ຈົດເຊັນບັນຊີ
13 ພະເຢໂຫວາເວົ້າກັບໂມເຊວ່າ: 2 “ໃຫ້ສົ່ງຄົນໄປສອດແນມແຜ່ນດິນການາອານທີ່ເຮົາຈະເອົາໃຫ້ພວກອິດສະຣາເອນ. ໃຫ້ເຈົ້າເລືອກຜູ້ຊາຍຄົນໜຶ່ງຈາກແຕ່ລະຕະກູນທີ່ເປັນຫົວໜ້າ+ ແລ້ວສົ່ງໄປສອດແນມ.”+
3 ໂມເຊສົ່ງເຂົາເຈົ້າອອກຈາກບ່ອນກັນດານປາຣານ+ ຕາມທີ່ພະເຢໂຫວາສັ່ງ. ຜູ້ຊາຍເຫຼົ່ານັ້ນເປັນຫົວໜ້າຂອງຄົນອິດສະຣາເອນ. 4 ເຂົາເຈົ້າມີຊື່ດັ່ງຕໍ່ໄປນີ້: ຊາມມູອາລູກຊາຍຂອງຊາກູເຣ ຈາກຕະກູນຣູເບັນ; 5 ຊາຟາດລູກຊາຍຂອງໂຮຣີ ຈາກຕະກູນຊີເມໂອນ; 6 ກາເລັບ+ລູກຊາຍຂອງເຢຟຸນເນ ຈາກຕະກູນຢູດາ; 7 ອີການລູກຊາຍຂອງໂຢເຊັບ ຈາກຕະກູນອິດຊາຄາ; 8 ໂຮເຊຢາ+ລູກຊາຍຂອງນູນ ຈາກຕະກູນເອຟຣາຢິມ; 9 ປານຕີລູກຊາຍຂອງຣາຟູ ຈາກຕະກູນເບັນຢາມິນ; 10 ກາດດີເອນລູກຊາຍຂອງໂສດີ ຈາກຕະກູນເຊບູລູນ; 11 ກາດດີລູກຊາຍຂອງສູສີ ຈາກຕະກູນມານາເຊ+ເຊິ່ງກໍຄືຕະກູນໂຢເຊັບ;+ 12 ອຳມີເອນລູກຊາຍຂອງເກມາລີ ຈາກຕະກູນດານ; 13 ເສທູເຣລູກຊາຍຂອງມີກາເອນ ຈາກຕະກູນອາເຊ; 14 ນາບີລູກຊາຍຂອງໂວບສີ ຈາກຕະກູນນັບທາລີ; 15 ແລະເກອູເອນລູກຊາຍຂອງມາກິ ຈາກຕະກູນຄາດ. 16 ນີ້ແມ່ນລາຍຊື່ຂອງຄົນທີ່ໂມເຊສົ່ງໄປສອດແນມແຜ່ນດິນການາອານ. ໂມເຊໄດ້ປ່ຽນຊື່ຂອງໂຮເຊຢາລູກຊາຍຂອງນູນເປັນໂຢຊວຍ.*+
17 ຕອນທີ່ໂມເຊສົ່ງເຂົາເຈົ້າໄປສອດແນມແຜ່ນດິນການາອານ ລາວບອກວ່າ: “ໃຫ້ຂຶ້ນໄປທາງເນເກັບ* ຈາກນັ້ນໃຫ້ຂຶ້ນໄປທາງເຂດທີ່ມີພູຫຼາຍໆໜ່ວຍ.+ 18 ພວກເຈົ້າຕ້ອງໄປສືບເບິ່ງວ່າແຜ່ນດິນນັ້ນເປັນແນວໃດ+ ຄົນຢູ່ຫັ້ນແຂງແຮງຫຼືອ່ອນແອ ມີຫຼາຍຫຼືມີໜ້ອຍ 19 ແຜ່ນດິນນັ້ນດີຫຼືບໍ່ດີ ເມືອງທີ່ເຂົາເຈົ້າຢູ່ມີກຳແພງອ້ອມຫຼືບໍ່ມີ 20 ແຜ່ນດິນນັ້ນອຸດົມສົມບູນຫຼືແຫ້ງແລ້ງ+ ມີຕົ້ນໄມ້ຫຼາຍຫຼືບໍ່ຫຼາຍ. ພວກເຈົ້າຕ້ອງກ້າຫານ+ແລະເອົາໝາກໄມ້ຈາກແຜ່ນດິນນັ້ນມານຳ.” ຕອນນັ້ນ ເປັນລະດູເກັບກ່ຽວໝາກລະແຊັງຊຸດທຳອິດພໍດີ.+
21 ເຂົາເຈົ້າຈຶ່ງຂຶ້ນໄປສອດແນມແຜ່ນດິນນັ້ນ ຕັ້ງແຕ່ບ່ອນກັນດານຊິນ+ໄປຈົນຮອດເຣໂຮບ+ທີ່ຢູ່ໃກ້ໆເລໂບຮາມັດ.+ 22 ເມື່ອເຂົາເຈົ້າຂຶ້ນໄປທາງເນເກັບ ເຂົາເຈົ້າກໍໄປຮອດເມືອງເຮັບໂຣນ+ ເຊິ່ງເປັນເມືອງທີ່ອາຮີມານ ເຊຊາຍ ແລະຕານມາຍ*+ທີ່ເປັນລູກຫຼານຂອງອານາກ+ອາໄສຢູ່. ເມືອງເຮັບໂຣນນີ້ຖືກສ້າງຂຶ້ນກ່ອນເມືອງໂຊອານໃນແຜ່ນດິນເອຢິບ 7 ປີ. 23 ເມື່ອໄປຮອດຮ່ອມພູເອັດຊະໂຄນ+ ເຂົາເຈົ້າໄດ້ຕັດເອົາງ່າໄມ້ທີ່ມີພວງໝາກລະແຊັງ ເຊິ່ງໜັກຫຼາຍຈົນຕ້ອງໄດ້ໃຫ້ຜູ້ຊາຍ 2 ຄົນໃຊ້ໄມ້ຫາມໄປ. ເຂົາເຈົ້າຍັງໄດ້ເອົາໝາກພິລາກັບໝາກເດື່ອມານຳ.+ 24 ເຂົາເຈົ້າເອີ້ນບ່ອນນັ້ນວ່າຮ່ອມພູ*ເອັດຊະໂຄນ*+ ຍ້ອນພວກອິດສະຣາເອນໄດ້ຕັດເຄືອໝາກລະແຊັງມາຈາກຮ່ອມພູນັ້ນ.
