັນຍາໄວ້.+ ຂ້ອຍຍັງໄດ້ສ້າງວິຫານເພື່ອສັນລະເສີນຊື່ຂອງພະເຢໂຫວາພະເຈົ້າຂອງອິດສະຣາເອນ 11 ແລະໃນວິຫານນີ້ຂ້ອຍໄດ້ເຮັດບ່ອນມ້ຽນຫີບເຊິ່ງມີຄຳສັນຍາ+ທີ່ພະເຢໂຫວາເຮັດກັບຄົນອິດສະຣາເອນ.”
12 ຈາກນັ້ນ ໂຊໂລໂມນກໍຢືນຢູ່ຕໍ່ໜ້າແທ່ນບູຊາຂອງພະເຢໂຫວາທີ່ຢູ່ຕໍ່ໜ້າພວກອິດສະຣາເອນແລະຍົກມື 2 ເບື້ອງຂຶ້ນຟ້າ.+ 13 (ໂຊໂລໂມນຢືນຢູ່ແທ່ນທອງແດງອີກແທ່ນໜຶ່ງທີ່ລາວເຮັດເຊິ່ງກວ້າງ 5 ສອກ* ຍາວ 5 ສອກ ແລະສູງ 3 ສອກ.* ແທ່ນນີ້ຕັ້ງຢູ່ກາງເດີ່ນຂອງວິຫານ.)+ ລາວຄູ້ເຂົ່າລົງຕໍ່ໜ້າພວກອິດສະຣາເອນແລະຍົກມື 2 ເບື້ອງຂຶ້ນຟ້າ+ 14 ແລ້ວເວົ້າວ່າ: “ພະເຢໂຫວາພະເຈົ້າຂອງອິດສະຣາເອນ ບໍ່ວ່າຈະຢູ່ໃນສະຫວັນຫຼືຢູ່ໃນໂລກນີ້ກໍບໍ່ມີພະເຈົ້າອົງໃດຄືກັບພະອົງທີ່ເຮັດຕາມຄຳສັນຍາແລະສະແດງຄວາມຮັກທີ່ໝັ້ນຄົງຕໍ່ຜູ້ທີ່ຮັບໃຊ້ພະອົງສຸດຫົວໃຈ.+ 15 ພະອົງເຮັດຕາມຄຳສັນຍາທີ່ເຮັດກັບດາວິດພໍ່ຂອງລູກ.+ ພະອົງເປັນຜູ້ສັນຍາດ້ວຍໂຕເອງ ແລະໃນມື້ນີ້ພະອົງກໍໄດ້ເຮັດໃຫ້ຄຳສັນຍານັ້ນເກີດຂຶ້ນແທ້.+ 16 ພະເຢໂຫວາພະເຈົ້າຂອງອິດສະຣາເອນ ຂໍພະອົງເຮັດຕາມຄຳສັນຍາທີ່ເຮັດກັບດາວິດພໍ່ຂອງລູກທີ່ວ່າ ‘ຖ້າລູກຫຼານຂອງເຈົ້າເຮັດຕາມກົດໝາຍຂອງເຮົາ+ຄືກັບທີ່ເຈົ້າໄດ້ເຮັດ+ກໍຈະມີແຕ່ລູກຫຼານຂອງເຈົ້າປົກຄອງອິດສະຣາເອນຕະຫຼອດໄປ.’ 17 ພະເຢໂຫວາພະເຈົ້າຂອງອິດສະຣາເອນເອນເອີ້ຍ ຂໍພະອົງເຮັດໃຫ້ຄຳສັນຍາທີ່ເຮັດກັບດາວິດຜູ້ຮັບໃຊ້ຂອງພະອົງເກີດຂຶ້ນແທ້.
