ເອເຊກຽນ
37 ພະລັງ*ຂອງພະເຢໂຫວາມາຢູ່ນຳຂ້ອຍ. ພະເຢໂຫວາໃຊ້ພະລັງຂອງເພິ່ນພາຂ້ອຍໄປກາງທົ່ງພຽງ.+ ຂ້ອຍເຫັນຢູ່ຫັ້ນເຕັມແຕ່ກະດູກ. 2 ເພິ່ນໃຫ້ຂ້ອຍຍ່າງເລາະເບິ່ງກະດູກຢູ່ທົ່ງພຽງນັ້ນ. ຂ້ອຍເຫັນກະດູກເຫຼົ່ານັ້ນແຫ້ງແທ້ແຫ້ງວ່າ.+ 3 ເພິ່ນຖາມຂ້ອຍວ່າ: “ລູກມະນຸດ ກະດູກເຫຼົ່ານັ້ນຈະກັບຄືນມາມີຊີວິດອີກໄດ້ບໍ?” ຂ້ອຍຕອບວ່າ. “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດ ມີແຕ່ພະອົງຜູ້ດຽວທີ່ຮູ້.”+ 4 ເພິ່ນບອກຂ້ອຍວ່າ: “ໃຫ້ເຈົ້າພະຍາກອນແລະສັ່ງກະດູກວ່າ ‘ກະດູກທີ່ແຫ້ງໆເອີ້ຍ ໃຫ້ຟັງສິ່ງທີ່ພະເຢໂຫວາເວົ້າ.
5 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາຈະເອົາລົມຫາຍໃຈໃສ່ໃຫ້ພວກເຈົ້າ ແລ້ວພວກເຈົ້າຈະມີຊີວິດອີກ.+ 6 ເຮົາຈະເອົາເສັ້ນເອັນກັບຊີ້ນໃສ່ໃຫ້ພວກເຈົ້າແລະເອົາໜັງມາຫຸ້ມພວກເຈົ້າ. ເຮົາຈະເອົາລົມຫາຍໃຈໃສ່ໃຫ້ພວກເຈົ້າ ແລະພວກເຈົ້າຈະມີຊີວິດອີກ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.”’”
7 ຂ້ອຍຈຶ່ງພະຍາກອນຕາມທີ່ເພິ່ນສັ່ງ. ຕອນທີ່ພະຍາກອນຢູ່ນັ້ນ ຂ້ອຍໄດ້ຍິນສຽງກະດູກຕຳກັນດັງກ໋ອງໆ ແລະກະດູກແຕ່ລະອັນກໍມາຕໍ່ກັນ. 8 ແລ້ວຂ້ອຍກໍເຫັນເສັ້ນເອັນກັບຊີ້ນມາຕິດຢູ່ກັບກະດູກແລະມີໜັງມາຫຸ້ມໄວ້ ແຕ່ມັນຍັງບໍ່ມີລົມຫາຍໃຈ.
9 ຈາກນັ້ນ ເພິ່ນບອກຂ້ອຍວ່າ: “ລູກມະນຸດ ໃຫ້ເຈົ້າພະຍາກອນແລະສັ່ງລົມວ່າ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ລົມ*ເອີ້ຍ ໃຫ້ພັດມາຈາກທັງສີ່ທິດແລະພັດມາໃສ່ຄົນເຫຼົ່ານີ້ທີ່ຖືກຂ້າແລ້ວເພື່ອເຂົາເຈົ້າຈະມີຊີວິດອີກ.”’”
10 ຂ້ອຍຈຶ່ງພະຍາກອນຕາມທີ່ເພິ່ນສັ່ງ. ຄົນເຫຼົ່ານັ້ນກໍເລີ່ມຫາຍໃຈໄດ້ ເຂົາເຈົ້າຈຶ່ງມີຊີວິດແລະລຸກຂຶ້ນຢືນໄດ້.+ ເຂົາເຈົ້າມີບັກຫຼາຍໆເປັນກອງທັບໃຫຍ່.
