ຈົດໝາຍສະບັບທຳອິດເຖິງຕີໂມທຽວ
6 ໃຫ້ຄົນທີ່ເປັນທາດນັບຖືນາຍຂອງໂຕເອງຈາກໃຈ+ ເພື່ອບໍ່ໃຫ້ຜູ້ໃດເວົ້າໝິ່ນປະໝາດຊື່ແລະຄຳສອນຂອງພະເຈົ້າໄດ້.+ 2 ສ່ວນທາດທີ່ມີນາຍເປັນຜູ້ທີ່ມີຄວາມເຊື່ອ ຢ່າໝິ່ນປະໝາດນາຍຍ້ອນວ່າເປັນພີ່ນ້ອງກັນ. ແຕ່ຄວນເຕັມໃຈຮັບໃຊ້ນາຍໃຫ້ຫຼາຍຂຶ້ນ ຍ້ອນນາຍທີ່ລາວຮັບໃຊ້ຢູ່ນັ້ນເປັນພີ່ນ້ອງຮ່ວມຄວາມເຊື່ອແລະເປັນພີ່ນ້ອງທີ່ຮັກ.
ໃຫ້ເຈົ້າສອນແລະແນະນຳເລື່ອງເຫຼົ່ານີ້ຕໍ່ໄປ. 3 ຖ້າມີຜູ້ໃດມາແພ່ຄຳສອນຕົວະ ແລະບໍ່ເຫັນດີກັບຄຳສອນທີ່ເປັນປະໂຫຍດ+ເຊິ່ງມາຈາກພະເຢຊູຄລິດຜູ້ເປັນນາຍຂອງພວກເຮົາ ຫຼືບໍ່ເຫັນດີກັບຄຳສອນທີ່ໃຫ້ສັດຊື່ຕໍ່ພະເຈົ້າ+ 4 ຜູ້ນັ້ນກໍເປັນຄົນອວດດີແລະບໍ່ເຂົ້າໃຈຫຍັງເລີຍ.+ ລາວມັກຖຽງທຸກເລື່ອງແມ່ນແຕ່ເລື່ອງຄຳເລັກໆນ້ອຍໆ.+ ການເຮັດແບບນີ້ເຮັດໃຫ້ເກີດຄວາມອິດສາ ການຜິດຖຽງກັນ ການເວົ້າດູຖູກກັນ* ແລະການລະແວງສົງໄສກັນ. 5 ຄົນທີ່ຄິດຊົ່ວແລະບໍ່ຍອມເຂົ້າໃຈຄວາມຈິງມັກຖຽງກັນເລື່ອງທີ່ບໍ່ສຳຄັນປານໃດ.+ ພວກນີ້ສວຍປະໂຫຍດຈາກຄົນທີ່ເຊື່ອຟັງພະເຈົ້າສຸດຫົວໃຈ.+ 6 ທີ່ຈິງ ພວກເຮົາຈະໄດ້ປະໂຫຍດຫຼາຍ ຖ້າພວກເຮົາເຊື່ອຟັງພະເຈົ້າສຸດຫົວໃຈ+ແລະພໍໃຈໃນສິ່ງທີ່ມີຢູ່.* 7 ຕອນເກີດມາໃນໂລກ ພວກເຮົາບໍ່ໄດ້ເອົາຫຍັງມານຳ ແລະຕອນຈາກໂລກນີ້ໄປ ພວກເຮົາກໍເອົາຫຍັງໄປບໍ່ໄດ້ຄືກັນ.+ 8 ດັ່ງນັ້ນ ເມື່ອພວກເຮົາມີຂອງກິນແລະມີເຄື່ອງນຸ່ງໃສ່* ພວກເຮົາກໍຄວນຈະພໍໃຈໃນສິ່ງທີ່ມີຢູ່.+
9 ຄົນທີ່ຢາກຮັ່ງຢາກມີກໍຍອມແພ້ຕໍ່ການລໍ້ໃຈແລະຕິດກັບດັກ.+ ລາວມີຄວາມຕ້ອງການຫຼາຍຢ່າງທີ່ໂງ່ແລະອັນຕະລາຍ ເຊິ່ງເຮັດໃຫ້ລາວຕ້ອງເຈິກັບຄວາມຈິບຫາຍ.+ 10 ການຮັກເງິນເປັນຮາກເຫງົ້າຂອງຄວາມຊົ່ວທຸກແບບ. ການຢາກຮັ່ງຢາກມີແບບນີ້*ໄດ້ເຮັດໃຫ້ບາງຄົນຖິ້ມຄວາມເຊື່ອ ແລະລາວເອງຕ້ອງເຈັບປວດໃຈ*ຫຼາຍຢ່າງ.+
11 ສ່ວນເຈົ້າທີ່ເປັນຄົນຂອງພະເຈົ້າ ເຈົ້າຕ້ອງໜີໄປໄກໆຈາກສິ່ງເຫຼົ່ານີ້ ແລະພະຍາຍາມເຮັດສິ່ງທີ່ຖືກຕ້ອງ. ໃຫ້ເຊື່ອຟັງພະເຈົ້າສຸດຫົວໃຈ ແລະສະແດງຄວາມເຊື່ອ ຄວາມຮັກ ຄວາມອົດທົນ ແລະຄວາມອ່ອນໂຍນ.+ 12 ໃຫ້ເຈົ້າຕໍ່ສູ້ໃນການສູ້ຮົບທີ່ມີກຽດເພື່ອປົກປ້ອງຄວາມເຊື່ອ. ໃຫ້ຍຶດໝັ້ນກັບຄວາມຫວັງເລື່ອງຊີວິດຕະຫຼອດໄປ. ພະເຈົ້າເລືອກເຈົ້າໃຫ້ໄດ້ຊີວິດຕະຫຼອດໄປ ແລະເຈົ້າໄດ້ປະກາດເລື່ອງນີ້ຕໍ່ໜ້າພະຍານຫຼາຍຄົນ.
