ເອຊາຢາ
60 “ຜູ້ຍິງເອີ້ຍ ລຸກຂຶ້ນແມ້+ ແລ້ວສ່ອງແສງອອກໄປ ຍ້ອນວ່າແສງສະຫວ່າງໄດ້ສ່ອງມາຮອດເຈົ້າແລ້ວ
ແລະແສງລັດສະໝີຂອງພະເຢໂຫວາກໍສ່ອງມາໃສ່ເຈົ້າ.+
2 ຖ້າເບິ່ງເດີ້ ຄວາມມືດຈະປົກຄຸມຢູ່ທົ່ວໂລກ
ແລະຂີ້ເຝື້ອທີ່ດຳໆໜາໆຈະປົກຄຸມຊາດຕ່າງໆ.
ແຕ່ພະເຢໂຫວາຈະສ່ອງແສງໃສ່ເຈົ້າ
ແລະຄົນອື່ນຈະເຫັນແສງລັດສະໝີຂອງເພິ່ນທີ່ສ່ອງໃສ່ເຈົ້າ.
3 ຊາດຕ່າງໆຈະມາຫາແສງສະຫວ່າງຂອງເຈົ້າ+
4 ເງີຍໜ້າຂຶ້ນແລະແນມເບິ່ງອ້ອມຂ້າງເຈົ້າແມ້!
ເຂົາເຈົ້າທັງໝົດມາລວມກັນແລ້ວແລະກຳລັງມາຫາເຈົ້າ.
ລູກຊາຍຂອງເຈົ້າທີ່ຢູ່ບ່ອນທີ່ໄກໆກຳລັງມາ+
ແລະລູກສາວຂອງເຈົ້າກໍມີຄົນອູ້ມຄາບໃສ່ແອວມາ.+
5 ໃນຕອນນັ້ນ ເຈົ້າຈະເຫັນສິ່ງນີ້ແລະມີຄວາມສຸກຫຼາຍ.+
ຫົວໃຈຂອງເຈົ້າຈະເຕັ້ນແຮງດ້ວຍຄວາມດີໃຈ
ຍ້ອນວ່າຄວາມຮັ່ງມີຂອງທະເລຈະໄຫຼມາຫາເຈົ້າ
ແລະຊັບສົມບັດຂອງຊາດຕ່າງໆກໍຈະມາຫາເຈົ້າຄືກັນ.+
6 ແຜ່ນດິນຂອງເຈົ້າຈະມີຝູງອູດຢູ່ເຕັມ
ເປັນອູດໂຕຜູ້ທີ່ມາຈາກມີດີອານແລະເອຟາ.+
ຄົນຈາກເຊບາກໍຈະມາ.
ເຂົາເຈົ້າຈະເອົາຄຳກັບກຳຍານ*ມານຳ.
ເຂົາເຈົ້າຈະສັນລະເສີນພະເຢໂຫວາໃຫ້ທຸກຄົນຟັງ.+
7 ຝູງແກະທັງໝົດຈາກເກດາ+ຈະຖືກລວບລວມແລະພາມາຫາເຈົ້າ.
ແລະເຈົ້າຍັງຈະໄດ້ໃຊ້ແກະໂຕຜູ້ຈາກເນບາໂຢດ+ນຳອີກ.
ພວກມັນຈະເປັນເຄື່ອງບູຊາທີ່ເຮົາພໍໃຈຢູ່ເທິງແທ່ນບູຊາຂອງເຮົາ.+
ເຮົາຈະເຮັດໃຫ້ວິຫານຂອງເຮົາມີສະຫງ່າລາສີ.+
8 ຄົນເຫຼົ່ານີ້ແມ່ນໃຜທີ່ລອຍມາຄືກັບຂີ້ເຝື້ອ
ແລະບິນມາຄືກັບນົກເຂົາບິນກັບເມືອຮັງ?
