ຂ່າວຄາວສະບັບທີສອງ
25 ອາມາຊີຢາເປັນກະສັດຕອນອາຍຸ 25 ປີ ແລະລາວປົກຄອງຢູ່ເມືອງເຢຣູຊາເລັມ 29 ປີ. ແມ່ຂອງລາວຊື່ເຢໂຮອັດດັນ*ເປັນຄົນເຢຣູຊາເລັມ.+ 2 ລາວເຮັດສິ່ງທີ່ພະເຢໂຫວາເບິ່ງວ່າຖືກຕ້ອງ ແຕ່ບໍ່ໄດ້ເຮັດສຸດຫົວໃຈ. 3 ເມື່ອການປົກຄອງຂອງລາວໝັ້ນຄົງແລ້ວ ລາວກໍຂ້າພວກຄົນຮັບໃຊ້ທີ່ຂ້າພໍ່ລາວ.+ 4 ແຕ່ອາມາຊີຢາບໍ່ໄດ້ຂ້າລູກຂອງເຂົາເຈົ້າ. ລາວເຮັດຕາມຄຳສັ່ງຂອງພະເຢໂຫວາທີ່ຂຽນໄວ້ໃນກົດໝາຍຂອງໂມເຊທີ່ວ່າ: “ຢ່າຂ້າພໍ່ຍ້ອນຄວາມຜິດຂອງລູກ ແລະຢ່າຂ້າລູກຍ້ອນຄວາມຜິດຂອງພໍ່. ແຕ່ລະຄົນຈະຖືກຂ້າຍ້ອນຄວາມຜິດຂອງໂຕເອງ.”+
5 ອາມາຊີຢາໄດ້ເອີ້ນພວກຢູດາໃຫ້ມາລວມກັນ ແລະໃຫ້ເຂົາເຈົ້າຢືນຕາມຈຸ້ມເຈື້ອເຊິ່ງມີຫົວໜ້າກອງພັນແລະຫົວໜ້າກອງຮ້ອຍເປັນຫົວໜ້າກຸ່ມຂອງເຂົາເຈົ້າ. ລາວເຮັດແບບນີ້ກັບພວກຢູດາແລະພວກເບັນຢາມິນ.+ ລາວຈົດຊື່ຄົນທີ່ມີອາຍຸ 20 ປີຂຶ້ນໄປ+ແລະເຫັນວ່າມີທະຫານ 300.000 ຄົນທີ່ຖືກຝຶກມາຢ່າງດີເຊິ່ງພ້ອມທີ່ຈະໄປຕໍ່ສູ້. ເຂົາເຈົ້າຮູ້ຈັກໃຊ້ຫອກໃຊ້ໂລ້. 6 ລາວເອົາເງິນໜັກ 100 ຕະລັນ*ໄປຈ້າງທະຫານອິດສະຣາເອນທີ່ເກັ່ງໆ 100.000 ຄົນ. 7 ແຕ່ຄົນຂອງພະເຈົ້າທ່ຽງແທ້ເວົ້າກັບອາມາຊີຢາວ່າ: “ກະສັດ ຂໍຢ່າໃຫ້ທະຫານອິດສະຣາເອນໄປຕໍ່ສູ້ນຳກັນກັບທ່ານ ເພາະພະເຢໂຫວາບໍ່ໄດ້ຢູ່ກັບພວກອິດສະຣາເອນ+ຫຼືບໍ່ໄດ້ຢູ່ກັບພວກເອຟຣາຢິມ. 8 ໃຫ້ທ່ານກ້າຫານແລະໄປຕໍ່ສູ້ເອງໂລດ. ພະເຈົ້າທ່ຽງແທ້ມີລິດເດດ ເພິ່ນສາມາດຊ່ວຍທ່ານໃຫ້ຊະນະສັດຕູໄດ້+ ຫຼືເຮັດໃຫ້ສັດຕູຊະນະທ່ານກໍໄດ້.” 9 ອາມາຊີຢາເວົ້າກັບຄົນຂອງພະເຈົ້າທ່ຽງແທ້ວ່າ: “ແລ້ວເງິນໜັກ 100 ຕະລັນ*ທີ່ຂ້ອຍເອົາໃຫ້ພວກທະຫານອິດສະຣາເອນເດ?” ຄົນຂອງພະເຈົ້າທ່ຽງແທ້ຕອບວ່າ: “ພະເຢໂຫວາສາມາດເອົາເງິນໃຫ້ທ່ານໄດ້ຫຼາຍກວ່ານັ້ນອີກ.”+ 10 ອາມາຊີຢາຈຶ່ງບອກພວກທະຫານທີ່ລາວຈ້າງມາຈາກເຂດເອຟຣາຢິມໃຫ້ກັບເມືອເຮືອນຂອງໂຕເອງ. ເຂົາເຈົ້າຈຶ່ງຄຽດໃຫ້ພວກຢູດາຫຼາຍແລະກັບເມືອດ້ວຍຄວາມໃຈຮ້າຍ.
