ເອຊາຢາ
37 ເມື່ອກະສັດເຮເຊກີຢາໄດ້ຍິນເລື່ອງນີ້ ລາວກໍຈີກເສື້ອຂອງໂຕເອງແລະນຸ່ງຜ້າເນື້ອຫຍາບເຂົ້າໄປໃນວິຫານຂອງພະເຢໂຫວາ.+ 2 ຈາກນັ້ນ ເຮເຊກີຢາໄດ້ໃຫ້ເອລີຢາກີມທີ່ເປັນຜູ້ເບິ່ງແຍງວັງ ເຊັບນາທີ່ເປັນເລຂາ ແລະພວກຫົວໜ້າປະໂລຫິດນຸ່ງຜ້າເນື້ອຫຍາບໄປຫາຜູ້ພະຍາກອນເອຊາຢາ+ລູກຊາຍຂອງອາມອດ. 3 ເຂົາເຈົ້າເວົ້າກັບເອຊາຢາວ່າ: “ກະສັດເຮເຊກີຢາບອກວ່າ ‘ມື້ນີ້ເປັນມື້ທີ່ພວກເຮົາທຸກລຳບາກ ເປັນມື້ທີ່ພວກເຮົາຖືກດູຖູກຫຼາຍ ແລະເປັນມື້ທີ່ເປັນຕາອາຍແທ້ໆ. ພວກເຮົາເປັນຄືກັບຜູ້ຍິງທີ່ຮອດຍາມເກີດລູກແລ້ວ ແຕ່ບໍ່ມີແຮງເບັ່ງ.+ 4 ພະເຢໂຫວາພະເຈົ້າຄືຊິໄດ້ຍິນທຸກສິ່ງທີ່ຣັບຊາເຄເວົ້າ. ກະສັດອັດຊີເຣຍເຈົ້ານາຍຂອງລາວສົ່ງລາວມາເຍາະເຍີ້ຍພະເຈົ້າຜູ້ມີຊີວິດຢູ່.+ ພະເຢໂຫວາພະເຈົ້າຈະແກ້ແຄ້ນລາວໃນສິ່ງທີ່ລາວເວົ້າ. ຂໍໃຫ້ເຈົ້າອະທິດຖານ+ເພື່ອພວກເຮົາທີ່ຍັງເຫຼືອຢູ່ນີ້.’”+
5 ເມື່ອຄົນຂອງກະສັດເຮເຊກີຢາໄປຫາເອຊາຢາ+ 6 ເອຊາຢາກໍເວົ້າກັບເຂົາເຈົ້າວ່າ: “ໄປບອກເຈົ້ານາຍຂອງພວກເຈົ້າແບບນີ້ ‘ພະເຢໂຫວາບອກວ່າ “ບໍ່ຕ້ອງຢ້ານ+ຍ້ອນສິ່ງທີ່ພວກເຈົ້າໄດ້ຍິນແລະບໍ່ຕ້ອງຢ້ານຍ້ອນຄົນຮັບໃຊ້ຂອງກະສັດອັດຊີເຣຍ+ເວົ້າດູຖູກເຮົາ. 7 ເຮົາຈະປ່ຽນຄວາມຄິດລາວ. ລາວຈະຮູ້ຂ່າວເລື່ອງໜຶ່ງແລ້ວກໍກັບໄປປະເທດຂອງໂຕເອງ+ ແລະເຮົາຈະເຮັດໃຫ້ລາວຖືກຂ້າຕາຍດ້ວຍດາບຢູ່ຫັ້ນ.”’”+
8 ເມື່ອຣັບຊາເຄຮູ້ວ່າກະສັດອັດຊີເຣຍຖອຍກອງທັບອອກຈາກເມືອງລາກິດແລ້ວໄປຕໍ່ສູ້ຢູ່ເມືອງລິບນາແທນ ລາວຈຶ່ງໄປຫາກະສັດຢູ່ຫັ້ນ.+ 9 ເມື່ອກະສັດອັດຊີເຣຍໄດ້ຍິນວ່າຕີຮາກາກະສັດຂອງເອທິໂອເປຍໄດ້ມາຕໍ່ສູ້ລາວ ລາວຈຶ່ງສົ່ງຄົນໄປຫາເຮເຊກີຢາອີກເທື່ອໜຶ່ງ+ແລະສັ່ງເຂົາເຈົ້າວ່າ: 10 “ໃຫ້ພວກເຈົ້າໄປບອກເຮເຊກີຢາກະສັດຂອງຢູດາຈັ່ງຊີ້ ‘ຢ່າໃຫ້ພະເຈົ້າທີ່ເຈົ້າໄວ້ໃຈຕົວະພວກເຈົ້າວ່າ “ກະສັດອັດຊີເຣຍຍຶດເມືອງເຢຣູຊາເລັມບໍ່ໄດ້ດອກ.”