9 ຄົນທີ່ຢູ່ຕາມເກາະຕ່າງໆຈະຫວັງເພິ່ງເຮົາ.+
ເຮືອຈາກຕາຊິດຈະນຳໜ້າມາ
ແລະພາພວກລູກຊາຍຂອງເຈົ້າມາຈາກບ່ອນທີ່ຢູ່ໄກໆ.+
ເຂົາເຈົ້າເອົາເງິນກັບຄຳມາພ້ອມ.
ເຂົາເຈົ້າມາເພື່ອສັນລະເສີນຊື່ຂອງພະເຢໂຫວາພະເຈົ້າຂອງເຈົ້າທີ່ເປັນພະເຈົ້າອົງບໍລິສຸດຂອງອິດສະຣາເອນ.
10 ຄົນຕ່າງຊາດຈະສ້າງກຳແພງໃຫ້ເຈົ້າ
ແລະພວກກະສັດຂອງເຂົາເຈົ້າຈະຮັບໃຊ້ເຈົ້າ.+
ຕອນທີ່ເຮົາໃຈຮ້າຍ ເຮົາໄດ້ລົງໂທດເຈົ້າ
ແຕ່ຕອນທີ່ເຮົາພໍໃຈເຈົ້າ ເຮົາຈະອີ່ຕົນເຈົ້າ.+
11 ປະຕູເມືອງຂອງເຈົ້າຈະເປີດໄວ້ຕະຫຼອດ.+
ມັນຈະເປີດໄວ້ໝົດມື້ໝົດຄືນ
ເພື່ອໃຫ້ຊາດຕ່າງໆເອົາຊັບສົມບັດມາໃຫ້.
ພວກກະສັດຂອງເຂົາເຈົ້າຈະຍ່າງນຳໜ້າເຂົາເຈົ້າມາ.+
12 ຊາດໃດແລະປະເທດໃດທີ່ບໍ່ຍອມຮັບໃຊ້ເຈົ້າຈະຖືກທຳລາຍ.
ຊາດເຫຼົ່ານັ້ນຈະຈິບຫາຍ.+
13 ຕົ້ນໄມ້ທີ່ດີທີ່ສຸດຈາກເລບານອນຈະມາເປັນຂອງເຈົ້າ.+
ຕົ້ນຈູນິເປີ້* ຕົ້ນແອັດສ໌* ແລະຕົ້ນແປກ+
ຈະຖືກໃຊ້ເພື່ອຕົກແຕ່ງວິຫານຂອງເຮົາ.
ເຮົາຈະເຮັດໃຫ້ບ່ອນວາງຕີນຂອງເຮົາງົດງາມ.+
14 ພວກລູກຊາຍຂອງຄົນທີ່ກົດຂີ່ຂົ່ມເຫງເຈົ້າຈະມາໝູບລົງຢູ່ຕໍ່ໜ້າເຈົ້າ.
ທຸກຄົນທີ່ດູຖູກເຈົ້າຈະຕ້ອງໝູບລົງຢູ່ຕີນເຈົ້າ.
ເຂົາເຈົ້າຈະເອີ້ນເຈົ້າວ່າເມືອງຂອງພະເຢໂຫວາ
ຊີໂອນຂອງພະເຈົ້າອົງບໍລິສຸດຂອງອິດສະຣາເອນ.+
15 ເຖິງວ່າເຮົາເຄີຍປະຖິ້ມເຈົ້າ ແລະເຖິງວ່າທຸກຄົນເຄີຍຊັງເຈົ້າແລະບໍ່ຍ່າງຜ່ານເຈົ້າ+
ແຕ່ເຮົາຈະເຮັດໃຫ້ເຈົ້າເປັນສິ່ງທີ່ຄົນຈະຍ້ອງຍໍຕະຫຼອດໄປ
ເປັນສິ່ງທີ່ເຮັດໃຫ້ມີຄວາມຍິນດີຕະຫຼອດທຸກຍຸກທຸກສະໄໝ.+
16 ຊາດຕ່າງໆແລະພວກກະສັດຈະຈັດໃຫ້ເຈົ້າມີທຸກສິ່ງທຸກຢ່າງ+
ຄືກັບແມ່ທີ່ໃຫ້ລູກກິນນົມຢ່າງບໍ່ອັ້ນ.+
ແລ້ວເຈົ້າຈະຮູ້ວ່າເຮົາເຢໂຫວາເປັນຜູ້ຊ່ວຍເຈົ້າໃຫ້ລອດ
ເຮົາເປັນພະເຈົ້າຜູ້ມີລິດເດດຂອງຢາໂຄບທີ່ໄຖ່ເຈົ້າຄືນມາ.+
17 ເຮົາຈະເອົາຄຳມາແທນທອງແດງ
ເອົາເງິນມາແທນເຫຼັກ
ເອົາທອງແດງມາແທນໄມ້
ແລະເອົາເຫຼັກມາແທນຫີນ.
