ປະຖົມມະການ
27 ຕອນນີ້ ອີຊາກເຖົ້າຫຼາຍແລະຕາກໍບໍ່ເຫັນຮຸ່ງແລ້ວ. ລາວໄດ້ເອີ້ນເອຊາວ+ລູກກົກຂອງລາວມາຫາແລະເວົ້າວ່າ: “ລູກເອີ້ຍ” ເອຊາວຕອບວ່າ: “ມີຫຍັງພໍ່?” 2 ອີຊາກເວົ້າອີກວ່າ: “ຕອນນີ້ພໍ່ກໍເຖົ້າແລ້ວ ບໍ່ຮູ້ວ່າພໍ່ຊິຢູ່ຮອດມື້ໃດ. 3 ພໍ່ຢາກໃຫ້ລູກເອົາທະນູອອກໄປລ່າສັດ.+ 4 ແລ້ວເຮັດອາຫານແຊບໆທີ່ພໍ່ມັກແລະເອົາມາໃຫ້ພໍ່ກິນ. ພໍ່ຊິໄດ້ອວຍພອນໃຫ້ເຈົ້າກ່ອນພໍ່ຕາຍ.”
5 ຕອນນັ້ນ ເຣເບກາໄດ້ຍິນວ່າອີຊາກເວົ້າຫຍັງກັບເອຊາວ. ເອຊາວກໍອອກໄປລ່າສັດຕາມທີ່ພໍ່ບອກ.+ 6 ເຣເບກາໄປບອກຢາໂຄບວ່າ:+ “ແມ່ຫາກໍໄດ້ຍິນພໍ່ເວົ້າກັບເອຊາວອ້າຍຂອງເຈົ້າວ່າ 7 ‘ໄປລ່າສັດແລະເຮັດອາຫານແຊບໆມາໃຫ້ພໍ່. ພໍ່ຊິໄດ້ກິນແລະອວຍພອນເຈົ້າຕໍ່ໜ້າພະເຢໂຫວາກ່ອນພໍ່ຕາຍ.’+ 8 ລູກເອີ້ຍ ຟັງແມ່ໃຫ້ດີໆເດີ້ ແລ້ວເຮັດຕາມທີ່ແມ່ບອກ.+ 9 ໃຫ້ລູກໄປເອົາແບ້ນ້ອຍໂຕຕຸ້ຍໆ 2 ໂຕຢູ່ຝູງມາໃຫ້ແມ່. ແມ່ຊິໄດ້ເຮັດອາຫານແຊບໆແບບທີ່ພໍ່ມັກ. 10 ແລ້ວລູກກໍເອົາໄປໃຫ້ພໍ່ກິນ ເພື່ອພໍ່ຊິໄດ້ອວຍພອນໃຫ້ລູກກ່ອນພໍ່ຕາຍ.”
11 ຢາໂຄບບອກແມ່ວ່າ: “ແຕ່ອ້າຍເອຊາວມີຂົນຫຼາຍໄດ໋+ ລູກພັດບໍ່ມີເລີຍ. 12 ຖ້າພໍ່ມາຄຳເບິ່ງໂຕລູກ+ ພໍ່ກໍຊິຮູ້ວ່າລູກບໍ່ແມ່ນອ້າຍເອຊາວ. ແທນທີ່ລູກຊິໄດ້ພອນ ລູກຊິຖືກສາບແຊ່ງຫຼາຍກວ່າໄດ໋ແມ່.” 13 ແມ່ຈຶ່ງເວົ້າກັບລາວວ່າ: “ລູກເອີ້ຍ ຖ້າລູກຈະຖືກສາບແຊ່ງ ກໍໃຫ້ຄຳສາບແຊ່ງນັ້ນມາຖືກແມ່ສະ. ໄປເຮັດຕາມທີ່ແມ່ບອກ ໄປເອົາແບ້ 2 ໂຕມາໃຫ້ແມ່.”+ 14 ຢາໂຄບໄປເອົາແບ້ມາໃຫ້ແມ່ ແລ້ວແມ່ກໍເຮັດອາຫານແຊບໆແບບທີ່ພໍ່ລາວມັກ. 15 ຈາກນັ້ນ ເຣເບກາໄດ້ເອົາເຄື່ອງນຸ່ງທີ່ດີທີ່ສຸດຂອງເອຊາວທີ່ຢູ່ໃນເຮືອນມາໃຫ້ຢາໂຄບນຸ່ງ.+ 16 ລາວຍັງເອົາໜັງແບ້ທີ່ມີຂົນມາຫຸ້ມແຂນແລະຄໍຂອງຢາໂຄບນຳ.+ 17 ຈາກນັ້ນ ລາວກໍເອົາອາຫານທີ່ເຮັດແລ້ວໆກັບເຂົ້າຈີ່ໃຫ້ຢາໂຄບ.+
