ຂ່າວຄາວສະບັບທີສອງ
12 ເມື່ອການປົກຄອງຂອງເຣໂຮໂບອາມໝັ້ນຄົງ+ແລະລາວມີກຳລັງເຂັ້ມແຂງແລ້ວ ເຣໂຮໂບອາມກັບພວກອິດສະຣາເອນທີ່ຢູ່ຝ່າຍລາວກໍເຊົາເຮັດຕາມກົດໝາຍຂອງພະເຢໂຫວາ.+ 2 ໃນປີທີ 5 ທີ່ກະສັດເຣໂຮໂບອາມປົກຄອງ ຊີຊາກ+ກະສັດຂອງເອຢິບກໍມາໂຈມຕີເມືອງເຢຣູຊາເລັມ ຍ້ອນພວກອິດສະຣາເອນບໍ່ສັດຊື່ຕໍ່ພະເຢໂຫວາ. 3 ຊີຊາກມີລົດມ້າ 1.200 ຄັນ ທະຫານມ້າ 60.000 ຄົນ ແລະມີກອງທັບຫຼາຍແທ້ຫຼາຍວ່າມານຳລາວຈາກເອຢິບ. ໃນກອງທັບເຫຼົ່ານັ້ນມີພວກລີເບຍ ພວກສຸກກີ ແລະພວກເອທິໂອເປຍຢູ່ນຳ.+ 4 ຊີຊາກຍຶດເມືອງຕ່າງໆທີ່ມີກຳແພງອ້ອມໃນຢູດາໄດ້ ແລະໃນທີ່ສຸດກອງທັບຂອງລາວກໍມາຮອດເມືອງເຢຣູຊາເລັມ.
5 ພວກເຈົ້ານາຍຂອງຢູດາໄດ້ມາຫາເຣໂຮໂບອາມຢູ່ເມືອງເຢຣູຊາເລັມຍ້ອນວ່າຢ້ານຊີຊາກ. ຕອນນັ້ນ ຜູ້ພະຍາກອນເຊມາຢາ+ກໍມາຫາເຂົາເຈົ້າແລະເວົ້າວ່າ: “ພະເຢໂຫວາເວົ້າຈັ່ງຊີ້ ‘ຍ້ອນພວກເຈົ້າຖິ້ມເຮົາ ເຮົາຈຶ່ງຖິ້ມພວກເຈົ້າ+ແລະຍອມໃຫ້ຊີຊາກມາໂຈມຕີພວກເຈົ້າ.’” 6 ພວກເຈົ້ານາຍຂອງອິດສະຣາເອນກັບກະສັດໄດ້ຮູ້ສຶກຜິດແລະຖ່ອມໂຕ.+ ເຂົາເຈົ້າເວົ້າວ່າ: “ພະເຢໂຫວາເຮັດຖືກແລ້ວ.” 7 ເມື່ອພະເຢໂຫວາເຫັນວ່າເຂົາເຈົ້າຮູ້ສຶກຜິດແລະຖ່ອມໂຕ ພະເຢໂຫວາຈຶ່ງເວົ້າກັບເຊມາຢາວ່າ: “ຍ້ອນເຂົາເຈົ້າສຳນຶກຜິດ ເຮົາຈະບໍ່ທຳລາຍເຂົາເຈົ້າ+ ແລະອີກຈັກໜ້ອຍເຮົາຈະຊ່ວຍເຂົາເຈົ້າ. ເຮົາຈະບໍ່ໃຈຮ້າຍໃຫ້ເຂົາເຈົ້າແລ້ວ ແລະເຮົາຈະບໍ່ຍອມໃຫ້ຊີຊາກທຳລາຍເມືອງເຢຣູຊາເລັມ. 8 ແຕ່ເຮົາຈະໃຫ້ເຂົາເຈົ້າຮັບໃຊ້ຊີຊາກ ແລ້ວເຂົາເຈົ້າຈະຮູ້ວ່າການຮັບໃຊ້ເຮົາກັບຮັບໃຊ້ກະສັດຂອງປະເທດອື່ນຕ່າງກັນແນວໃດ.”
