ພະບັນຍັດ
4 “ພວກອິດສະຣາເອນ ຂໍໃຫ້ຟັງຂໍ້ກຳນົດແລະກົດໝາຍທີ່ຂ້ອຍສອນໃຫ້ພວກເຈົ້າເຮັດຕາມ ເພື່ອພວກເຈົ້າຈະບໍ່ຕາຍ+ ແລະສາມາດເຂົ້າໄປຍຶດເອົາແຜ່ນດິນທີ່ພະເຢໂຫວາພະເຈົ້າຂອງປູ່ຍ່າຕານາຍຂອງພວກເຈົ້າຈະເອົາໃຫ້. 2 ຫ້າມຕັດຫຼືຕື່ມຄຳສັ່ງເຫຼົ່ານີ້.+ ໃຫ້ພວກເຈົ້າເຮັດຕາມກົດໝາຍຂອງພະເຢໂຫວາພະເຈົ້າຂອງພວກເຈົ້າທີ່ຂ້ອຍກຳລັງຈະບອກ.
3 ພວກເຈົ້າກໍເຫັນແລ້ວວ່າພະເຢໂຫວາໄດ້ເຮັດຫຍັງແດ່ກັບຄົນທີ່ນະມັດສະການພະບາອານທີ່ຢູ່ເປໂອ. ພະເຢໂຫວາພະເຈົ້າຂອງພວກເຈົ້າໄດ້ທຳລາຍພວກເຂົາທຸກຄົນ.+ 4 ແຕ່ພວກເຈົ້າທີ່ຢູ່ຝ່າຍພະເຢໂຫວາພະເຈົ້າຂອງພວກເຈົ້າຍັງມີຊີວິດຢູ່ຈົນຮອດທຸກມື້ນີ້. 5 ຂ້ອຍສອນຂໍ້ກຳນົດກົດໝາຍ+ນີ້ໃຫ້ພວກເຈົ້າຕາມທີ່ພະເຢໂຫວາພະເຈົ້າຂອງຂ້ອຍໄດ້ສັ່ງຂ້ອຍ ເພື່ອພວກເຈົ້າຊິໄດ້ເຮັດຕາມຕອນທີ່ເຂົ້າໄປຢູ່ໃນແຜ່ນດິນທີ່ເພິ່ນສັນຍາ. 6 ໃຫ້ພວກເຈົ້າເຮັດຕາມຢ່າງເຄັ່ງຄັດ+ ເພື່ອຄົນຊາດອື່ນໆທີ່ໄດ້ຍິນຂໍ້ກຳນົດກົດໝາຍຂອງພວກເຈົ້າຊິຮູ້ວ່າ ພວກເຈົ້າມີສະຕິປັນຍາ+ແລະມີຄວາມເຂົ້າໃຈ+ ແລະພວກເຂົາຊິເວົ້າວ່າ ‘ຊາດນີ້ຈັ່ງແມ່ນສະຫຼາດແລະມີຄວາມເຂົ້າໃຈອີ່ຫຼີ.’+ 7 ພະເຢໂຫວາພະເຈົ້າຢູ່ໃກ້ພວກເຮົາທຸກເທື່ອຕອນທີ່ພວກເຮົາຮ້ອງຫາເພິ່ນ.+ ມີຊາດໃດບໍທີ່ມີພະເຈົ້າແບບນີ້? 8 ມື້ນີ້ຂ້ອຍຊິສອນຂໍ້ກຳນົດກົດໝາຍທີ່ຖືກຕ້ອງສົມບູນໃຫ້ພວກເຈົ້າ.+ ມີຊາດໃດບໍທີ່ມີກົດໝາຍທີ່ດີແບບນີ້?