18 ແລ້ວຢາໂຄບກໍໄປຫາພໍ່ແລະເວົ້າວ່າ: “ພໍ່ເອີ້ຍ!” ພໍ່ຕອບວ່າ: “ມີຫຍັງລູກ? ລູກແມ່ນໃຜ ເອຊາວຫຼືຢາໂຄບ?” 19 ຢາໂຄບຕອບພໍ່ວ່າ: “ລູກແມ່ນເອຊາວ ລູກກົກຂອງພໍ່.+ ລູກເຮັດຕາມທີ່ພໍ່ບອກແລ້ວ. ພໍ່ ລຸກຂຶ້ນມາກິນຊີ້ນທີ່ລູກຫາມາແມ້ ແລ້ວພໍ່ຊິໄດ້ອວຍພອນໃຫ້ລູກ.”+ 20 ອີຊາກຖາມລູກວ່າ: “ລູກເອີ້ຍ ລູກຄືຫາຊີ້ນມາໄດ້ໄວແທ້?” ລາວຕອບວ່າ: “ຍ້ອນພະເຢໂຫວາພະເຈົ້າຂອງພໍ່ຊ່ວຍລູກເດ້.” 21 ແລ້ວອີຊາກກໍເວົ້າກັບຢາໂຄບວ່າ: “ລູກ ຫຍັບມາໃກ້ໆພໍ່ດຸ. ພໍ່ຊິໄດ້ຄຳເບິ່ງໂຕລູກວ່າແມ່ນເອຊາວແທ້ໆບໍ່.”+ 22 ຢາໂຄບກໍຫຍັບເຂົ້າໄປໃກ້ພໍ່. ເມື່ອພໍ່ຄຳເບິ່ງໂຕລາວແລ້ວກໍເວົ້າວ່າ: “ຟັງສຽງພັດແມ່ນສຽງຢາໂຄບ ບາດຈັບເບິ່ງມືພັດແມ່ນມືເອຊາວ.”+ 23 ອີຊາກບໍ່ຮູ້ວ່າລູກຜູ້ນີ້ແມ່ນຢາໂຄບ ຍ້ອນວ່າມືຂອງລາວມີຂົນຫຼາຍຄືກັບມືເອຊາວ. ອີຊາກຈຶ່ງອວຍພອນໃຫ້ຢາໂຄບ.+
24 ອີຊາກຖາມອີກວ່າ: “ລູກແມ່ນເອຊາວແທ້ໆບໍ?” ຢາໂຄບຕອບວ່າ: “ແມ່ນແລ້ວພໍ່.” 25 ແລ້ວອີຊາກກໍເວົ້າວ່າ: “ລູກເອີ້ຍ ເອົາຊີ້ນສັດນັ້ນມາໃຫ້ພໍ່ກິນ ແລ້ວພໍ່ຊິອວຍພອນໃຫ້ລູກ.” ຢາໂຄບກໍເອົາຊີ້ນມາໃຫ້ພໍ່ກິນ ແລະເອົາເຫຼົ້າແວງໃຫ້ພໍ່ດື່ມນຳ. 26 ອີຊາກເວົ້າກັບຢາໂຄບວ່າ: “ລູກ ຫຍັບເຂົ້າມາໃກ້ໆພໍ່ແດ່ ແລະຈູບ*ພໍ່ນຳ.”+ 27 ຢາໂຄບກໍຫຍັບເຂົ້າໄປໃກ້ໆແລະຈູບພໍ່. ພໍ່ກໍໄດ້ກິ່ນເຄື່ອງນຸ່ງຂອງເອຊາວທີ່ຢາໂຄບນຸ່ງຢູ່.+ ແລ້ວພໍ່ກໍອວຍພອນໃຫ້ລາວວ່າ:
