ພະບັນຍັດ
18 “ປະໂລຫິດກັບຄົນໃນຕະກູນເລວີທັງໝົດຈະບໍ່ໄດ້ຮັບສ່ວນແບ່ງ ຫຼືມໍລະດົກຄືກັບຄົນອິດສະຣາເອນຄົນອື່ນໆ. ເຂົາເຈົ້າຈະໄດ້ກິນສ່ວນແບ່ງຈາກເຄື່ອງບູຊາດ້ວຍໄຟໃຫ້ພະເຢໂຫວາ.+ 2 ຍ້ອນແນວນີ້ ພວກເລວີຈຶ່ງບໍ່ໄດ້ຮັບມໍລະດົກຄືກັບຕະກູນອື່ນໆ. ພະເຢໂຫວາຈະຈັດກຽມສິ່ງຈຳເປັນໃຫ້ເຂົາເຈົ້າຕາມທີ່ເພິ່ນໄດ້ບອກເຂົາເຈົ້າ.
3 ຖ້າປະຊາຊົນຈະເອົາເຄື່ອງບູຊາມາໃຫ້ ບໍ່ວ່າຈະເປັນງົວຫຼືແກະ ເຂົາເຈົ້າຕ້ອງເອົາສ່ວນເຫຼົ່ານີ້ມາໃຫ້ປະໂລຫິດຄື: ຂາໜ້າ ຄາງກະໄຕ ແລະຄູຄັນນາ. 4 ເຈົ້າຕ້ອງເອົາເຂົ້າ ເຫຼົ້າແວງໃໝ່ ນ້ຳມັນໝາກກອກ ແລະຂົນແກະທີ່ຕັດເທື່ອທຳອິດມາໃຫ້ເຂົາເຈົ້ານຳ.+ 5 ພະເຢໂຫວາພະເຈົ້າຂອງເຈົ້າໄດ້ເລືອກລາວ ແລະລູກຫຼານຂອງລາວຈາກຕະກູນທັງໝົດຂອງອິດສະຣາເອນໃຫ້ມາຮັບໃຊ້ໃນຊື່ຂອງພະເຢໂຫວາ.+
6 ຖ້າຄົນເລວີຄົນໃດຢາກຍ້າຍອອກຈາກເມືອງທີ່ລາວຢູ່+ ແລ້ວໄປຢູ່ໃນບ່ອນທີ່ພະເຢໂຫວາໄດ້ເລືອກໄວ້+ ລາວກໍເຮັດໄດ້. 7 ລາວຈະໄປຮັບໃຊ້ຢູ່ຫັ້ນໃນຊື່ຂອງພະເຢໂຫວາພະເຈົ້າຂອງລາວໄດ້ ຄືກັບຍາດຕິພີ່ນ້ອງຂອງລາວທີ່ເປັນຄົນເລວີ ເຊິ່ງເຮັດວຽກຢູ່ບ່ອນນັ້ນຕໍ່ໜ້າພະເຢໂຫວາຢູ່ແລ້ວ.+ 8 ເຖິງວ່າລາວຈະໄດ້ເງິນຈາກການຂາຍເຄື່ອງຂອງຂອງປູ່ຍ່າຕານາຍຂອງລາວແລ້ວ ແຕ່ລາວກໍຈະໄດ້ຮັບອາຫານເທົ່າກັບຄົນອື່ນ.+
9 ເມື່ອເຈົ້າເຂົ້າໄປໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ເຈົ້າແລ້ວ ຫ້າມເຈົ້າເຮັດສິ່ງທີ່ເປັນຕາຂີ້ດຽດຄືກັບຊາດອື່ນໆເຮັດ.+ 10 ຢ່າໃຫ້ຜູ້ໃດເອົາລູກຊາຍຫຼືລູກສາວຂອງໂຕເອງໄປເຜົາບູຊາ.*+ ຢ່າໃຫ້ຜູ້ໃດທຳນາຍອະນາຄົດ*+ ໃຊ້ມົນ+ ຫຼືເບິ່ງໂຊກເບິ່ງລາງ.+ 11 ຢ່າໃຫ້ຜູ້ໃດເສກຂອງໃສ່ຜູ້ອື່ນ. ຢ່າໃຫ້ຜູ້ໃດໄປປຶກສາຄົນຊົງ+ ໝໍດູ+ ຫຼືໄປຖາມຂ່າວຫາຄົນຕາຍ.+ 12 ພະເຢໂຫວາຂີ້ດຽດຄົນທີ່ເຮັດສິ່ງເຫຼົ່ານີ້ ແລະຍ້ອນຄົນເຫຼົ່ານີ້ເຮັດສິ່ງທີ່ເປັນຕາຂີ້ດຽດ ພະເຢໂຫວາພະເຈົ້າຂອງເຈົ້າຈຶ່ງຂັບໄລ່ພວກເຂົາອອກໄປຈາກແຜ່ນດິນຂອງເຈົ້າ. 13 ເຈົ້າຕ້ອງເປັນຄົນດີບໍ່ມີບ່ອນຕິຕໍ່ໜ້າພະເຢໂຫວາພະເຈົ້າຂອງເຈົ້າ.+
