ຂ່າວຄາວສະບັບທີສອງ
11 ເມື່ອເຣໂຮໂບອາມໄປຮອດເມືອງເຢຣູຊາເລັມ ລາວກໍຟ້າວລວບລວມທະຫານທີ່ເກັ່ງໆ 180.000 ຄົນຈາກຕະກູນຢູດາແລະຕະກູນເບັນຢາມິນ+ໄປຕໍ່ສູ້ກັບພວກອິດສະຣາເອນເພື່ອຍຶດເອົາການປົກຄອງທັງໝົດຂອງລາວກັບຄືນມາ.+ 2 ພະເຢໂຫວາຈຶ່ງບອກເຊມາຢາ+ທີ່ເປັນຜູ້ພະຍາກອນຂອງເພິ່ນ*ວ່າ: 3 “ໃຫ້ເຈົ້າໄປບອກເຣໂຮໂບອາມລູກຊາຍຂອງໂຊໂລໂມນທີ່ເປັນກະສັດຢູດາກັບພວກອິດສະຣາເອນທຸກຄົນໃນຕະກູນຢູດາແລະຕະກູນເບັນຢາມິນວ່າ 4 ‘ພະເຢໂຫວາບອກວ່າ “ຢ່າໄປຕໍ່ສູ້ກັບພີ່ນ້ອງຂອງພວກເຈົ້າ. ໃຫ້ພວກເຈົ້າກັບເມືອເຮືອນສະ ຍ້ອນເຮົາເປັນຜູ້ທີ່ເຮັດໃຫ້ເລື່ອງທັງໝົດນີ້ເກີດຂຶ້ນ.”’”+ ເຂົາເຈົ້າເຊື່ອຟັງພະເຢໂຫວາແລ້ວພາກັນກັບເມືອແລະບໍ່ໄດ້ໄປຕໍ່ສູ້ກັບເຢໂຣໂບອາມ.
5 ເຣໂຮໂບອາມຢູ່ເມືອງເຢຣູຊາເລັມ ແລະລາວໄດ້ເຮັດໃຫ້ເມືອງຕ່າງໆໃນຢູດາເຂັ້ມແຂງຂຶ້ນ. 6 ເມືອງຕ່າງໆທີ່ລາວເຮັດໃຫ້ເຂັ້ມແຂງຂຶ້ນມີ: ເບັດເລເຮັມ+ ເອຕາມ ເຕໂກອາ+ 7 ເບັດຊູຣາ ໂສໂກ+ ອະດຸລາມ+ 8 ກັດ+ ມາເຣຊາ ຊິເຟ+ 9 ອາໂດຣາຢິມ ລາກິດ+ ອາເຊກາ+ 10 ໂຊຣາ ອາຢາໂລນ+ ແລະເຮັບໂຣນ.+ ເມືອງເຫຼົ່ານີ້ແມ່ນເມືອງທີ່ມີກຳແພງອ້ອມໃນເຂດຂອງຕະກູນຢູດາແລະໃນເຂດຂອງຕະກູນເບັນຢາມິນ. 11 ເຣໂຮໂບອາມເຮັດໃຫ້ເມືອງເຫຼົ່ານີ້ເຂັ້ມແຂງຂຶ້ນໂດຍສົ່ງພວກຫົວໜ້າກອງທັບໄປຢູ່ແຕ່ລະເມືອງ ແລ້ວສົ່ງຂອງກິນ ນ້ຳມັນໝາກກອກ ແລະເຫຼົ້າແວງໄປໃຫ້ເຂົາເຈົ້າ. 12 ລາວຍັງໄດ້ສົ່ງໂລ້ໃຫຍ່ກັບຫອກໄປໃຫ້ນຳອີກ. ລາວເຮັດໃຫ້ເມືອງເຫຼົ່ານີ້ເຂັ້ມແຂງຂຶ້ນຫຼາຍ. ລາວປົກຄອງເຂດຂອງຕະກູນຢູດາແລະເຂດຂອງຕະກູນເບັນຢາມິນຕໍ່ໄປ.
