ຂ່າວຄາວສະບັບທີສອງ
28 ອາຮາດ+ເປັນກະສັດຕອນອາຍຸ 20 ປີ ແລະລາວປົກຄອງຢູ່ເມືອງເຢຣູຊາເລັມ 16 ປີ. ລາວບໍ່ໄດ້ເຮັດສິ່ງທີ່ພະເຢໂຫວາເບິ່ງວ່າຖືກຕ້ອງ. ລາວບໍ່ໄດ້ເຮັດຄືກັບດາວິດທີ່ເປັນປູ່ຍ່າຕານາຍຂອງລາວ.+ 2 ແຕ່ລາວເຮັດຊົ່ວຄືກັບກະສັດອົງອື່ນໆຂອງອິດສະຣາເອນ.+ ລາວເຖິງຂັ້ນເອົາເຫຼັກມາເຮັດຮູບພະບາອານ.+ 3 ນອກຈາກນັ້ນ ອາຮາດຍັງເຜົາເຄື່ອງບູຊາຢູ່ຮ່ອມພູຮິນໂນມ*ແລະເອົາພວກລູກຂອງໂຕເອງໄປເຜົາເປັນເຄື່ອງບູຊາ.+ ລາວເຮັດສິ່ງທີ່ເປັນຕາຂີ້ດຽດຄືກັບຊາດຕ່າງໆ+ທີ່ພະເຢໂຫວາໄດ້ໄລ່ໜີໄປຈາກພວກອິດສະຣາເອນ. 4 ລາວຍັງໄດ້ເຜົາເຄື່ອງບູຊາຢູ່ບ່ອນນະມັດສະການຕ່າງໆ+ ຢູ່ຕາມໂນນພູ ແລະຢູ່ກ້ອງຕົ້ນໄມ້ໃຫຍ່ທຸກຕົ້ນ.+
5 ພະເຢໂຫວາຈຶ່ງຍອມໃຫ້ກະສັດຊີເຣຍ+ຊະນະອາຮາດ. ພວກຊີເຣຍຈັບພວກຢູດາບັກຫຼາຍໆໄປເປັນຊະເລີຍຢູ່ເມືອງດາມາເຊ.+ ບໍ່ແມ່ນແຕ່ເທົ່ານັ້ນ ເພິ່ນຍັງຍອມໃຫ້ກະສັດອິດສະຣາເອນຊະນະອາຮາດແລະຂ້າພວກຢູດາຕາຍຫຼາຍແທ້ຫຼາຍວ່າ. 6 ຕອນນັ້ນ ເປກາ+ລູກຊາຍຂອງເຣມາລີຢາຂ້າທະຫານຢູດາທີ່ກ້າຫານຕາຍ 120.000 ຄົນພາຍໃນມື້ດຽວ ຍ້ອນພວກຢູດາໄດ້ປະຖິ້ມພະເຢໂຫວາພະເຈົ້າຂອງປູ່ຍ່າຕານາຍຂອງເຂົາເຈົ້າ. + 7 ຊິກຣີທີ່ເປັນທະຫານຈາກຕະກູນເອຟຣາຢິມໄດ້ຂ້າມາອາເສຢາລູກຊາຍຂອງກະສັດ ອັດຊະຣິກາມທີ່ເບິ່ງແຍງວັງ ແລະເອນການາທີ່ເປັນຮອງກະສັດ. 8 ພວກອິດສະຣາເອນໄດ້ຈັບພວກຜູ້ຍິງແລະເດັກນ້ອຍຈາກຢູດາ 200.000 ຄົນໄປເປັນຊະເລີຍ ແລະຍຶດເອົາເຄື່ອງຂອງພວກຢູດາບັກຫຼາຍໆກັບໄປເມືອງຊາມາເຣຍ.+
9 ໂອເດັດຜູ້ພະຍາກອນຂອງພະເຢໂຫວາທີ່ຢູ່ເມືອງຊາມາເຣຍໄດ້ອອກໄປຫາພວກທະຫານອິດສະຣາເອນທີ່ກັບມາເມືອງຊາມາເຣຍ ແລະເວົ້າກັບເຂົາເຈົ້າວ່າ: “ພະເຢໂຫວາພະເຈົ້າຂອງປູ່ຍ່າຕານາຍຂອງພວກເຈົ້າໃຈຮ້າຍໃຫ້ພວກຢູດາຫຼາຍ ເພິ່ນຈຶ່ງຍອມໃຫ້ພວກເຈົ້າຊະນະພວກຢູດາ.+ ແຕ່ພວກເຈົ້າຂ້າເຂົາເຈົ້າຢ່າງໂຫດຫ້ຽມແລະເພິ່ນກໍເຫັນສິ່ງທີ່ເກີດຂຶ້ນ. 10 ຕອນນີ້ພວກເຈົ້າຢາກໃຫ້ຄົນຢູດາແລະຄົນໃນເມືອງເຢຣູຊາເລັມເປັນຄົນໃຊ້ຂອງພວກເຈົ້າ+ ແຕ່ທີ່ຈິງພວກເຈົ້າກໍເຮັດຜິດຕໍ່ພະເຢໂຫວາພະເຈົ້າຂອງພວກເຈົ້າຄືກັນ. 11 ໃຫ້ພວກເຈົ້າສົ່ງຊະເລີຍເຫຼົ່ານີ້ກັບເມືອ ຍ້ອນວ່າພະເຢໂຫວາກຳລັງໃຈຮ້າຍໃຫ້ພວກເຈົ້າຫຼາຍ.”