9 ໃຫ້ລະວັງແລະເອົາໃຈໃສ່ດີໆ ເພື່ອພວກເຈົ້າຊິບໍ່ລືມໃນສິ່ງທີ່ພວກເຈົ້າໄດ້ເຫັນ ແລະເພື່ອໃຫ້ສິ່ງເຫຼົ່ານັ້ນຢູ່ໃນໃຈຂອງພວກເຈົ້າໄປຕະຫຼອດຊີວິດ. ພວກເຈົ້າຕ້ອງເລົ່າສິ່ງເຫຼົ່ານັ້ນໃຫ້ລູກຫຼານຂອງພວກເຈົ້າຟັງ.+ 10 ຕອນທີ່ພວກເຈົ້າຢືນຢູ່ຕໍ່ໜ້າພະເຢໂຫວາພະເຈົ້າຂອງພວກເຈົ້າຢູ່ໂຮເຣັບ ພະເຢໂຫວາສັ່ງຂ້ອຍວ່າ ‘ໃຫ້ເອີ້ນປະຊາຊົນມາຟັງສິ່ງທີ່ເຮົາຊິບອກ+ ເພື່ອເຂົາເຈົ້າຊິຢ້ານຢຳເຮົາ+ຕະຫຼອດຊີວິດຂອງເຂົາເຈົ້າ ແລະເພື່ອເຂົາເຈົ້າຊິໄດ້ສອນລູກສອນຫຼານ.’+
11 ແລ້ວພວກເຈົ້າກໍພາກັນມາຢືນຢູ່ໃກ້ໆຕີນພູ. ຢູ່ພູນັ້ນມີໄຟລຸກຂຶ້ນໄປເທິງຟ້າ ມີຄວາມມືດຄຶ້ມ ແລະມີຂີ້ເຝື້ອຕຶບໜາ.+ 12 ພະເຢໂຫວາເລີ່ມເວົ້າກັບພວກເຈົ້າຈາກໄຟນັ້ນ.+ ພວກເຈົ້າໄດ້ຍິນສຽງເພິ່ນເວົ້າ+ ແຕ່ບໍ່ເຫັນເພິ່ນ.+ 13 ເພິ່ນໄດ້ເຮັດສັນຍາກັບພວກເຈົ້າ+ແລະສັ່ງພວກເຈົ້າໃຫ້ເຮັດຕາມຂໍ້ກຳນົດກົດໝາຍຂອງເພິ່ນ ເຊິ່ງກໍຄືກົດໝາຍ 10 ຂໍ້*+ທີ່ຕໍ່ມາເພິ່ນໄດ້ຂຽນໄວ້ໃນແຜ່ນຫີນ 2 ແຜ່ນ.+ 14 ພະເຢໂຫວາໄດ້ສັ່ງຂ້ອຍໃຫ້ສອນຂໍ້ກຳນົດກົດໝາຍໃຫ້ພວກເຈົ້າ ເຊິ່ງເປັນກົດໝາຍທີ່ພວກເຈົ້າຕ້ອງເຮັດຕາມຕອນທີ່ເຂົ້າໄປຢູ່ໃນແຜ່ນດິນທີ່ເພິ່ນຊິເອົາໃຫ້.
