ພະບັນຍັດ
31 ຈາກນັ້ນ ໂມເຊກໍເວົ້າກັບພວກອິດສະຣາເອນວ່າ: 2 “ຕອນນີ້ ຂ້ອຍອາຍຸ 120 ປີແລ້ວ.+ ຕໍ່ໄປ ຂ້ອຍຊິບໍ່ໄດ້ນຳໜ້າພວກເຈົ້າອີກແລ້ວ ເພາະພະເຢໂຫວາບອກຂ້ອຍວ່າ ‘ເຈົ້າຊິບໍ່ໄດ້ຂ້າມແມ່ນ້ຳຈໍແດນໄປ.’+ 3 ພະເຢໂຫວາພະເຈົ້າຂອງພວກເຈົ້າຈະເປັນຜູ້ນຳໜ້າພວກເຈົ້າ. ເພິ່ນຈະທຳລາຍຊາດຕ່າງໆ ແລະຊ່ວຍພວກເຈົ້າໃຫ້ຂັບໄລ່ພວກເຂົາອອກໄປຈາກແຜ່ນດິນທີ່ພວກເຈົ້າຈະເຂົ້າໄປຍຶດເອົາ.+ ຄືກັບທີ່ພະເຢໂຫວາບອກໄວ້ ໂຢຊວຍຈະເປັນຜູ້ນຳພາພວກເຈົ້າຂ້າມແມ່ນ້ຳໄປ.+ 4 ພະເຢໂຫວາຈະທຳລາຍຊາດຕ່າງໆນັ້ນຄືກັບທີ່ເພິ່ນທຳລາຍສີໂຮນ+ແລະໂອກ+ກະສັດຂອງຄົນອາໂມ ພ້ອມກັບແຜ່ນດິນຂອງພວກເຂົາ.+ 5 ພະເຢໂຫວາຈະຊ່ວຍພວກເຈົ້າໃຫ້ເອົາຊະນະພວກເຂົາ ແລະພວກເຈົ້າຕ້ອງກຳຈັດພວກເຂົາຕາມທີ່ຂ້ອຍສັ່ງພວກເຈົ້າ.+ 6 ໃຫ້ກ້າຫານແລະເຂັ້ມແຂງ.+ ຢ່າຊູ່ຢ້ານພວກເຂົາ+ ເພາະພະເຢໂຫວາພະເຈົ້າຂອງພວກເຈົ້າເປັນຜູ້ນຳໜ້າພວກເຈົ້າໄປ. ເພິ່ນຈະບໍ່ປະບໍ່ຖິ້ມພວກເຈົ້າ.”+
7 ຈາກນັ້ນ ໂມເຊກໍເອີ້ນໂຢຊວຍມາ ແລະເວົ້າກັບລາວຕໍ່ໜ້າພວກອິດສະຣາເອນວ່າ: “ໃຫ້ກ້າຫານແລະເຂັ້ມແຂງ+ ເພາະເຈົ້າຈະເປັນຜູ້ທີ່ພາປະຊາຊົນເຂົ້າໄປໃນແຜ່ນດິນທີ່ພະເຢໂຫວາສັນຍາວ່າຈະເອົາໃຫ້ປູ່ຍ່າຕານາຍຂອງເຂົາເຈົ້າ ແລະເຈົ້າຈະເອົາແຜ່ນດິນນັ້ນໃຫ້ເປັນມໍລະດົກຂອງເຂົາເຈົ້າ.+ 8 ພະເຢໂຫວາຈະນຳໜ້າເຈົ້າໄປ ແລະເພິ່ນຈະຢູ່ນຳເຈົ້າສະເໝີ.+ ເພິ່ນຈະບໍ່ປະບໍ່ຖິ້ມເຈົ້າ. ຢ່າຊູ່ຢ້ານ.”+
