ຈົດໝາຍສະບັບທຳອິດເຖິງຄລິດສະຕຽນໃນເມືອງເທຊະໂລນິກ
1 ຂ້ອຍໂປໂລກັບຊີລາວານ*+ແລະຕີໂມທຽວ+ຂຽນຫາປະຊາຄົມຢູ່ເມືອງເທຊະໂລນິກເຊິ່ງເປັນອັນໜຶ່ງອັນດຽວກັບພະເຈົ້າຜູ້ເປັນພໍ່ແລະກັບພະເຢຊູຄລິດຜູ້ເປັນນາຍ.
ຂໍໃຫ້ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ແລະສັນຕິສຸກ.
2 ພວກເຮົາຂອບໃຈພະເຈົ້າສະເໝີເມື່ອເວົ້າເຖິງພວກເຈົ້າໃນຄຳອະທິດຖານ.+ 3 ພວກເຮົາຄິດເຖິງວຽກທີ່ພວກເຈົ້າເຮັດຢ່າງສັດຊື່ເພື່ອພະເຈົ້າຜູ້ເປັນພໍ່ຂອງພວກເຮົາ ລວມທັງວຽກໜັກທີ່ພວກເຈົ້າເຮັດດ້ວຍຄວາມຮັກ ແລະທີ່ພວກເຈົ້າອົດທົນຍ້ອນມີຄວາມຫວັງ+ໃນພະເຢຊູຄລິດຜູ້ເປັນນາຍຂອງພວກເຮົາ. 4 ພີ່ນ້ອງເອີ້ຍ ພວກເຮົາຮູ້ວ່າພະເຈົ້າຮັກພວກເຈົ້າແລະໄດ້ເລືອກພວກເຈົ້າແລ້ວ. 5 ຂ່າວດີທີ່ພວກເຮົາປະກາດນັ້ນບໍ່ໄດ້ມາເຖິງພວກເຈົ້າແຕ່ຄຳເວົ້າເທົ່ານັ້ນ ແຕ່ມາພ້ອມກັບລິດເດດແລະພະລັງບໍລິສຸດແລະພ້ອມກັບຄວາມໝັ້ນໃຈຢ່າງເຕັມທີ. ພວກເຈົ້າກໍຮູ້ວ່າພວກເຮົາເປັນຄົນແບບໃດຕອນທີ່ເຮັດວຽກເພື່ອພວກເຈົ້າ. 6 ພວກເຈົ້າຮຽນແບບພວກເຮົາ+ແລະຜູ້ເປັນນາຍ+ ຍ້ອນພວກເຈົ້າຍອມຮັບຄຳສອນຂອງພະເຈົ້າທັງໆທີ່ຕ້ອງອົດທົນກັບຄວາມທຸກລຳບາກຫຼາຍ+ ແຕ່ກໍມີຄວາມຍິນດີຈາກພະລັງບໍລິສຸດ. 7 ພວກເຈົ້າເປັນຕົວຢ່າງໃຫ້ພວກລູກສິດໃນແຂວງມາເກໂດເນຍກັບແຂວງອະຂາຢາ.
8 ພວກເຈົ້າເຮັດໃຫ້ຄຳສອນຂອງພະເຢໂຫວາ*ແພ່ໄປທົ່ວແຂວງມາເກໂດເນຍກັບແຂວງອະຂາຢາ. ບໍ່ແມ່ນແຕ່ເທົ່ານັ້ນ ຄົນຢູ່ທຸກບ່ອນຍັງໄດ້ຍິນເລື່ອງທີ່ພວກເຈົ້າເຊື່ອໃນພະເຈົ້ານຳ+ ພວກເຮົາຈຶ່ງບໍ່ຕ້ອງເວົ້າຫຍັງອີກ. 9 ຄົນພາກັນເວົ້າເຖິງເລື່ອງທີ່ພວກເຮົາມາຫາພວກເຈົ້າເທື່ອທຳອິດ ແລະເລື່ອງທີ່ພວກເຈົ້າຖິ້ມຮູບບູຊາແລ້ວມາເຊື່ອພະເຈົ້າ+ ເພື່ອຈະໄດ້ເປັນທາດຂອງພະເຈົ້າທ່ຽງແທ້ຜູ້ມີຊີວິດຢູ່. 10 ພວກເຈົ້າມາເຊື່ອພະເຈົ້າເພື່ອລໍຖ້າລູກຊາຍຂອງເພິ່ນທີ່ຈະມາຈາກສະຫວັນ.+ ເພິ່ນປຸກລູກຜູ້ນີ້ໃຫ້ຄືນມາຈາກຕາຍແລ້ວ ເຊິ່ງກໍແມ່ນພະເຢຊູຜູ້ທີ່ຊ່ວຍພວກເຮົາໃຫ້ພົ້ນຈາກການລົງໂທດຂອງພະເຈົ້າທີ່ກຳລັງຈະມາຮອດ.+