11 ແລ້ວເພິ່ນເວົ້າກັບຂ້ອຍວ່າ: “ລູກມະນຸດ ກະດູກເຫຼົ່ານີ້ແມ່ນພວກອິດສະຣາເອນທັງໝົດ.+ ເຂົາເຈົ້າເວົ້າວ່າ ‘ກະດູກຂອງພວກເຮົາແຫ້ງແລ້ວ ແລະພວກເຮົາກໍບໍ່ມີຄວາມຫວັງຫຍັງເລີຍ.+ ພວກເຮົາຖືກທຳລາຍຈົນບໍ່ເຫຼືອຫຍັງ.’ 12 ໃຫ້ເຈົ້າພະຍາກອນແບບນີ້ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ປະຊາຊົນຂອງເຮົາເອີ້ຍ ເຮົາຈະເປີດບ່ອນຝັງສົບຂອງພວກເຈົ້າ+ແລະປຸກພວກເຈົ້າຂຶ້ນມາຈາກບ່ອນນັ້ນ. ແລ້ວເຮົາຈະພາພວກເຈົ້າໄປແຜ່ນດິນອິດສະຣາເອນ.+ 13 ປະຊາຊົນຂອງເຮົາ ເມື່ອເຮົາເປີດບ່ອນຝັງສົບຂອງພວກເຈົ້າແລະປຸກພວກເຈົ້າຂຶ້ນມາຈາກບ່ອນນັ້ນ ພວກເຈົ້າກໍຈະຮູ້ວ່າເຮົາແມ່ນເຢໂຫວາ.+ 14 ເຮົາຈະເອົາພະລັງຂອງເຮົາໃສ່ໃຫ້ພວກເຈົ້າ ແລ້ວພວກເຈົ້າຈະມີຊີວິດອີກເທື່ອໜຶ່ງ.+ ເຮົາຈະໃຫ້ພວກເຈົ້າໄດ້ຢູ່ໃນແຜ່ນດິນຂອງໂຕເອງ. ແລ້ວພວກເຈົ້າຈະຮູ້ວ່າເຮົາເຢໂຫວາໄດ້ເວົ້າໄວ້ແບບນີ້ ແລະເຮົາໄດ້ເຮັດຕາມທີ່ໄດ້ເວົ້າໄວ້ແລ້ວ.’ ພະເຢໂຫວາໄດ້ເວົ້າຈັ່ງຊີ້.”
15 ພະເຢໂຫວາເວົ້າກັບຂ້ອຍອີກວ່າ: 16 “ລູກມະນຸດ ໃຫ້ເຈົ້າເອົາໄມ້ອັນໜຶ່ງມາແລະຂຽນວ່າ ‘ສຳລັບຢູດາກັບພວກອິດສະຣາເອນທີ່ຢູ່ນຳລາວ.’+ ແລ້ວໃຫ້ເຈົ້າເອົາໄມ້ອີກອັນໜຶ່ງມາແລະຂຽນວ່າ ‘ໄມ້ຂອງເອຟຣາຢິມ ສຳລັບໂຢເຊັບແລະພວກອິດສະຣາເອນທຸກຄົນທີ່ຢູ່ນຳລາວ.’+ 17 ແລ້ວໃຫ້ເຈົ້າເອົາໄມ້ 2 ອັນນັ້ນມາກຳໄວ້ຄືກັບກຳໄມ້ອັນດຽວ.+ 18 ເມື່ອຄົນຊາດດຽວກັນກັບເຈົ້າຖາມວ່າ ‘ເຈົ້າຊິບໍ່ບອກພວກເຮົາບໍວ່າເລື່ອງນີ້ໝາຍຄວາມວ່າແນວໃດ?’ 19 ໃຫ້ບອກເຂົາເຈົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາຈະເອົາໄມ້ທີ່ຢູ່ໃນມືຂອງເອຟຣາຢິມເຊິ່ງແມ່ນໄມ້ຂອງໂຢເຊັບແລະຕະກູນຕ່າງໆຂອງອິດສະຣາເອນມາຢູ່ກັບໄມ້ຂອງຢູດາ.+ ເຮົາຈະກຳໄມ້ 2 ອັນນີ້ໄວ້ນຳກັນຄືກັບກຳໄມ້ອັນດຽວ.”’ 20 ໄມ້ 2 ອັນນີ້ທີ່ເຈົ້າຂຽນໃສ່ ເຈົ້າຕ້ອງກຳໄວ້ໃນມືເພື່ອໃຫ້ເຂົາເຈົ້າເຫັນ.