9 ຈາກນັ້ນ ໂມເຊໄດ້ຂຽນກົດໝາຍນີ້+ ແລະໄດ້ເອົາໃຫ້ປະໂລຫິດຄົນເລວີທີ່ຫາມຫີບສັນຍາຂອງພະເຢໂຫວາກັບພວກຜູ້ນຳຂອງອິດສະຣາເອນທຸກຄົນ. 10 ໂມເຊສັ່ງເຂົາເຈົ້າວ່າ: “ທຸກໆ 7 ປີທີ່ກົງກັບປີທີ່ຕ້ອງຍົກໜີ້+ຕອນທີ່ມີເທດສະການປຸກຕູບ*+ 11 ເມື່ອພວກອິດສະຣາເອນທຸກຄົນໄດ້ມາຢູ່ຕໍ່ໜ້າພະເຢໂຫວາ+ພະເຈົ້າຂອງພວກເຈົ້າໃນບ່ອນທີ່ເພິ່ນໄດ້ເລືອກໄວ້ ພວກເຈົ້າຕ້ອງອ່ານກົດໝາຍນີ້ໃຫ້ເຂົາເຈົ້າຟັງ.+ 12 ໃຫ້ປະຊາຊົນມາລວມໂຕກັນ+ ທັງຜູ້ຊາຍ ຜູ້ຍິງ ເດັກນ້ອຍ ແລະຄົນຕ່າງຊາດທີ່ອາໄສຢູ່ໃນເມືອງຂອງເຈົ້າ ເພື່ອເຂົາເຈົ້າຈະໄດ້ຟັງແລະຮຽນຮູ້ທີ່ຈະຢ້ານຢຳພະເຢໂຫວາພະເຈົ້າຂອງພວກເຈົ້າ ແລະເຮັດຕາມກົດໝາຍທັງໝົດນີ້ຢ່າງເຄັ່ງຄັດ. 13 ລູກຫຼານຂອງເຂົາເຈົ້າທີ່ຍັງບໍ່ຮູ້ຈັກກົດໝາຍນີ້ກໍຈະໄດ້ຟັງ+ ແລະຮຽນຮູ້ທີ່ຈະຢ້ານຢຳພະເຢໂຫວາພະເຈົ້າຂອງພວກເຈົ້າຕະຫຼອດເວລາທີ່ຢູ່ໃນແຜ່ນດິນທີ່ພວກເຈົ້າຈະຂ້າມແມ່ນ້ຳຈໍແດນໄປຍຶດເອົານັ້ນ.”+
14 ພະເຢໂຫວາບອກໂມເຊວ່າ: “ອີກບໍ່ດົນເຈົ້າກໍຈະຕາຍ.+ ໃຫ້ເຈົ້າເອີ້ນໂຢຊວຍມາ ແລະພາລາວໄປທີ່ເຕັ້ນຂໍການຊີ້ນຳເພື່ອເຮົາຈະໄດ້ແຕ່ງຕັ້ງລາວ.”+ ແລ້ວໂມເຊກັບໂຢຊວຍກໍໄປທີ່ເຕັ້ນຂໍການຊີ້ນຳ. 15 ຈາກນັ້ນ ພະເຢໂຫວາກໍມາຢູ່ໃນເສົາຂີ້ເຝື້ອທີ່ຢູ່ຕໍ່ໜ້າທາງເຂົ້າເຕັ້ນຂໍການຊີ້ນຳ.+
16 ພະເຢໂຫວາເວົ້າກັບໂມເຊວ່າ: “ອີກບໍ່ດົນເຈົ້າກໍຈະຕາຍ ແລະພວກນີ້ກໍຈະບໍ່ສັດຊື່ຕໍ່ເຮົາ. ເຂົາເຈົ້າຈະນະມັດສະການພະເຈົ້າຂອງຊາດຕ່າງໆໃນແຜ່ນດິນທີ່ເຂົາເຈົ້າຈະເຂົ້າໄປຢູ່.+ ເຂົາເຈົ້າຈະຖິ້ມເຮົາ+ ແລະບໍ່ເຮັດຕາມຄຳສັນຍາທີ່ເຮົາໄດ້ເຮັດກັບເຂົາເຈົ້າ.