13 ພວກປະໂລຫິດແລະພວກເລວີທົ່ວອິດສະຣາເອນໄດ້ຍ້າຍອອກຈາກເຂດທີ່ເຂົາເຈົ້າຢູ່ເພື່ອມາຢູ່ຝ່າຍເຣໂຮໂບອາມ. 14 ພວກເລວີໄດ້ປະຖິ້ມທົ່ງຫຍ້າແລະຊັບສິນຂອງເຂົາເຈົ້າ+ເພື່ອຍ້າຍມາຢູ່ຢູດາແລະເຢຣູຊາເລັມ ຍ້ອນເຢໂຣໂບອາມແລະພວກລູກຊາຍຂອງລາວບໍ່ໃຫ້ເຂົາເຈົ້າເປັນປະໂລຫິດຮັບໃຊ້ພະເຢໂຫວາອີກຕໍ່ໄປ.+ 15 ເຢໂຣໂບອາມແຕ່ງຕັ້ງປະໂລຫິດຂອງໂຕເອງຢູ່ບ່ອນນະມັດສະການຕ່າງໆ+ເພື່ອໃຫ້ເຂົາເຈົ້າພາປະຊາຊົນນະມັດສະການພະເຈົ້າອື່ນໆທີ່ມີຮູບຮ່າງຄ້າຍຄືກັບໂຕແບ້*+ແລະຮູບປັ້ນງົວນ້ອຍທີ່ລາວເຮັດຂຶ້ນມາ.+ 16 ຄົນຈາກທຸກຕະກູນໃນອິດສະຣາເອນທີ່ຕັ້ງໃຈນະມັດສະການພະເຢໂຫວາພະເຈົ້າຂອງອິດສະຣາເອນກໍມາເມືອງເຢຣູຊາເລັມນຳພວກປະໂລຫິດແລະພວກເລວີເພື່ອເຜົາເຄື່ອງບູຊາໃຫ້ພະເຢໂຫວາພະເຈົ້າຂອງປູ່ຍ່າຕານາຍຂອງເຂົາເຈົ້າ.+ 17 ໃນ 3 ປີທຳອິດ ເຂົາເຈົ້າເຊື່ອຟັງພະເຈົ້າຄືກັບດາວິດແລະໂຊໂລໂມນ. ໃນໄລຍະ 3 ປີນັ້ນເຂົາເຈົ້າໄດ້ຊ່ວຍໃຫ້ການປົກຄອງຂອງເຣໂຮໂບອາມລູກຊາຍຂອງໂຊໂລໂມນທີ່ເປັນກະສັດຂອງຢູດາໝັ້ນຄົງຂຶ້ນ.
18 ເຣໂຮໂບອາມແຕ່ງດອງກັບມາຮາລາດລູກສາວຂອງເຢຣີໂມດກັບອາບີຮາຍ. ເຢຣີໂມດເປັນລູກຊາຍຂອງດາວິດ. ອາບີຮາຍເປັນລູກສາວຂອງເອລີອາບ+ທີ່ເປັນລູກຊາຍຂອງເຢຊີ. 19 ເຣໂຮໂບອາມກັບມາຮາລາດໄດ້ລູກນຳກັນຊື່ເຢອຸດ ເຊມາຣີຢາ ແລະຊາຮຳ. 20 ຕໍ່ມາ ເຣໂຮໂບອາມໄດ້ແຕ່ງດອງກັບມາອາກາຫຼານສາວຂອງອັບຊາໂລມ.+ ເຂົາເຈົ້າໄດ້ລູກນຳກັນຊື່ອາບີຢາ+ ອາດຕາຍ ຊີຊາ ແລະເຊໂລມິດ. 21 ເຖິງວ່າເຣໂຮໂບອາມຈະມີເມຍ 18 ຄົນແລະເມຍນ້ອຍ* 60 ຄົນ ແຕ່ລາວກໍຮັກມາອາກາຫຼານສາວຂອງອັບຊາໂລມຫຼາຍກວ່າເມຍທຸກຄົນ.+ ເຣໂຮໂບອາມມີລູກຊາຍທັງໝົດ 28 ຄົນ ແລະລູກສາວທັງໝົດ 60 ຄົນ. 22 ເຣໂຮໂບອາມໄດ້ແຕ່ງຕັ້ງອາບີຢາລູກຊາຍຂອງມາອາກາໃຫ້ເປັນຫົວໜ້າແລະເປັນຜູ້ນຳພວກອ້າຍນ້ອງທັງໝົດ ຍ້ອນເຣໂຮໂບອາມຕັ້ງໃຈທີ່ຈະໃຫ້ອາບີຢາເປັນກະສັດ. 23 ເຣໂຮໂບອາມຈັດການເລື່ອງນີ້ຢ່າງສະຫຼາດໂດຍໃຫ້ລູກຊາຍບາງຄົນໄປຢູ່ຕາມເມືອງຕ່າງໆທີ່ມີກຳແພງອ້ອມໃນເຂດຂອງຕະກູນຢູດາແລະເຂດຂອງຕະກູນເບັນຢາມິນ.+ ລາວສົ່ງຂອງຢູ່ຂອງກິນໄປໃຫ້ເຂົາເຈົ້າຫຼາຍແທ້ຫຼາຍວ່າແລະຍັງເອົາເມຍຫຼາຍຄົນໃຫ້ເຂົາເຈົ້ານຳອີກ.