15 ຍ້ອນວ່າໃນມື້ທີ່ພະເຢໂຫວາໄດ້ເວົ້າກັບພວກເຈົ້າຈາກໄຟທີ່ຢູ່ໂຮເຣັບ ພວກເຈົ້າແນມບໍ່ເຫັນເພິ່ນ. ດັ່ງນັ້ນ ພວກເຈົ້າຕ້ອງລະວັງ. 16 ຢ່າເຮັດໃຫ້ໂຕເອງຖືກທຳລາຍໂດຍເຮັດຮູບຫຍັງກໍຕາມເພື່ອນະມັດສະການ ບໍ່ວ່າຈະເປັນຮູບຜູ້ຊາຍຫຼືຮູບຜູ້ຍິງ+ 17 ຮູບສັດທີ່ຢູ່ເທິງດິນຫຼືຮູບນົກທີ່ຢູ່ເທິງຟ້າ+ 18 ຮູບສັດເລືອຄານຫຼືຮູບປາທີ່ຢູ່ໃນນ້ຳ.+ 19 ເມື່ອພວກເຈົ້າເງີຍໜ້າຂຶ້ນເບິ່ງຟ້າແລະເຫັນຕາເວັນ ເດືອນ ແລະດາວຕ່າງໆເຊິ່ງເປັນສິ່ງທີ່ຢູ່ເທິງຟ້າ ຢ່າຫຼົງໄປຂາບໄຫວ້ຫຼືນະມັດສະການສິ່ງເຫຼົ່ານັ້ນ.+ ພະເຢໂຫວາພະເຈົ້າຂອງພວກເຈົ້າໃຫ້ສິ່ງເຫຼົ່ານັ້ນກັບທຸກຄົນໃນໂລກ. 20 ແຕ່ພວກເຈົ້າເປັນຄົນທີ່ພະເຢໂຫວາພາອອກມາຈາກເອຢິບ ເຊິ່ງເປັນບ່ອນທີ່ເຮັດໃຫ້ພວກເຈົ້າທຸກລຳບາກຫຼາຍຄືກັບຢູ່ໃນເຕົາຫຼອມເຫຼັກ ເພື່ອພວກເຈົ້າຊິໄດ້ເປັນຊັບສົມບັດຂອງເພິ່ນ*+ ຄືກັບທີ່ເປັນຢູ່ຕອນນີ້.
21 ພະເຢໂຫວາໃຈຮ້າຍໃຫ້ຂ້ອຍຍ້ອນພວກເຈົ້າ+ ແລະເພິ່ນສາບານວ່າຂ້ອຍຊິບໍ່ໄດ້ຂ້າມແມ່ນ້ຳຈໍແດນເຂົ້າໄປໃນແຜ່ນດິນດີໆທີ່ພະເຢໂຫວາພະເຈົ້າຊິເອົາໃຫ້ພວກເຈົ້າເປັນມໍລະດົກ.+ 22 ຂ້ອຍຊິຕາຍໃນແຜ່ນດິນນີ້ແລະບໍ່ໄດ້ຂ້າມແມ່ນ້ຳຈໍແດນໄປ+ ແຕ່ພວກເຈົ້າຊິໄດ້ຂ້າມໄປແລະໄດ້ຢູ່ໃນແຜ່ນດິນທີ່ດີນັ້ນ. 23 ໃຫ້ພວກເຈົ້າລະວັງ. ຢ່າລືມຄຳສັນຍາທີ່ພະເຢໂຫວາພະເຈົ້າໄດ້ເຮັດກັບພວກເຈົ້າ.+ ຢ່າເຮັດຮູບຫຍັງກໍຕາມເພື່ອນະມັດສະການ ຍ້ອນພະເຢໂຫວາພະເຈົ້າຂອງພວກເຈົ້າຫ້າມບໍ່ໃຫ້ເຮັດແນວນັ້ນ.+ 24 ຍ້ອນພະເຢໂຫວາພະເຈົ້າຂອງພວກເຈົ້າເປັນຄືກັບໄຟທີ່ເຜົາຜານ.+ ເພິ່ນເປັນພະເຈົ້າທີ່ຮຽກຮ້ອງໃຫ້ນະມັດສະການເພິ່ນພຽງຜູ້ດຽວ.+
