ເອເຊກຽນ
33 ພະເຢໂຫວາເວົ້າກັບຂ້ອຍວ່າ: 2 “ລູກມະນຸດ ໃຫ້ບອກຄົນຊາດດຽວກັນກັບເຈົ້າ+ແບບນີ້
‘ສົມມຸດວ່າເຮົາໄດ້ປ່ອຍໃຫ້ສັດຕູໄປໂຈມຕີແຜ່ນດິນໜຶ່ງ+ ທຸກຄົນທີ່ຢູ່ຫັ້ນຈຶ່ງເລືອກຜູ້ຊາຍຄົນໜຶ່ງມາເປັນຄົນຍາມໃຫ້ເຂົາເຈົ້າ. 3 ເມື່ອເຫັນສັດຕູກຳລັງມາ ລາວກໍເປົ່າແກເຂົາສັດເພື່ອເຕືອນຄົນໃນແຜ່ນດິນ.+ 4 ຖ້າຜູ້ໃດໄດ້ຍິນສຽງແກ ແຕ່ບໍ່ສົນໃຈຟັງສຽງເຕືອນ+ ຜູ້ນັ້ນຈະຖືກສັດຕູຂ້າ. ລາວຈະຕາຍຍ້ອນຄວາມຜິດຂອງໂຕເອງ.+ 5 ຖ້າລາວໄດ້ຍິນສຽງແກ ແຕ່ບໍ່ສົນໃຈສຽງເຕືອນນັ້ນ ລາວຈະຕາຍຍ້ອນຄວາມຜິດຂອງໂຕເອງ. ແຕ່ຖ້າລາວສົນໃຈຟັງສຽງເຕືອນນັ້ນ ລາວກໍຈະບໍ່ຕາຍ.
6 ຖ້າຄົນຍາມເຫັນສັດຕູມາ ແຕ່ລາວບໍ່ໄດ້ເປົ່າແກເຕືອນຄົນໃນແຜ່ນດິນ+ ແລະສັດຕູໄດ້ຂ້າຄົນໜຶ່ງໃນພວກເຂົາເຈົ້າ. ຜູ້ນັ້ນຈະຕ້ອງຕາຍຍ້ອນຄວາມຜິດຂອງໂຕເອງ ແຕ່ເຮົາກໍຈະໃຫ້ຄົນຍາມຮັບຜິດຊອບນຳທີ່ຜູ້ນັ້ນຕາຍ.’+
7 ລູກມະນຸດເອີ້ຍ ເຮົາແຕ່ງຕັ້ງເຈົ້າໃຫ້ເປັນຄົນຍາມຂອງຊາດອິດສະຣາເອນ. ເຮົາບອກເຈົ້າແນວໃດ ເຈົ້າກໍຕ້ອງເຕືອນເຂົາເຈົ້າຕາມນັ້ນ.+ 8 ຖ້າເຮົາບອກຄົນຊົ່ວວ່າ ‘ຄົນຊົ່ວເອີ້ຍ ເຈົ້າຈະຕາຍ!’+ ແຕ່ເຈົ້າບໍ່ໄດ້ບອກແລະບໍ່ໄດ້ເຕືອນລາວໃຫ້ປ່ຽນແນວທາງຊີວິດຂອງໂຕເອງ ລາວຈະຕາຍຍ້ອນລາວເປັນຄົນຊົ່ວທີ່ເຮັດຜິດ+ ແລະເຈົ້າເອງກໍຕ້ອງຮັບຜິດຊອບທີ່ລາວຕາຍ. 9 ແຕ່ຖ້າເຈົ້າໄດ້ເຕືອນຄົນຊົ່ວຜູ້ນັ້ນແລ້ວ ແລະລາວບໍ່ໄດ້ປ່ຽນແປງແນວທາງຊີວິດຂອງໂຕເອງ ລາວຈະຕາຍຍ້ອນລາວເຮັດຜິດ+ ແຕ່ເຈົ້າຈະລອດ.+