11 ອາມາຊີຢາລວບລວມຄວາມກ້າແລະໄດ້ພາພວກທະຫານຂອງລາວໄປຕໍ່ສູ້ຢູ່ຮ່ອມພູເກືອ.+ ລາວຂ້າຄົນຈາກເສອີຕາຍ 10.000 ຄົນ.+ 12 ພວກຢູດາຈັບຄົນຈາກເສອີໄດ້ອີກ 10.000 ຄົນ ແລະພາເຂົາເຈົ້າໄປບ່ອນທີ່ເປັນເຫວ ແລ້ວຍູ້ໃຫ້ຕົກລົງເຫວຈົນເຂົາເຈົ້າຂາດເປັນຕ່ອນໆ. 13 ພວກທະຫານທີ່ອາມາຊີຢາບໍ່ໃຫ້ໄປຕໍ່ສູ້ນຳ+ໄດ້ໄປປຸ້ນເມືອງຕ່າງໆຂອງຢູດາຕັ້ງແຕ່ຊາມາເຣຍ+ຈົນຮອດເບັດໂຮໂຣນ.+ ເຂົາເຈົ້າຂ້າພວກຢູດາຕາຍ 3.000 ຄົນແລະຍຶດເອົາເຄື່ອງໄປບັກຫຼາຍໆ.
14 ເມື່ອອາມາຊີຢາກັບມາຈາກການຕໍ່ສູ້ກັບພວກເອໂດມ ລາວກໍເອົາຮູບພະຂອງພວກເສອີມານຳແລະຕັ້ງໃຫ້ເປັນພະເຈົ້າຂອງລາວ.+ ລາວເລີ່ມຂາບໄຫວ້ແລະເຜົາເຄື່ອງບູຊາໃຫ້ພະເຈົ້າເຫຼົ່ານັ້ນ. 15 ພະເຢໂຫວາຈຶ່ງໃຈຮ້າຍໃຫ້ອາມາຊີຢາຫຼາຍ. ເພິ່ນໄດ້ໃຫ້ຜູ້ພະຍາກອນຄົນໜຶ່ງໄປເວົ້າກັບລາວວ່າ: “ເປັນຫຍັງທ່ານຂາບໄຫວ້ຮູບພະເຫຼົ່ານີ້? ຂະໜາດພວກເອໂດມທີ່ຂາບໄຫວ້ມັນ ມັນຍັງຊ່ວຍເຂົາເຈົ້າໃຫ້ລອດຈາກທ່ານບໍ່ໄດ້.”+ 16 ຕອນທີ່ຜູ້ພະຍາກອນກຳລັງເວົ້າຢູ່ ອາມາຊີຢາເວົ້າໃຫ້ລາວວ່າ: “ຂ້ອຍແຕ່ງຕັ້ງເຈົ້າໃຫ້ເປັນທີ່ປຶກສາຂອງຂ້ອຍຫວະ?+ ມິດແມະ!+ ຄັນຍັງເວົ້າຕໍ່ ຂ້ອຍຊິຂ້າເຈົ້າຖິ້ມ.” ແຕ່ຜູ້ພະຍາກອນເວົ້າຕໍ່ວ່າ: “ຂ້ອຍຮູ້ວ່າພະເຈົ້າຕັດສິນໃຈທຳລາຍທ່ານແລ້ວ ຍ້ອນທ່ານເຮັດແບບນີ້ແລະບໍ່ຍອມຟັງຂ້ອຍ.”+ ຈາກນັ້ນ ຜູ້ພະຍາກອນກໍມິດ.
17 ຫຼັງຈາກອາມາຊີຢາກະສັດຂອງຢູດາປຶກສາກັບທີ່ປຶກສາຂອງລາວແລ້ວ ລາວກໍສົ່ງຄົນໄປບອກເຢໂຮອາດກະສັດຂອງອິດສະຣາເອນທີ່ເປັນລູກຊາຍຂອງເຢໂຮອາຮາດແລະເປັນຫຼານຂອງເຢຮູວ່າ: “ມາສູ້ກັນເບາະ?”*+ 18 ແລ້ວເຢໂຮອາດກະສັດຂອງອິດສະຣາເອນກໍສົ່ງຂ່າວໄປບອກອາມາຊີຢາກະສັດຂອງຢູດາວ່າ: “ຕົ້ນໜາມຢູ່ເລບານອນສົ່ງຂ່າວໄປບອກຕົ້ນຊີດ້າ*ຢູ່ເລບານອນວ່າ ‘ຍົກລູກສາວເຈົ້າໃຫ້ເປັນເມຍລູກຊາຍຂ້ອຍສະ.’ ແຕ່ສັດປ່າໂຕໜຶ່ງຢູ່ເລບານອນຍ່າງກາຍມາແລະຢຽບຕົ້ນໜາມນັ້ນ. 19 ເຈົ້າເວົ້າວ່າເຈົ້າຂ້າພວກເອໂດມໄດ້+ ເຈົ້າກໍເລີຍຈອງຫອງແລະຢາກມີກຽດຫວະ! ໃຫ້ຢູ່ວັງຂອງເຈົ້າພຸ້ນ. ເປັນຫຍັງເຈົ້າຈຶ່ງຊອກເລື່ອງໃຫ້ຢູດາຈິບຫາຍພ້ອມກັບເຈົ້າ?”