+ 17 ຕອນນັ້ນ ເຮົາຈະໃຈຮ້າຍໃຫ້ເຂົາເຈົ້າຫຼາຍ+ ແລະເຮົາຈະຖິ້ມເຂົາເຈົ້າ.+ ເຮົາຈະປິ່ນໜ້າໜີຈາກເຂົາເຈົ້າ+ຈົນກວ່າເຂົາເຈົ້າຈະຖືກທຳລາຍຈົນໝົດ. ຫຼັງຈາກທີ່ເຈິກັບຄວາມຈິບຫາຍແລະຄວາມທຸກລຳບາກຫຼາຍຢ່າງ+ ເຂົາເຈົ້າກໍຈະເວົ້າວ່າ ‘ຍ້ອນພະເຈົ້າຂອງພວກເຮົາບໍ່ໄດ້ຢູ່ນຳພວກເຮົາແລ້ວບໍ ພວກເຮົາຈຶ່ງເຈິກັບຄວາມຈິບຫາຍແບບນີ້?’+ 18 ແຕ່ຕອນນັ້ນ ເຮົາກໍຈະປິ່ນໜ້າໜີຈາກເຂົາເຈົ້າ ຍ້ອນເຂົາເຈົ້າເຮັດສິ່ງທີ່ຊົ່ວໂດຍໄປນະມັດສະການພະເຈົ້າອື່ນໆ.+
19 ຕອນນີ້ ໃຫ້ເຈົ້າຂຽນເພງ+ ແລະສອນພວກອິດສະຣາເອນໃຫ້ຮ້ອງໄດ້ຈົນຈື່ຂຶ້ນໃຈ.+ ເພງນີ້ຈະເຕືອນເຂົາເຈົ້າວ່າຖ້າບໍ່ເຊື່ອຟັງພະເຈົ້າ ເຂົາເຈົ້າຈະເປັນແນວໃດ.+ 20 ເມື່ອເຮົາພາເຂົາເຈົ້າເຂົ້າໄປໃນແຜ່ນດິນທີ່ເຮົາໄດ້ສັນຍາກັບປູ່ຍ່າຕານາຍຂອງເຂົາເຈົ້າ+ ເຊິ່ງເປັນແຜ່ນດິນທີ່ມີນ້ຳນົມກັບນ້ຳເຜີ້ງຫຼາຍ+ ແລະເມື່ອເຂົາເຈົ້າໄດ້ກິນຈົນອີ່ມແລະຈະເລີນຮຸ່ງເຮືອງແລ້ວ+ ເຂົາເຈົ້າກໍຈະໄປຂາບໄຫວ້ແລະນະມັດສະການພະເຈົ້າອື່ນໆ ແລ້ວເຂົາເຈົ້າກໍຈະບໍ່ໄດ້ນັບຖືເຮົາ ແລະບໍ່ໄດ້ເຮັດຕາມຄຳສັນຍາທີ່ເຮັດກັບເຮົາ.+ 21 ເມື່ອເຂົາເຈົ້າເຈິຄວາມຈິບຫາຍແລະຄວາມທຸກລຳບາກຫຼາຍຢ່າງ+ ເພງນີ້ກໍຈະເຮັດໃຫ້ເຂົາເຈົ້າຄິດເຖິງຄຳເຕືອນຂອງເຮົາ (ລູກຫຼານຂອງເຂົາເຈົ້າບໍ່ຄວນລືມເພງນີ້.) ເພາະເຮົາຮູ້ຢູ່ແລ້ວວ່າເຂົາເຈົ້າຄິດແນວໃດ+ ກ່ອນທີ່ເຮົາຈະພາເຂົາເຈົ້າເຂົ້າໄປໃນແຜ່ນດິນທີ່ເຮົາໄດ້ສັນຍາຊ້ຳ.”