10 ລູກມະນຸດເອີ້ຍ ໃຫ້ບອກພວກອິດສະຣາເອນແບບນີ້ ‘ພວກເຈົ້າເວົ້າວ່າ “ການກະບົດແລະຄວາມຜິດທີ່ພວກເຮົາເຮັດເປັນຄືກັບເຄື່ອງໜັກໆທີ່ພວກເຮົາແບກໄວ້. ມັນເຮັດໃຫ້ພວກເຮົາໝົດແຮງ.+ ພວກເຮົາຈະມີຊີວິດຢູ່ຕໍ່ໄປໄດ້ແນວໃດ?”’+ 11 ໃຫ້ເຈົ້າບອກເຂົາເຈົ້າຈັ່ງຊີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາສາບານວ່າຕາບໃດທີ່ເຮົາຍັງມີຊີວິດຢູ່ ເຮົາຈະບໍ່ດີໃຈທີ່ເຫັນຄົນຊົ່ວຕາຍ+ ແຕ່ເຮົາຢາກໃຫ້ລາວເຊົາເຮັດຊົ່ວ+ ເພື່ອລາວຈະມີຊີວິດຢູ່ຕໍ່ໄປ.+ ພວກອິດສະຣາເອນເອີ້ຍ ເຊົາເຮັດຊົ່ວແມ້+ ເພື່ອພວກເຈົ້າຈະບໍ່ຕາຍ.”’+
12 ລູກມະນຸດເອີ້ຍ ໃຫ້ເຈົ້າໄປບອກຄົນຊາດດຽວກັນກັບເຈົ້າວ່າ ‘ເຖິງວ່າຄົນດີເຄີຍເຮັດດີມາ ແຕ່ຖ້າລາວເຮັດຜິດ ສິ່ງດີໆທີ່ລາວເຄີຍເຮັດກໍຈະປົກປ້ອງຊີວິດລາວບໍ່ໄດ້.+ ເຖິງວ່າຄົນຊົ່ວເຄີຍເຮັດຊົ່ວ ແຕ່ຖ້າລາວເຊົາເຮັດຊົ່ວ ລາວກໍຈະບໍ່ຖືກທຳລາຍ.+ ສິ່ງດີໆທີ່ຄົນດີເຮັດມາຕະຫຼອດຈະບໍ່ໄດ້ຊ່ວຍຊີວິດລາວໃນມື້ທີ່ລາວເຮັດຜິດ.+ 13 ເມື່ອເຮົາເວົ້າກັບຄົນດີວ່າ “ເຈົ້າຈະມີຊີວິດຢູ່ຕໍ່ໄປ” ແຕ່ລາວພັດເຮັດຊົ່ວ ຍ້ອນຄິດວ່າສິ່ງດີໆທີ່ລາວເຄີຍເຮັດຈະຊ່ວຍຊີວິດລາວໄດ້+ ລາວຈະຕາຍຍ້ອນລາວເຮັດຜິດ+ ແລະເຮົາຈະລືມສິ່ງດີໆທີ່ລາວເຄີຍເຮັດ.
14 ແຕ່ສົມມຸດເຮົາບອກຄົນຊົ່ວວ່າ “ເຈົ້າຈະຕາຍແທ້ໆ” ແລ້ວລາວເຊົາເຮັດຜິດ ແລະປ່ຽນໄປເຮັດສິ່ງທີ່ຖືກຕ້ອງແລະຍຸຕິທຳ+ 15 ລາວເອົາເຄື່ອງທີ່ຄົນເອົາມາຈຳສົ່ງຄືນ+ ເອົາເຄື່ອງທີ່ລາວປຸ້ນມາສົ່ງຄືນ+ ແລະເຮັດຕາມກົດໝາຍທີ່ປົກປ້ອງຊີວິດໂດຍບໍ່ເຮັດຜິດອີກ. ຖ້າລາວເຮັດແນວນີ້ ລາວຈະມີຊີວິດຢູ່ຕໍ່ໄປ.+ ລາວຈະບໍ່ຕາຍ. 16 ເຮົາຈະບໍ່ລົງໂທດລາວສຳລັບຄວາມຜິດທີ່ລາວເຄີຍເຮັດ.+ ລາວຈະມີຊີວິດຢູ່ຕໍ່ໄປ ຍ້ອນລາວເຮັດສິ່ງທີ່ຖືກຕ້ອງແລະຍຸຕິທຳ.’+
17 ຄົນຊາດດຽວກັນກັບເຈົ້າເວົ້າວ່າ ‘ແນວທາງຂອງພະເຢໂຫວາບໍ່ຍຸຕິທຳ.’ ແຕ່ທີ່ຈິງແລ້ວ ແນວທາງຂອງເຂົາເຈົ້າຫັ້ນແຫຼະທີ່ບໍ່ຍຸຕິທຳ.