12 ຕອນນັ້ນ ຫົວໜ້າບາງຄົນໃນຕະກູນເອຟຣາຢິມ ພ້ອມກັບອາຊາຣີຢາລູກຊາຍຂອງເຢໂຮຮານັນ ເບເຣກີຢາລູກຊາຍຂອງເມຊິນເລໂມດ ເຢຮີຊະກີຢາລູກຊາຍຂອງຊາລຶມ ແລະອາມາສາລູກຊາຍຂອງຮັດໄລໄດ້ອອກໄປຫາພວກທະຫານທີ່ກັບມາຈາກການຕໍ່ສູ້. 13 ເຂົາເຈົ້າບອກພວກທະຫານວ່າ: “ຢ່າເອົາພວກຊະເລີຍມາປະເທດຂອງພວກເຮົາ ຖ້າເຮັດແບບນັ້ນພວກເຮົາຈະເຮັດຜິດຕໍ່ພະເຢໂຫວາ. ເພິ່ນໃຈຮ້າຍໃຫ້ພວກອິດສະຣາເອນຢູ່ແລ້ວ ຖ້າເອົາພວກຊະເລີຍມານີ້ ພວກເຮົາແຮ່ງຊິເຮັດຜິດຫຼາຍກວ່າເກົ່າອີກ.” 14 ພວກທະຫານຈຶ່ງເອົາຊະເລີຍກັບເຄື່ອງທີ່ຍຶດມາໄດ້+ສົ່ງໃຫ້ພວກເຈົ້ານາຍແລະຄົນອື່ນໆທີ່ມາລວມກັນຢູ່ຫັ້ນ. 15 ເຂົາເຈົ້າໄດ້ເລືອກບາງຄົນໃຫ້ຊ່ວຍພວກຊະເລີຍ. ຄົນເຫຼົ່ານີ້ເອົາເຄື່ອງນຸ່ງຈາກເຄື່ອງທີ່ຍຶດມາໄດ້ໃຫ້ຜູ້ທີ່ບໍ່ມີເຄື່ອງນຸ່ງໃສ່ ເອົາເກີບ ເອົາຂອງກິນກັບນ້ຳ ແລະເອົານ້ຳມັນສຳລັບໃຊ້ທາໂຕໃຫ້ພວກຊະເລີຍ. ເຂົາເຈົ້າພາພວກຊະເລີຍໄປສົ່ງຢູ່ເຢຣິໂກເມືອງແຫ່ງຕົ້ນປາມ. ສ່ວນຄົນທີ່ບໍ່ມີແຮງເຂົາເຈົ້າກໍໃຫ້ຂີ່ໂຕລາ. ຫຼັງຈາກສົ່ງພວກຊະເລີຍແລ້ວ ເຂົາເຈົ້າກໍກັບເມືອເມືອງຊາມາເຣຍ.
16 ຕອນນັ້ນ ກະສັດອາຮາດໄດ້ໄປຂໍໃຫ້ກະສັດອັດຊີເຣຍຊ່ວຍ.+ 17 ພວກເອໂດມໄດ້ມາໂຈມຕີພວກຢູດາອີກເທື່ອໜຶ່ງແລະຈັບພວກຢູດາໄປເປັນຊະເລີຍ. 18 ພວກຟີລິດສະຕີນ+ໄດ້ມາໂຈມຕີເມືອງຕ່າງໆໃນເຊເຟລາ+ແລະໃນເນເກັບຂອງຢູດາ. ເຂົາເຈົ້າໄດ້ຍຶດເອົາເມືອງເບັດເຊເມັດ+ ເມືອງອາຢາໂລນ+ ເມືອງເກເດໂຣດ ເມືອງໂສໂກກັບເມືອງນ້ອຍໆທີ່ຢູ່ອ້ອມແອ້ມເມືອງນັ້ນ ເມືອງຕິມນາ+ກັບເມືອງນ້ອຍໆທີ່ຢູ່ອ້ອມແອ້ມເມືອງນັ້ນ ແລະເມືອງກິມໂຊກັບເມືອງນ້ອຍໆທີ່ຢູ່ອ້ອມແອ້ມເມືອງນັ້ນ ແລ້ວພວກຟີລິດສະຕີນກໍຍ້າຍເຂົ້າໄປຢູ່ເມືອງເຫຼົ່ານັ້ນແທນ. 19 ຍ້ອນອາຮາດກະສັດຂອງອິດສະຣາເອນ*ພາພວກຢູດາບໍ່ສັດຊື່ຕໍ່ພະເຢໂຫວາແລະເຮັດຜິດຫຼາຍຢ່າງ ພະເຢໂຫວາຈຶ່ງລົງໂທດເຂົາເຈົ້າ.