25 ເຂົາເຈົ້າໄປສອດແນມແຜ່ນດິນນັ້ນ 40 ມື້+ແລ້ວກໍກັບມາ. 26 ເຂົາເຈົ້າກັບມາຫາໂມເຊແລະອາໂຣນກັບພວກອິດສະຣາເອນຢູ່ກາເດັດໃນບ່ອນກັນດານປາຣານ.+ ພວກຄົນສອດແນມໄດ້ບອກໃຫ້ທຸກຄົນຮູ້ວ່າແຜ່ນດິນນັ້ນເປັນແນວໃດ ແລະເອົາໝາກໄມ້ຈາກແຜ່ນດິນນັ້ນໃຫ້ເຂົາເຈົ້າເບິ່ງນຳ. 27 ພວກຄົນສອດແນມເລົ່າໃຫ້ໂມເຊຟັງວ່າ: “ພວກເຮົາເຂົ້າໄປໃນແຜ່ນດິນນັ້ນແລະກໍເຫັນວ່າແຜ່ນດິນນັ້ນມີນ້ຳນົມກັບນ້ຳເຜີ້ງຫຼາຍແທ້ໆ+ ແລະນີ້ແມ່ນໝາກໄມ້ທີ່ພວກເຮົາເອົາມາ.+ 28 ແຕ່ຄົນທີ່ຢູ່ຫັ້ນເປັນຄົນແຂງແຮງ. ເມືອງຕ່າງໆຂອງເຂົາເຈົ້າໃຫຍ່ຫຼາຍແລະມີກຳແພງອ້ອມນຳ ແລະພວກເຮົາກໍເຫັນພວກລູກຫຼານຂອງອານາກຢູ່ຫັ້ນ.+ 29 ຄົນອາມາເລັກ+ຢູ່ເຂດເນເກັບ.+ ຄົນເຮດ ຄົນເຢບຸດ+ ແລະຄົນອາໂມ+ຢູ່ເຂດທີ່ມີພູຫຼາຍໆໜ່ວຍ. ຄົນການາອານ+ຢູ່ໃກ້ໆທະເລ+ແລະຕາມແຄມຝັ່ງແມ່ນ້ຳຈໍແດນ.”
30 ກາເລັບພະຍາຍາມເຮັດໃຫ້ປະຊາຊົນມິດງຽບເພື່ອໃຫ້ຟັງໂມເຊ ໂດຍເວົ້າວ່າ: “ໃຫ້ພວກເຮົາຂຶ້ນໄປຕອນນີ້ໂລດ. ພວກເຮົາຈະຍຶດແຜ່ນດິນນັ້ນໄດ້ ເພາະພວກເຮົາຈະຊະນະຄົນທີ່ຢູ່ຫັ້ນໄດ້ແນ່ນອນ.”+ 31 ແຕ່ພວກຄົນສອດແນມທີ່ໄປນຳກາເລັບເວົ້າວ່າ: “ພວກເຮົາຂຶ້ນໄປຕໍ່ສູ້ກັບພວກນັ້ນບໍ່ໄຫວດອກ ຍ້ອນພວກເຂົາແຂງແຮງກວ່າພວກເຮົາ.”+ 32 ເຂົາເຈົ້າເວົ້າແນວບໍ່ດີກ່ຽວກັບແຜ່ນດິນທີ່ເຂົາເຈົ້າໄປສອດແນມໃຫ້ພວກອິດສະຣາເອນຟັງບໍ່ຢຸດບໍ່ເຊົາ+ວ່າ: “ແຜ່ນດິນນັ້ນອັນຕະລາຍ. ຖ້າພວກເຮົາໄປຢູ່ກໍຕ້ອງຕາຍແທ້ໆ ແລະຄົນທີ່ຢູ່ຫັ້ນທຸກຄົນເປັນຄົນໂຕໃຫຍ່ຜິດທຳມະຊາດ+ 33 ແລະພວກເຮົາຍັງໄດ້ເຫັນພວກລູກຫຼານຂອງອານາກ+ທີ່ສືບເຊື້ອສາຍມາຈາກພວກຄົນຮ່າງຍັກ.* ຖ້າທຽບກັນແລ້ວ ພວກເຮົາກໍສ່ຳກັບຕັກກະແຕນ ແລະພວກເຂົາກໍຈະເຫັນພວກເຮົາເປັນຕັກກະແຕນຄືກັນ.”