21 ຈາກນັ້ນ ໃຫ້ເຈົ້າບອກເຂົາເຈົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາຈະພາພວກອິດສະຣາເອນອອກມາຈາກຊາດຕ່າງໆທີ່ເຂົາເຈົ້າໄປຢູ່ນຳ ແລະເຮົາຈະລວບລວມເຂົາເຈົ້າຈາກທຸກບ່ອນ ແລ້ວພາເຂົາເຈົ້າໄປຢູ່ແຜ່ນດິນຂອງໂຕເອງ.+ 22 ເຮົາຈະໃຫ້ເຂົາເຈົ້າເປັນຊາດດຽວກັນໃນແຜ່ນດິນນັ້ນ+ ແລະເຂົາເຈົ້າຈະອາໄສຢູ່ຕາມພູຂອງອິດສະຣາເອນ. ເຂົາເຈົ້າຈະບໍ່ເປັນ 2 ຊາດ ແຕ່ຈະມີກະສັດອົງດຽວປົກຄອງເຂົາເຈົ້າ.+ ເຂົາເຈົ້າຈະບໍ່ຖືກແບ່ງແຍກເປັນ 2 ປະເທດອີກຕໍ່ໄປ.+ 23 ເຂົາເຈົ້າຈະບໍ່ເຮັດໃຫ້ໂຕເອງເປື້ອນໂດຍເຮັດສິ່ງທີ່ເປັນຕາຂີ້ດຽດ ເຮັດຜິດແນວອື່ນ ຫຼືນະມັດສະການຮູບບູຊາທີ່ເປັນຕາຂີ້ດຽດ*ອີກຕໍ່ໄປ.+ ເຮົາຈະຊ່ວຍເຂົາເຈົ້າໃຫ້ເຊົາເຮັດສິ່ງທີ່ບໍ່ສັດຊື່ແລະເຊົາເຮັດຜິດ. ເຮົາຈະເຮັດໃຫ້ເຂົາເຈົ້າສະອາດ.* ເຂົາເຈົ້າຈະເປັນປະຊາຊົນຂອງເຮົາ ແລະເຮົາຈະເປັນພະເຈົ້າຂອງເຂົາເຈົ້າ.+
24 ດາວິດ*ຜູ້ຮັບໃຊ້ຂອງເຮົາຈະເປັນກະສັດຂອງເຂົາເຈົ້າ+ ແລະເຂົາເຈົ້າຈະມີຜູ້ລ້ຽງຜູ້ດຽວ.+ ເຂົາເຈົ້າຈະເຮັດຕາມກົດໝາຍຂອງເຮົາແລະເຊື່ອຟັງຄຳສັ່ງຂອງເຮົາຢ່າງເຄັ່ງຄັດ.+ 25 ເຂົາເຈົ້າຈະອາໄສຢູ່ແຜ່ນດິນທີ່ເຮົາເອົາໃຫ້ຢາໂຄບຜູ້ຮັບໃຊ້ຂອງເຮົາ ເຊິ່ງເປັນບ່ອນທີ່ປູ່ຍ່າຕານາຍຂອງເຂົາເຈົ້າເຄີຍຢູ່.+ ເຂົາເຈົ້າກັບພວກລູກຫຼານ+ຈະຢູ່ຫັ້ນຕະຫຼອດໄປ+ ແລະດາວິດຜູ້ຮັບໃຊ້ຂອງເຮົາຈະເປັນຫົວໜ້າຂອງເຂົາເຈົ້າຕະຫຼອດໄປ.+
26 ເຮົາຈະເຮັດສັນຍາກັບເຂົາເຈົ້າເພື່ອໃຫ້ເຂົາເຈົ້າມີຄວາມສະຫງົບສຸກ.+ ສັນຍານັ້ນຈະຢູ່ຕະຫຼອດໄປ. ເຮົາຈະໃຫ້ເຂົາເຈົ້າມີບ່ອນຢູ່ແລະຈະເຮັດໃຫ້ເຂົາເຈົ້າມີຈຳນວນຫຼາຍຂຶ້ນ.+ ເຮົາຈະໃຫ້ວິຫານຂອງເຮົາຢູ່ກັບເຂົາເຈົ້າ*ຕະຫຼອດໄປ. 27 ເຮົາຈະຢູ່ກັບເຂົາເຈົ້າ ເຮົາຈະເປັນພະເຈົ້າຂອງເຂົາເຈົ້າ ແລະເຂົາເຈົ້າຈະເປັນປະຊາຊົນຂອງເຮົາ.+ 28 ເມື່ອວິຫານຂອງເຮົາຢູ່ກັບເຂົາເຈົ້າຕະຫຼອດໄປ ຊາດຕ່າງໆຈະຮູ້ວ່າເຮົາເຢໂຫວາເປັນຜູ້ແຍກຊາດອິດສະຣາເອນໄວ້ຕ່າງຫາກໃຫ້ເປັນຊາດທີ່ບໍລິສຸດ.”’”+