18 ແຕ່ພະເຈົ້າຈະຢູ່ກັບມະນຸດໃນໂລກນີ້ແທ້ໆບໍ?+ ຂະໜາດສະຫວັນທີ່ກວ້າງໃຫຍ່ກໍຍັງໃຫຍ່ບໍ່ພໍທີ່ຈະໃຫ້ພະອົງຢູ່+ ແລ້ວວິຫານຫຼັງນີ້ທີ່ລູກສ້າງຈະໃຫຍ່ພໍສຳລັບພະອົງບໍ?+ 19 ພະເຢໂຫວາພະເຈົ້າຂອງລູກ ຂໍພະອົງຟັງຄຳອະທິດຖານ ຄຳອ້ອນວອນ ແລະການຂໍຄວາມຊ່ວຍເຫຼືອທີ່ລູກເຊິ່ງເປັນຜູ້ຮັບໃຊ້ພະອົງອະທິດຖານຫາພະອົງ. 20 ຂໍພະອົງແນມເບິ່ງວິຫານຫຼັງນີ້ທັງກາງເວັນແລະກາງຄືນເຊິ່ງເປັນບ່ອນທີ່ພະອົງເຄີຍບອກວ່າຊື່ຂອງພະອົງຈະຢູ່ບ່ອນນີ້.+ ຂໍພະອົງຟັງຕອນທີ່ລູກເຊິ່ງເປັນຜູ້ຮັບໃຊ້ຂອງພະອົງປິ່ນໜ້າມາທາງວິຫານນີ້ເພື່ອອະທິດຖານ. 21 ເມື່ອລູກທີ່ເປັນຜູ້ຮັບໃຊ້ຂອງພະອົງຮ້ອງຂໍຄວາມຊ່ວຍເຫຼືອ ແລະເມື່ອພວກອິດສະຣາເອນທີ່ເປັນປະຊາຊົນຂອງພະອົງອ້ອນວອນໂດຍປິ່ນໜ້າມາທາງວິຫານນີ້+ ຂໍພະອົງຟັງຈາກບ່ອນຢູ່ຂອງພະອົງໃນສະຫວັນ.+ ຂໍພະອົງຟັງແລະຍົກໂທດໃຫ້ພວກເຮົາ.+
22 ຖ້າຜູ້ໃດຜູ້ໜຶ່ງຖືກກ່າວຫາວ່າເຮັດຜິດຕໍ່ຄົນອື່ນ ແຕ່ລາວສາບານ*ວ່າລາວບໍ່ໄດ້ເຮັດ ແລະຫຼັງຈາກນັ້ນລາວມາຢືນຢູ່ຕໍ່ໜ້າແທ່ນບູຊາຂອງພະອົງໃນວິຫານນີ້+ 23 ຂໍພະອົງຟັງຈາກສະຫວັນແລະຕັດສິນລາວ. ຖ້າຜູ້ຮັບໃຊ້ຂອງພະອົງຜູ້ນັ້ນເຮັດຜິດ ຂໍໃຫ້ພະອົງລົງໂທດລາວຕາມຄວາມຜິດທີ່ລາວເຮັດ+ ແຕ່ຖ້າລາວບໍ່ໄດ້ເຮັດຜິດ ຂໍພະອົງຕອບແທນລາວຕາມຄວາມດີທີ່ລາວເຮັດ.+
24 ເມື່ອພວກອິດສະຣາເອນປະຊາຊົນຂອງພະອົງຕໍ່ສູ້ບໍ່ຊະນະພວກສັດຕູຍ້ອນເຂົາເຈົ້າເຮັດຜິດຕໍ່ພະອົງ+ ຖ້າເຂົາເຈົ້າກັບມາຫາພະອົງ ສັນລະເສີນຊື່ຂອງພະອົງ+ ແລະອະທິດຖານ+ອ້ອນວອນຫາພະອົງຢູ່ວິຫານນີ້+ 25 ຂໍພະອົງຟັງເຂົາເຈົ້າຈາກສະຫວັນ+ ຂໍຍົກໂທດໃຫ້ເຂົາເຈົ້າ ແລະຂໍພາເຂົາເຈົ້າກັບມາແຜ່ນດິນທີ່ພະອົງເອົາໃຫ້ເຂົາເຈົ້າແລະປູ່ຍ່າຕານາຍຂອງເຂົາເຈົ້າ.+
26 ເມື່ອທ້ອງຟ້າຖືກປິດໄວ້ແລະບໍ່ມີຝົນຕົກ+ຍ້ອນເຂົາເຈົ້າເຮັດຜິດຕໍ່ພະອົງຊ້ຳແລ້ວຊ້ຳອີກ+ ຖ້າເຂົາເຈົ້າປິ່ນໜ້າມາທາງວິຫານນີ້ແລະອະທິດຖານຫາພະອົງ ສັນລະເສີນຊື່ຂອງພະອົງ ແລະກັບໃຈຈາກຄວາມຜິດທີ່ເຂົາເຈົ້າໄດ້ເຮັດຍ້ອນພະອົງລົງໂທດເຂົາເຈົ້າ+ 27 ຂໍພະອົງຟັງຈາກສະຫວັນແລະຍົກໂທດໃຫ້ພວກອິດສະຣາເອນຜູ້ຮັບໃຊ້ຂອງພະອົງ ຂໍສອນເຂົາເຈົ້າກ່ຽວກັບທາງທີ່ຖືກຕ້ອງທີ່ເຂົາເຈົ້າຄວນໄປ+ ແລະຂໍໃຫ້ຝົນຕົກ+ໃສ່ແຜ່ນດິນທີ່ພະອົງເອົາໃຫ້ເຂົາເຈົ້າເປັນມໍລະດົກ.