20 ໃນທີ່ສຸດຕິກລັດປິເລເສ+ກະສັດຂອງອັດຊີເຣຍກໍມາຫາອາຮາດ ແຕ່ແທນທີ່ຈະມາຊ່ວຍ ລາວພັດເຮັດໃຫ້ອາຮາດເດືອດຮ້ອນຫຼາຍກວ່າເກົ່າ.+ 21 ອາຮາດໄດ້ເອົາເຄື່ອງທີ່ມີຄ່າທີ່ຢູ່ໃນວິຫານຂອງພະເຢໂຫວາ ຢູ່ວັງຂອງກະສັດ+ ແລະຢູ່ເຮືອນຂອງພວກເຈົ້ານາຍໄປເປັນຂອງຂວັນໃຫ້ກະສັດອັດຊີເຣຍ ແຕ່ການເຮັດແບບນັ້ນກໍບໍ່ໄດ້ຊ່ວຍອາຮາດເລີຍ. 22 ຕອນທີ່ອາຮາດເດືອດຮ້ອນ ລາວກໍແຮ່ງບໍ່ສັດຊື່ຕໍ່ພະເຢໂຫວາຫຼາຍກວ່າເກົ່າອີກ. 23 ລາວເລີ່ມເຜົາເຄື່ອງບູຊາໃຫ້ພະເຈົ້າຂອງພວກດາມາເຊ+ ເຖິງວ່າພວກນີ້ຫາກໍເອົາຊະນະລາວໄດ້.+ ລາວເວົ້າວ່າ: “ຍ້ອນພະເຈົ້າຂອງກະສັດຊີເຣຍຊ່ວຍພວກຊີເຣຍ ຄັນຂ້ອຍເຜົາເຄື່ອງບູຊາໃຫ້ພະເຈົ້າເຫຼົ່ານີ້ ພະເຈົ້າເຫຼົ່ານີ້ກໍຈະຊ່ວຍຂ້ອຍຄືກັນ.”+ ຍ້ອນອາຮາດກັບພວກປະຊາຊົນນະມັດສະການພະເຈົ້າເຫຼົ່ານີ້ ເຂົາເຈົ້າຈຶ່ງຈິບຫາຍ. 24 ອາຮາດໄດ້ເອົາເຄື່ອງໃຊ້ຕ່າງໆຢູ່ວິຫານຂອງພະເຈົ້າທ່ຽງແທ້ມາຕັດເປັນປ່ຽງນ້ອຍໆ+ ປິດປະຕູວິຫານຂອງພະເຢໂຫວາ+ ແລະເຮັດແທ່ນບູຊາໃຫ້ພະເຈົ້າອື່ນໆຢູ່ທຸກຈອກທຸກແຈໃນເມືອງເຢຣູຊາເລັມ. 25 ລາວຍັງເຮັດບ່ອນນະມັດສະການໃຫ້ພະເຈົ້າອື່ນໆຢູ່ທຸກເມືອງໃນຢູດາ.+ ລາວເຮັດໃຫ້ພະເຢໂຫວາພະເຈົ້າຂອງປູ່ຍ່າຕານາຍຂອງລາວໃຈຮ້າຍຫຼາຍ.
26 ເລື່ອງຕ່າງໆຂອງອາຮາດຕັ້ງແຕ່ຕົ້ນຈົນຈົບກໍຂຽນໄວ້ໃນປຶ້ມຂອງພວກກະສັດຢູດາແລະພວກກະສັດອິດສະຣາເອນ.+ 27 ເມື່ອອາຮາດຕາຍ ເຂົາເຈົ້າຝັງລາວໄວ້ຢູ່ເມືອງເຢຣູຊາເລັມ ແຕ່ບໍ່ແມ່ນໃນບ່ອນຝັງສົບຂອງພວກກະສັດອິດສະຣາເອນ.+ ເຮເຊກີຢາລູກຊາຍຂອງລາວກໍເປັນກະສັດແທນ.