25 ຖ້າພວກເຈົ້າຢູ່ໃນແຜ່ນດິນນັ້ນດົນຫຼາຍປີຈົນມີລູກມີຫຼານ ແລ້ວພວກເຈົ້າກໍເຮັດໃຫ້ໂຕເອງຖືກທຳລາຍໂດຍເຮັດຮູບຫຍັງກໍຕາມເພື່ອນະມັດສະການ+ ແລະເຮັດໃຫ້ພະເຢໂຫວາພະເຈົ້າຂອງພວກເຈົ້າບໍ່ພໍໃຈໂດຍເຮັດສິ່ງຊົ່ວໃນສາຍຕາເພິ່ນ+ 26 ໃນມື້ນີ້ ຂ້ອຍຈະໃຫ້ຟ້າດິນເປັນພະຍານວ່າ ພວກເຈົ້າຈະຖືກທຳລາຍຢ່າງໄວໃນແຜ່ນດິນທີ່ພວກເຈົ້າຈະຂ້າມແມ່ນ້ຳຈໍແດນໄປຍຶດເອົານັ້ນ. ພວກເຈົ້າຈະຢູ່ໃນແຜ່ນດິນນັ້ນໄດ້ບໍ່ດົນ ແລະຈະຖືກທຳລາຍຢ່າງແນ່ນອນ.+ 27 ພະເຢໂຫວາຈະເຮັດໃຫ້ພວກເຈົ້າແຕກໜີໄປຢູ່ປະເທດອື່ນໆ+ ແລະຈະມີຄົນລອດບໍ່ເທົ່າໃດຄົນ+ໃນປະເທດຕ່າງໆທີ່ພະເຢໂຫວາໄລ່ພວກເຈົ້າໄປຢູ່ນັ້ນ. 28 ແລ້ວພວກເຈົ້າຈະຕ້ອງນະມັດສະການພະເຈົ້າອື່ນໆທີ່ຄົນເຮັດຈາກໄມ້ແລະຫີນ.+ ພະເຈົ້າເຫຼົ່ານັ້ນແນມເບິ່ງບໍ່ໄດ້ ຟັງບໍ່ໄດ້ ກິນດື່ມບໍ່ໄດ້ ແລະດົມກິ່ນກໍບໍ່ໄດ້.
29 ໃນບ່ອນນັ້ນ ຖ້າພວກເຈົ້າຊອກຫາພະເຢໂຫວາພະເຈົ້າຂອງພວກເຈົ້າສຸດຫົວໃຈແລະສຸດຊີວິດ+ ພວກເຈົ້າກໍຈະພົບເພິ່ນ.+ 30 ໃນອະນາຄົດທາງໜ້າ ຖ້າພວກເຈົ້າເຈິກັບຄວາມທຸກລຳບາກຫຼາຍແລະເຈິກັບສິ່ງທີ່ຂ້ອຍໄດ້ເວົ້າໄປແລ້ວ ໃຫ້ພວກເຈົ້າກັບມາຫາພະເຢໂຫວາພະເຈົ້າຂອງພວກເຈົ້າແລະເຊື່ອຟັງເພິ່ນ.+ 31 ພະເຢໂຫວາພະເຈົ້າຂອງພວກເຈົ້າເປັນພະເຈົ້າທີ່ມີຄວາມເມດຕາ.+ ເພິ່ນຈະບໍ່ປະຖິ້ມພວກເຈົ້າ ຫຼືທຳລາຍພວກເຈົ້າໃຫ້ໝົດໄປ ຫຼືລືມສັນຍາທີ່ເພິ່ນໄດ້ເຮັດກັບປູ່ຍ່າຕານາຍຂອງພວກເຈົ້າ.+