28 ຖ້າມີຄວາມອຶດຢາກ+ຫຼືໂລກລະບາດ+ໃນແຜ່ນດິນ ຫຼືຖ້າຕົ້ນໄມ້ແລະຜັກຕາຍຍ້ອນພະຍາດ+ ລົມຮ້ອນ ຫຼືຝູງຕັກກະແຕນ+ ຫຼືຖ້າພວກສັດຕູຂອງເຂົາເຈົ້າມາລ້ອມເມືອງໃດເມືອງໜຶ່ງ+ ຫຼືຖ້າມີໄພພິບັດ ຫຼືພະຍາດຊະນິດໃດຊະນິດໜຶ່ງເກີດຂຶ້ນ+ 29 ເມື່ອຜູ້ໃດຜູ້ໜຶ່ງຫຼືພວກອິດສະຣາເອນທຸກຄົນ (ເພາະແຕ່ລະຄົນຮູ້ຈັກຄວາມເຈັບປວດຂອງໂຕເອງ)+ ຍົກມືຂຶ້ນແລະປິ່ນໜ້າມາທາງວິຫານນີ້+ເພື່ອອະທິດຖານ+ແລະອ້ອນວອນ+ຂໍສິ່ງໃດກໍຕາມ 30 ຂໍພະອົງຟັງຈາກສະຫວັນທີ່ເປັນບ່ອນຢູ່ຂອງພະອົງ+ ຂໍພະອົງຍົກໂທດໃຫ້ເຂົາເຈົ້າ+ ແລະຂໍພະອົງຕອບແທນແຕ່ລະຄົນຕາມການກະທຳຂອງເຂົາເຈົ້າເພາະພະອົງຮູ້ຈັກໃຈຂອງເຂົາເຈົ້າ (ພະອົງຜູ້ດຽວເທົ່ານັ້ນທີ່ຮູ້ຈັກໃຈຂອງມະນຸດແທ້ໆ)+ 31 ເພື່ອເຂົາເຈົ້າຈະຢ້ານຢຳພະອົງ ໂດຍໃຊ້ຊີວິດຢູ່ໃນແນວທາງຂອງພະອົງຕະຫຼອດຊີວິດຂອງເຂົາເຈົ້າທີ່ອາໄສຢູ່ໃນແຜ່ນດິນທີ່ພະອົງເອົາໃຫ້ປູ່ຍ່າຕານາຍຂອງພວກເຮົາ.
32 ສຳລັບຄົນຕ່າງຊາດທີ່ບໍ່ແມ່ນຄົນອິດສະຣາເອນແລະຄົນທີ່ມາຈາກບ່ອນທີ່ໄກໆຍ້ອນຊື່ທີ່ຍິ່ງໃຫຍ່+ແລະລິດເດດຂອງພະອົງ ເມື່ອລາວມາແລະປິ່ນໜ້າມາທາງວິຫານນີ້ເພື່ອອະທິດຖານ+ 33 ຂໍພະອົງຟັງຈາກສະຫວັນທີ່ເປັນບ່ອນຢູ່ຂອງພະອົງ ຂໍໃຫ້ພະອົງເຮັດຕາມທຸກຢ່າງທີ່ຄົນຕ່າງຊາດຂໍເພື່ອທຸກຄົນທີ່ຢູ່ໃນໂລກຈະຮູ້ຈັກຊື່ຂອງພະອົງ+ແລະຢ້ານຢຳພະອົງຄືກັບພວກອິດສະຣາເອນປະຊາຊົນຂອງພະອົງ ແລະຂໍໃຫ້ເຂົາເຈົ້າຮູ້ວ່າວິຫານທີ່ລູກສ້າງນີ້ເຮັດໃຫ້ຊື່ຂອງພະອົງໄດ້ຮັບການສັນລະເສີນ.