“ກິ່ນຂອງລູກພໍ່ຄືກັບກິ່ນຂອງທົ່ງຫຍ້າທີ່ພະເຢໂຫວາອວຍພອນ. 28 ຂໍໃຫ້ພະເຈົ້າທ່ຽງແທ້ໃຫ້ນ້ຳຄ້າງຕົກລົງມາຈາກຟ້າ+ ໃຫ້ແຜ່ນດິນອຸດົມສົມບູນ+ ໃຫ້ລູກມີເຂົ້າກັບເຫຼົ້າແວງໃໝ່ຫຼາຍໆ.+ 29 ໃຫ້ຜູ້ຄົນຮັບໃຊ້ລູກ ໃຫ້ຊາດຕ່າງໆກົ້ມລົງຄຳນັບລູກ ໃຫ້ລູກເປັນນາຍຂອງພີ່ນ້ອງ ແລະໃຫ້ອ້າຍນ້ອງຂອງລູກກົ້ມລົງຄຳນັບລູກ.+ ໃຫ້ຜູ້ທີ່ສາບແຊ່ງລູກຖືກສາບແຊ່ງ ແລະຜູ້ທີ່ອວຍພອນລູກໄດ້ຮັບພອນ.”+
30 ເມື່ອອີຊາກອວຍພອນຢາໂຄບແລ້ວໆ ຢາໂຄບກໍໄປຈາກພໍ່. ຕອນທີ່ຢາໂຄບອອກໄປ ພໍດີເອຊາວກໍກັບມາແຕ່ລ່າສັດ.+ 31 ເອຊາວເຮັດອາຫານແຊບໆມາໃຫ້ພໍ່ແລະເວົ້າກັບພໍ່ວ່າ: “ພໍ່ ລຸກຂຶ້ນມາກິນຊີ້ນທີ່ລູກຫາມາໃຫ້ເດີ້ ເພື່ອພໍ່ຊິໄດ້ອວຍພອນລູກ.” 32 ອີຊາກຖາມວ່າ: “ລູກແມ່ນໃຜ?” ເອຊາວຕອບວ່າ: “ລູກແມ່ນເອຊາວ ລູກກົກຂອງພໍ່.”+ 33 ອີຊາກກໍຕົກໃຈຫຼາຍແລະເວົ້າວ່າ: “ຄັນຊັ້ນ ຫວ່າງກີ້ນີ້ແມ່ນໃຜລ່າສັດແລະເອົາຊີ້ນມາໃຫ້ພໍ່ກິນ? ພໍ່ກິນແລ້ວກ່ອນລູກຊິມາຮອດ. ພໍ່ອວຍພອນໃຫ້ລາວແລ້ວ ແລະລາວຊິໄດ້ພອນຕາມນັ້ນ!”
34 ເມື່ອໄດ້ຍິນພໍ່ເວົ້າແນວນັ້ນ ເອຊາວກໍຮ້ອງໄຫ້ສຽງດັງເພາະເສຍໃຈຫຼາຍ. ລາວບອກພໍ່ວ່າ: “ພໍ່ ອວຍພອນໃຫ້ລູກນຳແດ່. ພໍ່ ອວຍພອນໃຫ້ລູກແດ່ເດີ້!”+ 35 ແຕ່ພໍ່ເວົ້າວ່າ: “ນ້ອງຂອງລູກມາຫຼອກລວງພໍ່ແລະເອົາພອນຂອງລູກໄປແລ້ວ.” 36 ເອຊາວເວົ້າວ່າ: “ຈັ່ງແມ່ນເຮັດສົມກັບທີ່ໄດ້ຊື່ຢາໂຄບ*ເນາະ. ລາວມາເອົາສິ່ງທີ່ເປັນຂອງລູກໄປ 2 ເທື່ອແລ້ວ.+ ລາວເອົາສິດລູກກົກຂອງລູກໄປແລ້ວ+ ແລະຕອນນີ້ກໍຍັງມາເອົາພອນຂອງລູກໄປນຳ!+ ພໍ່ບໍ່ມີພອນເຫຼືອໄວ້ໃຫ້ລູກແດ່ບໍ?” 37 ອີຊາກບອກເອຊາວວ່າ: “ພໍ່ໄດ້ອວຍພອນໃຫ້ນ້ອງເປັນນາຍຂອງລູກ+ ໃຫ້ພີ່ນ້ອງທຸກຄົນເປັນຄົນຮັບໃຊ້ຂອງລາວ ແລະໃຫ້ລາວມີເຂົ້າກັບເຫຼົ້າແວງໃໝ່ຫຼາຍໆ.+ ລູກເອີ້ຍ ພໍ່ບໍ່ມີພອນຫຍັງຊິໃຫ້ລູກແລ້ວ.”