32 ຕອນນີ້ ຂໍໃຫ້ພວກເຈົ້າຄິດເຖິງສະໄໝກ່ອນທີ່ພວກເຈົ້າຊິເກີດ ຕັ້ງແຕ່ຕອນທີ່ພະເຈົ້າສ້າງຄົນຢູ່ເທິງໂລກ. ຕັ້ງແຕ່ສຸດຂອບໂລກເບື້ອງນີ້ໄປຈົນຮອດສຸດຂອບໂລກເບື້ອງນັ້ນ ພວກເຈົ້າເຄີຍໄດ້ເຫັນຫຼືເຄີຍໄດ້ຍິນສິ່ງທີ່ຍິ່ງໃຫຍ່ແບບນີ້ບໍ?+ 33 ເຄີຍມີຄົນໄດ້ຍິນສຽງພະເຈົ້າເວົ້າອອກມາຈາກໄຟ ແລ້ວຍັງມີຊີວິດຢູ່ຄືກັບພວກເຈົ້າບໍ?+ 34 ພະເຈົ້າໄດ້ເລືອກພວກເຈົ້າອອກມາຈາກຊາດຕ່າງໆໃຫ້ເປັນຄົນຂອງເພິ່ນ ແລ້ວພວກເຈົ້າກໍໄດ້ເຫັນກັບຕາວ່າ ຕອນທີ່ພະເຢໂຫວາພະເຈົ້າຊ່ວຍພວກເຈົ້າອອກຈາກເອຢິບ ເພິ່ນໄດ້ໃຊ້ການຕັດສິນລົງໂທດ ການອັດສະຈັນ+ ສົງຄາມ+ ລິດເດດທີ່ຍິ່ງໃຫຍ່*+ ແລະໄດ້ເຮັດສິ່ງທີ່ເປັນຕາຢ້ານຫຼາຍຢ່າງ.+ ເພິ່ນບໍ່ເຄີຍເຮັດແບບນີ້ເພື່ອຜູ້ໃດມາກ່ອນແມ່ນບໍ? 35 ເພິ່ນເຮັດສິ່ງເຫຼົ່ານັ້ນເພື່ອໃຫ້ພວກເຈົ້າຮູ້ວ່າ ພະເຢໂຫວາເປັນພະເຈົ້າທ່ຽງແທ້ອົງດຽວ+ ບໍ່ມີພະເຈົ້າອື່ນນອກຈາກເພິ່ນ.+ 36 ເພິ່ນໃຫ້ພວກເຈົ້າໄດ້ຍິນສຽງເພິ່ນຈາກຟ້າເພື່ອສອນພວກເຈົ້າໃຫ້ເຊື່ອຟັງເພິ່ນ. ເພິ່ນຍັງໃຫ້ພວກເຈົ້າເຫັນໄຟລຸກຂຶ້ນໄປເທິງຟ້າ ແລະໄດ້ຍິນສຽງເພິ່ນຈາກໄຟນັ້ນ.+
37 ເພິ່ນຮັກປູ່ຍ່າຕານາຍຂອງພວກເຈົ້າ ແລະເລືອກລູກຫຼານຂອງເຂົາເຈົ້າໃຫ້ເປັນຄົນຂອງເພິ່ນ.+ ເພິ່ນໃຊ້ລິດເດດທີ່ຍິ່ງໃຫຍ່ຂອງເພິ່ນຊ່ວຍພວກເຈົ້າອອກມາຈາກເອຢິບ. 38 ເພິ່ນໄດ້ຂັບໄລ່ຊາດຕ່າງໆທີ່ມີຄົນຫຼາຍກວ່າ ແລະມີກຳລັງຫຼາຍກວ່າອອກໄປຈາກແຜ່ນດິນທີ່ຈະໃຫ້ພວກເຈົ້າເປັນມໍລະດົກ ເພື່ອຈະໃຫ້ພວກເຈົ້າເຂົ້າໄປຢູ່ຄືກັບທີ່ເປັນຢູ່ຕອນນີ້.+ 39 ໃນມື້ນີ້ ໃຫ້ພວກເຈົ້າຮູ້ແລະຈື່ໄວ້ວ່າ ພະເຢໂຫວາເປັນພະເຈົ້າທ່ຽງແທ້ອົງດຽວຢູ່ໃນສະຫວັນແລະຢູ່ໃນໂລກ+ ບໍ່ມີພະເຈົ້າອື່ນ.+ 40 ພວກເຈົ້າຕ້ອງເຮັດຕາມຂໍ້ກຳນົດກົດໝາຍຂອງເພິ່ນຕາມທີ່ຂ້ອຍສັ່ງໃນມື້ນີ້ ເພື່ອພວກເຈົ້າກັບລູກຫຼານຂອງພວກເຈົ້າຈະຢູ່ດີມີແຮງ ແລະມີຊີວິດຍືນຍາວໃນແຜ່ນດິນທີ່ພະເຢໂຫວາພະເຈົ້າຂອງພວກເຈົ້າຈະເອົາໃຫ້ພວກເຈົ້າ.”+