+ 11 ເຈົ້າກໍຮູ້ວ່າຂ້ອຍທີ່ເປັນກະສັດອັດຊີເຣຍໄປຕໍ່ສູ້ຢູ່ປະເທດໃດ ຂ້ອຍກໍທຳລາຍປະເທດນັ້ນ.+ ແລ້ວເຈົ້າຄິດວ່າເຈົ້າຊິລອດຫວະ? 12 ຕອນທີ່ປູ່ຍ່າຕານາຍຂອງຂ້ອຍໄປຕໍ່ສູ້ກັບປະເທດຕ່າງໆ ພະເຈົ້າຂອງປະເທດເຫຼົ່ານັ້ນຊ່ວຍປະຊາຊົນຂອງໂຕເອງໄດ້ບໍ?+ ປະເທດໂກຊານ ຮາຣານ+ ເຣເຊັບ ແລະພວກເອເດັນທີ່ຢູ່ເຕລັດຊາຍັງມີຢູ່ຫວະ? 13 ພວກກະສັດຂອງເມືອງຮາມັດ ເມືອງອາປາດ ເມືອງເສຟາວາຢິມ+ ເມືອງເຮນາ ແລະເມືອງອີວາເດ້ຍັງຢູ່ບໍ?’”
14 ເຮເຊກີຢາໄດ້ເອົາຈົດໝາຍຈາກພວກຜູ້ສົ່ງຂ່າວມາອ່ານ. ຈາກນັ້ນ ລາວກໍໄປວິຫານຂອງພະເຢໂຫວາ ແລະເອົາຈົດໝາຍເຫຼົ່ານັ້ນວາງຢູ່ຕໍ່ໜ້າພະເຢໂຫວາ.+ 15 ເຮເຊກີຢາອະທິດຖານຫາພະເຢໂຫວາ+ວ່າ: 16 “ພະເຢໂຫວາຜູ້ບັນຊາການກອງທັບ+ພະເຈົ້າຂອງອິດສະຣາເອນຜູ້ນັ່ງຢູ່ບັນລັງເທິງ*ເຄຣູບ ພະອົງເປັນພະເຈົ້າອົງດຽວທ່ຽງແທ້ຂອງທຸກປະເທດໃນໂລກນີ້. ພະອົງເປັນຜູ້ສ້າງຟ້າແລະໂລກ. 17 ພະເຢໂຫວາ ຂໍໃຫ້ພະອົງຟັງ.+ ພະເຢໂຫວາ ຂໍໃຫ້ພະອົງເບິ່ງ.+ ພະເຈົ້າຜູ້ມີຊີວິດຢູ່ ຂໍພະອົງຟັງທຸກສິ່ງທີ່ເຊນນາເກຣິບເວົ້າເຍາະເຍີ້ຍພະອົງ.+ 18 ພະເຢໂຫວາ ກະແມ່ນຢູ່ທີ່ພວກກະສັດອັດຊີເຣຍໄດ້ທຳລາຍປະເທດຕ່າງໆ+ລວມທັງປະເທດຂອງເຂົາເຈົ້າເອງ 19 ແລະເຂົາເຈົ້າໄດ້ໂຍນພະເຈົ້າຂອງປະເທດເຫຼົ່ານັ້ນຖິ້ມໃນໄຟ.+ ສິ່ງເຫຼົ່ານັ້ນບໍ່ແມ່ນພະເຈົ້າແທ້ໆ ແຕ່ເປັນສິ່ງທີ່ມະນຸດເອົາໄມ້ແລະຫີນເຮັດຊື່ໆ+ ເຂົາເຈົ້າຈຶ່ງທຳລາຍໄດ້. 20 ພະເຢໂຫວາພະເຈົ້າ ຕອນນີ້ຂໍພະອົງຊ່ວຍພວກເຮົາໃຫ້ລອດຈາກກະສັດອັດຊີເຣຍ ເພື່ອທຸກປະເທດໃນໂລກນີ້ຈະຮູ້ວ່າພະເຢໂຫວາຜູ້ດຽວເທົ່ານັ້ນທີ່ເປັນພະເຈົ້າ.”+
21 ເອຊາຢາລູກຊາຍຂອງອາມອດໄດ້ໃຫ້ຄົນໄປບອກເຮເຊກີຢາວ່າ: “ພະເຢໂຫວາພະເຈົ້າຂອງອິດສະຣາເອນເວົ້າຈັ່ງຊີ້ ‘ຍ້ອນເຈົ້າອະທິດຖານຫາເຮົາເລື່ອງເຊນນາເກຣິບກະສັດຂອງອັດຊີເຣຍ+ 22 ເຮົາເຢໂຫວາຈຶ່ງເວົ້າກ່ຽວກັບລາວວ່າ:
“ລູກສາວຂອງຊີໂອນທີ່ເປັນສາວບໍລິສຸດຊັງເຈົ້າຫຼາຍແລະລາວກໍເຍາະເຍີ້ຍເຈົ້າ.