13 ຕໍ່ໜ້າພະເຈົ້າຜູ້ທີ່ເຮັດໃຫ້ສິ່ງທີ່ມີຊີວິດທຸກຢ່າງຢູ່ໄດ້ ແລະຕໍ່ໜ້າພະຄລິດເຢຊູຜູ້ທີ່ປະກາດຄວາມເຊື່ອຂອງເພິ່ນກັບປົນຕີໂອປີລາດ+ ຂ້ອຍຂໍສັ່ງເຈົ້າ 14 ໃຫ້ເຮັດຕາມຄຳສັ່ງຂອງຂ້ອຍຢ່າງເຄັ່ງຄັດແລະບໍ່ໃຫ້ຂາດຕົກບົກພ່ອງຈົນກວ່າພະເຢຊູຄລິດຜູ້ເປັນນາຍຂອງພວກເຮົາຈະມາສະແດງລິດເດດຂອງເພິ່ນ.+ 15 ເມື່ອຮອດເວລານັ້ນ ເພິ່ນຜູ້ມີຄວາມສຸກແລະເປັນຜູ້ດຽວທີ່ມີອຳນາດຍິ່ງໃຫຍ່ຈະເປີດເຜີຍໂຕເອງ. ເພິ່ນເປັນກະສັດເໜືອທຸກຄົນທີ່ປົກຄອງເປັນກະສັດແລະເປັນເຈົ້ານາຍເໜືອເຈົ້ານາຍທຸກຄົນ.+ 16 ເພິ່ນຜູ້ດຽວບໍ່ມີວັນຕາຍ+ ຢູ່ໃນຄວາມສະຫວ່າງທີ່ບໍ່ມີໃຜເຂົ້າໄປຮອດໄດ້+ ແລະເປັນຜູ້ທີ່ບໍ່ມີມະນຸດຄົນໃດໄດ້ເຫັນຫຼືເບິ່ງເຫັນໄດ້.+ ຂໍໃຫ້ເພິ່ນໄດ້ຮັບກຽດແລະລິດເດດຕະຫຼອດໄປ. ອາແມນ.*
17 ໃຫ້ເຈົ້າແນະນຳ*ຄົນຮັ່ງໃນໂລກນີ້*ວ່າຢ່າໃຫ້ເປັນຄົນຖືໂຕ ແລະຢ່າຝາກຄວາມຫວັງໄວ້ກັບຊັບສົມບັດທີ່ບໍ່ໝັ້ນຄົງ+ ແຕ່ໃຫ້ຝາກຄວາມຫວັງໄວ້ກັບພະເຈົ້າຜູ້ທີ່ໃຫ້ພວກເຮົາມີທຸກສິ່ງທີ່ເຮັດໃຫ້ພວກເຮົາມີຄວາມສຸກ.+ 18 ບອກເຂົາເຈົ້າໃຫ້ເຮັດດີຫຼາຍໆເພື່ອຈະຮັ່ງດ້ວຍຄວາມດີ. ໃຫ້ເຂົາເຈົ້າເປັນຄົນໃຈກວ້າງແລະຮູ້ຈັກແບ່ງປັນ.+ 19 ເມື່ອເຮັດແບບນີ້ກໍສ່ຳກັບວ່າເຂົາເຈົ້າສະສົມຊັບສົມບັດທີ່ໝັ້ນຄົງເຊິ່ງເປັນການວາງຮາກຖານທີ່ດີໄວ້ສຳລັບອະນາຄົດ+ ເພື່ອເຂົາເຈົ້າຈະໄດ້ຍຶດໝັ້ນກັບຄວາມຫວັງເລື່ອງຊີວິດແທ້ໄວ້.+
20 ຕີໂມທຽວລູກຮັກ ຂໍໃຫ້ຮັກສາສິ່ງທີ່ຝາກໄວ້ກັບເຈົ້າໃຫ້ດີໆ.+ ຢ່າສົນໃຈຄຳເວົ້າທີ່ບໍ່ເປັນປະໂຫຍດເຊິ່ງໝິ່ນປະໝາດພະເຈົ້າແລະສິ່ງທີ່ຄົນເອີ້ນກັນຜິດໆວ່າ “ຄວາມຮູ້” ເຊິ່ງຂັດແຍ່ງກັບຄວາມຈິງ.+ 21 ບາງຄົນອວດຄວາມຮູ້ແບບນີ້ແລ້ວເຮັດໃຫ້ເຂົາເຈົ້າຫຼົງໄປຈາກຄວາມເຊື່ອ.
ຂໍໃຫ້ເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ຈາກພະເຈົ້າ.