41 ຕອນນັ້ນ ໂມເຊໄດ້ກັນເມືອງທາງທິດຕາເວັນອອກຂອງແມ່ນ້ຳຈໍແດນໄວ້ 3 ເມືອງ.+ 42 ຖ້າຜູ້ໃດເຮັດໃຫ້ຄົນອື່ນຕາຍໂດຍບໍ່ໄດ້ຕັ້ງໃຈແລະບໍ່ໄດ້ຊັງກັນມາກ່ອນ+ ຜູ້ນັ້ນຈະໜີໄປເມືອງໃດເມືອງໜຶ່ງໃນ 3 ເມືອງນີ້ໄດ້.+ 43 ສາມເມືອງນີ້ມີ: ເມືອງເບເຊ+ທີ່ຢູ່ພູພຽງໃນບ່ອນກັນດານເຊິ່ງເປັນຂອງຄົນຕະກູນຣູເບັນ ເມືອງຣາໂມດ+ທີ່ຢູ່ໃນກິລຽດເຊິ່ງເປັນຂອງຄົນຕະກູນຄາດ ແລະເມືອງໂກລານ+ໃນບາຊານເຊິ່ງເປັນຂອງຄົນຕະກູນມານາເຊ.+
44 ນີ້ແມ່ນກົດໝາຍ+ທີ່ໂມເຊສັ່ງພວກອິດສະຣາເອນ. 45 ສິ່ງເຫຼົ່ານີ້ເປັນຂໍ້ເຕືອນໃຈ ຂໍ້ກຳນົດ ແລະຄຳສັ່ງທີ່ໂມເຊໃຫ້ກັບພວກອິດສະຣາເອນຫຼັງຈາກອອກຈາກເອຢິບ.+ 46 ຕອນນັ້ນ ເຂົາເຈົ້າຢູ່ເຂດແມ່ນ້ຳຈໍແດນໃນຮ່ອມພູທີ່ຢູ່ກົງກັນຂ້າມກັບເບັດເປໂອ+ ເຊິ່ງເຄີຍເປັນແຜ່ນດິນຂອງສີໂຮນກະສັດຂອງຄົນອາໂມທີ່ຢູ່ເມືອງເຮັດຊະໂບນ.+ ໂມເຊກັບພວກອິດສະຣາເອນຕໍ່ສູ້ຊະນະລາວຫຼັງຈາກອອກມາຈາກເອຢິບ.+ 47 ເຂົາເຈົ້າຍຶດເອົາແຜ່ນດິນຂອງກະສັດສີໂຮນ ແລະແຜ່ນດິນຂອງກະສັດໂອກ+ທີ່ຢູ່ບາຊານ. ກະສັດທັງສອງອົງນີ້ຂອງຄົນອາໂມຢູ່ເຂດທາງທິດຕາເວັນອອກຂອງແມ່ນ້ຳຈໍແດນ. 48 ພວກອິດສະຣາເອນຍຶດແຜ່ນດິນຕັ້ງແຕ່ເມືອງອາໂຣເອ+ທີ່ຢູ່ແຄມຮ່ອມພູ*ອາໂນນ ໄປຈົນຮອດພູສີໂອນທີ່ມີອີກຊື່ໜຶ່ງວ່າເຮີໂມນ+ 49 ແລະເຂດອາຣາບາທັງໝົດທີ່ຢູ່ເຂດທາງທິດຕາເວັນອອກຂອງແມ່ນ້ຳຈໍແດນ ໄປຈົນຮອດທະເລຂອງເຂດອາຣາບາ*ທີ່ຢູ່ຕີນເນີນພູປິຊະກາ.+