20 ແຕ່ອາມາຊີຢາບໍ່ຟັງ.+ ມັນເປັນແນວນີ້ກໍຍ້ອນພະເຈົ້າທ່ຽງແທ້ຕັ້ງໃຈຈະໃຫ້ສັດຕູຊະນະອາມາຊີຢາແລະຄົນຂອງລາວ+ ຍ້ອນວ່າເຂົາເຈົ້າໄປນະມັດສະການພະເຈົ້າຂອງພວກເອໂດມ.+ 21 ເຢໂຮອາດກະສັດຂອງອິດສະຣາເອນຈຶ່ງໄປຕໍ່ສູ້ກັບອາມາຊີຢາກະສັດຂອງຢູດາຢູ່ເມືອງເບັດເຊເມັດ+ຂອງຢູດາ. 22 ອິດສະຣາເອນຊະນະຢູດາ ແລ້ວທະຫານຂອງຢູດາກໍແຕກໜີກັບເມືອເຮືອນ*ຂອງໃຜຂອງລາວ. 23 ຢູ່ເມືອງເບັດເຊເມັດ ເຢໂຮອາດກະສັດຂອງອິດສະຣາເອນໄດ້ຈັບອາມາຊີຢາກະສັດຂອງຢູດາທີ່ເປັນລູກຊາຍຂອງເຢໂຮອາດແລະເປັນຫຼານຊາຍຂອງເຢໂຮອາຮາດ.* ຈາກນັ້ນ ເຢໂຮອາດກໍພາອາມາຊີຢາໄປເມືອງເຢຣູຊາເລັມ. ເຢໂຮອາດໄດ້ທຳລາຍກຳແພງເມືອງເຢຣູຊາເລັມຕັ້ງແຕ່ປະຕູເອຟຣາຢິມ+ຈົນຮອດປະຕູແຈ+ ລວມທັງໝົດຍາວ 400 ສອກ.* 24 ລາວເອົາເງິນເອົາຄຳທັງໝົດກັບເຄື່ອງໃຊ້ທຸກຢ່າງທີ່ຢູ່ໃນວິຫານຂອງພະເຈົ້າທ່ຽງແທ້ທີ່ໂອເບັດເອໂດມເບິ່ງແຍງແລະໃນຄັງຊັບສິນຢູ່ວັງຂອງກະສັດໄປ.+ ລາວຍັງໄດ້ຈັບເອົາຊະເລີຍໄປນຳ. ແລ້ວເຢໂຮອາດກໍກັບໄປເມືອງຊາມາເຣຍ.
25 ຫຼັງຈາກເຢໂຮອາດ+ລູກຊາຍຂອງເຢໂຮອາຮາດກະສັດຂອງອິດສະຣາເອນຕາຍ+ ອາມາຊີຢາ+ລູກຊາຍຂອງເຢໂຮອາດກະສັດຂອງຢູດາກໍມີຊີວິດຢູ່ຕໍ່ອີກ 15 ປີ. 26 ເລື່ອງຕ່າງໆຂອງອາມາຊີຢາຕັ້ງແຕ່ຕົ້ນຈົນຈົບກໍຂຽນໄວ້ໃນປຶ້ມຂອງພວກກະສັດຢູດາແລະພວກກະສັດອິດສະຣາເອນ. 27 ນັບຕັ້ງແຕ່ອາມາຊີຢາເຊົານະມັດສະການພະເຢໂຫວາກໍມີຄົນວາງແຜນຂ້າລາວ+ຢູ່ເມືອງເຢຣູຊາເລັມ. ລາວຈຶ່ງໜີໄປເມືອງລາກິດ ແຕ່ເຂົາເຈົ້າກໍສົ່ງຄົນນຳລາວໄປແລະຂ້າລາວຕາຍຢູ່ຫັ້ນ. 28 ເຂົາເຈົ້າເອົາສົບຂອງອາມາຊີຢາໃສ່ລົດມ້າກັບມາແລະຝັງລາວໄວ້ກັບປູ່ຍ່າຕານາຍຂອງລາວຢູ່ຢູດາ.