38 ເອຊາວເວົ້າກັບພໍ່ວ່າ: “ພໍ່ ພໍ່ມີພອນແຕ່ຂໍ້ດຽວຫັ້ນບໍ? ພໍ່! ອວຍພອນໃຫ້ລູກນຳແດ່. ພໍ່ ອວຍພອນໃຫ້ລູກແດ່ເດີ້!” ແລ້ວເອຊາວກໍຮ້ອງໄຫ້ສຽງດັງ.+ 39 ພໍ່ຈຶ່ງເວົ້າກັບລາວວ່າ:
“ລູກຈະຢູ່ບ່ອນທີ່ດິນບໍ່ອຸດົມສົມບູນ ແລະບໍ່ມີນ້ຳຄ້າງຕົກລົງມາຈາກຟ້າ.+ 40 ລູກຈະຕ້ອງໃຊ້ດາບໄປຕະຫຼອດຊີວິດ+ ແລະຈະຮັບໃຊ້ນ້ອງ.+ ແຕ່ຈະມີມື້ໜຶ່ງ ລູກຈະບໍ່ຍອມເປັນທາດຂອງນ້ອງອີກຕໍ່ໄປ.”*+
41 ເອຊາວໃຈຮ້າຍໃຫ້ຢາໂຄບຫຼາຍ ຍ້ອນລາວໄດ້ພອນຂອງພໍ່ໄປ.+ ເອຊາວຄິດໃນໃຈຢູ່ເລື້ອຍໆວ່າ: “ພໍ່ໃກ້ຊິຕາຍແລ້ວ+ ຫຼັງຈາກພໍ່ຕາຍ ຂ້ອຍຊິຂ້າຢາໂຄບ.” 42 ເມື່ອເຣເບກາຮູ້ວ່າເອຊາວຄິດແນວນີ້ ລາວກໍຟ້າວໄປບອກຢາໂຄບວ່າ: “ລູກເອີ້ຍ ເອຊາວອ້າຍຂອງລູກກຳລັງວາງແຜນຊິຂ້າລູກເດີ້! 43 ລູກເອີ້ຍ ໃຫ້ເຮັດຕາມທີ່ແມ່ບອກເດີ້. ໜີໄປຢູ່ກັບລຸງລາບານທີ່ຢູ່ຮາຣານ.+ 44 ໄປຢູ່ຫັ້ນຈົນກວ່າອ້າຍຂອງລູກຊິໃຈເຢັນລົງ. 45 ຈົນກວ່າລາວຊິເຊົາໃຈຮ້າຍໃຫ້ລູກແລະລືມວ່າລູກເຮັດຫຍັງໃຫ້ລາວ. ແລ້ວແມ່ຊິສົ່ງຄົນໄປຮັບລູກມາພີ້. ແມ່ບໍ່ຢາກເສຍລູກທັງສອງຄົນໃນມື້ດຽວ.”
46 ຈາກນັ້ນ ເຣເບກາກໍເວົ້າກັບອີຊາກເລື້ອຍໆວ່າ: “ຈັ່ງແມ່ນນ້ອງທຸກໃຈນຳພວກຜູ້ຍິງຄົນເຮດນີ້ເດ້.+ ຖ້າຢາໂຄບເອົາຜູ້ຍິງຄົນເຮດມາເປັນເມຍຄືກັນອີກ ໃຫ້ນ້ອງຕາຍຄືຊິດີກວ່າ.”+