22 ໂມເຊຈຶ່ງຂຽນເພງນີ້ໃນມື້ນັ້ນ ແລະໄດ້ສອນພວກອິດສະຣາເອນໃຫ້ຮ້ອງເພງນີ້.
23 ຈາກນັ້ນ ພະເຈົ້າໄດ້ແຕ່ງຕັ້ງໂຢຊວຍ+ລູກຊາຍຂອງນູນ ແລ້ວເວົ້າວ່າ: “ໃຫ້ກ້າຫານແລະເຂັ້ມແຂງ+ ເພາະເຈົ້າຈະເປັນຜູ້ທີ່ຈະພາພວກອິດສະຣາເອນເຂົ້າໄປໃນແຜ່ນດິນທີ່ເຮົາໄດ້ສັນຍາວ່າຈະເອົາໃຫ້ເຂົາເຈົ້າ+ ແລະເຮົາຈະຢູ່ກັບເຈົ້າສະເໝີ.”
24 ເມື່ອໂມເຊຂຽນກົດໝາຍທັງໝົດໃສ່ໃນປຶ້ມແລ້ວໆ+ 25 ລາວກໍບອກພວກເລວີທີ່ຫາມຫີບສັນຍາຂອງພະເຢໂຫວາວ່າ: 26 “ໃຫ້ເອົາປຶ້ມກົດໝາຍນີ້+ໄປວາງໄວ້ຢູ່ທາງຂ້າງຫີບສັນຍາ+ຂອງພະເຢໂຫວາພະເຈົ້າຂອງພວກເຈົ້າ. ປຶ້ມນີ້ຈະເປັນຫຼັກຖານທີ່ພະເຈົ້າຈະໃຊ້ເພື່ອຕັດສິນພວກເຈົ້າ. 27 ຂ້ອຍຮູ້ດີວ່າພວກເຈົ້າເປັນຄົນມັກກະບົດ+ແລະຫົວແຂງ.+ ຂະໜາດວ່າຂ້ອຍມີຊີວິດຢູ່ ພວກເຈົ້າຍັງກະບົດຕໍ່ພະເຢໂຫວາຫຼາຍປານນີ້ ຄັນຂ້ອຍຕາຍໄປແລ້ວ ພວກເຈົ້າຄືຊິເຮັດຫຼາຍກວ່ານີ້ອີກ! 28 ໃຫ້ພວກຫົວໜ້າຕະກູນ ແລະຫົວໜ້າອື່ນໆທຸກຄົນມາຫາຂ້ອຍ ແລ້ວຂ້ອຍຈະບອກເຂົາເຈົ້າ ແລະຂ້ອຍຈະໃຫ້ຟ້າກັບດິນເປັນພະຍານນຳ.+ 29 ເພາະຂ້ອຍຮູ້ດີວ່າຫຼັງຈາກທີ່ຂ້ອຍຕາຍໄປແລ້ວ ພວກເຈົ້າຈະເຮັດສິ່ງທີ່ຊົ່ວແທ້ໆ+ ແລະພວກເຈົ້າຈະບໍ່ເຮັດຕາມທີ່ຂ້ອຍສັ່ງໄວ້. ໃນທີ່ສຸດ ພວກເຈົ້າຈະເຈິຄວາມທຸກລຳບາກຫຼາຍຢ່າງ+ ຍ້ອນພວກເຈົ້າໄດ້ເຮັດສິ່ງທີ່ພະເຢໂຫວາເຫັນວ່າຊົ່ວ ແລະເຮັດສິ່ງທີ່ເຮັດໃຫ້ເພິ່ນໃຈຮ້າຍ.”
30 ແລ້ວໂມເຊກໍເວົ້າເນື້ອເພງນີ້ໃຫ້ພວກອິດສະຣາເອນຟັງຕັ້ງແຕ່ຕົ້ນຈົນຈົບ.+