ລູກສາວຂອງເຢຣູຊາເລັມແກວ່ງຫົວໃສ່ເຈົ້າ.
23 ເຈົ້າຮູ້ບໍວ່າເຈົ້າເວົ້າເຍາະເຍີ້ຍໃຜ+ແລະດູຖູກໃຜ
ເຈົ້າຮູ້ບໍວ່າເຈົ້າຮ້ອງທັ່ງໃສ່ໃຜ?+
ແລະຮູ້ບໍວ່າເຈົ້າເບິ່ງໃຜດ້ວຍທ່າທາງທີ່ຈອງຫອງ?
ຜູ້ນັ້ນແມ່ນພະເຈົ້າອົງບໍລິສຸດຂອງອິດສະຣາເອນ.+
24 ເຈົ້າໃຊ້ຄົນໄປເຍາະເຍີ້ຍພະເຢໂຫວາ+ວ່າ
‘ຂ້ອຍຈະເອົາລົດມ້າທັງໝົດຂອງຂ້ອຍ
ແລ້ວຂຶ້ນໄປເທິງພູສູງຕ່າງໆ+
ແລະໄປຮອດບ່ອນທີ່ໄກທີ່ສຸດຂອງເລບານອນ.
ຂ້ອຍຈະຕັດເອົາຕົ້ນຊີດ້າ*ທີ່ງາມໆແລະຕົ້ນຈູນິເປີ້*ທີ່ດີໆ.
ຂ້ອຍຈະເຂົ້າໄປໃນບ່ອນທີ່ເລິກທີ່ສຸດແລະເຂົ້າໄປໃນປ່າທີ່ເປັນສວນທີ່ງາມໆ.
25 ຂ້ອຍຈະຂຸດນ້ຳສ້າງແລະກິນນ້ຳສ້າງເຫຼົ່ານັ້ນ.
ຂ້ອຍຈະຢຽບຄອງນ້ຳຕ່າງໆຂອງແມ່ນ້ຳນິນໃນເອຢິບໃຫ້ແຫ້ງ.’
26 ເຈົ້າບໍ່ເຄີຍໄດ້ຍິນບໍ? ເຮົາຕັດສິນໃຈໄວ້ແຕ່ດົນແລ້ວ.
ເຮົາວາງແຜນໄວ້ແຕ່ດົນແລ້ວ+
ແລະຕອນນີ້ເຮົາຈະເຮັດໃຫ້ມັນເກີດຂຶ້ນແທ້.+
ເຈົ້າຈະເຮັດໃຫ້ເມືອງຕ່າງໆທີ່ມີກຳແພງອ້ອມເຫຼືອແຕ່ຊາກຫັກພັງ.+
27 ຄົນທີ່ຢູ່ເມືອງນັ້ນຈະເຮັດຫຍັງບໍ່ໄດ້.
ເຂົາເຈົ້າຈະພາກັນຢ້ານແລະຖືກເຮັດໃຫ້ຂາຍໜ້າ.
ເຂົາເຈົ້າຈະອ່ອນແອຄືກັບພືດຜັກແລະຕົ້ນຫຍ້າ
ແລະຈະເປັນຄືກັບຫຍ້າເທິງຫຼັງຄາທີ່ຖືກລົມຮ້ອນຈາກທິດຕາເວັນອອກເຜົາ.
28 ແຕ່ເຮົາຮູ້ທຸກຢ່າງທີ່ເຈົ້າເຮັດ ບໍ່ວ່າເຈົ້າຈະນັ່ງ ຫຼືໄປໃສມາໃສ+
ຫຼືຕອນທີ່ເຈົ້າໃຈຮ້າຍໃຫ້ເຮົາ ເຮົາກໍຮູ້.+
29 ຍ້ອນເຮົາໄດ້ຍິນຄຳເວົ້າທີ່ເຈົ້າໃຈຮ້າຍໃຫ້ເຮົາ+ແລະທີ່ເຈົ້າດ່າເຮົາ+
ເຮົາຈະເອົາຂໍເກາະເກາະດັງເຈົ້າ ແລະເຮົາຈະເອົາເຊືອກ*+ຄາດໃສ່ປາກເຈົ້າ
ແລ້ວດຶງເຈົ້າກັບເມືອທາງທີ່ເຈົ້າມາ.”