34 ຖ້າພະອົງສົ່ງປະຊາຊົນຂອງພະອົງໄປຕໍ່ສູ້ກັບພວກສັດຕູຢູ່ໃສກໍຕາມ+ ແລະເຂົາເຈົ້າປິ່ນໜ້າມາທາງເມືອງທີ່ພະອົງເລືອກແລະທາງວິຫານທີ່ລູກສ້າງເພື່ອສັນລະເສີນຊື່ຂອງພະອົງ+ແລະອະທິດຖານ+ຫາພະອົງ 35 ຂໍໃຫ້ພະອົງຟັງຄຳອະທິດຖານແລະຄຳອ້ອນວອນຂອງເຂົາເຈົ້າຈາກສະຫວັນແລະຂໍໃຫ້ພະອົງຊ່ວຍເຂົາເຈົ້າ.+
36 ຖ້າເຂົາເຈົ້າເຮັດຜິດຕໍ່ພະອົງ (ເພາະວ່າບໍ່ມີຈັກຄົນທີ່ຈະບໍ່ເຮັດຜິດ)+ ແລະພະອົງໃຈຮ້າຍໃຫ້ເຂົາເຈົ້າຫຼາຍ ແລ້ວຍອມໃຫ້ພວກສັດຕູຊະນະເຂົາເຈົ້າແລະຈັບເຂົາເຈົ້າໄປເປັນຊະເລີຍຢູ່ບ່ອນໜຶ່ງບໍ່ວ່າຈະຢູ່ໃກ້ຫຼືຢູ່ໄກ+ 37 ໃນຕອນທີ່ເປັນຊະເລີຍ ຖ້າເຂົາເຈົ້າສຳນຶກໄດ້ວ່າເຮັດຜິດ ແລ້ວເຂົາເຈົ້າກັບມາຫາພະອົງແລະອ້ອນວອນຕໍ່ພະອົງວ່າ ‘ພວກເຮົາໄດ້ເຮັດຜິດແລະເຮັດຊົ່ວຕໍ່ພະອົງ’+ 38 ຖ້າເຂົາເຈົ້າໄດ້ກັບມາຫາພະອົງແທ້ໆດ້ວຍສຸດຊີວິດສຸດຫົວໃຈ+ຕອນທີ່ເຂົາເຈົ້າຍັງຢູ່ໃນບ່ອນທີ່ຖືກຈັບໄປເປັນຊະເລີຍ+ ແລະຖ້າເຂົາເຈົ້າປິ່ນໜ້າມາທາງແຜ່ນດິນທີ່ພະອົງເອົາໃຫ້ປູ່ຍ່າຕານາຍຂອງເຂົາເຈົ້າແລະທາງເມືອງທີ່ພະອົງໄດ້ເລືອກ+ແລະທາງວິຫານທີ່ລູກສ້າງເພື່ອສັນລະເສີນຊື່ຂອງພະອົງແລ້ວອະທິດຖານຫາພະອົງ 39 ຂໍໃຫ້ພະອົງຟັງຄຳອະທິດຖານແລະຄຳອ້ອນວອນຂອງເຂົາເຈົ້າຈາກສະຫວັນທີ່ເປັນບ່ອນຢູ່ຂອງພະອົງ ຂໍພະອົງຊ່ວຍເຂົາເຈົ້າ+ ແລະຂໍຍົກໂທດໃຫ້ປະຊາຊົນຂອງພະອົງທີ່ເຮັດຜິດຕໍ່ພະອົງ.
40 ພະເຈົ້າຂອງລູກ ເມື່ອພວກເຮົາອະທິດຖານຢູ່ບ່ອນນີ້ ຂໍໃຫ້ພະອົງສົນໃຈຟັງ.*+ 41 ພະເຢໂຫວາພະເຈົ້າ ຂໍໃຫ້ພະອົງກັບຫີບສັນຍາທີ່ເປັນສັນຍະລັກເຖິງລິດເດດຂອງພະອົງເຂົ້າໄປຢູ່ໃນບ່ອນພັກນີ້.+ ພະເຢໂຫວາພະເຈົ້າ ຂໍໃຫ້ພວກປະໂລຫິດສະແດງໃຫ້ເຫັນວ່າພະອົງເປັນຜູ້ຊ່ວຍໃຫ້ລອດໄດ້ ແລະຂໍໃຫ້ຄົນທີ່ສັດຊື່ມີຄວາມສຸກຍ້ອນສິ່ງດີໆທັງໝົດທີ່ພະອົງເຮັດ.+ 42 ພະເຢໂຫວາພະເຈົ້າ ຂໍພະອົງຢ່າປະຖິ້ມ*ຜູ້ທີ່ພະອົງໄດ້ເລືອກ.+ ຂໍໃຫ້ພະອົງຈື່ຄວາມຮັກທີ່ໝັ້ນຄົງທີ່ພະອົງສະແດງຕໍ່ດາວິດຜູ້ຮັບໃຊ້ຂອງພະອົງ.”+