9 ຊີຊາກກະສັດຂອງເອຢິບໄດ້ມາໂຈມຕີເມືອງເຢຣູຊາເລັມ ລາວເອົາຊັບສົມບັດທີ່ຢູ່ໃນວິຫານຂອງພະເຢໂຫວາ+ແລະໃນວັງຂອງກະສັດໄປ. ລາວເອົາທຸກສິ່ງທຸກຢ່າງ ລວມທັງໂລ້ຄຳທັງໝົດທີ່ໂຊໂລໂມນໄດ້ເຮັດໄປນຳ.+ 10 ກະສັດເຣໂຮໂບອາມຈຶ່ງເຮັດໂລ້ທອງແດງແທນແລະເອົາໂລ້ເຫຼົ່ານັ້ນໃຫ້ພວກຫົວໜ້າທະຫານທີ່ຍາມຢູ່ປະຕູທາງເຂົ້າວັງຂອງກະສັດ. 11 ທຸກເທື່ອທີ່ກະສັດມາວິຫານຂອງພະເຢໂຫວາ ພວກທະຫານຍາມຈະເອົາໂລ້ມາຖືໄວ້. ຈາກນັ້ນ ເຂົາເຈົ້າກໍຈະເອົາໂລ້ກັບໄປມ້ຽນຢູ່ຫ້ອງທະຫານຍາມຄືເກົ່າ. 12 ຍ້ອນກະສັດເຣໂຮໂບອາມຮູ້ສຶກຜິດແລະຖ່ອມໂຕ ພະເຢໂຫວາຈຶ່ງເຊົາໃຈຮ້າຍໃຫ້ລາວ+ ແລະບໍ່ໄດ້ທຳລາຍພວກຢູດາຈົນໝົດ.+ ເພິ່ນເຫັນວ່າເຂົາເຈົ້າຍັງມີສິ່ງທີ່ດີຢູ່.+
13 ກະສັດເຣໂຮໂບອາມມີອຳນາດຫຼາຍຂຶ້ນໃນເມືອງເຢຣູຊາເລັມແລະປົກຄອງຕໍ່ໄປ. ເຣໂຮໂບອາມເປັນກະສັດຕອນອາຍຸ 41 ປີ ແລະລາວປົກຄອງ 17 ປີຢູ່ເຢຣູຊາເລັມເຊິ່ງເປັນເມືອງທີ່ພະເຢໂຫວາເລືອກຈາກທຸກເມືອງໃນຕະກູນຕ່າງໆຂອງອິດສະຣາເອນສຳລັບຊື່ຂອງເພິ່ນ. ແມ່ຂອງເຣໂຮໂບອາມຊື່ນາອາມາເປັນຄົນອຳໂມນ.+ 14 ເຣໂຮໂບອາມເຮັດຊົ່ວ ຍ້ອນລາວບໍ່ໄດ້ຕັ້ງໃຈຊອກຫາການຊີ້ນຳຈາກພະເຢໂຫວາ.+
15 ເລື່ອງຕ່າງໆຂອງກະສັດເຣໂຮໂບອາມຕັ້ງແຕ່ຕົ້ນຈົນຈົບກໍຂຽນໄວ້ໃນປຶ້ມຂອງຜູ້ພະຍາກອນເຊມາຢາ+ກັບປຶ້ມຂອງຜູ້ພະຍາກອນອິດໂດ+ທີ່ມີລາຍຊື່ລູກຫຼານຂອງຕະກູນຕ່າງໆ. ເຣໂຮໂບອາມກັບເຢໂຣໂບອາມເຮັດສົງຄາມຕໍ່ສູ້ກັນຕະຫຼອດ.+ 16 ເມື່ອເຣໂຮໂບອາມຕາຍ ເຂົາເຈົ້າຝັງລາວໄວ້ຢູ່ເມືອງຂອງດາວິດ.+ ອາບີຢາ*+ລູກຊາຍຂອງລາວກໍເປັນກະສັດແທນ.