14 ຊາດຕ່າງໆທີ່ພວກເຈົ້າຈະຂັບໄລ່ອອກໄປນັ້ນມັກຟັງຄວາມພວກທີ່ໃຊ້ຄາຖາອາຄົມ+ແລະທຳນາຍອະນາຄົດ+ ແຕ່ພະເຢໂຫວາພະເຈົ້າຂອງພວກເຈົ້າຈະບໍ່ຍອມໃຫ້ພວກເຈົ້າເຮັດແນວນັ້ນ. 15 ພະເຢໂຫວາພະເຈົ້າຂອງພວກເຈົ້າຈະແຕ່ງຕັ້ງຄົນໜຶ່ງໃນພວກເຈົ້າໃຫ້ເປັນຜູ້ພະຍາກອນຄືກັບຂ້ອຍ. ພວກເຈົ້າຕ້ອງຟັງຄວາມລາວ.+ 16 ການເຮັດແນວນີ້ເປັນໄປຕາມທີ່ພວກເຈົ້າໄດ້ຂໍພະເຢໂຫວາພະເຈົ້າຂອງພວກເຈົ້າຢູ່ພູໂຮເຣັບໃນມື້ທີ່ພວກເຈົ້າມາປະຊຸມກັນ.+ ພວກເຈົ້າບອກວ່າ ‘ຢ່າໃຫ້ພວກເຮົາໄດ້ຍິນສຽງຂອງພະເຢໂຫວາພະເຈົ້າຂອງພວກເຮົາຫຼືເຫັນໄຟທີ່ລຸກແຮງນີ້ອີກເລີຍ ເພື່ອພວກເຮົາຊິບໍ່ຕາຍ.’+ 17 ແລ້ວພະເຢໂຫວາກໍບອກຂ້ອຍວ່າ ‘ເຂົາເຈົ້າເວົ້າຖືກແລ້ວ. 18 ເຮົາຈະແຕ່ງຕັ້ງຄົນໜຶ່ງໃນພວກເຂົາເຈົ້າໃຫ້ເປັນຜູ້ພະຍາກອນຄືກັບເຈົ້າ.+ ເຮົາຈະບອກລາວວ່າຕ້ອງເວົ້າຫຍັງ+ ແລະລາວຈະບອກເຂົາເຈົ້າຕາມທີ່ເຮົາສັ່ງ.+ 19 ຖ້າລາວເວົ້າໃນຊື່ຂອງເຮົາ ແລ້ວມີຄົນບໍ່ຟັງຄວາມລາວ ຜູ້ນັ້ນກໍຈະຖືກລົງໂທດ.+
20 ຖ້າຜູ້ພະຍາກອນຄົນໃດອ້າງຊື່ຂອງເຮົາ ໂດຍທີ່ເຮົາບໍ່ໄດ້ສັ່ງໃຫ້ລາວເວົ້າ ຫຼືຖ້າລາວເວົ້າໃນຊື່ຂອງພະເຈົ້າອື່ນ ຜູ້ພະຍາກອນຄົນນັ້ນຈະຕ້ອງຕາຍ.+ 21 ແຕ່ເຈົ້າອາດສົງໄສວ່າ “ພວກເຮົາຈະຮູ້ໄດ້ແນວໃດວ່າພະເຢໂຫວາບໍ່ໄດ້ບອກແນວນັ້ນ?” 22 ຖ້າຜູ້ພະຍາກອນໄດ້ເວົ້າໂດຍໃຊ້ຊື່ຂອງພະເຢໂຫວາ ແລະເລື່ອງທີ່ລາວເວົ້າບໍ່ໄດ້ເກີດຂຶ້ນແທ້ ກໍໝາຍຄວາມວ່າພະເຢໂຫວາບໍ່ໄດ້ບອກແນວນັ້ນ. ຜູ້ພະຍາກອນຄົນນັ້ນເວົ້າເອົາເອງ ເຈົ້າບໍ່ຕ້ອງຢ້ານລາວ.’”