30 ເຮົາຈະເຮັດແບບນີ້ເພື່ອຢືນຢັນໃຫ້ເຈົ້າ*ໝັ້ນໃຈວ່າສິ່ງທີ່ເຮົາເວົ້າຈະເກີດຂຶ້ນແທ້. ປີນີ້ເຈົ້າຈະໄດ້ກິນເຂົ້າທີ່ເກີດເອງ* ແລະປີໜ້າເຈົ້າກໍຈະໄດ້ກິນເຂົ້າທີ່ເກີດເອງຢູ່ບ່ອນເກົ່າ. ແຕ່ໃນປີຕໍ່ໄປເຈົ້າຈະໄດ້ຫວ່ານແລະເກັບກ່ຽວ ແລະເຈົ້າຈະໄດ້ເຮັດສວນໝາກລະແຊັງແລະກິນໝາກຂອງມັນ.+ 31 ພວກຢູດາທີ່ລອດຊີວິດ+ຈະຢັ່ງຮາກເລິກລົງດິນແລະເກີດດອກອອກໝາກ. 32 ເລື່ອງນີ້ຈະເກີດຂຶ້ນຍ້ອນຄົນທີ່ເຫຼືອຢູ່ເມືອງເຢຣູຊາເລັມຈຳນວນໜຶ່ງຈະຍ້າຍອອກໄປ ແລະພວກທີ່ໜີໄປລີ້ຢູ່ພູຊີໂອນກໍຈະອອກມາ.+ ພະເຢໂຫວາຜູ້ບັນຊາການກອງທັບຈະເຮັດສິ່ງເຫຼົ່ານີ້ຕາມທີ່ເພິ່ນຕັ້ງໃຈໄວ້.+
33 ພະເຢໂຫວາເວົ້າກ່ຽວກັບກະສັດອັດຊີເຣຍວ່າ+
“ລາວຈະບໍ່ໄດ້ເຂົ້າມາໃນເມືອງນີ້+
ແລະຈະບໍ່ໄດ້ຍິງທະນູຢູ່ນີ້.
ລາວຈະບໍ່ໄດ້ຖືໂລ້ມາຕໍ່ສູ້
ແລະຈະບໍ່ໄດ້ເອົາດິນມາກອງເປັນໂນນຈຸກຳແພງເພື່ອໂຈມຕີເມືອງນີ້.”’+
34 ‘ລາວມາທາງໃດກໍຈະກັບໄປທາງນັ້ນ.
ລາວຈະບໍ່ໄດ້ເຂົ້າມາໃນເມືອງນີ້.’ ພະເຢໂຫວາເວົ້າແບບນີ້.
35 ‘ເຮົາຈະປົກປ້ອງແລະຊ່ວຍເມືອງນີ້+ໃຫ້ລອດເພື່ອເຫັນແກ່ຊື່ຂອງເຮົາ+
ແລະເຫັນແກ່ດາວິດຜູ້ຮັບໃຊ້ຂອງເຮົາ.’”+
36 ທູດສະຫວັນອົງໜຶ່ງຂອງພະເຢໂຫວາໄດ້ໄປຄ້າຍຂອງພວກອັດຊີເຣຍແລະຂ້າທະຫານ 185.000 ຄົນຕາຍ. ເມື່ອມີຄົນຕື່ນຂຶ້ນມາຕອນເຊົ້າ ເຂົາເຈົ້າກໍເຫັນສົບພວກທະຫານທີ່ຕາຍຢາຍກັນຢູ່.+ 37 ເມື່ອເປັນແບບນັ້ນ ເຊນນາເກຣິບກະສັດຂອງອັດຊີເຣຍຈຶ່ງກັບໄປຢູ່ເມືອງນີເນເວ.+ 38 ມື້ໜຶ່ງຕອນທີ່ເຊນນາເກຣິບກຳລັງກົ້ມກາບພະນິດສະໂຣກຢູ່ໃນວິຫານ ລູກຊາຍຂອງລາວຊື່ອັດຣຳເມເລັກກັບຊາເຣັດເຊໄດ້ເອົາດາບຂ້າລາວຕາຍ+ ແລ້ວເຂົາເຈົ້າກໍໜີໄປຢູ່ອາຣາຣັດ.+ ອາຊາຮັດໂດນ+ລູກຊາຍອີກຜູ້ໜຶ່ງຂອງເຊນນາເກຣິບກໍເປັນກະສັດແທນ.