18 ຖ້າຄົນດີເຊົາເຮັດສິ່ງທີ່ຖືກຕ້ອງແລ້ວໄປເຮັດຊົ່ວ ລາວຈະຕາຍຍ້ອນເຮັດແບບນັ້ນ.+ 19 ແຕ່ຖ້າຄົນຊົ່ວເຊົາເຮັດຜິດແບບທີ່ລາວເຄີຍເຮັດ ແລ້ວປ່ຽນມາເຮັດສິ່ງທີ່ຖືກຕ້ອງແລະຍຸຕິທຳ ລາວຈະມີຊີວິດຢູ່ຕໍ່ໄປຍ້ອນເຮັດແບບນັ້ນ.+
20 ພວກເຈົ້າເວົ້າວ່າ ‘ແນວທາງຂອງພະເຢໂຫວາບໍ່ຍຸຕິທຳ.’+ ພວກອິດສະຣາເອນເອີ້ຍ ເຮົາຈະຕັດສິນພວກເຈົ້າແຕ່ລະຄົນຕາມການກະທຳຂອງພວກເຈົ້າ.”
21 ໃນວັນທີ 5 ເດືອນທີ 10 ຂອງປີທີ 12 ທີ່ພວກເຮົາໄປເປັນຊະເລີຍຢູ່ບາບີໂລນ ຜູ້ຊາຍຄົນໜຶ່ງໄດ້ໜີຈາກເຢຣູຊາເລັມມາຫາຂ້ອຍ+ແລະເວົ້າວ່າ: “ເຢຣູຊາເລັມຖືກຍຶດແລ້ວ!”+
22 ທີ່ຈິງ ໃນມື້ກ່ອນໜ້ານັ້ນ ພະລັງ*ຂອງພະເຢໂຫວາໄດ້ມາຢູ່ນຳຂ້ອຍ ແລະເຮັດໃຫ້ຂ້ອຍເວົ້າໄດ້ອີກ. ຍ້ອນແນວນີ້ ຕອນທີ່ຜູ້ຊາຍຄົນນັ້ນມາຫາຂ້ອຍໃນຕອນເຊົ້າ ຂ້ອຍກໍເວົ້າໄດ້ແລ້ວ.+
23 ຈາກນັ້ນ ພະເຢໂຫວາເວົ້າກັບຂ້ອຍວ່າ: 24 “ລູກມະນຸດ ພວກທີ່ອາໄສຢູ່ເມືອງຕ່າງໆທີ່ເປັນຊາກຫັກພັງ+ເວົ້າເຖິງແຜ່ນດິນອິດສະຣາເອນວ່າ ‘ອັບຣາຮາມຜູ້ດຽວຍັງໄດ້ແຜ່ນດິນນັ້ນ+ ແຕ່ພວກເຮົາມີຕັ້ງບັກຫຼາຍໆຄົນ ພວກເຮົາຕ້ອງໄດ້ແຜ່ນດິນນັ້ນແນ່ນອນ.’