ເຮົາຈະໃຫ້ຄວາມສະຫງົບສຸກເປັນຜູ້ເບິ່ງແຍງເຈົ້າ
ແລະໃຫ້ຄວາມຖືກຕ້ອງເປັນຫົວໜ້າເຈົ້າ.+
18 ຈະບໍ່ມີໃຜໄດ້ຍິນເລື່ອງຄວາມຮຸນແຮງໃນແຜ່ນດິນຂອງເຈົ້າ
ແລະຈະບໍ່ມີໃຜໄດ້ຍິນເລື່ອງການທຳລາຍໃນເຂດແດນຂອງເຈົ້າອີກ.+
ເຈົ້າຈະເອີ້ນກຳແພງຂອງເຈົ້າວ່າຄວາມລອດ+ ແລະຈະເອີ້ນປະຕູເມືອງຂອງເຈົ້າວ່າຄຳສັນລະເສີນ.
19 ໃນຕອນກາງເວັນເຈົ້າຈະບໍ່ຕ້ອງໃຫ້ຕາເວັນເປັນແສງສະຫວ່າງໃຫ້ເຈົ້າ
ແລະໃນຕອນກາງຄືນເຈົ້າຈະບໍ່ຕ້ອງໃຫ້ເດືອນສ່ອງແສງໃຫ້ເຈົ້າ
ຍ້ອນພະເຢໂຫວາຈະເປັນແສງສະຫວ່າງໃຫ້ເຈົ້າຕະຫຼອດໄປ.+
ພະເຈົ້າຂອງເຈົ້າຈະສ່ອງແສງໃສ່ເຈົ້າແລະເຮັດໃຫ້ເຈົ້າງົດງາມ.+
20 ຕາເວັນຂອງເຈົ້າຈະບໍ່ຕົກດິນຈັກເທື່ອ
ແລະເດືອນຂອງເຈົ້າຈະສ່ອງແສງຕະຫຼອດ
ຍ້ອນພະເຢໂຫວາຈະເປັນແສງສະຫວ່າງໃຫ້ເຈົ້າສະເໝີ+
ແລະມື້ທີ່ເຈົ້າຕ້ອງໂສກເສົ້າເສຍໃຈກໍຈະບໍ່ມີອີກຕໍ່ໄປ.+
21 ປະຊາຊົນທັງໝົດຂອງເຈົ້າຈະເຮັດສິ່ງທີ່ຖືກຕ້ອງ.
ເຂົາເຈົ້າຈະເປັນເຈົ້າຂອງແຜ່ນດິນນີ້ຕະຫຼອດໄປ.
ເຂົາເຈົ້າເປັນໜໍ່ທີ່ແຕກອອກຈາກເມັດພືດທີ່ເຮົາຫວ່ານ
22 ຄົນຈຳນວນໜ້ອຍຈະເພີ່ມຂຶ້ນເປັນຈຳນວນພັນ.
ຄົນທີ່ອ່ອນແອຈະກາຍເປັນຊາດທີ່ເຂັ້ມແຂງ.
ເຮົາເຢໂຫວາຈະເລັ່ງໃຫ້ສິ່ງນີ້ເກີດຂຶ້ນຕາມເວລາທີ່ເໝາະສົມ.”