25 ເຈົ້າຕ້ອງບອກເຂົາເຈົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ພວກເຈົ້າກິນຊີ້ນທີ່ຍັງບໍ່ໄດ້ເອົາເລືອດອອກ+ ໄວ້ວາງໃຈຮູບບູຊາທີ່ເປັນຕາຂີ້ດຽດ* ແລະຂ້າຄົນບໍ່ເຊົາ.+ ພວກເຈົ້າສົມຄວນໄດ້ແຜ່ນດິນນັ້ນບໍ? 26 ພວກເຈົ້າເພິ່ງດາບຂອງໂຕເອງ+ ເຮັດສິ່ງທີ່ເປັນຕາຂີ້ດຽດ ແລະແຕ່ລະຄົນກໍໄປນອນນຳເມຍຄົນອື່ນ.+ ພວກເຈົ້າສົມຄວນໄດ້ແຜ່ນດິນນັ້ນບໍ?”’+
27 ເຈົ້າຕ້ອງບອກເຂົາເຈົ້າຈັ່ງຊີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາສາບານວ່າຕາບໃດທີ່ເຮົາຍັງມີຊີວິດຢູ່ ພວກທີ່ອາໄສຢູ່ເມືອງຕ່າງໆທີ່ເປັນຊາກຫັກພັງຈະຖືກຂ້າດ້ວຍດາບ ພວກທີ່ຢູ່ທົ່ງຫຍ້າຈະເປັນອາຫານຂອງສັດປ່າ ແລະພວກທີ່ຢູ່ປ້ອມແລະຢູ່ຖ້ຳຈະຕາຍຍ້ອນພະຍາດ.+ 28 ເຮົາຈະເຮັດໃຫ້ແຜ່ນດິນນີ້ຮ້າງເປົ່າ+ ແຜ່ນດິນນີ້ຈະບໍ່ຍິ່ງຈອງຫອງອີກຕໍ່ໄປ. ພູຕ່າງໆຂອງອິດສະຣາເອນຈະຮ້າງເປົ່າ+ແລະຈະບໍ່ມີໃຜຍ່າງຜ່ານ. 29 ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາ ເມື່ອເຮົາເຮັດໃຫ້ແຜ່ນດິນນີ້ຮ້າງເປົ່າ+ຍ້ອນເຂົາເຈົ້າເຮັດສິ່ງທີ່ເປັນຕາຂີ້ດຽດ.”’+
30 ລູກມະນຸດ ຄົນຊາດດຽວກັນກັບເຈົ້າກຳລັງເວົ້າເຖິງເຈົ້າຢູ່ຂ້າງກຳແພງແລະຢູ່ທາງເຂົ້າເຮືອນ.+ ເຂົາເຈົ້າເວົ້າກັບພີ່ນ້ອງຂອງໂຕເອງວ່າ ‘ໄປ໋ ໄປຟັງສິ່ງທີ່ພະເຢໂຫວາບອກ.’ 31 ເຂົາເຈົ້າຈະມານັ່ງຢູ່ຕໍ່ໜ້າເຈົ້າຄືກັບທີ່ປະຊາຊົນຂອງເຮົາຈະເຮັດ. ເຂົາເຈົ້າຈະຟັງເຈົ້າເວົ້າ ແຕ່ຈະບໍ່ເຮັດຕາມ.+ ເຂົາເຈົ້າຈະເວົ້າເອົາໃຈເຈົ້າຊື່ໆ ແຕ່ໃນໃຈເຂົາເຈົ້າໂລບຢາກໄດ້ແຕ່ຜົນປະໂຫຍດໃຫ້ໂຕເອງ. 32 ສຳລັບເຂົາເຈົ້າ ເຈົ້າຈະເປັນແຕ່ຄົນທີ່ຮ້ອງເພງຮັກທີ່ມີສຽງມ່ວນໆແລະຫຼິ້ນເຄື່ອງດົນຕີທີ່ມີສາຍເກັ່ງ. ເຂົາເຈົ້າຈະຟັງເຈົ້າ ແຕ່ຈະບໍ່ມີໃຜເຮັດຕາມ. 33 ເລື່ອງທັງໝົດນີ້ຈະເກີດຂຶ້ນແທ້. ເມື່ອມັນເກີດຂຶ້ນ ເຂົາເຈົ້າຈະຮູ້ວ່າມີຜູ້ພະຍາກອນຢູ່ນຳເຂົາເຈົ້າ.”+